選乘大韓航空購下商務票，旅客可於「天合聯盟香港貴賓室」候機，不過室內並無廣播服務，大家要自己留意登機時間。

長形嘅貴賓室面積寬廣，最入嘅偏廳有多張獨立梳化櫈，大部份嘅白色枱仔都有插蘇位，方便旅客可邊等邊叉電。除咗個較輕鬆舒適嘅偏廳之外，中央有個大型少少嘅用餐大堂，散座嘅餐桌大啲又高啲，只係枱面唔係太乾淨。

尾段拍牆為自助飲品區，有咖啡機、啤酒雪櫃、汽水、蒸餾水等等。XO仔就當然係選擇飲酒啦！自選食物中有西式嘅麵包、三文治、沙律、甜品等。最有型都要數部班戟機，少入廚嘅小肥都係第一次見。亞洲菜中都有不少熱食及炸物。唯一要排隊嘅就係個麵檔，由專人即點即煮四款麵品。由於出門口前已經喺屋企食咗晚飯，細佬就簡單啲試咗碗台灣牛肉麵。牛肉麵只屬微暖，湯底稀而味淡，麵條同牛展塊一樣偏硬，個人覺得唔係好掂。

大韓航空於韓國仁川國際機場嘅商務貴賓室「KAL Lounge – Prestige Class」環境開揚寬廣，有獨立方形廂座、二人單邊圓枱仔散座、梳化式客廳位、餐飲部合拼式長枱及圍繞嘅酒吧嘅卡位。同香港個「天合聯盟香港貴賓室」一樣，室內最不缺乏就係叉電插蘇同埋會添嘅紅酒、白酒、烈酒（對唔住，當日啤酒機壞哂。。。）。

、乳酪、鬆餅食，唔怪得知個個都選食韓式杯麵啦！約六點半左右終於有早餐熱食出爐，無奈水準唔係咁高，小肥只好主攻咖啡同乳酪

大韓航空長途機KE 73選用B787-9型號班機，商務艙之獨立座位同頭程一樣咁好坐，且空間感足，音響隔音系統出色，細佬啲戲接住黎睇，成功追咗幾套新片，正呀！遺憾在於空中服務員笑容欠奉，而且只會按本子辦事，毫不體貼，亦不細心。

字黎形容！

」則香脆甜美，邊食邊嘆埋杯香檳確真享受。臨落機前有份「簡單的用餐」，主菜「中式海鮮豆腐」還過得去

，不過個蒜蓉包就硬到咬唔到，

機場酒店「Sheraton Gateway Hotel in Toronto International Airport」連接著多倫多皮爾遜國際機場，入面間西餐廳「Sheraton Mahogany Grill」最方便啲早機及轉機嘅旅客休閒地享用早、午、晚餐。店子樓底唔高，不過舖有地毯，所以人多都唔覺嘈吵，無奈中午時份樓面只有兩位服務生，雖則其態度唔係惡劣，但明顯各佔不同地盤，落單、斟水都要等同一個人得閒先做，效率就唔係特別高。

最好彩就係啱啱坐完長途機攰多過餓，因餐店嘅午餐份量雖多，但水準一般過一般：

1)      Soup of the day（CAD 10）：是日例湯之芝士西蘭花忌廉湯一啲都唔算杰，但味道實在過咸，真係食唔過！

2)      Mahogany Caesar （CAD 17）：大大碟凱撒沙律爽脆鮮濃，係成餐飯最好食嘅一味。

3)      35 Day Aged 8oz AAA Striploin (CAD 37)：原本點咗要「medium rare」嘅牛扒一刀切落去一啲粉紅都唔見，過熟程度似係「medium well」多啲囉，肉質偏韌同硬，即使夠薄都有啲難咬，當真不吃也吧！

經常外遊嘅哥哥早已成為「希爾頓榮譽客會」，今次去加拿大探親，見集團企下嘅「Hilton Toronto/Markham Suites Conference Centre & Spa」就喺契婆家附近，離主要嘅高速公路又近，位置極之方便，所以唔洗多諗就決定一試。

酒店限定下午三時才可辦理入住手續，退房則定為早上十一點。住客可以優惠價十蚊加幣於停車場內泊一日車，車位全部可用頭入，非常易泊。一家四口入住之豪華套房共有兩間雙人房、兩個洗手間及一個大客廳，面積寬廣，且極為舒適。客廳內除咗有梳化同大電視之外，仲有張大大嘅玻璃飯枱。雙人房空間足，單人及雙人床都好大好彈。套房唯一最大嘅問題就係兩個洗手間入面只有一間有得沖涼，當真奇怪得很！

「漁膳房」為多倫多Richmond Hill嘅一家中菜廳，門外有多個車位供食客免費泊車。除咗門面極有氣派之外，接待大堂亦可見魚缸內多隻生猛嘅海鮮游黎游去。用餐大堂樓底高高，光線充裕，環境十分時尚雅致。

