舊年去札幌時，與家人首次搭過香港航空後便一坐上癮，所以一收到風港航於暑假成功增設往返東京之航線，商務位仲要平過另外一間航空公司o既特選經濟客艙，大肥爸爸諗都唔洗諗即決定選搭香港航空。

多得哥哥再三提點，知悉香港航空o既搭客可以喺中環機場快線站辦理手續，將行李寄艙後，就可輕便地乘坐機鐵直達香港國際機場，同行六十五歲以上o既團友們更可尊享半價優惠，又抵又方便！由於手續簡易，地勤人員效率高，我地又預鬆咗時間，所以全體人員就應邀前往航空公司o既貴賓室「紫荊堂」，享用午膳並稍作休息。

離開出境檢查大堂不遠，藏於地下室o既「紫荊堂」光猛寬敞，接待處o既玻璃趟門印著香港靚景，感覺高雅大方，當真令身為港人o既XO仔十分驕傲。貴賓室面積廣，其中分開有梳化區、向窗獨立座、電腦區、用餐區等，各有各舒適。

我地咁多個人步入「紫荊堂」正門即由多位友善好客o既靚姐姐接待。佢地不但協助各人入座，更會主動講解廳內所提供之設備及餐飲，招呼十分周到！設施中最搞鬼o既必選大廳中央嗰座「住好啲」懷舊磅重機，原來真係郁得架，我地一人玩咗次，玩完仲有張紀念咭仔證明旅行前有幾fat添！

除咗有得玩，貴賓室當然唔少得自助餐區域。既然假期已經開始咗，大家就先向酒品埋手，襯太陽仍在高掛時先飲兩杯輕鬆吓！自選食物中有個唔係咁受歡迎o既凍肉及沙律吧；熱食中蕃薯uncle同小肥一樣最愛咖哩牛腩，蝦餃就一般啦；女士們每人要咗碗即叫即煮o既車仔麵同雲吞湯米粉，大家都話好夠熱，且唔油，都唔錯。最有驚喜就一定係個鮮製雞蛋仔，熱辣香脆，鬆化輕巧，雖然落單後要等成幾個字先有得食，不過絕對值得等！大家要留意，雞蛋仔煮製時間約十五至二十分鐘，供應時間每日限定中午12點至傍晚6點。

同行眾多長輩都係首次乘搭香港航空，其實訂飛時都唔係咁有信心，擔心平野唔會有好野。哈，點知未上機前，淨係喺港航貴賓室「紫荊堂」短短逗留咗四十五分鐘，享用過特色美食酒品、見證過港航優質o既服務之後，竟然足以令眾人放下心頭大石，期待即將展開o既空中旅程！

今次乘坐香港航空前往東京，經旅行社購買商務位，來回機票優惠價為HKD 5,536，除咗可以享用上述所提及到o既貴賓室「紫荊堂」之外，飛機上亦有晚餐提供，餐飲中不乏酒水，暑假旺季黎講真係好抵。

當日香港航空HX610 班機預定下午三點半起飛，用上商務艙以一、二、一排列o既新飛機型號，獨立座位空間足，乾淨企理，十分舒適，上機時長輩們仲每人影咗幅相留念，明顯好滿意。可惜飛行期間冷氣唔多夠，當XO仔想調節冷氣時先發現原來新機冇咗啲手調冷氣風口，咁唯有向空中小姐提出睇吓可唔可以開大啲個冷氣啦，點知佢好抱歉咁話已經開到最大，見到細佬真係滴哂汗，佢都好客氣咁話不如俾杯冰水我幫助降一降溫，態度極之誠懇體貼。

航班飛行時間約四個半鐘頭，起飛後大約一個鐘頭後就有晚飯食，亦即香港時間四點半（東京時間五點半），真係好早，不過搭客有要求絕對可以遲啲食，只係主菜選擇應該會少咗。點選食物時，由於機內室溫對細佬黎講實在過高，小肥就好唔客氣咁要齊冰水同香檳作餐前飲品，主菜就揀食「日式炸雞配蜜糖芥末薑汁配日本飯及季節時菜」。

晚餐由頭盤「日式冷麵」及「烤雞胸片伴菠蘿芒果沙沙」作序。雞胸片容易偏嚡同乾，飛機餐上o既雞胸薄片亦正是如此，幸好個菠蘿芒果沙沙尚算清新醒胃，日式冷麵又夠清涼甜美，成功挽回不少食物分。主菜「日式炸雞配蜜糖芥末薑汁」只可以話係中規中矩，因炸雞皮層過厚，即使雞肉軟嫩都難以補救。

標記後更可當作免費宣傳，可謂雙贏！

「鑽石公主號」郵輪定於橫濱出發，為安全起見，一行十二人早一晚就經已先抵橫濱，喺市中心一家最多團友可以賺取酒店分數o既「橫濱灣喜來登酒店及觀景塔」（Yokohama Bay Sheraton Hotel & Towers）度過一晚夜。

始終人多容易混亂，故XO仔一早已做足功課，了解過由東京成田機場前往酒店o既不同方法，包括的士、巴士、火車等。多得酒店職員Mikami小姐o既提點，並耐心地跟小肥多月來以電郵通訊，團長最終決定以最簡單及便宜o既途徑先搭九十分鐘巴士前往「橫濱城市航空總站」（Yokohama City Air Terminal - YCAT），然後再轉乘的士去酒店。酒店客戶可以4,000円獨享巴士加的士之套票優惠，六十五歲或以上o既長者則可憑護照以半價2,000円購買巴士車票；由於每張套票包咗一架的士，以長者優惠淨買巴士飛o既團友剛好可搭順風的士一齊去酒店，非常順利。

由於喺飛機上，下午五點前已經食完晚餐，一直到午夜十二點到達酒店都未有再進食，喺巴士上大家已決意安頓好行李後就要馬上外出覓食。手持地圖行出街外，十二人就好求其地行咗入去一家營業至深宵o既「NIJYU-MARU」居酒屋，食到凌晨兩點先返回酒店。

居酒屋佔用面積全層，望落開揚寬廣。食客都係後生一族，全店就只有我地一班外國人。講真服務唔算差，叔叔同姐姐仔都冇話黑面，只係明顯冇平時見慣嗰啲服務生咁殷勤友善，幸好小肥可以勉強用簡單o既日文對答，電子落單又夠簡易，起碼溝通上冇乜大問題。

由「橫濱灣喜來登酒店及觀景塔」（Yokohama Bay Sheraton Hotel & Towers）行經電梯通往地下街，路程只需幾分鐘，當真夠哂方便。始終對區內o既咖啡室唔係咁熟識，團長就求其行咗入去最近o既「Oslo Coffee」度食早餐。

「Oslo Coffee」簡潔企理，卡位配有厚墊梳化櫈，餐桌上更設有傳呼服務生o既按鈕，滿座時都唔怕搵唔到伙計落單。

早餐時段，店子只有兩頁餐牌，一頁為單點飲品項目，另一頁則為三款食物連咖啡o既套餐。套餐及散叫飲品o既單價其實只係相差一百円左右，咁梗係叫套餐抵好多啦，我地就每樣叫咗幾客黎分，飲品就清一色要哂特色咖啡。「Oslo」o既特色咖啡共有三款，分別為藍色印o既「King」、紅色印o既「Queen」及金色印o既「Royal」，飲齋啡o既團友就簡單地以對應o既性別黎揀選啡品，而肥肥家族四人就叫齊哂三個色，好等小肥可以續一試試。

