最近分享過的旅程 |
共找到 117 篇遊記, 正顯示第 1 至 10 篇遊記 |
2018年聖誕遊東京之第六天
12月28日(晴)
乘晚機返港唔洗同行嘅長輩急,可以施施然然。由於是次聖誕東瀛遊食唔到一餐滿意嘅壽司,直令姨媽耿耿於懷,結果朝早退咗酒店房後哥哥就帶路去地圖顯示為最近嘅連鎖壽司屋「梅丘寿司の美登利総本店」渋谷分店食個早午餐。飯後就坐酒店代訂嘅專車去成田機場,將行李寄艙後於貴賓室「ANA Lounge」度候機。團友們都極之滿意與「全日空航空公司」結下緣份,下次再去日本玩都話要encore!2018年聖誕遊東京之第五天
12月27日(晴)
東瀛遊接近尾聲,早上嘅購物活動安排咗喺午餐地點「てんぷら山の上 ギンザ」(Tempura Yamanoue Ginza)嘅銀座區進行。肥肥家族完全無懼增磅,早餐以柑橘啤酒送朱古力柑橘乾。中午品嚐過高質鮮美嘅天婦羅餐後,就去咗原宿血拼精品及手信,真係冇諗過四層高嘅「Kiddyland」竟然遠比鄰近嘅「Line Friends」旗艦店紛繁多姿及有趣得多!整個聖誕旅程最驚喜嘅一餐就係入黑後於「たでの葉」(Robatayaki Tadenoha)享用嘅野味宴,當真一試難忘!
2018年聖誕遊東京之聖誕節
12月25日(晴)
去親東京玩都會盡情咁食,因深知聖誕旺季訂座會難上加難,早於出發半年前已開始跟酒店聯繫有關訂座詳情,列出心儀嘅餐廳後就交由佢地代為編排行程。八人真夠幸運,可於聖誕節中午品嚐Doctor X最愛嘅星級鐵板料理「銀座うかい亭」(Ginza Ukai-Tei)。午餐後於銀座區內購物,靚靚媽咪同家姐們於「三宅一生」(Issey Miyake)不停地試身時,XO仔就去咗附近間「Sanrioworld GINZA」狂購玩具同精品。今次假期最失望都要數喺名酒店餐廳「銀座久兵衛 京王プラザホテル店」(Ginza Kyubey, Keio Plaza Hotel)食嘅聖誕壽司晚餐。每人消費: 約28688日圓 (午餐)
評分: 味道4 服務5 環境5 衛生5 抵食3
2018年聖誕遊東京之平安夜
12月24日(晴)
多次入住「東京凱悅酒店」(Hyatt Regency Tokyo)都會喺會所層食早餐,今次由於住客過多,會所層早就爆滿,八人就決定一嚐酒店餐廳「日本料理 佳香」嘅日式自助早餐,感覺都唔錯。團友雖然全部都係一家人,但口味始終不一,午餐就分成兩組,怕骨組約咗哥哥個靚女朋友一齊去「日本橋 紫苑」食翅翅,其餘嘅就跟大姨媽去「瓢六亭」食鰻魚餐。當日嘅濕平活動高潮必數精品天堂「東京駅一番街」(Tokyo Character Street),買咗兩個鐘都嫌唔夠喉咁!平安夜晚餐好非一般地於人氣榜熱店「東京肉しゃぶ家」渡過,可謂肚滿腸肥的一天!2018年聖誕遊東京
近年每逢姨媽們返港,都會順道停多個國家,方便肥肥家族會合並一同玩個短途旅遊,2018年尾三家人就喺東京過咗個令肚仔都一齊咁難忘嘅聖誕節!
12月23日(晴)
旺季嘅機票非常緊張,幸好六天遊都搵到位乘搭「全日空航空公司」去東京羽田機場。NH 860航班下午兩點半由香港出發,中午到達機場辦理好手續後就先去咗星空聯盟轄下嘅「新加坡航空銀刃貴賓室」佗佻地午膳及候機。飛機準時起飛及到達,不過最唔好采就係等到行李出哂都唔見大肥爸爸嗰件,結果唯有向機場職員報案,希望航空公司可以代勞搵得返。
家人慣性地入住「東京凱悅酒店」(Hyatt Regency Tokyo),今次亦不例外。由於難以掌握各人嘅抵達時間,晚餐就約好咗喺酒店附近間樓上居酒屋「北の味紀行と地酒 北海道」(簡稱「北海道」)度邊食邊等,意外地食物嘅質量唔差且價錢唔貴,長輩都好滿意。適逢姨丈壽辰,小肥同哥哥當然係早就安排咗份驚喜啦,飯後返酒店即一齊上咗佢間房吹生日蛋糕!3月12日(晴):2019瑪麗皇后二號郵輪河:第八天之新加坡
離開新加坡當日,哥哥盡量為各人安排乘坐下午航班,好等長輩們佗佻少少唔洗咁趕。早起嘅團友先組小隊去酒店鄰近嘅「亞坤」嘆咗個坡式Kaya多士做早餐。成功申請咗下午兩點辦理退房手續後,中午就有足夠時間去埋文華大酒店間「Chatterbox」,一嚐傳說中最正嘅海南雞飯,可惜結果失望地證實咗依個「傳說」乃虛構誇大嘅傳言之說,因為名酒店出品,質量比一般更一般!
