Handsome XO
我是Handsome XO。 我最喜愛到日本旅遊 , 最鍾意遊覽主要地標, 住宿通常會揀4星酒店。
留言  留言給此旅遊家
  遊記數目 116
  上載相片 3989
  上載影片 3
最近分享過的旅程
2018年聖誕遊東京
國家/地點: 日本
旅程日期: 2018-12-23 至 2018-12-28
2019瑪麗皇后二號郵輪八天遊
國家/地點: 新加坡, 越南
旅程日期: 2019-03-05 至 2019-03-12
2018台灣四天美食之旅
國家/地點: 台灣
旅程日期: 2018-11-23 至 2018-11-26
2018美加探親兩週遊
國家/地點: 加拿大, 美國
旅程日期: 2018-03-27 至 2018-04-07
2017京阪神六天遊
國家/地點: 日本
旅程日期: 2017-11-08 至 2017-11-13
2017台灣婚禮三天遊
國家/地點: 台灣
旅程日期: 2017-04-20 至 2017-04-23
2017溫馨家庭大阪四天遊
國家/地點: 日本
旅程日期: 2017-02-23 至 2017-02-26
東京豪食三日兩夜自由行
國家/地點: 日本
旅程日期: 2016-09-09 至 2016-09-11
2016鑽石公主郵輪東瀛遊
國家/地點: 日本, 俄羅斯
旅程日期: 2016-08-30 至 2016-09-09
2015台北怒食三天遊
國家/地點: 台灣
旅程日期: 2015-11-18 至 2015-11-21
2018年聖誕遊東京 (日本)
(旅程日期: 2018-12-23 至 2018-12-28 ,  旅程性質: 飲食購物)
 整個旅程  (共5篇遊記)
 分享至Facebook 
發表日期: 2020-12-10

2018年聖誕東京之平安夜

1224日(

多次入住「東京凱悅酒店」(Hyatt Regency Tokyo)都會喺會所層食早餐,今次由於住客過多,會所層早就爆滿,八人就決定一嚐酒店餐廳「日本料理 佳香」嘅日式自助早餐,感覺都唔錯。團友雖然全部都係一家人,但口味始終不一,午餐就分成兩組,怕骨組約咗哥哥個靚女朋友一齊去「日本橋 紫苑」食翅翅,其餘嘅就跟大姨媽去「瓢六亭」食鰻魚餐。當日嘅濕平活動高潮必數精品天堂「東京駅一番街」(Tokyo Character Street),買咗兩個鐘都嫌唔夠喉咁!平安夜晚餐好非一般地於人氣榜熱店「東京肉しゃぶ家」渡過,可謂肚滿腸肥的一天
餐牌
餐牌
日本料理 佳香
日本料理 佳香
禪式石池及靚花擺設
禪式石池及靚花擺設
自助餐飲
自助餐飲
自助餐飲
自助餐飲
燒魚及熱粥
燒魚及熱粥
熱粥
熱粥
和式自助早餐
和式自助早餐

東京凱悅酒店」房費所包嘅早餐券適用於酒店三樓之「日本料理 佳香」,早上七至十時可享用和式自助早餐(原價3,100円/大人;連稅3,683円/大人)。

日本餐廳以木為主嘅間隔感覺十分溫和舒適,室內外可見簡樸嘅屏風、禪式石池及靚花擺設,雅致得很。聖誕期間,店內坐滿食客,為怕影響他人,細佬不便於用餐區內隨便拍照。團友們未能一齊坐,不過都被安排入座鄰近嘅二至四人散座。

和式早餐每人包咗一客燒魚、麵豉湯及飯或

1)      燒魚皮層香脆,不過就勁多骨,對XO仔黎講實在係太高難度啦

2)      麵豉湯清香暖胃。

3)      粥品上枱前都係用火煲住嘅。大大碗白粥熱辣辣,而且軟綿綿。

自助餐飲區內有不少送粥嘅濃味配料,包括漬物、關東煮,當中個人鍾情食獅子狗卷。健康之選有生果、果汁、乳酪、清水。其餘有香腸、煙肉、雜菜、炒蛋、沙律等。熱食中最有驚喜就係芳香無比、爽潤巧脆嘅天婦羅舞茸菇,送一流!