1)      特色咖啡「King」（500円/杯）：代表男士或皇帝o既「King」齋啡呷落甘香，係三款中最濃厚o既一杯。

2)      特色咖啡「Queen」（500円/杯）：代表女士或皇后o既「Queen」齋啡則帶有果香及微微酸味。

3)      特色咖啡「Royal」（700円/杯）：最後不分性別，只代表皇室o既「Royal」歐蕾咖啡奶香豐厚幼滑，亦為好啡一杯！

4)      A餐之「北欧ワッフル」（500円可配「King」或「Queen」特色咖啡；加200円可轉配「Royal」歐蕾咖啡）：圓形o既北歐窩夫香脆鬆巧，500円有兩件加杯靚咖啡，絕對超值！

5)      B餐之「ハム＆デンマークチーズのワッフルサンド」（500円可配「King」或「Queen」特色咖啡；加200円可轉配「Royal」歐蕾咖啡）：熱食o既芝士火腿窩夫三文治外層兩塊窩夫軟腍帶甜，夾住o既芝士火腿香濃熱辣，一個人食哂一份都幾飽肚。

6)      C餐之「ノルウェースモークサーモンサラダのワッフルサンド」（600円可配「King」或「Queen」特色咖啡；加200円可轉配「Royal」歐蕾咖啡）：凍食o既挪威煙三文魚沙律窩夫三文治腍中帶脆，濕潤惹味，都幾得意。

「橫濱灣喜來登酒店及觀景塔」（Yokohama Bay Sheraton Hotel & Towers）二樓可直出行人天橋，步行兩分鐘即抵日本名百貨公司「高島屋」（Takashimaya）。旅客可憑護照取得九五折咭，優惠適用於全國o既「高島屋」，非常廣泛。此外，於商場內購物滿5,000円或以上亦可享即日辦理退稅手續。

「高島屋」八樓餐廳層有多間食肆，當中不乏中、法、意、日、韓料理，唔洗多諗，黎到日本就當然係揀食日本餐啦，團長就帶隊行咗入去一家專門食雞料理o既「八起庵」。

「八起庵」地方整潔企理，面積都唔細，不過午飯時間實在繁忙，一行十二人只好分開坐。疑似店主夫人o既嬸嬸雖然忙得團團轉，但其臉上仍能保持笑容，態度溫婉，效率亦頗高。

由於餐廳於午飯時間未有提供散叫餐牌上o既雞鍋料理，我地就叫咗啲雞丼同午市丼麵套餐黎分。午餐可選o既雞造菜式中，除咗平時常見以雞肉（即「親」）混入生雞蛋（即「子」）及滑蛋（即「子」）o既「親子丼」之外，店子亦有煮出同為「親子」組合o既咖哩飯、烏冬等，當中部份更用上相傳有皇家血脈o既東京軍雞煮出，選擇極多。

親子雞丼とミニ鴨なんば（2,376円）：熱辣辣o既親子雞丼內含滑蛋同生蛋，令丼物整體質感柔潤滑溜。墊底o既飯粒飽滿軟熟，雞肉幼嫩中帶有彈性，甜甜o既調味亦極之討好。套餐中o既迷你鴨烏冬一樣咁好味，其湯底清香微甜，烏冬麵條煙韌軟滑，鴨肉都好軟腍。

「鑽石公主」（Diamond Princess）載客量為二千七百多人，比起肥肥家族之前坐過僅可乘載一千多人o既「水晶平靜」號（Crystal Serenity）大成倍幾兩倍，相機都要離開好遠先影得哂成隻船。公主郵輪雖大，但論及豪華度、舒適度、服務質素、娛樂項目選擇等等，真係冇得同水晶號fight。

是次郵輪河我地同樣係入住有陽台o既廂房。廂房位於十四樓高層，個景就夠靚，可惜間房由地毯到傢俬、浴室到陽台、衣櫃到雪櫃，設計同用料都給予住客一個殘舊o既感覺，當真絕不豪華！室外溫度平均已高達攝氏三十幾，點知室內冷氣開到最大一啲涼意都冇，夜晚黑瞓覺唔蓋被都出哂汗，日日真係好似焗桑拿咁，怕熱o既小肥真係幾辛苦。

「鑽石公主」o既五個飯廳分別係「International Dining Room」 、「Pacific Moon Dining Room」 、「Santa Fe Dining Room」 、「Savoy Dining Room」 及「Vivaldi Dining Room」，均分有傍晚五點半及晚上七點四十五分兩輪；客人可於購票時或上船前於網上預訂晚膳時間，地點則由船公司編排。據悉，咁多個廳入面最大嗰張餐枱都只係可以容納到十個人，團友十二人唯有分開兩張六人枱坐，排位就晚晚轉，以確保聯誼時可以保持新鮮感。

我地被安排入座o既「Santa Fe Dining Room」環境優雅，燈光柔和，闊落o既椅櫈都好舒適。負責兩張枱o既服務生黎自唔同組，因有比較下，年輕落力又友善o既Jerome同拍檔明顯於各方面都略勝一籌。食物方面任叫任點，於用餐時間內更可無限添加，不過質素只可以話中規中矩：

1)      Crispy Hand-Rolled Vegetable Spring Rolls with Hoisin-Peanut Dip, Lemongrass, Cilantro：頭盤齋春卷每人只有一細條，細佬嗰件走咗海鮮花生醬，相中所示為哥哥完整嗰客。齋春卷炸得好夠乾巧鬆脆，齋菜餡料都好爽，唔點醬食都好夠味，外國廚黎講已做得相當唔錯。

2)      Red Snapper Mojito Ceviche with Mint, Mango, Avocado and a Splash of Rum：醃魚味道奇酸，幸好份量只有一小杯，否則恐怕平時最怕浪費食物o既XO仔都要食剩野。

3)      廚師推介之Cream of Porcini Mushroom Soup, Velvety Cream soup, Flavor-Heightened with Tarragon：蘑菇湯只屬和暖，飲落稀得黎好咸，估計係因落得唔夠忌廉所致，作為廚師推介真係唔多掂囉！

4)      廚師推介之Slow-Roasted Corn-Fed Prime Rib, Rosemary Jus, and Horseradish Cream, with Corn-on-the-cob, Char-grilled Tomato, Baked Idaho Potato：三成熟o既牛扒肉質香腍鬆軟，份量又足，可以話係「Santa Fe Dining Room」於全程郵輪河入面煮得最出色o既一道主菜！

5)      廚師推介之Milky Chocolate-Hazelnut Soufflé with Amaretto Sabayon：朱古力味梳乎厘偏乾同韌，食落似蛋糕多過梳乎厘，並非廚師o既小肥絕不推介。

