最近分享過的旅程 |
共找到 117 篇遊記, 正顯示第 41 至 50 篇遊記 |
2月26日(陰)
去旅行梗係要「早機去,晚機返」啦!為怕父母會過於勞累,四口子就乘搭香港航空下午四點五十分班機,於晚上八點左右回港,完全唔洗趕,仲可以喺機場食埋晚飯先返屋企。
酒店預設退房時間為中午十二點,小肥兩兄弟朝早食完早餐後即前往酒店對面間大丸買多輪手信,順便買咗兩盒超靚嘅杯仔蛋糕自己試。退完房就去咗酒店樓下間「新喜樂」食多餐日本菜做晏先起行前往機場。
肥肥家族去邊都只會預鬆時間,去機場亦不例外,幸好買商務機票可於貴賓室邊等邊享用小食酒水,即使飛機餐唔係太好食都唔會餓住個肚肚抵港。2月25日(晴)
翻閱香港出版嘅旅遊報刊雜誌,都會留意到介紹親大阪例必提到濕平熱點「心斎橋」內有咩新店開幕、新食肆登場、及旅客專享優惠。旅程嘅第三日,我地就以此為主要購物地帶,喺酒店食完個自助早餐後,即出發前往揚名海外嘅商店街。一如所料,喺「心斎橋」淨係逛一個早上係絕對唔夠皮嘅,結果當然係行到傍晚啦!
中午時份,小肥其實係應美人姐姐推介,於「心斎橋」附近一家頗洋化嘅「ステーキ オクソンOx On」食鐵板燒作午餐。個多小時嘅餐飲雖然高質,但就唔多夠飽,食甜品前大肥爸爸仲因行落樓梯時失足,誤傷咗喺佢前面嘅靚靚媽咪。。。幸好家母為習武之人,都叫做食過吓夜粥,不過要頂住過二百磅嘅無情力,傷勢幾唔嚴重極都唔可以再行得太耐街街囉。
由於翌日將返港,晚餐就決定喺梅田一間燒肉店「焼肉の牛太本陣」度搞掂。飯後小肥兩兄弟送咗父母回酒店後,先再走咗去「Hep Five Mall」度玩咗轉摩天輪,再嘆埋杯日本「星巴克」專有嘅「櫻花忌廉星冰樂」先捨得返房執行李。2月24日(晴)
肥肥家族嘅購物行程主要以滿足靚靚媽咪為目標,故小肥於編排路線時都會選取媽咪心儀嘅店舖為中心點,然後再決定去邊到用餐。由於酒店房費包有早餐,每朝早我地都會喺比會所層較多食物選擇嘅「Checkers」食完個自助餐先出街街。
家母最愛日本名設計師「三宅一生」嘅服裝產品,所以細佬專登揀咗到步翌日即到訪名家於大阪開設之旗艦店,並於離店不遠嘅兩星西餐廳「La Cime」享用咗一頓超有驚喜嘅法國九大簋午餐。
XO仔因早已計劃晚飯後要參加大阪當地唯一每週例必舉行嘅阿根廷探戈晚會,午後即帶家人返回酒店附近嘅「阪急百貨公司」逛街,方便旁晚時段放下戰利品後,可直接前往「Mの焼肉 福島本店」食燒牛肉做晚餐。
細佬當真興幸一訪「Cafétin de Buenos Aires」舉辦嘅舞會。會場內每位舞者都非常友善,見到陌生嘅小肥都會自動上前寒暄問好,舞技仲非常了得添!每人消費: 約12600日圓 (午餐)
評分: 味道5 服務5 環境5 衛生5 抵食5
2017溫馨家庭大阪四天遊
家人最怕於旅遊旺季出門,今年一家四口亦選擇喺農曆新年假後先悠遊地去大阪hea玩四日。
2月23日(晴)
近期愛上香港航空o既肥肥家族已成為忠實粉絲,是次東瀛遊亦冇諗過要搭其他航空公司,早已訂好乘搭午前o既HX 618班機飛往關西國際機場。
下午抵達機場後,四人即轉乘「関空快速列車」(KIX Rapid-service)前往大阪市中心。於「希爾頓酒店大阪」辦妥哂手續並安頓好行李後,我地就走咗上去酒店行政層個貴賓室度嘆咗輪歡樂時光,等大肥爸爸回咗氣先慢慢行去區內有名o既食街「曽根崎お初天神裏参道」度醫肚。結果食完壽司再食埋大阪名物「炸串」,即合共兩個晚餐,肥肥家族係咪好堅呢?!