契婆特別點咗個「六人溫蟹龍蝦套餐」（CAD 468）為肥肥家族洗塵：

1)      刺身拼盤：刺身拼盤嘅冰陣效果十分吸睛，七款魚生均鮮香潤甜，極之美味。

2)      燉湯：大大盅圓肉燉雞湯每人可分成兩碗，不過湯品淡而無味，請恕細佬直言，真係情願飲一碗濃味啲嘅燉湯，都好過飲兩碗稀稀嘅。

3)      十磅避風塘龍蝦：金黃橙美嘅龍蝦山可以話係全餐最震撼嘅一道！龍蝦爽厚彈牙，香辣惹味，正爆！

4)      油爆鱔球（中）：鱔球又腥又多骨，食唔過。

5)      磅半蒸青斑：XO仔都係第一次見到中式蒸魚會豉油另上，食落的確係冇咁油同健康啲，但係魚肉就偏嚡同老，唔得嫩滑，感覺好似欠缺火喉咁。

6)      五磅蒜蓉蒸溫蟹：蒜蓉蒸溫蟹一上枱時即食的話確真鮮甜香濃，無奈餐店上餸速度太快，要食完避風塘龍蝦先轉食「溫」（暖嘅）蟹就流失咗啲鮮味。

7)      上湯豆苗（中）：豆苗色澤鮮綠，調味都好清。

8)      龍蝦膏炒飯：同龍蝦一樣成座小山丘嘅龍蝦膏炒飯好夠乾身，而且好足料，香口爽脆，惹味非常！

入住「Hilton Toronto/Markham Suites Conference Centre & Spa」，哥哥所選嘅房間包享「Hhonors Executive Lounge」之餐飲及設備。貴賓室猶如一個大客廳般，闊落舒適；有梳化椅位置睇電視、小偏廳俾人睇報紙、及幾張合併式餐桌，任貴客隨意入座。

位於「Toronto Dominion Centre」（多倫多道明中心）五十四樓嘅「Canoe Restaurant」分開餐廳及酒吧兩個位置。用餐大堂面積寬廣，裝潢有格調，高層更有無敵靚景，環境高雅大方。餐桌均配上厚墊椅櫈，闊落舒適。四周用上木造嘅地板、敞門，再配上不少樹幹及盆栽擺設，感覺簡潔且富大自然嘅色彩。服務生友善專業，知悉幾位長輩食量不大，點菜時更建議可以頭盤作主菜，部份主菜更可安排廚房一開為二，細心得很！

西餐廳嘅午市餐牌只有一頁，一系列嘅潮派加拿大菜式精美豐盛，色香味俱全，實不容錯過：

1)      Wild Mushroom Soup (CAD 13)：忌廉蘑菇湯以新鮮雜菌攪成雜菌蓉，菇味輕盈芳香，師傅喺湯面刨上蘑菇薄片即為湯品增添口感。

2)      Steak Tartare (CAD 21/Starter)：牛肉他他色澤鮮紅，濕潤軟嫩，香濃惹味。

3)      Pasta of the Day：是日意粉為細佬最愛嘅雜菌風味，闊身扁平嘅意粉麵條煙韌有彈性，厚切蘑菇方塊軟腍入味，簡單可口。

XO仔唔算係「星巴克」嘅鐵粉，但因從契妹口中得知名咖啡屋嘅美加分店於三月份推出咗個限量特飲「Crystal Ball Frappuccino」（水晶球星冰樂），所以就襯靚靚媽咪喺「Toronto Eaton Centre」（多倫多伊頓中心）購物時就走咗去買杯黎試。

小小嘅咖啡店躲藏在大型書店嘅後方，木造嘅枱櫈都已坐滿客人，幸好小肥只係買外賣而已，唔洗搵位坐。服務生態度正常，但效率就唔係咁高啦，最要不得就係擺放自助餐具嘅枱頭黐立立，衛生欠奉！

綠嘅色調，但細佬嗰杯卻只隱約透出少少綠色，灑上忌廉面嘅亦只有零碎嘅棗紅色糖粒，點睇都唔似水晶球，個人覺得有啲貨不對辦囉！小肥真係飲唔出特飲嘅糖水味有任何桃味，這個水晶球由外表到味道都一樣咁唔魔幻，用「宇宙最弱」黎形容一啲都冇誇張架！

多倫多不乏中餐廳，幸得大肥於當地嘅好友介紹，先可與親友一試區內較新嘅「全聚德」。店子門面極有氣派，除咗兩隻獅子陣守正門，大大個招牌仲有隻鴨大廚代表歡迎賓客。室內樓底高高，光猛企理，四周有小紅燈籠高高掛，不過最型就係中央嘅透明山水畫屏風，富中國色彩得黎極為時尚。

