Handsome XO
我是Handsome XO。 我最喜愛到日本旅遊 , 最鍾意遊覽主要地標, 住宿通常會揀4星酒店。
留言  留言給此旅遊家
  遊記數目 117
  上載相片 4013
  上載影片 3
最近分享過的旅程
2018年聖誕遊東京
國家/地點: 日本
旅程日期: 2018-12-23 至 2018-12-28
2019瑪麗皇后二號郵輪八天遊
國家/地點: 新加坡, 越南
旅程日期: 2019-03-05 至 2019-03-12
2018台灣四天美食之旅
國家/地點: 台灣
旅程日期: 2018-11-23 至 2018-11-26
2018美加探親兩週遊
國家/地點: 加拿大, 美國
旅程日期: 2018-03-27 至 2018-04-07
2017京阪神六天遊
國家/地點: 日本
旅程日期: 2017-11-08 至 2017-11-13
2017台灣婚禮三天遊
國家/地點: 台灣
旅程日期: 2017-04-20 至 2017-04-23
2017溫馨家庭大阪四天遊
國家/地點: 日本
旅程日期: 2017-02-23 至 2017-02-26
東京豪食三日兩夜自由行
國家/地點: 日本
旅程日期: 2016-09-09 至 2016-09-11
2016鑽石公主郵輪東瀛遊
國家/地點: 日本, 俄羅斯
旅程日期: 2016-08-30 至 2016-09-09
2015台北怒食三天遊
國家/地點: 台灣
旅程日期: 2015-11-18 至 2015-11-21
2018台灣四天美食之旅 (台灣)
(旅程日期: 2018-11-23 至 2018-11-26 ,  旅程性質: 飲食購物)
發表日期: 2019-11-14

2018台灣四天美食之旅

小表姨近年因工作關係經常出入台灣,適逢姨媽們回港旅遊,表姨丈又可抽空外遊,難得有地膽陪伴,十二人就組團去台北玩幾日,早機去時晚機返,一於吃喝玩樂一番

1123日():台北的第一天

是次台灣週末遊,行程雖然話係全權由XO仔負責,但其實好多餐廳選擇都係聽取長輩嘅意見,而所乘搭嘅香港航空航班則由哥哥安排。

為怕遇上週五交通擠塞問題,朝早六點正就出發,預夠時間喺機場辦理好手續後可以喺香港航空貴賓室「遨堂」度輕鬆地食埋個自助早餐,先慢慢上機。HX252班機準時九點零五分起飛,空中服務員亦非常友善,不過機上嘅膳食真係幾恐怖吓囉

應小表姨推介,首次入住信義區「寒舍艾麗酒店」,啲房又大又舒適,位置仲好就腳添。等待酒店房間時,小肥早已安排大家先去「寒舍食譜」醫肚,一嚐旅遊王Uncle介紹嘅招牌脆皮先知鴨;餐廳就喺隔離間姊妹酒店「台北寒舍艾美酒店」入面,行過去五分鐘都唔洗,夠哂方便。

飯後入房安頓好行李後,團友就各自各去行街街。行唔夠一個街口,竟然俾眼力超強嘅靚靚媽咪發現到「微風松高」門外有個臨時攤位賣名牌威士忌喎,不過六點後先開門,嘻嘻,圍內幾個酒鬼即約好一夠鐘就去八吓。嘩,點知除咗新出嘅限量品「White Walker」做緊特價之外,神秘舖位入面仲有禮物送架!時間啱啱好,玩到咁上吓就同地膽姨姨、姨丈會合去食晚飯。真係估唔到細佬喺網上搵到嘅「桌藏餐廳」除咗成個古屋亭園咁靚,帶有中華風味嘅分子料理更加係美觀又美味,席上嘅長輩食後都話一試難忘
香港航空貴賓室 - 遨堂
香港航空貴賓室 - 遨堂
香港航空貴賓室 - 遨堂
香港航空貴賓室 - 遨堂
啤酒
啤酒
蝦餃、燒賣
蝦餃、燒賣
炒蛋
炒蛋
午餐肉湯米
午餐肉湯米
「香港航空」嘅貴賓室「遨堂」仍舊光猛闊落,場內嘅姐姐仔亦熱心有禮,面對著同行嘅長輩更加係超有耐性,服務態度絕對誠懇。不過用餐區域明顯冇之前打掃得咁潔淨,尤其係朝早開門只有數小時而言,黐立立嘅餐桌也未免太不衛生了。自助早餐選擇有限,最安全大路嘅有蝦餃同燒賣;最受歡迎就係即叫即煮,新鮮熱辣嘅炒蛋午餐肉湯米。除咗果汁同汽水,原來朝早都有罐裝啤酒飲喎,不過XO仔上機有香檳飲,一大清早當然唔會溝酒咁蠢啦
推介菜式: 炒蛋,午餐肉湯米
評分: 味道3   服務5   環境4   衛生2   抵食3
香港航空HX252選用A350-900型號班機
香港航空HX252選用A350-900型號班機
商務艙之獨立座位
商務艙之獨立座位
餐牌
餐牌
餐牌
餐牌
餐牌
餐牌
餐牌
餐牌
餐牌
餐牌
法式香蕉班戟
法式香蕉班戟
香港航空HX252選用A350-900型號班機,商務艙之獨立座位闊落舒適,私人空間足,而且衛生非常。空中服務員友善好客,可惜機上嘅法式香蕉班戟」又乾又嚡,伴配嘅芒果醬仲要勁酸,成份早餐只有杯乳酪朱古力好食,空中膳食低劣之質素也太恐怖了
評分: 味道1   服務5   環境4   衛生4   抵食3
謙卑午膳 笑臉2019-11-14
寒舍食譜
寒舍食譜
寒舍食譜
寒舍食譜
脆皮先知鴨,手創花枝軟絲丸,肥牛潤腸粉
脆皮先知鴨,手創花枝軟絲丸,肥牛潤腸粉
百花油條腸粉(NT 240/客)
百花油條腸粉(NT 240/客)
欖菜四季豆(NT 480)
欖菜四季豆(NT 480)
金瑤蟹肉乾燒米粉(NT 880/客)
金瑤蟹肉乾燒米粉(NT 880/客)
熊貓流沙包(NT 300/三隻)
熊貓流沙包(NT 300/三隻)
小菜
小菜

由「寒舍艾麗酒店」前往「寒舍艾美酒店」只需行過一條街,五分鐘唔洗就行得到,可謂超級方便。酒店中餐廳「寒舍食譜」樓底高高,極具氣派。用餐大堂開揚通爽,地上舖出厚厚嘅紅地毯,配上牆上嘅國畫,中國風味濃厚。服務生體貼友善,點心小菜質高味佳,整頓午餐當真猶如店名般謙遜,絕對值得推介。

1)      椒鹽鴨舌(NT 520):台式鴨舌同港版嘅唔同,每件都係連埋下巴嘅,所以大隻得多,細佬唔係幾識點咬,唯一只可以講得出椒鹽鴨舌嘅炸皮好鬆脆惹味。

2)      脆皮先知鴨(NT 1,880/隻):旅遊王Uncle介紹嘅招牌菜「脆皮先知鴨」原來係由寒舍集團創辦人蔡辰洋先生以蘇東坡嘅名作「春江水暖鴨先知」起名。每隻均由帶上手套嘅師傅即場切出。脖子長長嘅先知鴨當真如餸名般脆皮,皮下脂肪不多,鴨肉芳香軟嫩,堅掂!

3)      欖菜四季豆(NT 480):砌到成幅畫咁靚嘅四季豆翠綠香脆,簡單可口。

4)      XO醬乾炒蘿蔔糕(NT 420):雖則炒蘿蔔糕好夠乾身,無奈其炸皮過厚及腍,蘿蔔糕方塊偏韌而不鬆潤,甚為失色。

5)      手創花枝軟絲丸(NT 680/客):色澤金黃嘅花枝丸香脆鬆爽。

6)      肥牛潤腸粉(NT 280):腸粉甜豉油係上枱後由服務生代為淋上,以確保腸粉唔會被浸到腍哂。此味肥牛潤腸粉肥牛並非捲入腸粉內作餡,而係舖喺腸粉上蒸煮嘅。墊底嘅腸粉柔軟潤滑,伴配軟嫩嘅肥牛碎即增添肉香

7)      百花油條腸粉(NT 240/客):百花油條腸粉亦即釀入蝦膠炸兩,香滑嘅腸粉皮下嘅油條鬆化脆口,中間嘅百花蝦膠亦爽潤彈牙,點上甜豉油已夠滋味無窮!

