蕃薯Uncle話遊新加坡一定要食餐娘惹菜，每次講起更會眉飛色舞地講解菜式嘅來歷，話係多年前中國人與星、馬、印等人跨種族婚姻嘅結晶，由當時嘅女性混入多國傳統料理所獨創嘅住家菜。為咗要滿足饞嘴嘅佢，XO仔就四周探究食邊間好，結果親友及網評都一致推舉「National Kitchen by Violet Oon」。

餐店以主廚兼老闆娘嘅大名「Violet Oon」作寶號，喺新加坡開設咗成五間分店之多，人氣十足。揀咗去「National Kitchen by Violet Oon」分店晚膳，並於網上訂座，流程唔算複雜，英語嘅電郵通信簡單快捷，客人除咗要提供一張信用咭作保證之外，十多人嘅派對必先預設餐單，最低消費額為每人SGD 100，其中SGD 20可用落飲品度。

位於「National Gallery」嘅餐廳樓底高高，裝潢華麗有格調。窗外嘅大草皮身後就係「Marina Bay Sands」，連個景都有氣派過人。派對被安排於用餐大堂中央位置進行，以多張光亮嘅雲石餐桌合併成一張長枱，接駁位難免有凹凸不平，不過大肥爸爸覺得最唔舒服就係啲椅背唔夠高及冇手柄嘅木櫈。

令小肥不滿嘅反而係聲稱為高級餐廳嘅服務質素！平心而論，既然菜單早已寫好，唔計傳菜，服務生主要都係處理飲品，真係冇諗到除咗經理叔叔一個人之外，店內嘅全為生手，就連長輩要杯熱水或多張餐巾都足以令佢地慌張起黎！細佬一埋位就叫咗枝紅酒同香檳，紅酒好快就有，但枝香檳就要等到食完頭盤先出現，用餐時當然亦唔會有人自動波去加添酒水或換碟啦，自己要求得多都覺得煩厭呀！服務生雖然冇黑面，但明顯係冇乜心嗰隻囉！

自訂十道菜餐單中主要都係揀選咗推介嘅鎮店名菜。上枱時每碟份量看似細小，但食落卻相當溜滯：

1)      Starter Trio - Ngoh Hiang, Kuay Pie Tee, Chicken Satay：三色前菜以拼盤呈上，相片中左起為五香海鮮雞肉、小金杯、沙嗲雞。個人覺得三款重口味嘅小食雖然係有醬汁，但食落清一色地又乾又嚡又硬，打響頭炮黎講絕對唔多掂！

2)      Beef Rendang：仁當牛肉嘅碟盤載滿紅紅嘅辣汁，食落唔算好辣，不過敗筆在於牛肉唔夠腍，肉質又韌又嚡，眼見全枱人都食剩大半就知不吃也吧！

3)      Fish Tempra：炸魚係就係唔油，但係又硬又實，唔用刀真係切唔開，調味同時又甜又酸又咸又辣，只可以話唔係自己杯茶囉！

4)      Butter Prawn：色澤金黃嘅牛油蝦只屬和暖，幸好質感尚算爽彈，最奇怪就係拌入膠膠地又唔脆嘅牛油蛋絲，個口感組合唔係太協調。

5)      Chap Chye：喺高級餐廳食嘅娘惹雜菜嘅賣相有啲似南乳羅漢齋，濕濕腍腍，普通過一般酒樓水準。

6)      Jasmine Rice：因加咗三客海南雞飯分黎食，深知團友們根本冇可能每人再食多成碗白飯，所以落單時就同經理叔叔講話為怕浪費食物，叫佢只係出八碗白飯就夠，點知佢居然話點咗就要出，浪費就隨意吧！請恕細佬愚昧，既然客人主動提出減少份量但唔係唔俾錢喎，為何餐店仍堅持要將白飯呈上後再棄掉呢？！

7)      Dry Laksa：所謂「乾叻沙」其實即係叻沙意粉，廚師好似分子料理咁將叻沙湯底變成叻沙醬後煮出大蝦，再混入烚好嘅麵條就搞掂。乾叻沙嘅麵條煙煙韌韌，大蝦爽厚彈牙，伴入香濃嘅叻沙醬，菜式濕潤惹味，相當不錯。

8)      Hainanese Chicken Rice (SGD 20)：另叫嘅海南雞飯每客均一盤上，包咗五件海南雞、一碗雞飯、一碗湯、及三款蒜蓉、豉油、辣醬調味。雞飯嘅飯粒偏硬唔得軟熟，呈粉紅色嘅海南雞肉滑得黎唔嫩，食落仲有少少韌添，湯品淡而無味，SGD 20絕對不值！

9)      Kueh Beng Kah：成餐飯最正就係兩款甜品。木薯糕香軟鬆潤，由於甜得黎都幾溜吓，所以薄薄一片份量剛剛好。

10)  Pulot Hitam with Coconut Ice Cream：黑糯米微甜輕巧，連同清涼嘅椰子雪糕食即倍添柔滑。