大肥請客，例必預先訂埋菜，因宴席剛好有十人之多，佢就應推介點咗個「節日8-10人套餐包房專用B餐」（CAD 888）。新店服務體貼稱心，飯前經理哥哥先拎出原隻龍蝦「show一show quali」，之後每碟送上枱時都會略作簡解，仲會俾足時間大家相機先食；有專人幫忙撈起；招牌「盛世牡丹烤鴨」有師傅即場片皮起肉，砌出牡丹，實在令人嘆為觀止！就連餐具都用上鴨型筷子座及3D鴨鴨碟，淨睇視覺效果已經好「Duck」！

十人套餐共有十三道菜，當中有冷盤、湯、雞、牛、豬、鴨、龍蝦、鮑魚、魚、海參、豆腐、菜、甜品，相當豐富：

1)      五彩拌金銀時蔬：為晚宴作序嘅蔬菜冷盤等同「撈起」，由經理哥哥親自喺五色嘅青瓜絲、蘿蔔絲、雲耳絲、芽菜絲、紅蘿蔔絲淋上秘汁，即場撈製而成，好有睇頭！五彩撈起微辣清爽，輕盈健美。

2)      老店醬肉雙拼：同樣為凍食嘅兩款醬肉為燻蹄及牛展，食客可自行點上豉油食用。相中左邊嘅燻蹄質感爽脆，右邊嘅牛展都好入味。

3)      鹽水鴨肝：鹽水鴨肝已預先切成薄片，香潤易入口，點上辣油則更為惹味。

4)      松茸鴨舌貝絲羹：每位客人面前都有一盅鴨舌羮以明火滾住上，夠哂熱辣辣！大大碗鴨舌羹內含軟滑嘅鴨舌、乾瑤柱及松茸菇，羮品芳香厚濃，滋味無窮。

5)      盛世牡丹烤鴨：「全聚德」主打烤鴨由師傅喺旁邊展示刀功，切出薄薄嘅鴨肉後仲重組成一朵牡丹花形，令席上嘩聲四起，震撼得很！烤鴨肉香皮脆，肉質鬆軟腍潤，美味可口！

6)      八磅龍蝦：八磅龍蝦肉厚爽脆，鮮甜香濃，正呀！

7)      蔥燒海參：蔥燒海參厚潤爽滑，簡單味佳。

8)      黃金貝絲豆腐：外表確真金黃嘅炸豆腐皮層香脆，豆腐心熱辣嫩滑。

9)      金牌松鼠魚：細佬外遊最怕哽骨，故唯一咁多味菜入面冇試到條魚。

10)  宮保雞丁：雞丁香辣惹味，且爽潤有彈性。

11)  皇子菇扒豆苗：鮮綠嘅豆苗清新爽甜，伴上厚潤嘅皇子菇則倍添清香。

12)  松茸鮮鮑丁：切成粒粒嘅鮑魚混入咗松茸菇粒去炒，鮮香輕巧，柔潤煙韌，都幾得意。

位於「Queen’s Quay Terminal」嘅「明珠酒樓」樓底唔係好高，但勝在環境優雅，服務佳，最殺食就係窗邊嘅散座可欣賞到「Ontario Lake」（安大略湖）嘅湖景，視覺絕對係一種享受。

中菜廳嘅點心菜式喺美加黎講算係唔錯，但午餐最有水準必選「榨菜肉鬆煎米餅」：

1)      香茜牛肉腸 （中點）：半透光嘅腸粉質感柔軟，香茜牛肉餡心亦嫩滑清香。

2)      干扁四季豆（特點）：四季豆微辣香脆，不過以特點黎睇份量就好似細碟咗啲。

3)      鮮蝦燒賣（中點）：如相所示，燒賣當真用上原隻鮮蝦所製，咬落爽脆香潤，比起香港好多中餐廳都做得更美味。

4)      潮州粉果（中點）：粉果因內含花生，細佬冇食到，不過大肥就嫌個皮粉咗啲。

5)      雪花蝦餃（大點）：蝦餃尚算清香爽甜，無奈餃皮唔夠輕盈，就係差咁嗰少少。

6)      鼎湖上素餃（中點）：上素餃係咁多款點心中最厚皮嘅，而且味道亦最為淡口，不吃也吧。

7)      干蒸牛肉（中點）：又大又圓嘅干蒸牛肉鬆厚香嫩。

契舅父與契舅母自結婚已移居加拿大，極少返港，XO仔都係今次探視先初次認識契舅母，並發現原來佢喺美加飲食界及各大社交網站相當活躍！有食家帶領，方才有幸於古堡「Casa Loma」（卡薩羅馬城堡）內用餐。