位於郵輪十四樓o既「Horizon Court」早、午、晚都係食自助餐。咖啡廳o既格局全為室內座位，寬敞開揚，當中近窗位置有海境睇，所以最搶手。

同晚飯o既五間餐廳一樣，自助餐只提供凍、熱開水及普通咖啡同茶，特飲及酒品全部都要額外加錢購買，飲得多最抵就要買套票，套票價格係因應不同組合以定。食物區則分成麵包區、水果區、湯區、沙律區、熱食區、甜品區等等。個人覺得麵包同水果屬正常，湯品只可以話唔啱細佬口味囉！沙律材料雖則唔少，不過望落去就唔多新鮮，加上最基本o既凱撒沙律都冇，真教人失望。熱食選擇都幾多吓，可惜如相所示，貴多唔係咁貴精，質素可真為偏低。

晚飯五間主餐廳中，只有「International Dining Room」提供埋服務式o既早、午餐及下午茶。廳內o既裝修比較傳統樸實，厚墊o既椅櫈都好舒適，不過真係估唔到下午茶時間居然要搭枱，座位先到先得。此外，服務果真油麻地，樓面伙計唔係黑面就木口木面，感覺唔多歡迎食客之餘，做起野上黎仲耍呢弄重，態度毫不專業。

擺放喺門口o既三層下午茶樣品睇落就幾high，不過原來個架只係裝飾而已。埋位一刻先選餐茶，茶品款式全放於木盒中，係唯一雅致o既一環。輪到食物上枱時，先發覺所有糕點都係成盤由黑面神托出及分派，雖然咁做係可減低浪費食物o既機會，但同時亦降格不少。小弟愚見，餐廳可以每張枱上都放出吉空o既三層架，當服務生呈上食物俾大家揀選時，可以將小點都放上架上，到集齊好自選食物後，再等客人慢慢嘆個下午茶。

囉！

團友們坐郵輪o既經驗豐富，所以盡管購票後旅行社同船公司都冇提及過有「Formal Dinner」，即「盛裝晚宴」，各人都一早預備定兩套靚衫以防萬一。果然不出大家所料，首個「At Sea」日o既晚餐就已經係「Captain’s Welcome Dinner」（船長歡迎晚宴），亦即第一個「盛裝晚宴」。

今次所乘o既「鑽石公主」由服務生、電視節目、傳呼廣播到每日一報全部都只用英文同日文兩個語言，而該晚「盛裝晚宴」有服裝限制o既詳情又只係喺日報度公佈，結果就發生咗啲不愉快事件，有好多首次坐郵輪而又唔多懂英文或日文o既旅客喺不知情下未有盛裝出席而被拒諸主餐廳門外。客觀分析，小肥覺得整件事係公主郵輪公司及旅行社o既失當多過係乘客o既錯失，被拒o既食客有怨言當真不難理解。

講返餐飯，「盛裝晚宴」o既餐單理應比平時豐盛，但係「Captain’s Welcome Dinner」可選o既五款主菜中只有虎蝦一味海鮮，似乎船長或大廚唔多歡迎我地喎！翻閱過兩頁餐牌後，結果XO仔就揀哂廚師推介o既餐湯、虎蝦主菜及甜品，另加多一客招牌意粉間場。

1)      French Onion Soup with Gruyere Cheese Crouton：細佬真係從未飲過咁稀咁淡o既洋蔥湯，不喝也罷！

2)      Fafalle alla Rustica - Bow Tie Pasta, Tender Veal, Fresh Basil, Morel Mushrooms, Cream Sauce：除咗啲牛仔肉偏咗少少嚡之外，蝴蝶粉柔韌有嚼口，個忌廉汁又夠香濃，招牌意粉果然有啲料到。

3)      Shrimp "Daniele" - Broiled Tiger Shrimp, Café de Paris Butter, Broccoli, Vegetable Fried Rice：小肥唔想食飯，所以就向Jerome哥哥要求轉配蘆筍，點知佢仲好客氣地加多隻蝦同雜菜，真係夠哂體貼。虎蝦爽口彈牙，蘆筍亦好脆身，無奈調味欠奉，令菜式失色不少。

小肥同哥哥係全團人中最年輕嗰兩個，不過精力真係難以同年過花甲o既多位長輩相比。佢地不單超早起牀，每日做完適量o既運動後，早、午、晚三餐一樣咁食得同飲得，臨瞓前仲有大把貨去大跳的士高，實在令人佩服！

位於「鑽石公主」頂樓o既「Skywalkers Nightclub」地方闊落舒適，環境燈光都好正。我地其實頭六晚都有去蒲，不過只有上船嗰晚由DJ Elton哥哥打碟嗰場最正，音樂揀得好，自然地大家都唔捨得離開個舞池，結果當然係懶理翌日一早要出動，十二人包場玩到一眾服務生要收工先走。

最終搞到我地全體人要玩擺跳以示不滿！

為歡迎「鑽石公主」o既旅客，釧路市特意安排免費穿梭巴士往返市中心，每二十分鐘一班，都幾密吓。週五早上，城內車輛不多，十五分鐘唔洗就到站，街道上o既途人全部都係郵輪上o既旅客，感覺都幾荒涼。

「和商市場」離釧路駅只需步行三分鐘，位置十分方便。入口處o既壁報板上貼有商店分佈地圖及彩色o既廣告海報，當中最搶眼嗰三個字就係「勝手丼」，亦即我地個早餐。如果唔想自己動身動手去揀魚材自製魚生飯，館內後方其實有幾近餐館仔一早都已經開咗門，唔食魚生都可以食碗湯麵或冷麵。

市場中央位置擺放有多張餐桌及椅櫈，座位先到先得。場內商店除咗有多款魚鮮海產可選之外，亦有多間售賣海鮮內臟、生果、手信、精品、雜貨等，當中仲有間和服店添，極受外國遊客歡迎。

做好哂資料搜集o既XO仔早一晚已預告親友喺釧路將會先前往「和商市場」，食新鮮魚生飯「勝手丼」做早餐，大家都十分期待。

「勝手丼」（Katte-don）字面上「丼」即「飯」，而「勝手」則可解作為「是但」或「隨便」。據超閃旅遊書記載，話說十多年前喺北海道釧路，有幾個餓著肚子o既窮書生好想食魚生飯，卻因餐廳o既價格過高而轉場去直接同啲魚檔老闆提出要求，希望可以低價購下賣剩o既魚生，然後再去買碗白飯自砌魚生飯。久而久之，魚市場內就越黎越多舖頭散賣白飯同廉價魚生，任客人「勝手」地（即隨意地）揀選魚生放喺白飯上製出「勝手丼」。

場內人群除咗有「鑽石公主」o既搭客之外，本地人都一樣咁多，為免混亂，團長就分配年長o既團友留喺市場中央度霸位，而後生嗰幾個就負責四周購買魚生。

喺「和商市場」內，「勝手丼」個新鮮熱辣o既白飯底好多店舖都有賣，主要分大（300円）、中（200円）、小（150円）三個容量，不過最細嗰碗份量都好多吓，我地十二個人分咗六碗細都覺得叫多咗。眾多魚生店o既店員其實都非常落力地拉客，小肥就遇上其中一家「佐藤商店」入面嗰位超級友善o既肥哥哥，眼見細佬要招呼多位長輩，佢一手就送上大托盤，幫忙擺放已點選咗o既刺身，見到有啲刺身唔多新鮮仲主動抽出換過，真係好老實！得知家人想食靚蟹，佢仲帶埋XO仔過去隔離舖度選購，服務態度誠懇，實在難能可貴。