日本料理 佳香」優雅潔淨,服務生客套友善,和式自助餐豐富味佳。
推介菜式: 天婦羅舞茸菇,白粥,乳酪
每人消費: 約3683日圓 (早餐)
評分: 味道4   服務5   環境5   衛生5   抵食3
日本橋 紫苑
日本橋 紫苑
通往用餐大堂之走廊
通往用餐大堂之走廊
餐牌
餐牌
餐牌:節令水魚料理
餐牌:節令水魚料理
Moët & Chandon Rose Imperial Half Bottle (9,180円)
Moët & Chandon Rose Imperial Half Bottle (9,180円)
北京水餃(648円)
北京水餃(648円)
紅燒排翅毛鹿鮫(21,600円/位)
紅燒排翅毛鹿鮫(21,600円/位)
杏仁豆腐(756円/位)
杏仁豆腐(756円/位)

講真遊日本絕少會揀中餐食,因為個心總覺得日本版嘅中華料理唔可以同香港食到嘅媲美。機緣巧合下,於家庭聚會中跟叔公嬸婆坐埋一枱,大談食經時得知兩位長輩每次去東京玩都必定要訂位去「日本橋 紫苑」食翅翅,肥肥家族聽到流哂口水,所以就決定去見識吓

餐店位於日本橋三越本店新館十樓。正月將近,接待處旁展出多款迎春精美禮盒。店子設有兩間私人廂房,分別可容納八人及十二人。樓底雖然唔算高,不過勝在有地毯吸音,厚墊椅櫈亦十分舒適,個人只係略嫌冬天嘅暖氣過強,越食越熱。四人被安排入座用餐大堂靜靜嘅一角,半邊為梳化。舖有白色枱布嘅餐桌上簡單擺有自用餐巾及筷子,埋位續一派上熱毛巾,衛生潔淨。

適逢平安夜,午餐就點咗樽細粉紅色香檳碰碰杯。有一點好奇怪,就係香檳開咗後就一直放喺枱上,未有放入冰桶保凍,喺二十多度高溫下迅即變暖;此外,成餐飯都冇服務生為三人斟添酒品,結果要自己黎,感覺好似唔係太專業囉!唔想咁早飲酒嘅哥哥就叫咗壺台灣清香凍頂鳥龍茶(540円/位)。

厚本餐牌中、英、日對照,推介菜式更附有彩圖。最意外就係遇上水魚節,有成頁咁多嘅水魚菜式,小肥喺香港都未見過。出門前得到叔公同嬸婆教路,午餐每人只需點一份「紅燒排翅毛鹿鮫」(21,600円/位)已經夠哂飽。以鐵鍋滾住上枱嘅「紅燒排翅毛鹿鮫」比細佬個頭還要大,賣相震撼到連附近嘅食客都忍唔住要八吓四口子食緊乜,認真唔講得笑!大大梳靚翅不僅熱力十足,而且每份都係咁厚身,實屬勁量級!翅翅質感半腍半爽,芬芳潤滑,紅燒湯底鮮濃甜美,極品也!請留意,貴客可另加2,160円由上湯底轉為蟹湯底,不過哥哥同媽咪都話原味更出色。

高級中菜廳「日本橋 紫苑」環境優雅潔亮,紅燒排翅高質量足,唯一服務生態度欠缺熱誠,不甚體貼,以每人平均消費二萬五千円黎講,抵食一環變相被大打折扣。
推介菜式: 紅燒排翅毛鹿鮫
每人消費: 約25299日圓 (午餐)
評分: 味道4   服務2   環境4   衛生5   抵食3
JR東京站
JR東京站
東京駅一番街
東京駅一番街
搞笑鬼太郎小食禮盒
搞笑鬼太郎小食禮盒
鬆弛熊精品店
鬆弛熊精品店
鬆弛熊精品店:戰利品
鬆弛熊精品店:戰利品
鬆弛熊精品店:抵玩扭蛋
鬆弛熊精品店:抵玩扭蛋
P助限定商品
P助限定商品
P助精品
P助精品