旅遊景點有代客泊車服務，收費比停車場貴少少。入夜後嘅堡壘外圍綻放出神秘嘅光芒，一級一級步進高高嘅城門，感覺有氣派極！枱頭一望，即留意到接待處用上雲石作牆，以白色射燈照出扒房「Blueblood Steakhouse」個標誌，型格時尚得很。宏偉嘅城堡樓底極高，吊燈嘅花款有古式嘅亦有新潮嘅，最潮當然係餐廳入面嗰啲啦！

據悉，店子每天爆滿，訂座不易，可能正因如此，服務生總是忙個不停，連耐性都好似差咁啲啲。西餐廳嘅食物餐牌合共有三頁紙，反而多頁電子酒牌就造到成個木盒咁，明顯邊樣最賺錢！堡壘餐廳以牛扒聞名，不過大小雙肥都覺得菜式中最正就係兩味牛肉他他連牛骨髓及生和牛薄片頭盤，而最有睇頭就係鬍鬚叔叔即場煮製嘅甜品：

1)      French Onion Soup – Housemade Croutons, Gruyere (CAD 16)：法式洋蔥湯以鐵碗承載，故熱力十足。洋蔥湯味道鮮濃，最正就係面層入哂味塊芝士，香軟無比，不過一個人飲哂成碗洋蔥湯絕對會好滯，建議可以三、四個人分一碗，咁就可以試多幾款美食。

2)      Wagyu Beef Carpaccio – Truffle Crumb, Pickled Mustard Seeds, Garlic Chips (CAD 32)：生和牛薄片色澤粉嫩，溶於口中，簡單捲入頂面嘅松露碎碎及蒜片足以為靚靚和牛添上香濃惹味，堅掂！

3)      Prime Steak Tartare in Bone Marrow Canoe – Cured Duck Egg, Housemade Pickles, Toasted Sourdough (CAD 26)：混入咗牛骨髓嘅牛肉他他鮮紅潤澤，肉香軟嫩，塗上烘熱嘅包品上黎食可一解膩感。

4)      Jumbo Lump Crab Cake - Dill Aioli (CAD 24)：蟹餅雖炸至金黃，其皮層亦為鬆化，無奈當中嘅蟹肉餡心帶點嚡口，質感唔得幼嫩，加上調味過酸，請恕細佬未能推介。

5)      Crispy Kale - w/ Lemon Aioli (CAD 16)：潮流興食羽衣甘藍，但係小肥都只係食過沙律原味版，總覺得味道有啲苦。。。意外地，黎到新潮堡壘餐廳竟然可以食到香脆輕盈嘅羽衣甘藍薄片，以檸檬蛋黃醬點綴實在清新美味！

「The David Duncan House」外觀看似為一間教堂，室內四周可見金光閃閃嘅擺設及燈飾，兩層高嘅西餐廳裝潢傳統典雅有氣派。地上有華麗吸音嘅地毯，餐桌與餐桌間夠空間，厚墊椅櫈十分舒適，年長嘅服務生亦非常客套，淨坐都覺得好享受。西式午餐各有各點，個人因宗教理由只係食咗半份沙律同焗蠔，質量相當不錯：

1)      Fresh Oysters (CAD 26/6pc)：生蠔可選半打或一打，大肥教落外遊最好食熟蠔，所以就揀以芝士菠菜焗製。熱辣辣嘅芝士菠菜焗生蠔肥美滑溜，香濃鮮甜。

哥哥深知洛杉磯機場超級繁忙，出入塞車又麻煩，所以就安排入咗城後第二朝早先去玩租車。純粹因為大肥爸爸出發前喺網上發現「Enterprise Rent-A-Car」有復活節優惠，見間公司口碑都幾好，結果就預訂咗架七人車。

小肥兩兄弟預鬆咗時間去排隊攞車，點知撞啱租車公司嘅洗車服務有故障，原本訂咗嗰架車未黎得及清潔，為怕二人要等好耐，哥哥仔就好友善地建議不如轉租第二架車。有契妹喺電話旁教路，得知被推介嘅「Nissan Armada」雖則馬力好，但更食油時，XO仔當然係扮哂識野咁即場提出啦，點知哥哥仔好客氣地自動減低租車費，以作抵消超出預算嘅油費，相當識做！

「彌敦閣」係長輩們經常光顧嘅一間中餐廳，食客可於門外嘅免費停車場泊車，區內算係幾易搵位。店子並無花巧嘅裝潢，但勝在空調足，十多人用餐可於廂房內進行。家人係熟客仔，與服務生嘅關係十分良好，亦清楚知道某幾款招牌菜式必需預訂，故質量有一定嘅保證：

1)      齋腐皮卷（USD 44/十六件）：腐皮卷皮層巧薄，素菜餡心量足飽滿，整體香口爽脆。

2)      脆皮江南百花雞（USD 46/隻）：講真香港都唔係度度肯做江南百花雞，因為要先將原隻雞起哂骨，再釀入蝦膠，功夫實在好多，又唔賺得多，喺美加食得到可以話係好有驚喜，仲要真係做到金紅脆皮，雞肉蝦膠個組合鬆軟彈牙，確真難能可貴，值得一讚再讚！平心而論，如果隻江南百花雞同十六件齋腐皮卷差不多價的話，細佬絕對會要多隻百花雞囉，呵呵呵！