8)      櫻花蝦豚肉絲炒高麗菜(NT 480/客):以櫻花蝦豚肉絲點綴嘅高麗菜爽脆惹味。

9)      金瑤蟹肉乾燒米粉(NT 880/客):金橙亮麗嘅乾燒米粉幼嫩軟滑,油潤芬芳,蟹肉則鮮甜香嫩,撈入清新爽口嘅芽菜即加添口感,十分細膩。

10)  熊貓流沙包(NT 300/三隻):熊貓流沙包外型趣緻可愛,肥嘟嘟嘅包身鬆軟熱辣,中間嘅奶皇餡心亦香濃甜美。

 

推介菜式: 脆皮先知鴨,欖菜四季豆.肥牛潤腸粉,百花油條腸粉,櫻花蝦豚肉絲炒高麗菜,金瑤蟹肉乾燒米粉,熊貓流沙包
每人消費: 約1168新台幣 (午餐)
評分: 味道4   服務5   環境5   衛生5   抵食4
景隅精緻客房 - 牀
景隅精緻客房 - 牀
景隅精緻客房 - 衣櫃
景隅精緻客房 - 衣櫃
分隔洗手間及睡房為透明嘅玻璃窗
分隔洗手間及睡房為透明嘅玻璃窗
分隔洗手間及睡房為透明嘅玻璃窗
分隔洗手間及睡房為透明嘅玻璃窗
景隅精緻客房 - 浴室
景隅精緻客房 - 浴室
景隅精緻客房 - 靚靚咖啡杯
景隅精緻客房 - 靚靚咖啡杯
景隅精緻客房 - Nespresso 咖啡
景隅精緻客房 - Nespresso 咖啡
景隅精緻客房
景隅精緻客房

小表姨所介紹嘅「寒舍艾麗酒店」座落於超級方便嘅信義區,附近嘅購物熱點如「新光三越」、「誠品書店」、「微風松高」等全部不用坐車,步行只需幾分鐘就到

正門嘅哥哥仔非常客套有禮,除咗會自動為新住客提取行李之外,得知十多人每天出門都要三部的士往同一個地址後,更會即場安排,效率高且極之妥當。樓上接待處嘅姐姐們亦十分友善及有耐性,雖則多間房間均由細佬於網上預訂,但團友們對房間嘅要求不一,同時間可有兩位同事幫忙登記,實在令人感動

酒店嘅雙人「景隅精緻客房」闊落舒適,擺放著兩張單人床都仲有好多活動空間。分隔洗手間及睡房為透明嘅玻璃窗,設計新潮且十分大擔。房內設備都好齊全,每天更可以靚杯沖製名牌咖啡Nespresso飲,高級得很,連稅每晚平均$2,080可算物有所值。唯一由於冬天衣物偏厚同多,媽咪第一樣就發現房內唔係咁夠拉趟式嘅櫃桶
每晚價錢: 2080新台幣 (雙人房)
評分: 設備4   服務5   環境5   衛生5   抵住4
小樽手作咖啡- 鄰家小店
小樽手作咖啡- 鄰家小店
爵士炭燒珈琲(NT 140)
爵士炭燒珈琲(NT 140)
餐牌
餐牌
凍小樽秘制煉乳調和珈琲(NT 140)
凍小樽秘制煉乳調和珈琲(NT 140)
橘皮風味拿鐵珈琲(NT 140)
橘皮風味拿鐵珈琲(NT 140)
橘皮風味拿鐵珈琲(NT 140)
橘皮風味拿鐵珈琲(NT 140)
沖繩黑糖拿鐵珈琲(NT 140)
沖繩黑糖拿鐵珈琲(NT 140)
可愛卡通咖啡
可愛卡通咖啡

台北商場最不缺乏咖啡屋,今次就俾姨媽們發現「新光三越A11」內有間來自日本北海道嘅「小樽手作咖啡」。小店以木為主嘅裝潢十分簡潔,服務生亦相當友善。吧位配上小枱燈嘅設計令氣氛更為輕鬆寫意

五頁餐牌均附上詳盡解說及彩式插圖。多款飲品中,外型最普通就係杯凍小樽秘制煉乳調和珈琲NT 140),不過凍珈琲香醇甜美,而且滑溜非常。姨丈所點嘅爵士炭燒珈琲NT 140)即叫即燒,芳香洋溢。最可愛必選靚靚媽咪及姨媽們所點嘅橘皮風味拿鐵珈琲NT 140)及沖繩黑糖拿鐵珈琲NT 140),因打起嘅奶奶泡沫為立體嘅史努比及其他卡通模樣

商場咖啡店「小樽手作咖啡」環境簡潔企理,即叫即調之手作珈琲造型可愛,芬芳味佳,實屬打卡熱點也
每人消費: 約140新台幣 (下午茶)
評分: 味道4   服務4   環境4   衛生4   抵食4
Johnnie Walker Taste Lab
Johnnie Walker Taste Lab
Johnnie Walker Taste Lab
Johnnie Walker Taste Lab
Johnnie Walker Taste Lab
Johnnie Walker Taste Lab
新產品廣告牌
新產品廣告牌
會噴假雪嘅藍白「約翰走路」(Johnnie Walker)模型
會噴假雪嘅藍白「約翰走路」(Johnnie Walker)模型
限量版 White Walker(NT 960)
限量版 White Walker(NT 960)
White Walker 雞尾酒品套裝
White Walker 雞尾酒品套裝
White Walker 雞尾酒品套裝
White Walker 雞尾酒品套裝

美國HBO神劇權力遊戲」(Game of Thrones)第八季之終極篇於2019年全球同步播出。為隆重其事,電視台更與名牌威士忌「約翰走路」(Johnnie Walker)攜手合作,調製出限量版系列「White Walker,名字取自劇集中嘅角色,同時仲好吻合威士忌品牌嘅名,有意思極!碰巧是次台北之旅,竟然被酒鬼三人組喺微風松高購物時遇上正在佈置中嘅臨時攤位商店Johnnie Walker Taste Lab」,難得大家咁有緣喎,結果當然係等到傍晚六點正式開門時,即探個究竟啦

原來限時店舖係以酒吧形式向飲客介紹不同款式之威士忌,包括全新嘅White Walker」,可即場淨飲烈酒或品嚐酒保特調之雞尾酒品。場內有個會噴假雪嘅藍白約翰走路」(Johnnie Walker)模型及「權力遊戲」嘅皇者寶座佈景供貴客拍照留念。小店每日以特價NT 960限量推售White Walker,每位客人最多買兩樽,凡購一樽即送兩杯靚酒,於互聯網發佈靚相再加送酒版,認真抵玩!聽完哥哥仔嘅急口令解說,嘩卡卡,三口子當然係每人買兩樽啦,亦即每人可即場享用四杯酒酒

有別於品牌其他系列,銀藍白包裝嘅White Walker」建議最佳飲用方法為凍飲,而且好配合劇情咁,經冷藏後嘅靚樽會呈現出「WINTER IS HERE」嘅字句,實在精美得很。即買即送嘅兩杯酒品亦一啲都唔馬虎,喺冰島形嘅擺盤加上乾冰營造出冰凍嘅效果,外觀相當震撼!相中嘅矮杯內為淨飲嘅White Walker」,冰涼甜美,果香味非常突出,個人覺得比其他威士忌易入口得多。另外嗰杯鮮藍吸睛嘅雞尾酒亦用上「White Walker」調出,當中嘅薄荷味清新醒神,芳香無比,這個冬天的來臨也太神奇了!
推介菜式: White Walker
每人消費: 約1920新台幣 (其他)
評分: 味道5   服務5   環境5   衛生5   抵食5
桌藏
桌藏
四式麵包,牛油,前菜二重奏
四式麵包,牛油,前菜二重奏
干邑龍蝦海鮮湯佐擔仔麵
干邑龍蝦海鮮湯佐擔仔麵
雞煲湯,處女蟳焗越前米,洛神花冰沙
雞煲湯,處女蟳焗越前米,洛神花冰沙
洛神花冰沙
洛神花冰沙
四款主菜:澳洲羊肩排、澳洲和牛臉頰、美國安格斯牛扒、櫻桃鴨油封鴨腳
四款主菜:澳洲羊肩排、澳洲和牛臉頰、美國安格斯牛扒、櫻桃鴨油封鴨腳
甜品二重奏,小红莓凍飲,特濃咖啡
甜品二重奏,小红莓凍飲,特濃咖啡
中西匯萃於桌上
中西匯萃於桌上
干邑龍蝦海鮮湯佐擔仔麵