2016年9月11日(炎)
話咁快就玩盡2016年儲起嘅假期,要起程返香港啦!因已多次入住「東京凱悅酒店」,大家朝早就好熟練地喺酒店會所層度各自進食早餐,然後順便喺門外嘅接待處辦妥好退房手續,再喺酒店正門集合,乘坐「Airport Limousine」前往成田機場。入閘前,喺機場間「とんかついなば和幸」度食埋個炸豬扒做晏後,我地就佗佗佻佻地行咗去航空公司嘅貴賓室度嘆著酒等上機。回程時,「香港航空」以「日式牛肉壽喜燒」作為限量版主菜,有份試嘅長輩們都覺得好有驚喜,未入會嘅仲即場做埋會員添,係咪好堅呢?!2016年9月10日(炎)
肥肥家族近年出入日本次數都幾頻吓,經驗已教曉靚靚媽咪同姨媽們主力去邊度濕平,而男士們亦會襯機四周搜索零食、手信、及抵飲嘅清酒。今次三日兩夜東京遊親友早已定好主角為美食,故大家亦作好心理準備購物只為間場。
我地喺東京嘅第二日,九點左右女士們喺酒店食完個自助早餐後,即熟練地乘搭酒店嘅穿梭巴士,去新宿車站旁朝早十點開門嘅「小田急百貨」,快速選購日本限定版嘅心頭好,十一點再趕回酒店會合隊友,一齊坐的士前往銀座,喺小肥一位日藉女友嘅夢想法國餐廳「L’Osier」度享用咗頓令眾人都感到畢生難忘嘅法國盛宴作午餐。
聽就聽過唔少人介紹話日本人對法國餐好有要求,許多廚師店主嘅情操更高尚到情願不摘下米芝蓮星星添。位於銀座嘅「L’Osier」為日本名化妝品牌「Shiseido資生堂」於1973年所開設,法文店名嘅意思正正就係標誌著銀座嘅「柳樹」。曾連續多年獲得米芝蓮三星榮譽嘅頂級法國餐廳原來啱啱喺2013年大廈重建後換上新裝,並轉由年輕一代嘅法籍大廚Olivier Chaignon先生重新創作菜單。餐廳重開至今已連續兩年獲取米芝蓮兩星嘅佳績,結果亦當真冇令人失望!「L’Osier」華麗嘅法國午餐要花上三個多小時才能完整由頭食到落尾。肚滿腸肥嘅團友們飯後就各有各行街街,散散步,等到天黑先再次集合一同晚膳。由於XO仔近年愛上咗阿根廷探戈,當晚就刻意為自己安排咗段小插曲,首次約會當地嘅舞友食完壽司後去參加舞會,跳到盡興先返回酒店。
每人消費: 約18700日圓 (晚餐)
評分: 味道5 服務5 環境5 衛生5 抵食5
「鑽石公主號」返回橫濱港口一刻即為是次一連十一日o既「鑽石公主郵輪東瀛遊」劃上句號。既然都已經飛到黎日本,十二人亦決意要喺東京逗留多幾日,買夠、食夠、玩夠先返香港。
2016年9月9日(炎)
遊輪晨早泊岸,為咗要盡快前往東京食晏同爭取購物時間,XO仔就安排咗架巴士朝早十點由橫濱大棧橋碼頭出發入城。
酒店早已道明要等到下午兩點先會有房,我地唯有先將行李寄存,喺附近o既鐵板始祖「元祖 鉄板焼ステーキ みその」食完個晏,再轉去青山區狂購完一輪,喺「Q-Pot Café」食埋個的骰精美o既首飾下午茶後先返回酒店。辦妥手續後,團友安頓好行裝及略作休息後,大家就相約於酒店會所層度享用歡樂時光o既酒品及小食。
深知長輩如果由朝食到晚,都總愛飯後散一散步,舒展一吓,故晚餐小肥亦特意選擇喺酒店附近一家天婦羅老字號「天ぷら新宿つな八 総本店」用膳,食完就慢慢行返酒店。9月8日(炎):鑽石公主郵輪東瀛遊第九日之At Sea
郵輪河黎到尾聲,上岸前又再係「At Sea」日。眼見大家都早起咗咁多朝四出觀光,團長就俾個機會大家瞓晏啲,各自享受「鑽石公主」提供o既不同服務,包括按摩、健身、購物、拉老虎機等。。。中午先約埋喺十四樓個「Horizon Court」度食自助餐。
午飯過後,大隊就先去咗有歡樂時光優惠o既酒吧度飲咗round,然後就一齊去大玩Bingo。玩咗成個鐘,十二人中只有三個人叫做叫過糊,冇贏都起碼緊張過,玩完就當然係要飲多兩個round啦!