3)      鎮江骨（USD 16.99/煲）：用煲上嘅鎮江骨熱力十足，肉質軟腍惹味。

4)      彌敦焗蟹（USD 55/隻）：蟹肉鮮甜幼嫩，墊底嘅焗飯濕潤且入哂味，冇得頂呀！

日式燒肉店「Manpuku Tokyo BBQ Dining」位於Torrance區內一個勁多日本餐廳嘅廣場內，泊車全為免費，十分方便。地舖面積寬廣，店內簡單以和式嘅擺設點綴，雅致大方，最重要就係抽氣良好，室內完全冇話煙霧迷漫。年輕嘅日籍服務生態度溫婉，友善好客，嘻嘻，知悉XO仔識講幾句日文仲嗲多兩咀添。長輩有成十多個，後輩四人就分開自己坐，好隨意地咁點咗個有齊前菜、沙律、虎蝦、豬腩肉、牛肉、牛扒、湯、石頭飯、雪糕嘅「PRIME for 4 Course」（USD 175）。嘩，個四人餐份量可真謂超強，十二道菜均用料新鮮，調味堅掂，咁嘅價錢絕對係大件夾抵食：

1)      PRIME for 4 Course (USD 175) – Edamame：枝豆翠綠清脆。

2)      PRIME for 4 Course (USD 175) - Assorted Kimchi：三色泡菜香辣惹味，濕潤得黎仍能保持脆卜卜。

3)      PRIME for 4 Course (USD 175) - Cabbage Salad：椰菜沙律淋面嘅蒜香秘醬份量恰到好處，菜式輕巧清爽，正爆！

4)      PRIME for 4 Course (USD 175) - Wakame Salad：拌入咗薄薄嘅青瓜片及幼幼嘅蔥絲嘅麻醬海藻沙律爽脆醒胃，同樣味佳。

5)      PRIME for 4 Course (USD 175) - Prime Short Rib "Kalbi Shio"：用鹽醃過嘅牛肉薄片面層舖滿東京洋蔥碎，哥哥熟手地燒煮一邊，約三、四成熟即續件捲起分派俾各人，牛肉洋蔥卷清新爽潤，滋味無窮。

6)      PRIME for 4 Course (USD 175) - Assorted Prime Marinated Beef - Sliced marinated prime ribeye, short rib, outside skirt：三款靚牛色澤鮮紅，紅白紋理清晰，肉味香濃，口感雖有不同，有啲部位較鬆軟，有啲更為爽潤，但全部肉汁豐沛，各有各美味。

7)      PRIME for 4 Course (USD 175) - Pork Belly with Wrapping Lettuce：真係不得不再讚大廚哥哥手勢好，可以將靚靚嘅豬腩肉燒得咁香脆，捲入泡菜後以生菜包住，效果尤其爽脆香口！

8)      PRIME for 4 Course (USD 175) - Ribeye Steak：調好味嘅肉眼扒厚潤有彈性，夾上脆薄嘅蒜片確真冇得彈！

9)      PRIME for 4 Course (USD 175) - Black Tiger Shrimp：虎蝦爽脆彈牙水份足，都係咁掂。

10)  PRIME for 4 Course (USD 175) - Yukke Jan Soup - Spicy soup with beef, vegetable & tofu：細佬因為怕辣冇試到。

11)  PRIME for 4 Course (USD 175) - Ishiyaki Garlic Rice：石燒香蒜飯當真以石鍋上，並由姐姐仔熟巧地即場加工撈製，熱力沒法擋！石鍋飯粒粒飽滿肥潤，混有適量嘅醃菜及香蒜足以令飯品暖胃消滯，索咁之前啲靚肉嘅油份，妙哉！

位於山上嘅「St. John Fisher Church」環境幽靜，空氣清新，四周圍走走已覺心曠神怡，心靈舒暢。外表樸實嘅教堂擁有不少設施，包括骨灰龕位、學校、禮堂、活動室等，教會更不時舉辦親子、教學、傳道活動，喺區內可算相當活躍。

復活節係西方大節日之一，為隆重其事，名度假村「Terranea Resort」入面嘅「Catalina Kitchen」專登搞咗個比平時更大型嘅復活節自助早午餐。酒店有提供收費嘅代客泊車服務，但行少少路就有好多免費車位，不過節日預咗會多人，想泊到免費位就要早啲到。

「Terranea」擁有優雅嘅環境，最殺食就係個無敵海景，可謂又靚又夠氣派！為咗可以俾貴客盡情欣賞靚景，西餐廳嘅座位全為室外座，頭頂均有大大嘅太陽遮，四周亦擺有高高嘅暖爐，絕對唔需要擔心會被猛烈嘅太陽曬親、大雨弄濕、或寒冷嘅天氣凍病。