週末訪台數天,主要目的當然係離不開吃喝玩樂,但要為一行十二人編排膳食,絕非易事。幸好互聯網上嘅飲食資訊非常詳盡,XO仔方才發掘到連旅遊書籍都未提及過嘅隱蔽美食大宅「桌藏。以電郵訂座,只需填回信用卡授權書並支付訂金,流程相當簡易。

的士停在以磨沙玻璃圍起嘅餐廳門前,第一刻感覺十分時尚。步進圓形嘅門框卻又踏上幽靜嘅石徑,庭園式嘅設計又充滿著中國風。店內嘅光線柔和,摩登嘅間隔開揚通爽,厚墊椅櫈亦好舒適。每個座位面前除咗有齊備嘅餐具,最搶眼就係把扇形菜單。反轉一看先知原來兩邊嘅內容為中英對照,這個中西合璧典雅得也真夠全面。八道菜餐單價格為NT 3,300/位,當中每人需點選湯品及主菜兩個項目。湯品有「干邑龍蝦海鮮湯佐擔仔麵」及「日本瑤柱、金華火腿、雞煲湯」兩款可揀;而主菜則有四款之多,當晚有「澳洲羊肩排」、「澳洲和牛臉頰」、「美國安格斯牛扒」、「櫻桃鴨油封鴨腳」。

點好菜,晚餐即由一小杯清香怡神嘅「台南有機紅心芭樂茶」作序,據悉有養生紓壓之效。接棒嘅四式麵包有紅豆包、火腿包橄欖芝麻包芝士包,每件不單外表金黃,而且熱辣鬆軟,一人有成籃咁多,份量真夠堅!兩款牛油修長軟滑,中式嘅擺盤亦非常吸引。

菜譜中嘅前菜為二重奏,第一節「當令開胃菜」乃色澤鮮艷嘅小食拼盤。金邊靚碟上有鮮爽醒神嘅天使紅蝦、芬芳彈牙嘅松露鮑魚、鮮香潤澤嘅蕃茄仔、爽脆甜美嘅粟米仔無花果。而第二節「台式蘿蔔糕微烤法國鴨肝醬」雖看似簡單,但菜式嘅複雜度卻絲毫不遜前段。長碟上兩件台式蘿蔔糕方塊質感厚潤有彈性,師傅巧妙地喺面塗上微烤過嘅法國鴨肝醬,除咗為糕品添上柔軟滑溜,同時亦能帶出鮮濃惹味,神來之筆確真細膩得很

湯品一環,小肥揀咗「干邑龍蝦海鮮湯佐擔仔麵」,熱湯均由服務生即場續一倒入石碗中。橙黃色嘅海鮮湯底香濃醇厚,幼身嘅擔仔麵條又夠柔韌,混入鮮甜爽脆嘅龍蝦肉龍蝦湯麵絕對真材實料

人家聽歌學國語,小肥則用餐學中文!今次就由「桌藏」老師教曉三魚組成嘅「鱻」字為「鮮」之異體字;接著嘅一道「鱻盤」就係指當日最時令嘅海鮮「處女蟳」,即「螃蟹」,所烹調出嘅「處女蟳焗越前米」。菜式用上秋天最肥美嘅處女蟳,師傅拆出蟹肉後,就用返個殼加入飽滿晶瑩嘅越前米焗製,頂面再以翠綠嘅菜苗點綴,蟹飯入口鮮香濃甜,且毫不溜滯,當真如餸名咁「鱻」!

主菜出場前,貴客眼前突然煙霧四起,感覺猶如置身於仙境中般奇妙。霧裡透出嘅點點紅原來係清涼醒神且消滯嘅「洛神花冰沙」。真係冇諗到一頓晚餐除咗可大飽口福之餘,更可享盡眼福

兩三成熟嘅「美國安格斯牛扒」主菜不單紅潤有光澤,油脂不多,一刀切落去已感其肉質十分鬆軟,入口更覺美國靚牛極富彈性,且肉汁豐厚,惹味可口。

由咸轉甜,間場先有杯清爽微甜嘅小红莓凍飲為味蕾洗滌一番,冇錯,入面仲有朵食用花架。大廚嘅心思相當精密,甜品嘅設計跟前菜好對稱地一同譜出二重奏,第一節亦同為拼盤,不同之處在於前菜拼盤以西餐碟上,而甜品拼盤則換上鮮紅嘅中式錦盒承載。錦盒中嘅四件甜點均一口一件,中央淺啡色嘅「烏龍茶泡夫」外鬆內軟,烏龍茶味芳香,而上方件「焦糖芒果辣椒糕」則清甜得黎帶有少少辣勁,好得意。由於細佬早於訂座時說明對果仁敏感,自己嗰份就冇咗含果仁嘅嗰粒朱古力,而多咗件又彈又潤又清香嘅芭樂糕甜品第二節就帶點分子料理元素,連餐具嘅組合都新潮過人。下方嘅白碟上有件被雜果圍住嘅法式多士方磚,碟子上方凹咗嘅一角剛巧連接住另上嘅糖漿法式多士方磚鬆化輕盈,頂面以黑糖魚子醬點綴能增添濕潤及微甜,食客可因應自己嘅需求再淋上糖漿,伴配爽甜嘅鮮果又夠清新健美,整個設汁除咗美觀及美味之外,更很是周詳。

晚膳以餐後飲作結,小肥杯洋式特濃咖啡屬刺激性飲品,咖啡師不知是有意定無意地揀選咗隻刻有「靜」字嘅木碟呈上,莫非係要傳遞喝畢要靜下來嘅訊息?!

於台北化身為一所型格住宅嘅「桌藏」由外到內、裝潢到菜式,都散發著中西匯萃嘅氣息。時尚嘅用餐大堂由年輕友善嘅服務生掌舵,到步一刻已續一扶持長輩們入屋就座,離開時仲親身陪同去搭的士,體貼入微之情盡在不言中。大廚端上餐桌上嘅無國界美食精緻味佳,中段更締造出煙霧迷漫嘅特效仙境,這個感觀之旅確真豐盛,而且仲極之抵玩添

推介菜式: 干邑龍蝦海鮮湯佐擔仔麵,美國安格斯牛扒,台式蘿蔔糕微烤法國鴨肝醬,處女蟳焗越前米
每人消費: 約3800新台幣 (晚餐)
評分: 味道4   服務5   環境5   衛生5   抵食5
  1 個留言    |  加入你的留言
發表日期: 2020-01-13

1124日():台北的第二天

今次去台灣最主要嘅推動力就係因為知悉台中人氣法國餐廳「樂沐」(Le Mout)將於年尾結業,幫襯過嘅都好想臨別秋波食多次,而未去過嘅姨媽們就更有興趣一試,結果XO仔幾經辛苦,出盡人情牌後先訂到位。深知要預備十多人嘅餐飲一啲都唔簡單,加上咁遲先搞得掂,日子同用餐時間就任由餐廳定好為週六晚嘅晚餐後,細佬先編排該日嘅行程。

當日原來係台灣選舉,幸好街上嘅人同車都唔多,交通十分暢順。朝早先同團友由酒店行咗去「真芳碳烤吐司紅茶牛奶」食「吐司」同「起司」做早餐,之後就搭的士帶太太們去血拼佢地最愛嘅品牌。中午喺連地擔姨姨都未聽過嘅「允壽司」嘆咗個超正嘅魚生午餐後就直接去咗台北車站。等待前往台中嘅高鐵列車時最興奮就係可以喺車站個地下街度同靚靚媽咪瘋狂掃咗不少玩具同手信,意外收穫有成三大袋架,認真唔講得笑!反而團友們萬分期待嘅「樂沐」晚餐嘅質量卻令人大失所望,餐廳的終結竟成為整個旅程嘅低潮位
溫馨早餐店 笑臉2020-01-13
真芳碳烤吐司紅茶牛奶
真芳碳烤吐司紅茶牛奶
餐牌
餐牌
冰紅茶牛奶(NT 45)
冰紅茶牛奶(NT 45)
豬肉蛋起司(NT 60)
豬肉蛋起司(NT 60)
真芳三明治(NT 90)
真芳三明治(NT 90)
起司起司蛋(NT 50)
起司起司蛋(NT 50)
真芳蛋餅(NT 30)
真芳蛋餅(NT 30)
溫馨早餐
溫馨早餐