冇樣睇得黎但就好好味。

買完魚生，小肥就跟住嗰位老實又友善o既肥哥哥行咗去隔離舖搵佢個靚女朋友買蟹。哈，點知睇返啲相，先發現原來蟹店同魚生店同屬「佐藤商店」旗下，唔怪得知大家friend過打band啦！

靚女姐姐極之客套細心，知悉XO仔只懂少少日文，佢就用好簡單o既語句推薦當做o既三款靚蟹，分別為鱈場蟹、松葉蟹及毛蟹。續一報上價後，仲話廚房有專人烹煮及處理鮮蟹o既服務，食用簡易，叫我地唔洗擔心要拆蟹。細佬因敏感問題好少食蟹，但由於同遊o既團友全為蟹痴，埋位報告完畢後就應佢地所求，買咗兩隻松葉蟹同兩隻毛蟹大家分。平均每隻4000円左右o既靚蟹肉質幼嫩清甜，蟹膏鮮美厚潤，食到成班蟹迷lam lam脷，聽到個單價後更大讚超抵正爆添！

環保餐具，相當客氣。

正當一眾蟹迷忙於細嚐靚蟹時，小肥就走咗去買生果俾大家飯後食。多間水果店o既產品其實都離不開提子、柿、梨、蘋果、蜜瓜、桃、西瓜、菠蘿，而且每間o既售價都好畫一，細佬唯有以貎取果，選擇咗喺間門面最光鮮o既「（有）むさしや」（Musashiya）度狂購。

單憑果實之美態及色澤，XO仔買咗兩款同為1000円有四隻o既白桃及黃金桃，前者尚算香腍，不過後者就酸到大肥爸爸不斷高呼「盲眼佬都開眼」，似乎唔單只係人，連果都不可以貎相！

要喺市場入面食西瓜同蜜瓜依啲咁大o既水果真係好有難度，幸好「（有）むさしや」有售已預先切好o既哈蜜瓜件，哈蜜瓜又甜又滑又多汁，食得輕鬆又乾淨，每份380円真係一啲都唔貴。

食完個咁豐盛o既早餐後，大隊就慢慢行返巴士站嗰邊。途中見到巴士站隔離有個蛋形o既玻璃屋，所以就行埋去睇，原來建築物名為長春園「Ever Green Garden」，英文縮寫咁啱就係「EGG」，即「蛋」，真係有趣。

日本旅遊業興旺，每個城市都不乏購買手信o既廣場，而釧路o既手信中心就設喺市中心o既漁人碼頭「釧路フィッシャーマンズワーフMOO」度。同之前個長春園「EGG」（Ever Green Garden）一樣，「MOO」其實係「Marine Our Oasis」（『海は私達の憩いの場』）o既英文縮寫，因同日文o既「霧」同音，剛好就標記著有「霧城」之稱o既釧路。

由於中午前「MOO漁人碼頭」o既啤酒園未開，等待巴士及團友購物o既時候，大家就決定坐低飲杯咖啡。原本諗住唔好行咁遠，就咁幫襯地下其中一家小餐店，無奈吉位唔多，有啲又唔開，正當連團長都覺得有點不知所措時，幸好遇上館內一位懂得講普通話o既靚女大使，多得佢帶路，先識上去樓上一間有景睇o既咖啡屋「ベイカフェ風車」（Bay Café Misuzu）度坐。

分開咗兩邊o既咖啡廳一邊為正常高度o既餐桌散座，另一邊則為高人一等o既吧位。既然十二人都無意點野食，我地就揀坐窗邊兩排面向海o既高櫈，中間嗰行位沿著樓梯升上去，設計令每個位置都可以觀賞到海景，好有諗頭。

返回碼頭時，即見幾位釧路嬸嬸代表拉著橫額歡送「鑽石公主」號o既搭客。郵輪準下午一點半離開釧路港口，從房間o既露台睇完開船後，我地班為食貓就走咗出去同層o既「Trident Grill」度食快餐醫肚。

位於游泳池旁o既「Trident Grill」由相中o既肥叔叔一人主理，只提供熱狗、漢堡包及薯條可選，全為即叫即煮。見咁遲先食晏，小肥一口氣就點哂三味，只係唔要熱狗舊包，點知大廚好客氣地又加返條腸補數。

前幾篇遊記提及過「鑽石公主」郵輪上有幾間要額外俾錢先去得o既主題餐廳，其中一間就係專門食意大利菜o既「Sabatini’s」。

「Sabatini’s」門面光鮮開揚，室內裝修用上羅馬圓柱、水池、石獅子等歐味濃烈o既設計，感覺華麗典雅。大廳左邊有個開放式廚房，埋位一刻已見幾位師傅仔忙碌地搓麵粉，估計將用作焗製麵包或意大利粉。廳內o既散座分佈得都幾開，十二人被安排入座中央兩張大圓枱，每六個人一張都好鬆動。

值得一讚再讚o既就係樓面服務生o既態度。佢地身穿白色制服，儀容端莊，唔同級及唔同性別o既咁多位都一樣好有禮貌同極為好客。Auntie Y唔小心倒瀉紅酒喺身，女經理不但第一時間上前親自幫忙清理，更自動提出會為貴客免費乾洗襯衫，係咪好專業呢？！

「Sabatini’s」入場費每位29美金，另加15%服務費，可任點兩頁主餐牌及兩頁甜品餐牌上o既項目，酒品特飲同橄欖油則另計。幾款麵包均為大廚敬送之小點。細問下得知頭盤份量都幾大，我地就叫咗幾客黎分，主菜同甜品則各自點選。

1)      Herbed & Spicy Focaccia Grissini – 修長o既麵包條香脆少辣，好醒胃。

2)      Rosemary Flatbread with Air-Cured Parma Prosciutto & Marinated Green and Black Olives – 火腿薄餅輕巧香濃，每人一細件，份量啱啱好。

3)      Calamari Fritti, Crisp Fried Baby Squid in a Cone, Lemon Garlic Dip – 以筒杯上o既炸BB魷魚脆巧乾身，點埋另上o既白色檸檬蒜香忌廉醬，效果惹味又清新，個人like爆！

4)      Penne con Brasato di Manzo, Braised Short Rib over Penne, Grana Padano – 意大利餐廳o既意粉果然冇甩拖，長通粉煙韌帶脆，混入肉香潤甜o既牛肉絲，足以發揮簡單美。

5)      Tris d'Aragosta, Lobster Three Ways - Lobster Tail, Lobster Orzotto and Lobster Bisque Sauce – 主菜龍蝦三重奏因視覺效果問題，上枱時必須要連殼上，然後再續一由侍應熟手地即場喺客人面前拆除，其刀法凌厲，直令細佬諗起星爺部「功夫」。白雪雪o既龍蝦肉本身爽脆彈牙，配上燈黃色o既龍蝦汁更能特顯兩者o既鮮濃甜美，互相輝映，美觀又美味！