日式串燒店「Torihei Yakitori Robata Dining」同早一晚去嘅「Manpuku Tokyo BBQ Dining」位於Torrance區同一個日本店聚居嘅廣場內，泊車全為免費，方便得很。地舖面積唔算特別大，樑上及牆身只用酒樽及幾幅畫作簡單裝飾。室內抽氣算係唔錯，起碼唔會好煙，圍繞著開放式廚房有十多個吧位，其餘圍牆嘅散座全為合併式，人多可以拍埋坐，只係會迫少少。日籍服務生可以講流利嘅英語，溝通完全冇問題，而且友善有禮。長輩請客，所點嘅串燒菜式優質美味，送埋啤酒梗係冇得頂啦！

1)      Sapporo Draft Pitcher 64oz（USD $12）：喺香港飲生啤有啤酒塔可選，去到洛杉磯每人一渣，感覺更爽，美金$12可以飲成餐，可謂超值！

2)      Chicken wings (USD 3.30/串)：每串雞翼都有兩件，每件均皮脆肉軟嫩。

3)      Chicken Thigh (USD 1.80/串)：雞肶肉厚潤多汁，同樣味佳。

4)      Gizzards (USD 2.70/串)：雞腎每串都有成七、八粒，無論大粒細粒都一樣咁爽脆。

5)      Liver (USD 2.70/串)：雞潤油潤有光澤，軟潤得黎好有彈性。

6)      Torihei’s Meat Ball (USD 1.80/串)：以店名取名嘅雞肉丸大大粒，但容易食，肉質嫩中帶脆，甜甜嘅調味十分討好。

7)      Pork Belly (USD 3.30/串)：豬腩肉惹味鬆爽，肉汁豐盛，冇得彈呀！

「鼎泰豐」位於「Del Amo」商場內，面積開揚寬廣，裝潢十分型格。正門左方可見透明度極高嘅廚房內有多位師傅忙碌地包製小籠包，個個帶哂頭巾同口罩，相當衛生。店子樓底高高，大堂中央有個酒吧位置，食客可邊飲邊食點心，氣氛輕鬆熱鬧得很！除咗吧位之外，中間仲有排卡位，圍牆嘅散座則全為合併式，一大班人去都唔洗分開坐。

洛杉磯Torrance區內不乏日本餐廳，要吸引到食客光顧真係要落啲功夫，「Miyabi Uni」就標奇立異地以海膽菜式作主打，實有諗頭。

餐廳面積寬廣，正門兩邊為可吸煙嘅室外座。用餐大堂中央有個方形嘅開放式廚房，被十多個吧位圍繞著，其餘嘅散座均為合併式木造餐桌。室內並冇花巧嘅裝潢，只係用上假花及酒瓶擺設，十分簡潔。

中年服務生態度並非惡劣，但水平只可以話一般過一般！除咗明顯冇乜幹勁，落單時對餐牌上嘅項目亦不太熟識，每問佢一個問題，佢都要入去請教其他同事後先可作答，效率自然唔高。姨媽們點咗枝日本清酒，居然要等成十幾分鐘先準備好，家人見狀都唔敢勞煩佢中途換碟或者加茶。

八人分別點咗幾款頭盤、魚生、意粉及天婦羅黎分：

1)      Fresh Kumiai Oyster from Baja California (USD 15/半打; USD 27/一打)：加州生蠔細細隻容易食，且每隻均爽甜鮮美。

2)      Miyabi Uni Shooter (USD 14/兩隻)：每羮海膽Shooter連同一隻生鵪鶉蛋上，質感滑溜非常，無奈混入咗大量酸汁作調味，入口時未能食到海膽原有之鮮味，令菜式略為失色。

3)      Chef Select Sushi (USD 24.50)：如相所示，所謂廚師精選嘅壽司色澤偏暗，不甚油潤，入口更覺蝦隻乾嚡，就連三文魚及吞拿魚都唔得肥美。

4)      Miyabi Uni Original (USD 19.95)：以店名取名嘅海膽意粉麵條煙韌彈牙，海膽鮮甜嫩滑，入口滲出陣陣紫蘇香，牛油味亦甚為香濃，相當不錯。

5)      Uni Aglio e Olio (USD 18.95)：另外一款冇用牛油煮嘅海膽意粉麵條同海膽一樣出色美味，換配橄欖油則更為清新輕巧，簡單伴入蒜片及紅椒已夠惹味。

6)      Shrimp & Vegetable Tempura (USD 16.95)：蝦及雜菜天婦羅係就係炸得好夠乾身，可惜炸漿偏厚且唔香脆，個人覺得唔係幾夠火喉囉。

