喺「大丸梅田店」地牢買手信時，因見到小店「ファクトリーシン」（Factory Shin）個陳列玻璃雪櫃內嘅蛋糕仔實在精緻，結果當然係忍唔到手買咗兩盒返香港試啦！

蛋糕店嘅禮盒包裝及小點均精美吸睛，兩件禮盒裝連稅售594円、四件禮盒裝連稅售1,188円。

1)      【ハピネスリボン】（“Happiness Ribbon”）：白色甜點以雲尼拿杯仔蛋糕作底，白朱古力塗面，再配上紅色絲帶設計，定名為「幸福絲帶」。雲尼拿味杯仔蛋糕偏嚡同乾，頂面嘅白朱古力得個甜字，個人覺得好油麻地囉。

2)      【ジュエルピンク】（“Jewel Pink”）： 此件銀光閃爍嘅「粉紅色寶石」其實係以紅莓碎點綴嘅朱古力味杯仔蛋糕，賣相鮮美高貴。。。可惜杯仔蛋糕一樣偏嚡偏乾，幸好個紅莓碎朱古力脆皮酸甜討好，否則恐怕甜品店喺味道嗰環真係要食零雞蛋。

中午前於「希爾頓酒店大阪」辦理好退房手續後，肥肥家族就直接走咗落去大廈個地牢度搵食。全憑店子門外定食嘅模型，大肥爸爸好快就決定一試「新喜楽」，實行食多餐日本菜先返香港。

商場餐店裝潢簡約企理，散座全為合併式木造枱櫈，唔知係咪見我地一家四口個個都咁大隻呢，嬸嬸居然主動俾咗張六人枱我地坐，仲臉帶微笑地送上日英對照嘅彩圖餐牌，實在太好人啦！

1)      諗食乜野前，小肥就先點咗杯梅酒飲，點知酒品成壺連冰上，依800円真係抵飲呀！

2)      鴨鍋定食（880円）：靚靚媽咪所點嘅定食包有滾住上嘅中型鴨鍋、一碗白飯、及一碟醃菜。

3)      天婦羅定食（880円）：細佬所點嘅天婦羅定食一樣包咗碗新鮮熱辣嘅白飯、一碟惹味脆口嘅醃菜、另加多碗麵豉湯。雜錦天婦羅均鬆化香脆，其中三隻中蝦爽厚彈牙，雜菜都唔錯，一千円唔洗絕對抵食！

4)      新喜樂定食（1,420円）：大肥爸爸憑餐店門外個模型所揀嘅新喜樂定食其實即係鴨鍋定食同天婦羅定食嘅混合版。佢滿意地大讚定食飽肚又夠多款式。

5)      おすすめ御膳（2,700円）：哥哥就叫咗個廚師推介套餐，內含天婦羅、刺身、海鮮、蔬菜、麵豉湯、同埋甜品，極之豐富。

「香港航空」商務艙搭客候機時，均可於關西機場「飛鳥貴賓室」享用免費提供之小食及酒水。

添，離境前明顯飲到樂而忘返，要哥哥提醒話閘口機員有權阻止醉客上機，細佬先肯放低隻酒杯。

回程時所搭o既香港航空HX 619班機唔係好夠冷氣，小肥居然坐到出哂汗，同機艙服務員反應後都未能調低。見其態度溫婉誠懇，都明白到有啲野係佢地控制範圍之外o既。

「玫瑰花熏帶子」則又凍又硬硬地，個熏味唔係咁啱個人口味囉。主菜「水晶牛助骨」都算唔錯，肉質軟腍帶甜，配上紅米個組合都好健康，不過問題係啲餸唔夠熱。。。

鐵板燒專門店「ステーキ　オクソン」（Steak Ox On）為貌似小屋嘅地舖。正門有塊紅地毯，配上磚牆及玻璃門，感覺極之洋化。步入店子，迅即由年長嘅嬸嬸招待，先為各人掛上外套大衣，再帶領入座鐵板前嘅吧位。四口子埋位先從皮套酒牌各自點選酒品。然後全體一致都要咗客8,640円嘅特選午餐「Special Lunch」，並要齊兩款極上黑毛和牛。

午餐由是日前菜「オードブル」之法式鹹批作序。鹹批清涼輕巧，個人自係略嫌質感偏硬同乾。接著嘅時令沙律「季節の野菜サラダ」夠就夠爽口，不過細佬就唔係太鍾意其淡而無味嘅沙律醬囉。