每次外遊小弟最怕就係食酒店嘅自助早餐,所以除非係房費包咗,小肥盡量都會去訪尋區內嘅小店。多得近年網上流行分享飲食日誌,令團友們有緣遇上街坊熱店「真芳碳烤吐司紅茶牛奶」,食簡單嘅吐司早餐仲學埋國語,掂呀

真芳碳烤吐司紅茶牛奶」嘅招牌上寫明創辦年份為2015年,咁都幾新吓喎。玻璃門上清楚道出營業時間為每天早上六點半到下午一點半,明顯只做早餐及午餐。店內面積不大,木地板上只有四張木造餐桌,配上好街坊嘅圓櫈仔,望落都好乾淨企理。四周亦有不少聖誕及可愛佈置,場內氣氛倍添溫馨。

兩頁彩圖餐牌相當詳細,真係估唔到喺台北食早餐都學識唔少國語用詞,例如「吐司」係「多士」、「起司」等同「芝士」咁,非常有趣!大概六人嘅樣子也太外省了,所講嘅國語又充滿著口音,在場年輕嘅服務生都估到大家對點菜流程不太熟識,所以安排好座位後,即好客地介紹餐牌上嘅項目,並友善地告知要先喺收銀處點選食物及付款後,食物準備好就會續一呈上。落好單,俾埋錢,先有清晰嘅單據一張,原來餐店並無設加一服務費嘅。

呵呵呵,講個笑話俾大家笑吓先!話說姨丈叫咗杯「熱真芳紅茶」(NT 45),眼見熱飲被透明膠封實飲唔到喎,佢居然用手撕開塊膠黎飲。。。同桌嘅長輩其實都唔係好明小肥點解會笑爆咀,冇計啦,唯有等自己杯「冰紅茶牛奶」(NT 45)上枱時先玩真人示範。原來台灣嘅「冰紅茶牛奶」亦即香港嘅「凍奶茶」,凍飲香滑醇濃,絕不比港式絲襪奶茶遜色。

1)      豬肉蛋起司(NT 60):「豬肉蛋起司」每客有兩件。得悉團友們有意分黎食,姐姐仔仲好客氣地免費幫我地一開二後再開四,實在太周到啦豬肉蛋起司嘅兩塊多士好鬆脆,夾喺中間嘅豬肉蛋蛋芝士餡又夠惹味爽潤,掂呀!

2)      真芳三明治(NT 90):「真芳三明治」其實係以豬肉蛋起司作基礎,面底另加兩層薯仔南瓜沙律,要留意嘅一點係內含花生醬,好似細佬咁有敏感問題就唔食得啦。

3)      起司起司蛋(NT 50):顧名思義,「起司起司蛋」主材用上兩款車打芝士水牛芝士,並加上煎蛋孖芝蛋三文治香濃鬆軟,簡單可口。

4)      真芳蛋餅(NT 30):姐姐仔推介嘅真芳蛋餅外表有啲似薄罉,但個蛋餅係軟腍腍嘅,入面有韭菜、同蛋蛋,濕潤得黎咸咸甜甜咁,都幾得意。NT 30絕對係又平又正,結果當然係要追加啦

只開早、午市嘅「真芳碳烤吐司紅茶牛奶」位於靜寂嘅橫街上,小店簡潔企理,服務生體貼入微,可謂溫馨洋溢,加上奶茶三文治即叫即做,新鮮熱辣又美味,價廉物美,個人誠意推介
推介菜式: 豬肉蛋起司,起司起司蛋,真芳蛋餅,冰紅茶牛奶
每人消費: 約95新台幣 (早餐)
評分: 味道5   服務5   環境4   衛生5   抵食5
允壽司
允壽司
壽司吧
壽司吧
真鯛二重奏
真鯛二重奏
蟹肉茶碗蒸し
蟹肉茶碗蒸し
中拖羅刺身伴淮山及昆布
中拖羅刺身伴淮山及昆布
昆布鯖魚壽司
昆布鯖魚壽司
特濃咖啡
特濃咖啡
午市精選套餐(NT3,500)
午市精選套餐(NT3,500)

去台灣玩,除咗要食台菜、小籠包、火鍋之外,家人例必要食餐日本菜;有心要為親友嘅飲食日誌增添驚喜,XO仔今次就好大擔咁喺互聯網上挑選咗間唔係咁多人認識嘅「允壽司

壽司屋隱蔽於窄窄嘅單程橫街內,雲石閃光嘅門面新潮得黎甚為低調。餐店面積不大,右方為師傅嘅大舞台,面前排出十二個吧位,以透光嘅雲石小牆分隔,貴氣得黎不失時代感。牆上掛上以毛筆寫出店名中大大個「允」字,充分地表演出中國書法藝術嘅氣勢。

網上訂座流程簡易快捷,可慳返長途電話費之餘,小肥又唔洗講國語,對話有哂記錄唔洗驚會誤解,十二人包場仲可以一早訂下NT 3,500/位嘅精選午市套餐,並道明團友們有啲咩特別飲食要求及敏感問題。掌舵人小穎師傅相當好客同細心,用餐當日先確認同行邊幾位長輩只能食熟食,及邊個係有超多食物敏感嘅XO仔,態度絕對認真

食物全權由師傅安排,清酒就由識少少扮代表嘅小弟揀咗樽果香及花香味討好嘅「澤姬純米大吟釀」(NT 3,800)。

1)      伴配魚生青瓜蘿蔔靚薑全為師傅自家醃製,均爽脆醒胃。

2)      開胃小點鮑魚豆腐沙律」:沙律以幼嫩嘅豆腐、腍潤嘅鮑魚、清爽嘅無花果、鮮爆嘅三文魚籽麻醬所混製而成,組合新穎獨特,集齊爽嫩脆腍,口感極之豐富,以葫蘆碟仔承載更覺精緻矜貴。

3)      「真鯛二重奏」:真鯛以黑碟呈上,睇得出師傅喺視藝上都花下不少功夫。兩片銀光閃閃、魚肉透光嘅真鯛上分別擺放咗雪白嘅白蝦仔及橙黃嘅馬糞海膽,建議連同山葵及黑色嘅昆布碎花續件捲起一口食落肚。白蝦真鯛卷清香軟嫩,海膽真鯛卷則鮮濃甜美,卷物中嘅昆布碎花所散出嘅咸香慢慢滲進味蕾,感覺就好似舌尖喺沙灘吹緊海風咁,何其妙哉

4)      喺無添加嘅赤貝及間八刺身輕輕點上山葵豉油已夠清甜芳香,這個返璞歸真嘅對比舖排突顯出後者嘅清麗脫俗,同時亦反映出設計者嘅心思細密。

5)      厚厚嘅中拖羅刺身色澤粉嫩油潤,同伴配嘅淮山昆布半溶於口腔。

6)      見外出天氣有點寒冷,小穎師傅好體貼地叫廚房先蒸出鮮甜暖胃嘅「蟹肉茶碗蒸し」作為壽司環節前之間場菜

7)      大廚事先講明六款壽司均已調好哂味,味道編排由淡至濃。第一件深海池魚壽司爽厚潤澤,清香肥美。

8)      寒鰤魚壽司軟嫩甜潤。

9)      右口魚壽司用火槍輕輕燒過,魚肉幼嫩滑溜,魚味更為鮮濃突出。

10)  以紫菜包住嘅燒帶子外層香脆,帶子肉厚鮮嫩。

11)  相信整頓午餐製作最複雜嘅都要數件「昆布鯖魚壽司,因為要由兩位師傅合作切割魚片、於木盒上舖砌食材、擠壓木盒、包紮成卷物、再添置調味,每個動作都一樣咁乾淨俐落,實在另人嘆為觀止。昆布鯖魚壽司大大件咬落去好爽厚,當中最濃郁就係個昆布味,食食吓又傳出陣陣嘅紫蘇香柚子香喎,確真細膩得很

12)  大拖羅壽司粉裡透白,其鮮香甜美盡化於舌上後,吃畢仍齒頰留香,令人回味無窮。

13)  真係估唔到壽司屋除咗有高質嘅魚生之外,連熱食都絕不失禮!午餐所包有嘅天婦羅三品用上源自日本嘅北海道洋蔥北海道粟田白子炸製,聽落都覺得名貴得好有驚喜!三款金黃乾巧嘅天婦羅炸皮香脆鬆化,以竹籤串起嘅北海道洋蔥爽潤惹味、躲於洋蔥下嘅北海道粟田亦爽甜多汁。第三件白子因有紫蘇葉包住,所以炸物就透出綠色。此道紫蘇白子天婦羅芳香脆皮,中間嘅白子柔潤白滑,且軟嫩非常,黏上碟邊嘅咖哩鹽粉即能提升鮮香

14)  「海膽拖羅手卷」由師傅以「心連心」嘅方式續條直接轉交到貴客嘅手上,確保新鮮又窩心。橙美嘅手卷鮮甜無比,外脆內香嫩,正爆呀!