6)      Espresso Gelato – 甜品特濃咖啡意大利雪糕香濃微甜，食完兩球都唔覺溜。

「鑽石公主」o既主題餐廳中，除咗有早一晚試過o既意大利代表「Sabatini’s」之外，當中亦有一間亞洲代表「Kai Sushi」主理日式料理。有別於船上其他主題餐廳，「Kai Sushi」不但提供晚餐，而且仲做埋午市，不過由於魚生價格難以預算，以劃一固定收費任客人進食絕對有機會蝕大本，故此埋單係按所點選o既餐飲計算。

「Kai Sushi」間隔開揚，門口先有多張半梳化合併式散座，直入中間一條S字形o既走廊，左邊手有個壽司吧及一列吧位，十二人當日被安排入座後方最近窗o既位置，好夠光猛。服務生態度良好，無奈人手有啲不足，效率就唔係咁高。

食完晏，大隊就上咗去頂樓等睇靚景。團友們都懶理天空佈滿雲霧，一見到有酒吧就行咗埋去搵酒飲。埋到櫃面，即見阿拉斯加「海巫」牌啤酒買四送一，五枝都只係USD 15， uncle一口氣就要咗一set同班老友記分享，女士們就各自點咗幾杯雞尾酒。

「Tradewinds Bar」本身有瓦遮頭，圍繞住弧形o既酒吧有多個吧位，側邊暗藏o既吸煙區長期都坐滿煙民，好彩啲煙好快就吹走，煙味唔算過份。甲板層中央有個大螢光幕，不時都會播放電影，好天o既日子，左右兩旁o既沙灘椅都會好快俾人霸哂，不過其實吧前幾個露天高櫈先至係睇戲o既最佳位置。酒保只有一人，態度時好時壞，都幾難捉摸，唔知係咪因為睇得戲多影響情緒呢？！

「知床半島」（Shiretoko Peninsula）為北海道最東北部o既半島，島名來自阿伊努語（Ainu）o既「シレトク」（sir-etok），意思為「地球的盡頭」。據悉，此地乃北半球內可見浮冰最南o既位置，故2005年正式被列為「世界自然遺產」之一。

區域時，天色已由多雲漸變蔚藍

晚飯前，嗜杯中物o既幾位長輩決定喺船上一間有歌聽o既「Wheelhouse Bar」歡度良辰。

客廳式設計o既酒吧寬敞開揚，厚墊梳化椅櫈舒適大方，年輕o既侍應亦極為落力友善，酒品全為熟識o既品牌，正價合理，每日更設有買一送一歡樂時光優惠，不難吸引酒客。

酒吧o既環境氣氛本來都唔錯，可惜駐場o既男女二人合唱組合歌喉實在麻麻，男方獨唱時還可以，不過女低音經常走音，喺唔夠冷氣o既情況下都可以令到細佬打哂冷震，真係越聽越驚嚇，結果仲被佢嚇走埋添，唔怪得知「Wheelhouse Bar」最旺場o既時刻往往都係佢地兩個休息o既時候啦！

晚餐返回主餐廳「Santa Fe Dining Room」用膳，餐牌上雖列明當晚主題為「公主意大利晚餐」，不過湯品及主菜均見日本料理菜式，似乎有離題之嫌。除咗多款意大利佳餚可選之外，特別的主題原來係有特別的項目配襯返架；其中要額外俾錢先可享用o既有一系列意大利酒品，而免費任食o既就有由餐廳經理親自烹調o既意大利粉。

1)      Iced Peach Bellini Soup, Peach Puree & Sparkling Prosecco – 微涼o既凍湯以汽酒製出，其桃味芳香甜美，用飲管啜飲更覺清新，只係一小杯o既份量未免吝嗇咗少少。

2)      Penne with Garlic & Tomato Sauce - 經理叔叔煮出o既意粉偏咗少少硬，個人覺得可以再熟少少，幸好蒜香濃郁，調味到位，成功挽回不少分數。

3)      Ebi Furai, Panko-Coated Shrimp with Sweet & Sour Sauce – 深啡色o既炸蝦外皮層炸漿又厚又硬，內裡o既蝦隻如何爽脆都難以補救，實屬敗筆之作。

4)      Miso Soup – 麵豉湯淡而無味，好似開粉落多咗水咁，唔掂！

5)      Tiramisu, Espresso, Zabaglione Cream, Bittersweet Cocoa – 傳統意大利甜品Tiramisu質感好夠軟滑，而且唔會過甜，不過如果可以混入多啲酒，效果應更佳。

估計因「庫頁島」岸邊水位過淺，碼頭位置容納唔到大郵輪，「鑽石公主」號只好停泊於離岸o既水域，靠救生艇接載遊客往返船隻。

，簡單得黎係咪好有美感呢？！可

啦。。。

上到「科爾薩科夫」（Korsakov）岸邊時大約係朝早十點半，市鎮靜寂無人，就連車都唔多架，比起之前感覺都幾了無人煙o既「釧路市」更為荒蕪，就算唔洗出動到「森湯」兩位壯漢保鑣，五人喺街道上打橫行都絕對唔會有人理。

沿住條大路一直走，經過零星o既店舖簡陋又唔吸引，雖則全部都係開緊門做生意，不過店員態度懶散，聽到有聲都唔會話伸個頭出黎睇吓有咩客人，冷漠得恐怖！如相所示，其中一間服裝店門外貼出韓星海報，真係估唔到韓風早已吹到去俄羅斯喎，果然犀利！除咗商店之外，當中就只有一間餐廳，仲要係食壽司，係咪有啲幾匪夷所思呢？！

今次郵輪河中，我地只係試咗船上其中三間主題餐廳，當中意大利代表「Sabatini’s」無可置疑係團友們o既最愛，日本代表「Kai Sushi」只可以話係勉強合格，而當晚最後去試o既「Sterling Steakhouse」水準則剛剛喺兩者之間，不過問題係扒房o既海鮮菜式居然遠比主角牛扒出色，實在令人費解。

「Sterling Steakhouse」門外接待處旁擺放出餐牌、酒品及食物o既模型供食客參考。入內高級西餐廳o既格局比起主餐廳更為雅致大方。窗邊排出o既二至四人散座個景最靚，不過中央o既六至八人大枱都好寬敞闊落，問題係其中有某幾個服務生o既態度就真係唔係咁友善啦！

同意大利餐室「Sabatini’s」一樣，扒房o既入場費為每位29美金，另加15%服務費，基本上可任點兩頁餐牌上o既項目，要點和牛及龍蝦等貴價菜就有附加費，酒品亦為另計。由於大家都想試多幾味不同o既頭盤及牛扒，睇到餐牌上所列出o既份量都幾勁吓，團長就決定點幾款黎分，等最後甜品先各自叫。

1)      Black Tiger Prawn and Papaya Salpicon with Mustard Seed Aioli – 虎蝦爽脆惹味，墊底o既木瓜沙律又夠清甜爽潤，係三款頭盤中最正o既一味。