師傅以猛火燒煮極上黑毛和牛牛柳及西冷「へレステーキ、サーロイン」前，非常友善地提點小肥要準備相機捕捉熊熊火光。主菜和牛四人每款都分到有兩件，較為細食嘅靚靚媽咪就分多咗兩件出黎俾乖仔們食。燒至四成熟嘅和牛牛柳軟腍潤澤，而和牛西冷則更有口感，兩者均肉汁豐盛，配上碟上脆卜卜嘅蒜片最為惹味可口。其實和牛一啲都唔油膩，不過同一時間食咁多件都會覺得溜，中途夾入酸爽消滯嘅蕃茄「漬物」即令胃口大增。再黎多碗熱辣辣、香噴噴嘅「鐵板燒燒飯」都好似唔係好夠飽咁。熱食環節以一碗暖胃嘅麵豉湯「味噌汁」作結。

之後嬸嬸就叫我地移玉步往下層嘅客廳度食甜品。好不幸地，大肥爸爸就喺落樓梯時誤傷咗媽咪。。。

西式客廳大方雅致，闊落且有氣派。坐下不久，點完咖啡及餐茶後，每人先有一客爽甜嘅節令柚子味雪葩「旬のシャーベット」。甜品為芝麻蛋糕「ケーキ」伴鮮果。灰黑嘅芝麻蛋糕鬆軟微甜，配上爽甜多汁嘅特別柚倍添清香，簡單味佳。午餐正式由熱茶或咖啡劃上句號。

法日混血嘅「ステーキ　オクソン」（Steak Ox On）環境優雅，年長嘅嬸嬸態度有點高傲，肥師傅就友善客氣得多。肥肥家族同點嘅特選午餐質高美味，唯一份量唔多夠飽，每人成萬幾円依個價位感覺就唔係咁抵食囉！

為方便父母可以飯後早啲返酒店執行李，XO仔就揀咗喺離酒店只需步行八分鐘就到嘅「焼肉の牛太本陣梅田店」食多次燒肉做晚飯。

商場餐店好爆場，好在細佬早喺出發前於網上訂座，唔係肯定有排等。由於店內實在太迫人，座位冇得埃又唔係特別舒適，要影環境相絕對會影響到其他食客，還望大家體諒未有拍下。明白到全場滿座，服務生全都忙得團團轉，所以都好感激佢地仍可保持笑容及友善嘅態度，四口子對餐牌及餐飲有咩問題都好有耐性咁回答我地，絕對值得一讚。

肥肥家族於日本食飯全由小肥一人作主叫食物，一家人最易話為，所以細佬就點咗份燒和牛套餐「本陣セット」黎分，唔夠食先再追加飯麵。

1)      本陣セット（9800円）：本陣套餐包有火炙壽司三種、上生黑牛脷、五款特選牛肉、三式泡菜、燒野菜、及本陣沙律。本陣沙律清爽、三式泡菜惹味，燒野菜都好新鮮爽脆。五款特選牛肉均鮮紅美艷，雲石紋理紅白分明，食落有香軟、滑潤、嫩滑、爽薄，各有特色，可謂色香味俱全。三種火炙壽司如相般有六片生牛肉，另跟六粒細小嘅壽司白飯球。食客只需燒煮牛肉至理想嘅熟度，再連同白飯即可自製出火炙和牛壽司。火炙和牛壽司熱辣軟熟，白飯剛好中和牛肉嘅油份，組合確真無敵。

2)      和牛大判ハネシタ焼きすき（590/枚）：由於本陣套餐中嘅火炙和牛壽司太過出色，四口子都決定每人都要追加多一件配上蛋黃汁嘅壽喜燒火炙和牛壽司。同為壽司飯另上嘅壽喜燒火炙和牛壽司都係由客人自己燒煮和牛薄片。嘩，點上蛋黃汁嘅壽喜燒火炙和牛壽司不單柔軟腍潤，入口仲要多咗份香滑，美妙極！

3)      黑毛和牛みすじ（1850円/90g）：講真肥肥家族對牛隻不同部位嘅認識唔深，何況餐牌上全為日文，大家都只能單靠漢字挑選。厚身嘅黑毛和牛みすじ五成熟仍好夠軟腍，食落又唔會成口油，非常好味。

4)      石鍋牛肉飯（650円/小）：細碗飯份量真係唔多，一個男人絕對唔夠飽，個人略嫌牛肉唔夠，質量亦不及自己燒嗰啲咁靚，建議大家如果真係有飯癮就叫碗白飯黎送啲靚牛肉。

大阪梅田區其中一個地標就係離遠都可以望得到嘅摩天輪。摩天輪位於「HEP FIVE」購物商場內，入口處喺七樓，開放時間每天由朝早十一點到晚上十一點，五歲以下嘅小童可免費乘坐，其他人則一率收費500円。