15)  甜品黑糖粉抹茶麻糬」細細杯嘅份量啱啱好,麻糬煙煙韌韌,當中嘅黑糖味微甜且不溜滯,可口味佳。

16)  飯後一杯暖胃嘅特濃咖啡剛好為午宴畫上完美嘅感嘆號!

隱蔽小店「允壽司」環境簡樸時尚,師傅們及服務生態度誠懇且細心周到,午市精選套餐用材高質,魚生熟食美味之餘,更滿載驚喜,絕對值得一試再試。
推介菜式: 午市精選套餐
每人消費: 約4200新台幣 (午餐)
評分: 味道5   服務5   環境5   衛生5   抵食5
玩具小天堂 笑臉2020-01-13
台北車站
台北車站
台北車站地下街 Taipei City Mall
台北車站地下街 Taipei City Mall
迷你兵團精品
迷你兵團精品
小黃雞精品
小黃雞精品
P助精品
P助精品
高鐵列車
高鐵列車
高鐵列車
高鐵列車
列車上有小食
列車上有小食

由台北去台中最快捷嘅方法就係坐高鐵,車程約四十五分鐘。外國遊客可於網上預先訂飛及揀選座位,出發當日只需於指定櫃檯就可取得車票,流程十分簡易。來往台北及台中嘅高鐵列車每程NT 2,250,車上厚墊座椅舒適闊落,包咗每人一件糕點及飲品,絕對方便又抵

多得玩具專家P哥教路,今次坐高鐵最開心嘅就係發現咗台北車站原來暗藏超多玩具店嘅地下街!嘩,除咗大小商店之外,就連喺攤位及架仔舖都見到不同款式嘅迷你兵團、史努比、P助、小黃雞等精品,幸好二人早已備好多個環保袋,不過都要埋姨丈幫忙先攞得哂,當真買到XO仔同靚靚媽咪手都軟埋,大家話係咪好誇張呢?!
推介項目: 買精品玩具
參觀時段: 下午
評分: 值得去5  
失望的終結 哭臉2020-01-13
華麗餐具
華麗餐具
苦瓜/帶子/芝士
苦瓜/帶子/芝士
八戒:豬心/薏仁/四破魚/煙燻豬骨汁
八戒:豬心/薏仁/四破魚/煙燻豬骨汁
小牛胸線:黃菇/香料麵包/山茼蒿
小牛胸線:黃菇/香料麵包/山茼蒿
嫩烤鵝肉:無花果/可可香料醬
嫩烤鵝肉:無花果/可可香料醬
睡蓮
睡蓮
精緻茶點
精緻茶點
失望的落幕
失望的落幕

兩年前左右,多得越台工作嘅肥叔叔推介,肥肥家族方才有幸於台中「樂沐法式餐廳」品嚐過美女廚神製作嘅不一樣感官旅程

<https://tw.openrice.com/zh/taichung/review/%E6%A8%82%E6%B2%90%E4%B8%8D%E4%B8%80%E6%A8%A3%E7%9A%84%E6%84%9F%E5%AE%98%E4%B8%96%E7%95%8C-e124169>

點知冇幾耐就收到風話餐廳於2018年尾將會結業。因家中多位親友都未有緣一訪,所以小肥就幾經艱辛咁托上托,務求要訂到位一同去道別,嘻嘻,皇天總是不負有心人嘅,日子時間當然係任由餐廳定啦!十二人嘅晚餐必先預定菜單、道明各人對咩食物有過敏及收取訂金,全程以電郵溝通,非常簡易。

闊別一年多,三層高嘅洋房依然貴麗大方。由於早已訂下菜譜,埋位即由最識飲嘅姨媽點選酒品,不過因餐店不再入貨,大多項目都已售罄,只係牌上未有標明。溫婉有禮嘅哥哥仔極之有耐性,除咗推介仲有貨嘅精選紅酒外,對待臨時對菜單有異議嘅auntie更加係有求必應,十分相就,態度專業得很

處理好飲品後,姐姐先送上兩款海鹽味及海藻味牛油。正當細佬懶醒地同各人提到2017年嘅「感官午餐中有多款自家製麵包,印象最深刻有香醇惹味嘅高梁酒臘肉包及芳香微甜嘅蜂蜜麥包時,即令大家滿心期盼,真係冇諗到晚餐嘅麵包居然只有含果仁及不含果仁兩種!雖然包品熱辣鬆脆,但喺有比較下就覺得廚房孤寒咗,誠意也大打折扣囉

店內全場嘅晚餐均清一色由兩道是日下酒菜作序。第一道海鮮二重奏先以石春拼盤呈上,外表閃爍耀眼,精緻美觀。應建議由左邊起食,橢圓形嘅「青蘋果煙三文魚啫喱」質感軟潤,無奈底層件餅塊過份腍身,加上入口即嚐到三文魚籽嘅腥味,這種重口味也太不令人開胃了吧!幸好旁邊金光閃閃嘅匙羮上件「海膽蟹肉牛油果卷」清新甜美,可口脆巧,叫做挽回少許失落之感。第二道下酒菜「苦瓜/帶子/芝士」以彩色嘅食用花點綴,睇落就靚啦,但係可能個芝士苦瓜組合嘅苦味過份剛烈,細佬真係食唔出任何帶子嘅元素囉,不幸中之大幸就係兩啖就食完,算係唔會咁浪費食材

接著嘅「冷燻鵝肝:桂花/杏桃/蓮藕/蓮子」外型典雅,可惜主角鵝肝偏嚡同硬,唔得軟滑,其味道亦不夠香濃,甚為失色!碟上最正反而係舖面巧薄乾脆嘅炸蓮藕片及隱藏喺底件脆卜卜嘅鴨舌

或許係自己期望太高吧,傳聞嘅招牌菜式「八戒:豬心/薏仁/四破魚/煙燻豬骨汁」除咗輕巧脆薄嘅卜卜脆討好之外,雖則豬心嘅質感尚算爽腍,敗筆在於調味滲出一股不易接受嘅腥與押,就連汁液中嘅煙燻味都未能蓋過,莫非「八戒」未洗白白?!

晚餐高潮位必選「小牛胸線:黃菇/香料麵包/山茼蒿!熱辣嘅醬汁由專人續一喺食客面前斟上,小牛胸線方塊外脆內軟嫩,香口惹味得黎一啲都唔溜滯,一個人食兩份都冇問題

壓軸嘅鵝肉主菜登場前,每人先要揀選一把靚刀,每把都咁有睇頭同份量架!跟小牛胸線一樣,汁液上枱時先會即場淋上。記得上次黎食「感官」午餐時,當中嘅嫩烤鵝肉主菜是何等精妙,想不到餐店結業前出品嘅「嫩烤鵝肉:無花果/可可香料醬」竟然會係韌到切唔斷,咬唔開!牙力唔好嘅長輩們好多都勁不情願地食剩喺碟,睇日劇學懂此舉可算為對廚師最低嘅評價

換轉甜品環節前,先由清新爽涼嘅「鳳梨:卡蒙貝爾乳酪/野薑花/馬告」作間場。正常版甜品「楓蔦黃」為楓葉栗子蛋糕。不含果仁版甜品為中西合璧、微甜滋潤嘅「睡蓮」。而不能進食甜品嘅食客就有份酸都佢地咪哂眼嘅「生果盤」

結尾嘅「精緻茶點」中只有粉紅小天鵝一如名字般精緻,但僅此而已,因為三款茶點極度酸澀,食到連牙仔都哂打冷震,聽落恐唔恐怖呢?!好在飯後有杯正正常常嘅特濃咖啡中和吓先舒服返咋。