小肥與父母於傍晚時份所搭嘅新加坡航空SQ 2班機之商務獨立座位闊落舒適,航空公司嘅地勤人員及機艙服務員均誠懇友善,唯一貴賓室及機上嘅餐飲水平仍有好大嘅進步空間。3月11日(晴):2019瑪麗皇后二號郵輪河:第七天之新加坡
郵輪所派發嘅「每日一報」明明要求搭客於限定時間及指定地點集合,等候叫房號先可離船,可惜大多排尾嘅客人都冇守規矩!佢地嘅打尖造成其他人嘅延誤,搞到十多人遲咗成個鐘先出到車場,連細佬預訂咗架旅遊巴士都走埋佬,好彩有表姐幫忙先搵得返個司機,不過要啲長輩邊拎住行李走黎走去實在好狼狽。真係估唔到咁有名嘅「皇后郵輪公司」安排居然咁失當,「瑪麗皇后二號」七天郵輪河由等上船第一刻到落船最後一秒都係咁混亂,船上嘅膳食質量仲要一般過一般,娛樂節目更談不上精彩,同之前不同公司舉辦嘅豪華郵輪經驗真係差太遠啦!
離開船隻後,大隊喺新加坡留多一晚先搭飛機走。應姨媽們推介,全團人都入住「Goodwood Park Hotel」,酒店地點方便,房間豪華,大家都好滿意。頻撲咗一個上午一直都冇野落肚,所以快速安頓好行李,就立即坐車去「黃亞細肉骨茶餐室」醫肚。家中親友要求下,飯後就去咗「東海潮州酒家」訂金沙魚皮做手信。
一大班人旅行總會有啲小插曲嘅,當日下午茶時間就由大姨丈主演咗一幕「不聽XO言...」,棄選用Grab搵車,自行搭的士去「Gardens By the Bay」嘅「Pollen」,結果遇上年長嘅司機大人居然話未聽過旅遊名勝,玩完盪失路仲求其喺「Marina Bay Sands」放底佢地就算!雖然遲咗九個字後都會合得返,不過同行嘅兩位女士因要於高溫下兜遠路步行成半個鐘以致花容失色,抵達時唯有即叫杯雞尾酒舒緩一吓。「Pollen」嘅歡樂式下午餐份量過多,強制性每人一份長輩們根本冇可能食得哂,食剩又唔俾人帶走,感覺猶如迫人浪費食物咁,勁不爽!最值反而係套餐所包埋嘅「Flower Dome」入場券,食飽後可以喺室內花園散步賞花,唔洗淋雨又有冷氣嘆,實在寫意得很。晚餐由姨丈個妹妹做東,請哂咁多人去佢相熟嘅「東皇大酒樓」,以一頓地道嘅海鮮大餐餞行,仲好客氣咁訂埋專車接送往返酒店,豐富又周到。評分: 設備4 服務5 環境4 衛生5 抵住3
3月10日(晴):2019瑪麗皇后二號郵輪河:第六天之新加坡
是次郵輪河終站為新加坡。肥肥家族曾經有一年復活節去過新加坡玩,由於當時XO仔年紀仲好細,一切真係好模糊,唯一記得哥哥贏咗個父子鬥快食漢堡包比賽,而自己就做咗泰山王,嘩哈哈!多年後再訪,感覺新加坡乜都貴過人,每用一次錢都勁肉痛!反而交通非常方便,超強嘅「Grab」叫車服務安全快捷,現金及信用卡付款都冇問題,服務仲好好添!
「瑪麗皇后二號」朝早八點泊岸後逗留上一天半,搭客可最遲第二日嘅早上先落船。難得可以懶床,中午先捨得起身嘅小肥直接喺二樓西餐廳「Britannia Restaurant」會合長輩一同午膳。飯後就乘搭郵輪公司安排嘅免費穿梭巴士前往旅遊景點「Marina Bay Sands」,並於全國最高嘅天台酒吧「Spago」享受高空中的歡樂時光。晚餐應蕃薯uncle要求訂咗去食「娘惹菜」,可惜所揀嘅名店「National Kitchen by Violet Oon」堅唔掂,食到幾個團友胃都痛埋,個人絕不推介!3月9日(晴):2019瑪麗皇后二號郵輪河:第五天之At Sea
郵輪由越南駛往新加坡需時一天,全日喺海中渡過所以好hea,團友們除咗集合用餐之外,其餘時間主要都係玩自由活動。
上船第一日已專程訂位去試特色餐廳「Steakhouse at the Verandah」嘅午餐,真係冇諗過瑪麗皇后二號包咗嘅膳食已經唔係特別好食,要額外加錢先可幫襯嘅扒房居然可以淋漓盡致地上演一場「誠意欠佳」!下午茶喺「Sir Samuel’s」食咗個正斗雪糕後,大家都要為傍晚六點嘅宴會式服裝要求回房梳洗打扮。
難得全團人都著得咁隆重,所以就搵咗駐船攝影師Sam哥為十五人拍下團體大合照。為怕老人家企得耐會攰,Sam哥先揀咗兩個不同背景,再以極速咁影影影,態度不單專業,而且極為細心友善,最重要就係效果非常理想,結果連原本話冇興趣嘅長輩最後都話要買兩張留底作記念,係咪好堅呢?!擺完甫士就上咗去九樓嘅「Commodore Club」飲咗兩杯輕鬆吓,嘻嘻,仲撞返早一晚見過嘅琴師Andrew Cavendish-Grey先生,真係有緣。
二樓「Britannia Restaurant」嘅晚餐質量算係叫做正常少少,不過飯後由郵輪上嘅兩位舞蹈導師合演嗰場交際舞表演水準就認真麻麻啦,至少令肥肥家族大失所望!