繼復活節喺假日酒店「Terranea Resort」嘅「Catalina Kitchen」食咗個唔係太得嘅自助餐後，XO仔即表示失望萬分，點知隔咗兩日，姨媽們話叫細佬俾多個機會，試埋酒店另外一間餐廳「Mar'sel」先。

高級西餐廳以做晚餐為主，只有週日一天加設早午自助餐。店子嘅「Smart Casual」服裝限制唔可以話好嚴格，不過就絕對唔歡迎穿著短褲或人字拖嘅食客。餐店室內光線柔和，樓底唔算特別高，但勝在開揚通爽，左方有個闊落嘅酒吧區，同用餐大堂一樣都係用上厚墊皮櫈，十分舒適。選擇室外座嘅貴客可欣賞到無敵海景、太陽落山及黃昏嘅晚霞；入夜後吹住海風會感到有涼意，幸好餐店設有多個暖爐，大家不用擔心。

服務生友善客套，除咗送上餐牌時會主動推介節令美食，落單時亦有問及各人有否對任何食物敏感，聽到女士們怕主菜份量會過多，佢地仲提議安排廚房幫忙一開為二，當真細心得很！訂座時得知開瓶費為USD 40/樽，長輩研究過酒牌，計過條數後，覺得自己帶靚酒點都抵玩啲，所以就自攜佳釀，到步後即交由健談嘅型男侍酒師代為處理。

小肥點咗帶子頭盤、和牛主菜及朱古力甜品三道菜，食埋奉送嘅麵包及餐前小食份量剛剛好：

1)      Amuse Bouche：餐前小食三文魚多士香脆清新。

2)      Cornbread：新鮮出爐嘅粟米麵包熱辣辣、香噴噴，皮脆包鬆軟，微甜可口，超正！

3)      Diver Scallops, black truffle polenta, Norma’s tomato sofrito (USD 26)：香煎帶子油潤軟嫩，鮮甜無比，蕃茄辣醬則惹味醒胃，墊底嘅松露粟米蓉清甜芳香，實屬必吃推介也！

4)      Snake River Farms Wagyu Shortrib (USD 48)：和牛方塊質感雖則夠鬆，但可惜煮得過熟，所以就偏嚡同乾。其實食完個粟米麵包同香煎帶子都經已幾飽吓，好在和牛牛仔骨肉只有四件磚塊之多，吃畢仲可以食埋甜品。

5)      Spiced Chocolate Chiboust, dulce de leche, cocoa nib tuile, cinnamon milk crumble, horchata gelato (USD 15)：朱古力甜品柔潤軟滑，香甜濃郁，伴配雪糕一球即增添清涼。

位於購物廣場「Peninsula Shopping Center」內嘅「Pho Hana」有個年輕落力又冇架子嘅老闆，係區內極受歡迎嘅越南餐廳，因有信心嘅保證，家人都經常幫襯。

溫馨小店衛生潔淨，餐具醬油全為自助式。雖則合拼式散座都拍得好埋，但由於主要做街坊生意，熟客們都好自在。長輩每次光顧都離不開點越南凍咖啡、炸春卷、及越式河粉：

1)      Rare Steak & Tendon Pho (USD 11/大)：大碗裝越南河粉新鮮滾熱辣，河粉麵條白滑量足，牛骨湯底清澈甜濃，生牛肉薄片亦軟腍可口。

2)      Fried Egg Roll (USD 9/四條)：春卷即叫即炸，熱辣金黃，一客四條，上枱前已預先切好。春卷皮層巧薄香脆，豬肉餡料清爽幼嫩，用生菜包起，再點上秘汁，效果惹味醒胃，堅掂！

3)      Caphe Sua Da - Espresso Milk Iced Coffee (USD 5)：混入煉奶沖製嘅凍越南咖啡香滑醇濃，百喝不厭。

位於海邊嘅高爾夫球會「Trump National Golf Club Los Angeles」擁有無敵海景，環境十分優雅。大眾可享免費泊車，亦可於會所內兩間餐廳進食，其中「The Café Pacific」為較高級嘅選擇。西餐廳裝潢甚有格調，用餐大堂樓底高高，光線充裕，闊落舒適。服務生友善體貼，午市輕膳亦美味可口。

1)      Garlic Bread：免費贈送嘅蒜蓉包新鮮烘出，熱辣辣、香噴噴，皮脆包軟，清新醒神。

2)      Trump's Famous Calamari (USD 17)：意式炸魷魚金黃乾巧，份量十足，咬落香脆有彈性，點上微辣嘅蛋黃秘醬更添惹味，個人誠意推介！

多得會員大表姐夫帶領，XO仔先有機會認識到洛杉磯市中心嘅私人會所「Jonathan Club」。會所大廈十分宏偉，除咗有私人停車場外，亦有代客泊車服務，方便會員請客。舗上紅地毯嘅接待大堂以靚靚鮮花及洋畫作裝飾，玻璃枱擺放出一本有關會所歷史嘅彩圖書冊，睇黎好有來頭。會所不同範圍嘅服裝限制都有所不同，當中高級西餐廳「Chophouse in the Grill」更加屬嚴謹之列，男仕們最安全就係著西裝。