外觀形如一幢別墅嘅米芝蓮星級食肆「樂沐法式餐廳」可算是台中最有名嘅法國餐廳,曾榮獲「亞洲50最佳餐廳」之美譽,當真萬萬估不到於二零一八年十二月正式結束營業前嘅告別宴居然會教人如此驚嚇地失望!雖則店內嘅接待員及服務生依舊友善體貼,但對遠由香港越洋嘅家人黎講,菜式偏低之質量及廚神未有親身烹調嘅情況下,也顯得「樂沐」的落幕過份草率及敷衍了,感覺就好似餐店喺度夾硬頂埋個租約咁。因深深體會到名廚店主對食客嘅尊重都消失埋,在座嘅各位都表示即使餐店日後會重開都絕不會幫襯!店子已沒有了,更談不上有進步空間,唯有搖頭高歌一曲「忘記它」。
每人消費: 約5000新台幣 (晚餐)
評分: 味道2   服務4   環境4   衛生5   抵食1
  0 個留言    |  加入你的留言
發表日期: 2020-02-04

1125日():台北的第三天

去台北玩咗咁多次,XO仔印象中最好食嘅台菜應該係兒時同婆婆喺「欣葉」食過嗰一餐,不過邊間分店就真係唔記得啦!碰巧今次長輩們要求食台菜,細佬第一時間就諗到可以回味一吓,所以就揀咗出名高雅境靚嘅「欣葉食藝軒」食午餐,只可惜名店嘅質量甚為參差,或者是自己期望過高吧。晚餐方面,冬天最受歡迎當然係火鍋啦!由於團友十二人嘅口味不一,麻辣及藥材均屬太重口味,姨姨就提議清少少食日式涮涮鍋,一齊試試佢同事極力推介嘅「橘色涮涮屋」,真係估唔到除咗有好野食,更享受到驚喜禮待

「欣葉食藝軒」位於台北101辦公大樓八十五樓
「欣葉食藝軒」位於台北101辦公大樓八十五樓
欣葉食藝軒門面及環境
欣葉食藝軒門面及環境
免費贈送之餐前小食:炸牛膀薄片,醃提子,辣豆乾
免費贈送之餐前小食:炸牛膀薄片,醃提子,辣豆乾
花膠佛跳牆 (必先預訂;NT 550/一份)
花膠佛跳牆 (必先預訂;NT 550/一份)
麻油腰花(必先預訂;NT 450/份)
麻油腰花(必先預訂;NT 450/份)
煎豬肝(必先預訂;NT 320/份)
煎豬肝(必先預訂;NT 320/份)
活處女蟳蒸米糕(必先預訂;NT 1,380)
活處女蟳蒸米糕(必先預訂;NT 1,380)
給遊客欣賞的台菜
給遊客欣賞的台菜

「欣葉食藝軒」位於台北101辦公大樓嘅八十五樓,第一次去原來都幾複雜,因為入口唔易搵,兜黎兜去後又要轉升降機,搭前仲要過埋保安區添。店子紅黑嘅正門及鯉魚牆均滲出時尚又傳統嘅中國色彩。進入大廳即見到台北101嘅畫品,道明分店嘅特色。

網上訂座,流程簡易清晰,對應部門嘅同事遇上問題少男都好有耐性地續一解答疑問。除咗要收取訂金之外,部份菜式必先預訂,而且規定每位客人基本消費為NT 1,080,另加一服務費,如要選坐靠窗位置,基本消費就會高少少。當日因席上有畏高人士,故選擇咗不靠窗位置,真係冇諗到十二人會被安排入座內廳高咗半級嘅開放式廂房內,私人空間足,厚墊椅櫈又夠舒適大方

餐桌上有齊備嘅餐具,整潔衛生。衣著整齊嘅服務生大多客套有禮,不過如果可以友善地加返啲笑容,相信感覺會更良好。因細佬早以電郵訂下大部份招牌菜,用餐前只需加多幾味就已經好夠食:

1)      炸牛膀薄片(免費贈送):唔講真係食唔出第一碟免費小食係牛膀所炸出嘅薄片。金黃閃閃嘅炸牛膀薄片好比薯片般巧薄香脆,食落清香得黎一啲都唔覺熱氣,實屬驚喜之作

2)      醃提子(免費贈送):小肥冇試,不過長輩們都大讚醃提子味道好得意同好開胃。

3)      辣豆乾(免費贈送):小食中以此味辣豆乾最為惹味醒神。

4)      花膠佛跳牆 (必先預訂;NT 550/一份):睇戲時就聽得多,但XO仔咁大個人都係第一次食佛跳牆,故亦十分期盼。如相所示,佛跳牆盅面有塊大大嘅花膠,NT 550黎講絕對足料,可惜以用排骨及雞所煲製黎講,個人就略嫌淡淡嘅湯底唔夠濃甜,就好似煲得味夠火候,佛祖點都跳唔過幅牆咁

5)      麻油腰花(必先預訂;NT 450/份):請留意,圖中之份量為兩份麻油腰花。色澤濃厚嘅湯中每件豬腰均爽厚震撼,其質感脆口之餘仲好夠潤滑,絕對冇話煮到過熟而縮哂水,必吃推介也

6)      食藝軒冷三拼:三色拼盤包有烏魚子、五味宜蘭鮑、白切嫩土雞。每份拼盤單價為NT 960,但份量唔得平均,要十二人都有得分黎食的話,鮑魚為NT 150/隻、烏魚子NT 90/片、白切嫩土雞NT 420/份。三款冷盤都可以用個「乾」字黎形容,明顯唔係細佬杯茶!最重口味嘅烏魚子又咸又嚡又乾;白切土雞欠缺光澤,咬落一啲都唔嫩囉,就連雞皮都唔潤;鮑魚厚身得黎又硬又韌,不吃也吧。

7)      煎豬肝(必先預訂;NT 320/份):睇相都睇得到每件豬肝好夠厚肉,外表亦好夠油潤,無奈食落口微爽得黎有啲硬同粉粉地,似係用火過猛,引致初期肝硬化嘅跡象,勁嘥料!

8)      蚵仔煎(NT 380/份):台灣名菜個煎蛋底外觀好夠金黃吸睛,但就敗在蚵仔唔得肥嘟嘟,加上搵蔥易過搵蚵仔,NT 380絕對有搵笨之嫌!

9)      活處女蟳蒸米糕、活處女蟳蒸米粉(必先預訂;NT 1,380):蟹品菜式必先預訂,可選米糕或米粉作底,伴配藍色醋汁。小肥因敏感問題未有食用,故只能同大家分享靚相。

10)  酥炸花枝丸(NT 70/粒):圓碌碌嘅花枝丸色澤就夠光亮,入口卻過份軟腍,唔得香口鬆彈,甚為失色。

11)  香檳茸炒時蔬(NT 420):反而香檳菇炒菜芳香爽脆,幾夠鑊氣。

12)  蒜香牛菲力(NT 720):已熟透嘅牛菲力粒粒厚韌老嚡,加上肉汁欠奉,真係食唔過

13)  櫻花蝦高麗菜(NT 350):高麗菜新鮮清爽,簡單以櫻花蝦點綴已夠惹味。

14)  招牌杏仁豆腐(必先預訂;NT 120/碗):招牌甜品杏仁豆腐清香嫩滑,微甜易入口。

台北名餐廳「欣葉食藝軒」環境雅致時尚,開揚舒適,可惜服務生之態度及經典菜式之質量甚為參差,遠不及回憶中嘅味道,或許名店進化咗嘅口味較迎合其他遊客喜愛吧,請恕肥肥家族不懂欣賞
推介菜式: 炸牛膀薄片,麻油腰花,香檳茸炒時蔬,櫻花蝦高麗菜,招牌杏仁豆腐
每人消費: 約1800新台幣 (午餐)
評分: 味道3   服務3   環境5   衛生5   抵食2
橘色涮涮屋
橘色涮涮屋
綜合菜盤、和風蕃茄、和風生菜沙拉、和風蘆筍豆腐
綜合菜盤、和風蕃茄、和風生菜沙拉、和風蘆筍豆腐
黑毛和牛嫩肩(NT 3,000/套餐)
黑毛和牛嫩肩(NT 3,000/套餐)
頂級日本松阪和牛(NT 4,200/套餐)
頂級日本松阪和牛(NT 4,200/套餐)
黑毛和牛板腱(NT 2,480/套餐)
黑毛和牛板腱(NT 2,480/套餐)
煮粥
煮粥
甜品:杏仁豆腐、焦糖布丁、椰香雪花糕、節令水果
甜品:杏仁豆腐、焦糖布丁、椰香雪花糕、節令水果
橘色驚喜禮待
橘色驚喜禮待