靚靚媽咪同姨媽們愛購物,不過除咗衫褲鞋襪之外,最令大家瘋狂嘅都要數卡通精品,嘻嘻,依方面XO仔絕對遺傳到佢地啲基因呀!家人畢竟不同年代出生,陪著長大嘅卡通人物亦好唔一樣,上網找尋購物熱點時竟然俾細佬發現東京車站內原來有條「東京駅一番街」(Tokyo Character Street),有齊大家心儀嘅蠟筆小新鬆弛熊Hello Kitty比卡超龍貓P等角色嘅精品店,就連外國代表史努比自己都有個Snoopy Town!食嘅、擺嘅、玩嘅乜都有,款式琳瑯滿目,特價貨品同扭蛋抵過香港多多聲,絕對稱得上為精品天堂!買夠五千円仲可以憑護照退稅,不過大家要記緊於購物前先去服務櫃檯登記及索取「免稅收理單」哦!

推介項目: 購物
參觀時段: 下午
評分: 值得去5  
歡樂時光 笑臉2020-12-10
酒酒
酒酒
小食拼盤
小食拼盤
小食拼盤
小食拼盤
Suntory日本天然水
Suntory日本天然水
闊別兩年,「東京凱悅酒店」(Hyatt Regency Tokyo會所層酒廊嘅間隔冇乜大轉變,都係咁光鮮潔淨,闊落舒適。反而服務生人數多咗,所提供嘅餐飲亦明顯有所加強。歡樂時光每位客人都有一份小食拼盤送酒,酒品選擇多咗日本清酒、粉紅汽酒等,數量估計係從前嘅兩倍,睇黎酒店生意增長不少。
評分: 味道4   服務4   環境5   衛生5   抵食4
東京肉しゃぶ家(Tokyo Niku Shabuya)
東京肉しゃぶ家(Tokyo Niku Shabuya)
環境及店主兼主廚高忠伸先生
環境及店主兼主廚高忠伸先生
十四代日本清酒(1,250円/盒)
十四代日本清酒(1,250円/盒)
廚師發辦聖誕大餐(22,000円/位)
廚師發辦聖誕大餐(22,000円/位)
廚師發辦聖誕大餐(22,000円/位):涮涮鍋
廚師發辦聖誕大餐(22,000円/位):涮涮鍋
廚師發辦聖誕大餐(22,000円/位):涮涮肉
廚師發辦聖誕大餐(22,000円/位):涮涮肉
廚師發辦聖誕大餐(22,000円/位):香箱蟹及香箱蟹飯
廚師發辦聖誕大餐(22,000円/位):香箱蟹及香箱蟹飯
廚師發辦聖誕大餐(22,000円/位)
廚師發辦聖誕大餐(22,000円/位)

第一次喺東京過聖誕節,平安夜就一反傳統地棄選西餐,於日本名飲食網「食べログ」(Tabelog)度揀咗間超高評價3.95分(最高4分)嘅「東京肉しゃぶ家」(Tokyo Niku Shabuya)食日式涮涮鍋,一於烚吓烚吓咁過

餐店木造嘅門面有射燈照明,於街道上十分起眼,只係外國人未必識睇其日文嘅招牌。小店一眼睇哂,只有十二個圍繞住師傅大舞台嘅吧位,光亮簡潔,晚市要分兩輪都合情合理。裝潢中最可愛就係牆上一幅著住和服嘅狗仔畫像。細問下,得知講得一口流利國語嘅店主兼主廚高忠伸先生為韓日混血兒,2016年創立嘅店舖為與太太之愛情結精,通往廚房通道之紅白門簾正正印上二人嘅芳名,濃情厚愛盡在不言中

飲品選擇中,日本清酒九成九都只可以續杯叫,姨媽們見係聖誕節就決定豪啲飲十四代(1,250円/盒),可惜酒品唔知開咗幾多日,飲落當中應有之酒味已經揮發咗大半。聖誕期間,餐廳只提供一款廚師發辦聖誕大餐,每位22,000円,另加8%稅,訂座時必先預繳五成訂金:

1)      為平安夜晚餐作序嘅兩片薄切牛脷色澤粉嫩,輕輕燒過足以令其質感鬆爽軟潤,用金碟承載更顯佳節盛宴貴氣十足。

2)      同樣以金盤呈上嘅兩件北海道 ニシン(Nishin)魚籽刺身顏色同口感都一樣咁清新,不用點上調味已夠鮮爽。

3)      另配嘅牛尾湯好暖胃,不過就有少少嚡同粉,唔係咁啱小弟口味

4)      和牛海膽卷橙紅嘅配搭十分鮮艷,一口食落去,黏上甜豉油和牛薄片海膽刺身同時化於舌上,兩款海陸主材嘅芳香及鮮甜慢慢滲進味蕾,美妙極

5)      或許係個人對牛尾嘅偏見,XO仔覺得清燉牛尾雖然好夠腍,不過其肉質及湯底均偏油膩同唔係咁夠味,反而頂面點綴嘅蔥絲勁清爽惹味。

6)      不知不覺已經食到第六道菜,唔講真係未必睇得出熱食嘅三款主材咁猛料,包括魚翅鮑魚海膽,咪即翅鮑膽?!舖面嘅一梳梳魚翅爽脆非常,撥開先見到魚翅塔原來以厚潤彈牙嘅鮮鮑及嫩滑嘅海膽墊底,組合口感豐富,鮮美可口。

7)      正當細佬以為翅鮑膽屬重頭戲,點知跟住上場嘅香箱蟹再另起高潮,因為席上嘅長輩全為蟹痴。嘻嘻,拆蟹重任當然係師傅預先做啦!已去殼嘅香箱蟹肉橙白艷麗、幼嫩柔軟、鮮甜無比,底層嘅碎柳混入橙美嘅蟹膏蟹籽即增強厚潤濕脆,正蟹確真無懈可擊

8)      既然店名「東京肉しゃぶ家」用上「肉しゃぶ」(Niku Shabu)而起,理應為其專長,海陸大餐亦不可缺少涮涮肉靚肉上枱前先要擺好嗰陣,滾熱辣嘅火鍋每二人一組,調味芝麻醬酸汁蔥碎蘿蔔蓉薑蓉則每人一份,設備及配料都係咁齊全,絕對講究,且衛生非常。三款肉品為不同部份之和牛,單憑其獨特嘅紅白紋理已睇得出油脂分佈及比率有所不同。下圖中最多雪花嘅和牛薄片每人一大塊,半溶於口,係一種充滿犯罪感嘅美味!件數最多嘅牛脷因切得夠薄,於滾湯中拖兩拖已夠熟,入口軟腍帶微微韌度,同頭盤輕輕燒過嗰兩片牛脷完全唔同。最後兩件和牛看似厚身,但烚完縮埋水後就剛剛好,咬落肉質超級柔順軟滑,每個部位都各有特色。除咗和牛之外,涮涮鍋環節每人仲有一杯仔正菜雜菌,每款均芳香輕盈。

9)      肉食中壓軸上陣嘅和牛壽喜燒拌蛋黃泡泡外表鮮黃亮麗,夠哂搶眼!經過蛋黃泡泡洗禮嘅和牛壽喜燒尤其芬芳香滑,咀嚼時壽喜燒甜味慢慢散發進口腔,真係甜到笑架

10)  單尾嘅一碗清湯麵品十分暖胃。

11)  其實食完碗麵大家都已經攬住個肚肚話飽,誰不知結尾仲有個香箱蟹飯,師傅攞個蟹煲show quali嗰一刻也太震撼同吸引了,順便提及到飯品混入咗醋醋可有助消滯,XO仔心諗幾大就幾大啦,放緊假一於去盡佢,飽極都要騰出空間食多碗香箱蟹飯飯底粒粒飽滿肥潤,以香箱蟹肉蟹膏蟹籽撈製,集齊爽脆鮮嫩清甜於一身,正到暈呀

小店「東京肉しゃぶ家」簡潔企理,由友善好客嘅店主兼主廚掌舵,氣氛輕鬆溫馨,平安夜之廚師發辦和式海陸大餐精美豐盛,用材上盛,海鮮和牛菜式均質高味佳,能於短短開業兩年間成為網紅熱店,絕對係實至名歸!
推介菜式: 香箱蟹飯,和牛壽喜燒拌蛋黃泡泡,和牛海膽卷,薄切牛脷,香箱蟹
每人消費: 約26800日圓 (晚餐)
評分: 味道4   服務5   環境4   衛生5   抵食3
  0 個留言    |  加入你的留言
此遊記的留言
加入留言
如要加入留言, 請先登入