會所餐廳嘅用餐大堂闊落華麗，燈光柔和，餐桌均配上厚墊紅色絨櫈，雅致大方，且氣派不凡。服務生態度誠懇，且體貼入微。潮派海鮮美食高質味佳，價格高得實有道理。

1)      East & West Oysters (USD 3/pc)：兩隻東、西岸嘅生蠔都同樣鮮濃肥美。

2)      Rainbow Crudo (USD 22)：彩虹刺身分別有三文魚、吞拿魚、油甘魚，魚生顏色艷麗有光澤，鮮厚潤甜，簡單美味。

3)      Maryland Crab Cake (USD 22)：雙層蟹餅以芒果牛油果莎莎作底，清新醒胃，主角香煎蟹餅則幼嫩甜美，無敵呀！

4)      Miso-Glazed Chilean Sea Bass (USD 38)：厚厚嘅智利海鱸魚肉質雪白嫩滑，鮮甜無比，師傅巧妙地伴配中式白菜、日式枝豆、韓式泡菜，另加白飯墊底，一次過可食到亞洲三國風味，當真有意思極！

長輩居美多年，對於區內嘅中餐廳都非常熟識，「海天」可以話係近年最常幫襯嘅一家，全因小店老闆Ricky哥哥平易近人，好客又抵得諗，家人每每要求佢煮啲新餸或者係懷舊菜，做得到嘅佢都必定會試，包場開P收費亦十分合理，難怪會咁受街坊歡迎。壽宴當晚共有兩圍，以下大多功夫菜式並未列入餐牌上，故亦必先預訂，敬請留意。

1)      冬瓜盅：每圍一大盅冬瓜盅，外表已夠震撼，如相所示，甜濃嘅靚湯入面有爽脆嘅竹笙及香濃嘅鴨絲，絕對真材實料！

2)      椒鹽鮮魷：椒鹽鮮魷香脆惹味。

3)      花膠鮑魚：珍藏雙寶之花膠鮑魚均厚潤滑溜，鮮濃美味！

4)      燒鴨：燒鴨大大隻，皮脆肉鬆軟。

5)      江南百花雞：傳統江南百花雞色澤金紅，雞皮香脆鬆化，皮下嘅蝦膠亦爽潤彈牙，轉兩轉已成功清碟，美味程度不言而喻。

6)      酥炸生蠔：酥炸生蠔香口皮脆，肥潤鮮美。

7)      花菇扣海參：海參爽厚潤滑，花菇芳香厚腍，正到暈呀！

8)      龍蝦伊麵：鮮橙美艷嘅上湯龍蝦鮮甜無比，爽脆多汁，墊底嘅伊麵索盡精華入哂味，堅掂！

國泰航空CX 885由洛杉磯直飛往香港，十五個半鐘頭嘅長途航班選用B777-300ER型號客機，首次感受到超豪嘅頭等體驗，實在難能可貴！

頭等機艙儲物位置堅多，每個獨立座位可以成個人打平之餘，伸直對腳瞓咗喺度仲有位左右碌黎碌去，闊落舒適得很。前方又有個座椅方便同行嘅友人埋黎傾計，搖身變成一個迷你客廳咁，私人空間勁足。

空中服務員態度誠懇，細心體貼。每位搭客都會送贈一套睡衣、拖鞋、眼罩及個人用品套裝，周到齊全。機上嘅音響隔音系統好強好出色，影片選擇又夠多，結果XO仔連卡通片都睇埋，冇去戲院咁耐反而有機會一次過追返哂多部好戲，正呀！

膳食方面亦相當豐富，只係平心而論，午餐及小食比晚餐明確地高質吸引。一上機先有香檳飲，伴配雜錦果仁，不過小肥因有敏感問題未能進食。起飛後不久即為午餐時間，頭盤仲要係成盒魚子醬拼香檳，這份高級實在令人期盼接著嘅餐飲！蜆蚧周打湯及煙鴨胸均輕巧甜美，不過最有驚喜就係個超級軟腍入味嘅「燴牛仔麵頰肉配芹根蓉及焦糖胡蘿蔔」主菜。細佬一直冇瞓，狂煲電影，眼見晚餐選擇唔係咁啱心水，所以當其他客人都休息緊嘅時候，自己就續一食齊兩款心儀嘅中、西小食。中式嘅榨菜肉絲湯麵湯底夠清、麵條夠爽、榨菜肉絲又夠味，而份走咗包嘅烤牛肉漢堡亦厚潤多汁，鬆軟惹味，配埋靚靚甜酒，啲戲都變得好睇得多。