人氣火鍋店暗黑嘅門面其實有啲難搵,幸好迷途小羔羊入錯咗第二間大廈門口都可以遇上好心人帶路,相信這就是出路遇貴人哦

橘色涮涮屋」品牌嘅「二館」分店全為廂房設計,走廊通道嘅石徑設計和風味濃,襯托上亮燈屏風,裝潢即顯得十分時尚。可能家人身型個個都有返咁上吓,感覺十二人嘅廂房有少少窄,但眼見餐桌上有足夠空間擺放齊備嘅餐具、調味料及兩個大爐,或許是自己過肥而已

初次光臨,翻閱多頁餐牌後都未能決定如何點菜。友善嘅姐姐仔耐心地簡單解說後,得知多位長輩食量不多,就建議十二人不妨點選九份套餐,每四人一組分黎食,唔夠先再追加,細心得很!

落好單,先有熱辣辣嘅清湯兩大鍋。第一道上場嘅為每款套餐都包有嘅「綜合菜盤」。細佬影好相相後,帶著手套嘅肥哥哥即代勞將雜菜有系統地轉移入熱鍋中,衛生非常。「綜合菜盤」中有甜甜嘅粟米魚蛋片、嫩滑嘅豆腐、香軟嘅冬菇、減肥佳品嘅芋絲等。

等待蔬菜煲煮時,各人可先享用前菜套餐前菜共有三款可選,分別為「和風蕃茄」、「和風生菜沙拉」、「和風蘆筍豆腐」。因共點咗九份套餐,小肥就好順理成章咁每款要三客,點知上枱時居然全部都有四客,亦即十二人都有一份!據悉此舉原來係店子特別「招待」,亦即送贈給大家,確真令人感激不盡。前菜中嘅「和風生菜沙拉」因內含果仁,故小弟未有緣一試。鮮紅潤澤嘅「和風蕃茄」已預切成四至五件,蕃茄軟腍多汁,以豉油蒜粒調味即倍添惹味。「和風蘆筍豆腐」嘅主角豆腐幼嫩輕盈,頂面伴配清脆嘅蘆筍及甜甜嘅蟹柳,組合十分清新。

平心而論,三款和牛主菜同樣高質,單憑相片都可以清楚睇到和牛薄片嘅紅白雪花紋理清晰粉嫩,如果唔係同場比較下,當真難而道出大大片嘅「頂級日本松阪和牛」(NT 4,200/套餐)最為軟嫩柔潤。「黑毛和牛嫩肩」(NT 3,000/套餐)嘅脂肪率看似偏高,但入口半溶於口腔嘅同時又帶有微微嚼口,吃畢亦不感到溜滯,個人覺得性價比屬三款套餐中最高也。反而因有對比下,最後上嘅「黑毛和牛板腱」(NT 2,480/套餐)就顯得偏嚡咗少少,不過食落和牛潤而不膩,絕對唔係劣品

套餐嘅單尾同前菜一樣共有三個選擇,分別為以越光米煮出嘅「白飯」、「烏冬麵條」、「煮粥」。哈哈,真係冇諗到十二人竟然會咁齊心地要「煮粥」。粥品同「綜合菜盤」一樣由肥哥哥即場撈煮,即煲即食,包保新鮮滾熱辣。混入咗紫菜蛋花碎蔥等配料煲製嘅靚粥索盡涮涮鍋中嘅精華,每人一碗後仲有得添,份量十足,而且鮮甜濃郁,窩心暖胃。送粥附帶爽脆醒胃嘅醃菜三味,都係有十二份架,這就是盡在不言中的無微不至!

可能係見到酒瓶內仲有半樽酒未飲啦,肥哥哥突然呈上十二碟小食「龍膽石斑南蠻漬」以作送酒之用,似乎這種「招待」應改稱為「禮待」才恰當。

據餐牌所示,甜品環節應有三款可選,分別為「杏仁豆腐」、「焦糖布丁」、「當日甜品」。「杏仁豆腐」清涼微甜;「焦糖布丁」軟滑甜濃;「當日甜品」嘅「椰香雪花糕」則芬芳香潤。除咗每款甜品送上四份之外,最後每人仲額外加送清爽清甜嘅「節令水果」。

和風「橘色涮涮屋」時尚雅緻,服務生體貼好客,十二人只點上九份和牛套餐,卻免費送足十二份配套前菜甜品,驚喜禮待可謂溫情暖意洋溢晚市套餐用料高質,和牛靚粥美味可口,絕對係貨真價實,值得推薦
推介菜式: 頂級日本松阪和牛,黑毛和牛嫩肩,煮粥
每人消費: 約3900新台幣 (晚餐)
評分: 味道4   服務5   環境4   衛生4   抵食4
  0 個留言    |  加入你的留言
發表日期: 2020-02-10

1126日():台北的第四天

離開台北嗰朝早,小肥原本想去新光三越A11內某家卡通主題咖啡屋度打卡兼食早餐嘅,無奈去到先知小店根本冇位坐。因時間有限,一行七人唯有急忙地喺商場另覓餐廳,幸好一上到三樓就俾眼利嘅姨長發現有間「Café MUJI」,快速咁食咗個高質早餐後就返酒店辦理退房手續。由於安排好乘搭晚機走,攜帶住行李走黎走去會好唔方便,XO仔就專登包咗兩架車接送十人,確保團友們唔會走失

午餐揀咗去姨媽們一直念念不忘嘅地道海鮮餐廳「台南三哥海鮮」,不過真係好可惜,闊別幾年後,三哥出品嘅海鮮菜式竟然質素大幅下滑,大不如前,令人大失所望!飯後由年輕友善嘅司機哥哥帶領下,先買多輪手信,再走咗轉「迪化街」,最後喺「北芳園招牌牛肉麵」食咗碗一般過一般嘅台灣牛肉麵後,就去機場。「香港航空」嘅商務搭客喺台灣桃園機場可享用「長榮航空The Star貴賓室」提供嘅餐飲及設備,無奈室內人多擠迫,食物質量同回程機上嘅飛機餐一樣咁低!
Café MUJI
Café MUJI
Café MUJI
Café MUJI
餐牌
餐牌
餐牌
餐牌
冷手沖濃縮咖啡歐蕾(NT 100/大杯)
冷手沖濃縮咖啡歐蕾(NT 100/大杯)
蜂蜜烤雞芥末醬三明治(NT 200/一份)
蜂蜜烤雞芥末醬三明治(NT 200/一份)
檸檬糖霜磅蛋糕(NT 70)
檸檬糖霜磅蛋糕(NT 70)
抵玩快速高質早餐
抵玩快速高質早餐

家人對「無印良品」都非常熟識,亦好有信心,故唔洗多諗就入咗去搵位。意外地,店子樓面頗高,四周木造嘅間隔及傢俬嘅感覺極之溫和舒適,食客可隨意翻閱架上嘅雜誌刊物,輕鬆寫意得很。餐牌只有中文版,甜品款式則附有彩圖參考。落好單,俾哂錢後,友善客套嘅服務生隨即準備餐飲並續一呈上。餐具及開水均設於一旁供食客自助提取。

1)      冷手沖濃縮咖啡歐蕾(NT 100/大杯):咖啡歐蕾香滑冰涼。

2)      蜂蜜烤雞芥末醬三明治(NT 200/一份):即叫即烘嘅蜂蜜烤雞芥末醬三明治底層塊麵包鬆化香脆,雞件厚潤惹味。

3)      檸檬糖霜磅蛋糕(NT 70):反而檸檬糖霜磅蛋糕就偏乾同硬,最為失色

「Café MUJI」光鮮企理,服務生溫婉體貼,早市套餐質高抵食,咖啡又夠濃滑,實屬簡單早餐嘅好去處。
推介菜式: 蜂蜜烤雞芥末醬三明治
每人消費: 約180新台幣 (早餐)
評分: 味道4   服務5   環境3   衛生4   抵食5
降級了的三哥海鮮
降級了的三哥海鮮
白鯧米粉(NT 600/小)
白鯧米粉(NT 600/小)
黑腳太監雞(NT800/半隻)
黑腳太監雞(NT800/半隻)
處女蟳(NT 1,000/隻)
處女蟳(NT 1,000/隻)
處女蟳(NT 1,000/隻)
處女蟳(NT 1,000/隻)
蒜泥蚵仔(NT 400/中)
蒜泥蚵仔(NT 400/中)
香煎烏頭(NT 1,300)
香煎烏頭(NT 1,300)
蕃薯葉(NT200/中)
蕃薯葉(NT200/中)