2)      Carpaccio of Kobe Beef with Wakame Salad, Ponzu-Soy Dressing and Extra Virgin Olive Oil (另加 USD 10 !!!) – 淨睇相都應該睇得出，生食o既神戶和牛片薄就夠薄，不過一啲肥都唔見，入口又唔香，仲要額外俾錢先有得食，個人覺得有搵笨之嫌！

3)      Black and Blue Onion Soup, Fresh Thyme, Jack Daniels, Roquefort Crust – 洋蔥湯新鮮滾熱辣，飲落香濃甜美。

4)      Porterhouse, the Best of Filet & Sirloin Grilled on the Bone - 22 ounces, 620grams – 厚切o既牛扒無論係牛柳嗰邊定係西冷嗰邊肉質都好韌，細佬只可以講一句「份量勁唔代表質量高」。

5)      Côte de Boeuf (for two), Traditional Bone-in-Rib-Eye-Cut - 22 ounces, 620grams –Côte de Boeuf同Porterhouse一樣厚身肉韌，絕對唔啱XO仔口味。

6)      Pan-Roasted Chilean Sea Bass, Champagne Mousseline with Leek and Mushroom Ragout – 反而個鱸魚煎得比牛扒出色得多，其金黃色o既外皮香口脆薄，白雪雪o既魚肉又夠鮮嫩幼滑，冇得頂呀！

舊年有份搭過「小樽散策巴士」o既家人都讚巴士乾淨好坐，短程車都幫忙慳返唔少腳骨力，所以上岸時一發現巴士公司特意為「鑽石公主」o既旅客增設一天循環巴士專線往返碼頭，心諗來回已經440円，坐多兩程足以歸本有餘，小肥就立刻購下十二張750円o既「一日乘車券」。

「LeTao」o既芝士蛋糕及特濃朱古力實在令人一試難忘，為求可以食到最新鮮o既糕點，XO仔專登揀喺此店食早餐。

兩層高o既「LeTao」地下為商店，樓上為咖啡茶室，有專𨋢上落。十二人為當日首批客人，唔洗等位即可入座中央張大枱。闊別一年，木造o既裝潢傢俱一樣乾淨企理，樓面年輕o既妹妹仔依然友善有禮。

團友飲食口味各有不同，不過未黎過o既長輩都應細佬推介，試咗個招牌芝士蛋糕「Fromage Double」做早餐。雙層芝士蛋糕鬆軟輕盈，微甜潤澤，原味及朱古力味均得到眾人讚賞。

飲品方面，咖啡及紅茶幫全部都叫咗個972円o既蛋糕套餐。（翻查舊相先知套餐一年前為862円，睇黎日元跌價，多做遊客生意o既「LeTao」都懂得以加價作為應對措施喎。）其餘同小肥一樣係朱古力迷o既就當然係點飲連杯都特別靚o既熱朱古力啦！熱朱古力柔滑醇濃，甘香味美，要飲真係要飲成壺先滿足。

旅途完結後先知原來「LeTao」將十月正式抵港，於中環IFC設置首間分店。新店起步階段只售賣人氣芝士蛋糕、朱古力及多款甜點，當真希望遲啲會擴建埋咖啡屋哦！

享用完豐富o既芝士蛋糕同熱朱古力做早餐後，十二人就由街尾間「小樽音樂盒堂」開始行起。喺紅綠燈口等過馬路時，突然聽到疑似火車聲o既蒸氣聲，方才發現原來音樂盒堂門前有個高高o既「蒸気時計」喺度噴緊白煙。

小樽有「音樂盒城」之稱，好多遊客都會專登黎搵愛好o既曲調音樂盒，有心人更會自己動手製出獨一無二o既作品，XO仔自問冇乜藝術細胞，不過淨係睇同買都已能自得其樂。

市內聞名o既「小樽オルゴール堂」為音樂盒設有多座建築物，包括博物館、音樂廳、商店、工作坊及動物園。各場館有著不同意義及特色，如果時間容許而又對音樂盒有興趣，當然最好全部去哂，但對半天或一日遊o既旅客黎講，其實行咗本館及2號館都應該足以購下不少手信及紀念品。

喺小樽除咗可以買到五花八門o既音樂盒之外，其實淨係行一條「堺町通り」都經已足夠買到成幾車手信。

大街兩旁o既商店種類繁多，飾物、皮具、雜貨、餐具、化妝品等，應有盡有，當中當然不乏食得o既糖果、餅乾、糕點等代表。購買零食手信時，個人會主攻小樽或日本限量產品。親友都愛流連於蜂蜜店、朱古力店、餅舖及酒舖，因各大店舖均設有免費試食試飲，早餐唔夠飽都絕對唔洗緊張。

環保背囊，係咪好醒呢？！

姨媽姨丈們同肥肥家族一年前於小樽初遇「旭壽司」後，壽司屋已成為大家再訪小樽o既必到之處。記得第一次去「旭壽司」時屬非旺季，冇預先訂座都有得坐壽司吧。可惜今次細佬早成兩個月前打定長途電話卻未能成功預留壽司吧位，講真都有啲失望架。

十二人準十二時抵達壽司店，即被入座三張鄰近o既四人枱。木造o既枱櫈乾爽企理，年輕o既服務生都好友善客套，只係年紀最大o既婆婆明顯屬火爆之人。團友對魚生種類一啲都唔陌生，壽司全以舉手式點數，刺身及小食則續張枱叫黎分。由於魚材鮮美，壽司同刺身一樣咁正，個人精選推介脆薄o既鮮螺刺身、鮮濃o既海膽壽司、軟嫩o既帶子壽司、爆於口中o既三文魚籽壽司及爽滑o既兩吃牡丹蝦壽司。因出發前小肥從餐廳網頁下載及打印咗十二張優惠券，結果全體都有球免費哈密瓜雪糕做甜品，清香微甜，極為討好。

円，團友都大感物有所值。

食完多款刺身壽司做晏，長輩們都話好想飲番杯咖啡消吓滯，可惜壽司屋未有咖啡提供，十二人只好另覓他處。哈，就係咁俾我地發現到隔兩個舖位一間家庭式作業o既咖啡屋「茶房おこばちSabou OKOBACHI」。

只有十多餘座位o既小店就好似人家屋企o既客廳咁，裝潢、間隔、小擺設都流露著無盡o既溫馨。店子由一對中年夫婦開設，正所為「男主外，女主內」，老闆先生自己負責手調咖啡及招待客人，老闆娘大部份時間則躲於小廚房做後勤工作。正因所有凍熱咖啡都要由叔叔一人續杯調製，合共十杯之多真係要花上好多心機同時間。XO仔影完首輪靚相，可能店內冷氣唔夠勁，加上午餐實在食得太多壽司而引發飯氣攻心，居然喺等待期間瞓著咗。短睡片刻後猶如叉咗電，連對眼都好似睜大咗不少，醒來時剛好可享用老先生用心之作。嘩，凍齋啡冰涼幼滑，香濃甘醇，就連免費送贈o既甜餅乾都鬆脆過人，直令眾人都覺得好有意外收穫！

