名店集中地「Ginza Six」新建於2017年，屬銀座區內規模最大嘅購物中心，地庫層嘅商店主要都係同飲食有關，吸引到XO仔嘅係舖面尤其鮮明嘅「10FACTORY 銀座店」！

小店源於「柑橘王國」愛媛縣，品牌以不同品種嘅愛媛縣柑橘製出果汁、汽水、果醬、糖果、朱古力、雪糕等柑橘美食。店內有售肥肥家族最愛嘅朱古力柑橘乾；由於家人都比較抗拒白朱古力，細佬可以慳返少少。兩款朱古力柑橘乾中，「Orangette」（324円/件）嘅柑橘果乾明顯較為厚潤，朱古力脆皮同柑橘果香兩者嘅甜味好夾。不過更為乾脆嘅「Chocolate Mikan Rusk」（324円/件）就少咗份嚼勁，而且味道冇咁甜濃，唔係咁啱細佬口味。

全店最具人氣就係要排隊購買嘅柑橘飲品及甜品，有果汁、茶、汽水、酒、雪糕等七款可選。小肥第一杯先飲橙亮嘅柑橘果汁「Fresh-Squeezed Mikan Juice」（680円/杯）。鮮榨果汁十分清涼，而且鮮甜無比，實不用錯過，必喝推介也！至於杯柑橘啤酒「Mikan Biiru」（680円/杯）其實即係柑橘果汁溝啤酒，飲落唔似啤酒之餘仲失掉咗柑橘本身嘅鮮甜，組合有啲不知所謂，超唔掂囉！