「台南三哥海鮮」家庭式作業,只限電話訂座,環境依舊咁街坊。嬸嬸得知可以台語溝通即變得友善得多,隨即先送上三款花生、青瓜、自家醃製嘅蛤仔,並強調小食全屬送酒佳品,嘻嘻,咁就要啤一啤佢啦!細佬兩款台灣啤酒都試哂,略嫌兩者嘅口味偏淡同有微微澀,只可以話唔係自己杯啤酒囉

早已知曉店子並無餐牌,XO仔就根據上次嘅經驗點返自己推介過嘅菜式,另加嬸嬸即場提議嘅幾味小菜:

1)      白鯧米粉(NT 600/小):十人用膳,看似人多可以點大份,但由於早已規劃咗會去食下午茶,結果就點咗小份。如相所示,連爐上嘅白鯧米粉細份都好大鍋,夾起哂啲芋頭、蔥、炸白鯧魚件後,可清晰地見到滾湯入面嘅米粉同蠔仔勁足料,無奈今次嘅魚湯底唔係幾夠味,差咁少少火候

2)      黑腳太監雞(NT800/半隻):嬸嬸極力推薦嘅「黑腳太監雞」隻腳當真係黑色架;點咗半隻雞,所以只見一隻黑腳。雞隻明顯好大隻,不過皮下脂肪唔多,外表健康得黎有光澤。正當大家以為太監雞嘅肉質會較為幼嫩時,食落口雞肉卻偏嚡帶韌,加上皮層仍可見到不少雞毛,衛生方面亦大打折扣,請恕小弟未能推介。

3)      蕃薯葉(NT200/中):鮮綠色嘅蕃薯葉質感軟身得黎帶點嚡口,而且調味過咸,不吃也吧。

4)      蒜泥蚵仔(NT 400/中):最令XO仔失望必選個人最期待嘅蒜泥蚵仔!碟上嘅蚵仔體積雖則看似肥潤,可惜用粉過多,咬落又腍又黏,毫不鮮甜,亦談不上惹味,碟底仲要水汪汪咁,難怪個個食到搖哂頭

5)      香煎烏頭(NT 1,300):據姨丈所講,整頓午餐最好食就係此味香煎烏頭,不過小弟因為怕骨冇試到。

6)      處女蟳(NT 1,000/隻):萬眾期代嘅處女蟳外殼橙紅鮮美,上枱時夠哂震撼!但係當姨媽打開黎睇,即發現蟹膏不單色澤暗淡,不甚濃厚,吃畢更齊聲地有彈冇讚,完全唔掂當呀

7)      清炒水蓮(NT 200/中):最後碟水蓮菜外觀還好,但咬落老嚡之餘,仲要勁多渣,結果最怕浪費食物嘅長輩們都話與期食到成碟渣,倒不如食剩可能會好過啲。

相隔幾年再訪「台南三哥海鮮」,環境人物冇變,唯一食物質素明顯下降。市內不乏食肆,睇黎都唔會再返轉頭。
每人消費: 約630新台幣 (午餐)
評分: 味道2   服務2   環境3   衛生3   抵食2
北芳園招牌牛肉麵
北芳園招牌牛肉麵
北芳園招牌牛肉麵
北芳園招牌牛肉麵
自助調味料及開水
自助調味料及開水
自助餐具
自助餐具
餐牌
餐牌
電子落單
電子落單
半筋半肉清燉王牛肉刀削麵(NT280/淑女)
半筋半肉清燉王牛肉刀削麵(NT280/淑女)
半筋半肉清燉王牛肉刀削麵(NT280/淑女)
半筋半肉清燉王牛肉刀削麵(NT280/淑女)

訪台四天,點都要食返碗台灣牛肉麵先算遊過台北嘅,臨去機場前就應旅遊書推介一試「北芳園招牌牛肉麵」。

下午茶時間,麵店內只有兩枱客,所以唔洗排隊,座位仲任揀唔嬲添。店子面積不小,中間一排四人方形枱,埋邊則為二至多人嘅半梳化式散座,都幾闊落。一頁餐牌中英對照,並附帶彩圖及標明價格,清晰易明。點菜已全面電子化,十分先進,流程簡單快捷。餐桌上設有自助餐具,仲有個「服務小叮嚀」牌仔,提醒貴客如對麵品有任何不滿,可即時反映,廚房會馬上調整,似乎要求相當認真。收銀員態度溫和,知道十人為遊客顯得都好有耐性,告知調味料及開水必需喺出面自己攞。由於食完午餐冇幾耐,為怕浪費食物,全體都決定一嚐份量較少嘅「淑女版」,當中長輩大多都選擇食細麵。

1)      半筋半肉清燉王牛肉刀削麵(NT280/淑女):麵品個湯底淡而無味,也過份地清了吧!入面嘅牛筋同牛展極其量只可以話係普普通通,冇乜特別;而粗厚嘅刀削麵雖然好夠嚼口,食落整體卻欠缺香濃及火候,一般到完全唔會令人想返轉頭嗰隻。

「北芳園招牌牛肉麵」嘅牛肉麵當真質量不甚突出,或許其環境比其他台灣牛肉麵店大間及企理,方才得到旅遊書籍嘅推薦,不過以NT 280/細碗咁嘅價位黎講,個人覺得市內實在有太多更好嘅選擇了。
每人消費: 約280新台幣 (下午茶)
評分: 味道2   服務3   環境3   衛生3   抵食1
人多食物差 哭臉2020-02-10
長榮航空The Star貴賓室
長榮航空The Star貴賓室
長榮航空The Star貴賓室
長榮航空The Star貴賓室
自助區
自助區
自助飲品區
自助飲品區
糕點
糕點
熱食菜式
熱食菜式
烏冬
烏冬
由於「香港航空」於台灣桃園機場並無設置自己嘅貴賓室,乘坐商務機艙嘅旅客就被安排候機時享用「長榮航空The Star貴賓室」嘅設施。原來「長榮航空」喺同一層內有成四個貴賓室咁多,「The Star」只係其中之一個貴賓室嘅接待處有個機械人,不過係用黎做乜就冇探究。進入內廳,即驚見四周早已坐滿搭客,十人結果要搭枱先搵到位坐,真係幾誇張吓。自助食物區內最穩陣相信都要數飲品,有咖啡機、罐裝汽水、啤酒、紙包果汁、樽裝凍茶等,亦有多款酒品可選,不過當然唔會係高檔貨啦!食物其實用一個字已可形容得到:麵包糕點唔係又乾又硬就成pat野咁,喺熱爐暖住嘅菜式大多過熟而變得嚡口,加上調味欠奉,見到都唔開胃,可謂萬二分恐怖!
評分: 味道1   服務1   環境2   衛生2   抵食1
香港航空 HX283班機
香港航空 HX283班機
餐牌
餐牌
餐牌
餐牌
餐牌
餐牌
餐牌
餐牌
餐牌
餐牌
輕膳之香草紅酒燴牛肉配烤紅皮薯及雜菜
輕膳之香草紅酒燴牛肉配烤紅皮薯及雜菜
香草紅酒燴牛肉配烤紅皮薯及雜菜
香草紅酒燴牛肉配烤紅皮薯及雜菜
「香港航空」HX283班機選用A330型號班機,舊款商務艙座位並非獨立式,但都好夠空間。空中服務員態度雖不算惡劣,但亦不甚友善。晚上八點起飛嘅航班包咗三道菜輕膳,頭盤「時令鮮果」又凍又酸,主菜「香草紅酒燴牛肉配烤紅皮薯及雜菜」嘅牛肉同雜菜均厚而乾嚡,甜品「芒果朱古力慕絲」則淡而無味,唔得軟潤,最正只有蒜蓉包同名牌朱古力方塊
評分: 味道2   服務2   環境3   衛生3   抵食2
  0 個留言    |  加入你的留言