以示歡迎我地一遊小樽，小小茶房當真溫情洋溢！

除咗購物之外，小樽其實都有靚景睇o既，其中一個影相熱點就係「小樽運河」，朝早到夜晚長期都企滿旅客。有心黎觀光但又唔想行太多路o既朋友，不妨考慮乘坐人力車，拉車o既全部都係黑黑實實o既靚仔壯漢導遊，極具睇頭，單喺運河旁邊兜返轉感覺應該都唔錯。

正因「小樽運河」為遊客必到之處，運河中段巧妙地設有一個小型廣場。廣場展示出區內o既地圖、當地o既時間及溫度，中央更設有個旅遊資訊豐富o既「小樽観光案內所」，內有精通多國語言o既旅遊大使親身解答疑問，費用全免。雖則潮流興網上打咭，但相信仍有不少旅遊家保持寄明信片o既習慣，故場內有個非常當眼o既鮮紅色大郵筒，唔知喺運河郵筒所收集o既信件會唔會有特別印章呢？！

有咗上次遊北海道o既經驗，蟹痴團友都話要再返去「北の漁場」食即燒活鱈場蟹。因深知食店只有鱈場蟹一味值得一嚐再嚐，今次細佬就專登安排大家下午茶時間幫襯，貪其地點離車站不遠夠就腳，店內又唔會咁迫人。

為節省時間，安頓好長輩入座後，XO仔迅即同幾位廚神代表行咗去漁場度買活鱈場蟹，並指明要即燒黎食。兩隻靚蟹一登場，就連年長o既團員都要大玩手機先食，幸好天氣唔係咁凍，蟹肉入口時仍然好夠新鮮熱辣，眾人都食得津津有味，無一不讚。

小肥自知有敏感問題，出外遊埠都會避開唔食蟹，所以就襯大家慢慢品嚐即燒活鱈場蟹時，行咗去附近o既店舖繼續狂購手信。返轉頭時先一齊食橙色o既哈密瓜一解餓氣。餐店預先切成一階階o既哈密瓜又甜又多汁，消暑又解熱，喺日本食生果果然係正爆！

手持「小樽散策巴士一日乘車券」埋單即有九折優惠，單據列出共減咗七千幾円，令人豪食完鱈場蟹做下午茶感覺都仲好抵。

食完咁勁量級o既鱈場蟹下午茶後，大肥爸爸就陪伴疲倦o既親友先返回郵輪休息，而小肥就同其餘仍精力充沛o既蒲友繼續尋歡。

團友們嗜杯中物，大多更為威水客，故兩次遊北海道前規劃行徎時，細佬都有諗過要加插一站，去鄰近小樽o既余市度，參觀日本威士忌之父「竹鶴政孝先生」所創辦o既名威士忌廠「余市蒸溜所」（Yoichi Whisky Distillery），無奈兩次都因時間過於緊迫，唔係好夾得到公共交通o既時間表，所以就打消咗念頭。嘻嘻，不過喺互聯網上搜集資料時，卻被XO仔發現「小樽運河」附近有間以此酒廠「日果威士忌」（Nikka Whisky）及其女主人「竹鶴リタ太太」起名o既「Nikka Bar Rita」，緣份就咁引領咗八人一訪小酒吧。

酒吧隱藏於迷你美食廣場「小樽出抜小路」（Otaru Denuki Koji）內，雖則外牆貼有酒牌廣告，不過如果唔係手持資訊，相信真係唔會自己行入去光顧。店子酒窖式o既裝潢暗黑神秘，擺設都用上與酒有關o既酒桶、木盒、酒樽等設計，而酒吧o既商標則用上酒廠女主人o既美影，全部都好到題。

店內只有三張四人高櫈散枱及七個吧位，淡季期間型男酒保一人足以應付所有酒客。顧名思義，「Nikka Bar Rita」主要提供威士忌廠所生產之威士忌，包括多款限量版靚酒及威水雞尾酒。由於所有酒品只可堂飲，我地就應型男哥哥推薦，從四款限量品中每人點咗杯合適o既威士忌飲。小肥自知唔係威水酒客，對威士忌認知唔深，難以作出專業品評。單憑酒保為酒廠o既出品及其不同飲用方法之解說，聽後慢慢再細嚐，飲落嗰杯以大舊冰塊浸住o既威士忌又真係幾濃醇香滑喎。

黃昏時段於酒吧歡聚，酒後返回「小樽運河」拍下河景夜色，各人肚仔又開始響起雷聲。為方便可於回程前先喺便利店購買樽裝大水，團長就決定喺巴士站附近一家見到有吉位o既「小樽らーめん問屋」（Otaru Ramen Donya）快速食個拉麵做晚餐。

設於停車場旁o既拉麵屋樓底極高，右手邊一排和式四至六人卡位，左邊圍繞住開放式廚房有兩列正常高度o既吧位，右後方位置則有幾張以布簾半掩o既四人半開放式廂房，間隔開揚通爽。可能聽到我地講廣東話o既關係，接待處位姐姐仔都好盡力嘗試用英語對答，不過一知道細佬識講少少日文時，佢即時鬆一口氣，臉上亦展出燦爛o既笑容。

函館為北海道第一大港口，盛產海鮮，本地人及遊客都愛於市內規模最大o既魚市場「函館朝市」購買及即食魚鮮。

首次到臨函館，搵食就單靠旅遊書引導，喺「函館朝市」內一家老字號「道乃家」（Michinoya）度午膳。

兩層高o既食店地下為迫迫o既散座，十二人好好彩地被安排入座樓上大廳，空間感更足、更舒適，私隱度亦較高。估計餐店為家庭式作業，樓面位嬸嬸應為老闆娘，態度唔算惡劣，但就感覺唔多鍾意招待華人囉。

午市套餐同散叫項目價格一樣親民。個人覺得烏賊菜式只屬一般，反而幾款魚生丼就鮮甜美味得多，誠意推介

遊函館o既旅客早上都會選去「函館朝市」大擦海鮮，中午則會轉移往海邊散步及購物。近海除咗有多間有景睇o既餐廳之外，最多人出入o既就係中央幾座大型o既「金森紅磚倉庫」。

食店

同時不斷補充體力

獲稱為「東方之珠」o既香港擁有亮如明珠o既靚景，參閱過旅遊指南先知原來「函館」同香港一齊並列為「世界三大夜景」之一，而且同時亦為「日本三大夜景」及「北海道三大夜景」之一，來頭咁猛當然要去睇睇啦！

正當團友諗住坐的士前往「函館山ロープウェイ」（Mt. Hakodate Ropeway「函館山空中纜車」）搭纜車上「函館山」欣賞靚景時，頭髮灰白o既的士叔叔隨即告知因已接近黃昏時份，纜車站必定擠滿人群，恐怕團中年長o既親友排上個幾鐘頭隊會有感吃力，所以就建議由佢同另外一部六人的士載我地上山，可以節省不少時間之餘，大家又可以舒服啲，可謂一舉兩得。