由於大家都為晚餐「Captain’s Gala Dinner」盛裝打扮,飯前就相約於郵輪大堂一邊欣賞歌舞表演,一邊搵專業攝影師影團體相。
評分: 味道4 服務5 環境4 衛生5 抵食5
9月7日(雲):鑽石公主郵輪東瀛遊第八日之Aomori 青森
離開北海道後,返回橫濱前,「鑽石公主」號先路經本州最北o既「青森」(Aomori),逗留咗大半日。有點好奇怪,XO仔出發前喺書局度買旅遊書時,真係搵唔到任何有關青森o既旅遊指南,結果唯有見步行步。
郵輪早於七點抵達「沖館埠頭」,青森市亦安排好免費穿梭巴士往返市中心及碼頭。團友十二人準九點出發,入城後先喺巴士站旁o既A字塔「青森縣觀光物產館ASPAM」索取旅遊資訊,並於頂樓o既瞭望台觀賞青森市o既景色。
由於區內o既食肆大多中午前都未開門,我地只好向著下一個景點蘋果酒廠「A Factory」慢慢進發,邊行邊搵食。行咗大概二十分鐘,終於見到間熟識o既連鎖店「大戶屋」,眼見親友四肢都開始乏力,團長就決定食個簡單o既午餐,補充返啲體力後先去品酒。
離餐廳只有八分鐘路程o既蘋果酒廠除咗有蘋果酒飲之外,其實廠內仲有個超級市場同小餐店,其中當然係唔少得有青森名產o既蘋果同蘋果汁啦!好唔好味就見仁見智。。。
青森市內雖則都有不少購物商場及商店,但居然連出名最愛行街o既大姨媽行咗五分鐘後都主動提出要返回船隻休息,明顯啲街唔係咁好行囉!當幾位年長o既親友提早回程時,留下o既愛蒲一族就決意停多站「南大門」,食多round韓式燒肉作頭輪晚餐後,再趕搭巴士返上郵輪會合團友食第二個晚餐。9月6日(雨):鑽石公主郵輪東瀛遊第七日之Hakodate 函館
「鑽石公主」號喺北海道o既最後一站為道南o既「函館」(Hakodate),可能航行需時,抵港時間為中午十二點正。函館跟之前停過o既釧路一樣同為漁業發達之港口,遊客都愛黎食海鮮,不同之處就係其主要特產為烏賊,故四周都可見烏賊o既影子。
函館既為漁港,郵輪又選擇午飯時間泊岸,我地第一時間即趕去早上營業o既「函館朝市」,為求食到新鮮o既海產。外出落著大雨,幸好市場離「函館駅」步行只需兩分鐘,恰巧地函館市為「鑽石公主」搭客特設o既免費穿梭巴士正正就停喺「函館駅」旁,夠哂方便。
食完晏,十二人就分三架的士前往旅遊熱店「金森紅磚倉庫」瘋狂購物三小時。直至接近黃昏,天色漸由陰轉晴,大肥爸爸就同兩位怕吹風o既團友先返回船隻休息,其餘九人就再坐的士上「函館山」度觀賞夜景。
晚飯時段,九人原本諗住喺市內食埋飯先,無奈各大小餐館全為滿座,大家唯有返上郵輪主餐廳度醫肚。嘻嘻,上船一刻,咁啱撞見一架拉麵車「元祖バスラーメン」(元祖巴士拉麵)喺碼頭開緊檔喎,一向鍾意食拉麵o既幾隻為食鬼就忍唔住偷偷地約咗飯後一齊落去食宵夜;真係估唔到依碗拉麵居然可以成為當日喺函館短留十一小時內最難忘o既一刻!