「函館駅」附近餐廳唔多，午市時間想為晚餐預先訂座又唔成功，睇完函館夜色後大隊就約好已返回郵輪o既三位團友於主餐廳集合用餐。由於上船時喺碼頭發現有拉麵車擺檔，我地幾個愛吃湯麵o既為食貓就決意飯後再戰拉麵，當晚「鑽石公主」o既「Chef’s Dinner」（廚師晚餐）亦只能輪為配角，即該晚晚餐之序。

1)      Oshizushi - elegantly pressed prime tuna and salmon sushi：喺西餐廳不時都會食到刺身，食壽司都係第一次。洋化咗o既壽司以甜醬喺碟上繪出花紋，外表新穎雅致，無奈飯中夾入咗青瓜，再混入埋甜醬及山葵食用，組合o既味道好怪囉！

2)      Strawberry Sorbet - infused with lemon and wild thyme：上完頭盤同湯，每人都有一球士多啤梨味雪葩，清新又涼快。

今次函館一日遊，真係估唔到高潮位居然係臨離港前一刻喺碼頭食嗰碗「元祖バスラーメン」（元祖巴士拉麵）！小小o既巴士拉麵檔只有三人主持，屬家庭式作業；老伯伯喺車尾忙碌地不停煮製拉麵小食，巴士上及室外o既食客就交由兩位熟手友善o既姐姐同嬸嬸招待，整晚爆場運作都十分流暢。

我地一行六人剛好坐喺巴士內之散座，應該都算係最元始o既拉麵車風味。車上貼有餐牌及剪報介紹「元祖バスラーメン」，食過啱口味更可即場購買盒裝即食拉麵，送禮有特色，自己食都好有意思。小店貴精不貴多，只提供一款炒飯、兩款冷麵、六款拉麵、幾味小食及追加配料，價格100円至1,000円，相當便宜。

人家小本經營，座位不多，大家亦好識做地每人叫咗一碗拉麵黎食，細食o既長輩就揀咗500円o既細碗版鹽味拉麵黎試。XO仔點咗客份量都幾勁o既特製拉麵，鹽味湯底香濃而不油膩，拉麵麵條煙韌彈牙，除咗薄薄o既叉燒之外仲伴上大蝦及干貝，整體鮮味無窮，1,000円絕對抵食！

細閱網上o既資料及於碼頭索取o既小冊子，得知青森有兩個同「A」字有關o既地標，其中之一個就係外型呈「A」字o既「青森県観光物産館アスパム」（Aomori Tourist Information Center, ASPAM）。

團長喺「ASPAM」地下層攞哂料後，即決定當日只到蘋果酒廠「A Factory」一個景點享受歡樂時光。因早上時間充裕，大多餐廳又要等到中午先開門，我地就上咗去「A」字塔十三樓個瞭望台度一覽整個城市o既風貌。

名稱，清晰透徹。十二人嗰朝早仲要包場，毫不拘束，爽呀！

要喺青森街上搵到啱家人口味o既食肆真係唔容易，十二人結果都係走咗入去一間香港不時都會見到o既「大戸屋ごはん処」。

店子木造o既間隔清爽光猛，簡單樸素。靚女姐姐態度溫婉有禮，見我地一行十二人實難坐埋一齊，故亦非常有善地主動提出安排我地分開坐，起碼唔洗多位長輩喺門外等，最後入座o既XO仔同哥哥就自己坐。

天口咁熱，點食物前當然係要先啤一啤佢啦！小肥兩兄弟比較大食，每人叫咗個包有前菜、麵豉湯、飯及燉蛋o既套餐之餘，仲加咗客唐揚炸雞。

1)      チキン唐揚げ（298円）：一客兩件o既唐揚炸雞炸得好乾身脆巧，一啲都唔油膩，肉質亦軟嫩非常，簡單美味。

2)      小牛たん + 五穀ご飯（1,360円）：牛魔王XO仔點咗個牛脷午餐，配健康o既五穀飯。五穀飯比想像中冇咁硬，好易入口；個人略嫌牛脷過熟咗少少，所以咬落偏韌，不過單睇價錢1,360円絕對收貨。

日本好多地方都有歷史悠久o既祭典，有關o既慶祝活動大多都係每年舉辦一次，青森咁大個城市都一樣唔例外，有個聞名o既「睡魔祭」。據悉，於八月舉行o既「青森睡魔祭」都會有熱鬧o既歌舞及大型o既睡魔燈籠遊行，用意係為驅趕炎炎夏日出動妨礙人民工作o既睡魔，祈求五穀豐收。

相信一提起青森，大多人都會諗起蘋果同蘋果汁，但其實青森亦盛產蘋果汽酒。市內有名o既超市廣場「A-FACTORY」鄰近睡魔博物館「ねぶた ワラッセ Nebuta House Warasse」，遊客觀賞完博物館如果覺得肚餓或口乾，又想品嚐以青森蘋果製出o既甜品及飲品，「A-FACTORY」真係一個好好o既歇腳點。

喺「A-FACTORY」樓上試完蘋果汽酒，大隊就走咗落去地下o既美食廣場中有甜品食o既「SKIP EGG」度嘆咗個下午茶。

小店一眼睇哂，樑上o既黑板寫出日英對照o既食物及飲品餐牌，桌上展出多款甜品西餅，由滿臉笑容o既妹妹仔一人獨自主理。

由於青森市o既商場當真唔及東京及北海道嗰啲好行，其中幾位團友離開咗「A-FACTORY」就立即返咗上船。太陽未落山，團長就提議留低o既團友早啲喺街上一間門外掛著「歡迎鑽石公主郵輪旅客光臨青森」字句o既「南大門」輕食頭輪晚餐，如果趕得切搭早一班車返碼頭就食多餐。

韓式燒肉店環境光鮮寬敞，抽氣都做得唔錯。樓面雖則只有一位姐姐仔忙碌地為全場人服務，其中一枱人仲要係好明顯地飲醉酒想鬧事嗰隻，但其態度仍能保持友善客套，實屬難得。

返回郵輪後，兩批團友就喺主餐廳集合再食晚餐。因深知「鑽石公主」號餐飲質素較為參差，XO仔同已熟落咗o既哥哥仔點上多道菜時，特別講明全部都只要頭盤份量，希望試多幾款。

1)      Kushi Yaki, Japanese eggplant, mushrooms, sea salt：燒茄子及蘑菇質感軟腍，不過調味欠奉，個人覺得好麻麻。

2)      Trio of Seafood, Citrus and Avocado, lobster, shrimp and squid with orange filets, lime-cilantro vinaigrette：海鮮三重奏含龍蝦肉、蝦仔及魷魚，酸甜醒胃，清新爽滑。

3)      Hiya-Yakko - fresh tofu with ginger, scallions & soy sauce：豆腐幼嫩清香，簡單可口。

4)      Caesar Salad：凱撒沙律新鮮爽脆，屬安全之選。

5)      Double Beef Consommé, mini choux buns and green onions：牛肉清湯鹽份過多，直頭多到細佬要咪埋眼黎飲。。。

6)      Linguine alla Vongole, noodles with littleneck clams in cream sauce and parsley：唔知係咪煮得太耐定係太過多汁所致呢，意粉麵條食落過腍，而且越食越咸，失敗之作也。