鮮紅色嘅卡箱相當奪目，每卡可最多坐四個人，環繞一圈約十五分鐘。講真大阪嘅夜景實難與東方之珠媲美，此摩天輪唯一獨特之處就係卡箱內有個可以接駁手提電話嘅喇叭，搭客可一邊欣賞大阪景色嘅同時播放出自選歌曲

喺「HEP FIVE」一訪梅田火紅色嘅景點後，喺商場竟然有緣地遇上星巴克咖啡屋「スターバックスコーヒー」（Starbucks Coffee），店子仲要推緊紅粉緋緋嘅櫻花特飲喎，XO仔即抵擋唔住誘惑。。。

咖啡店內四周嘅裝潢都用上櫻花圖案，就連印章及手機遊戲都用上櫻花作主題，真係夠哂粉紅。

Sakura Blossom Cream Frappuccino（570円/Tall）：小肥所選嘅「櫻花盛放忌廉星冰樂」外表雪白，粉紅元素源自頂面嘅白朱古力脆脆及櫻花粒粒，成功營造出片片櫻花花瓣漂落之情景，當真極有思意！櫻花忌廉星冰樂清香柔滑，微甜中有櫻花粒粒帶黎少少醒神清新嘅酸甜，粉紅色嘅白朱古力花瓣又增添多份脆甜，這杯粉紅色櫻花誘惑實在美妙動人啊！

酒店內其實有兩個地方都可以用房費包咗嘅早餐券，其中一度就係三十二樓嘅行政酒廊，據悉該處座位及餐飲項目都比較少。深知大肥爸爸最愛多元化，所以哥哥就話不如喺酒店設於二樓嘅咖啡室「Checkers」內享用較多野食嘅自助歐陸式早餐。

餐室每朝早六點半開始就會開放俾啲住客食早餐，閒日收十點，週末收十一點。入座後服務生都會先呈上咖啡或茶，接著就由貴客自取食物。自助區有多款果汁、茶包、麵包、水果、咸點、熱食可選，當中個人主攻朱古力牛角包、燒賣、乳酪、粟米湯、同粥。開放式廚房內有位廚師哥哥即場煎蛋及炒蛋，當然大家亦可點奄列啦！

多得蕃薯Uncle每天都有細閱五份報紙嘅習慣，每份仲要係由頭版睇到尾頁，中間大小專欄及廣告都唔放過嗰隻，方才知悉大阪有間抵食高質嘅星級法國餐廳「La Cime」，肥肥家族當然係要第一時間見識吓啦！

從官方網站已清楚了解餐室午市只供一款8,500円嘅九道菜餐單，晚市則一率為18,000円嘅十二道菜餐單，另加稅。網上訂座流程由用餐日期一個月前開始，逢週日休息，小肥跟隨指示就輕而易舉地於一個月之前成功為午餐訂好位。負責人於二十四小內以電郵確認回覆，告知大廚會用節令食材烹調精美午餐，並問及各人有否對任何食物敏感，相當詳細，未到大阪已感其服務態度專業。

由梅田出發，乘坐地鐵往離餐店最近嘅本町站只需約五分鐘，由車站行去餐廳再要八至十分鐘，個人覺得絕對方便。身為地舖嘅西餐廳以不甚起眼嘅黑白色作門面，室內亦無花巧嘅裝潢，彷彿正要用極簡主義嘅室內設計向貴客道出相等於「請留意美饌」嘅訊息，有意思極！店子面積不大，但勝在樓底高，環境潔淨企理，簡單用上鮮花擺設已夠雅致，就連洗手間都寬廣舒適過人。

四口子初次光臨「La Cime」，官仔骨骨嘅經理哥哥眼見小肥手持相機，即友善地提點因店內有其他食客，希望細佬可喺不影響他人用餐嘅情況下拍照，XO仔話哂都係醒字派，當然明白點做啦！

餐桌上每個座位前面都有整齊嘅餐具及當日嘅精選餐單，另附一份飲品牌。食物早已喺訂座時選好，故大家只需點選飲品，當中可揀單杯美酒、汽水、原枝洋酒、甚至可任由侍酒師即玩配酒添。家中以靚靚媽咪最識飲同最飲得，外遊都唔怕會飲醉嗰隻，所以只有佢一人玩6,000円嘅「配酒套餐」。媽媽大讚餐廳所揀選嘅香檳、紅酒、白酒、清酒同啲菜式相合得黎唔會互相衝突，而且質量絕非等閒之輩，價錢實為超值也！

九道菜午餐先由鬼佬白蘿蔔所烹調嘅馬卡龍前菜作序。「White carrot & almond」鬆化潤滑得黎極之輕盈，以大大件假木高盤承載又增添份純樸，可謂美貌與美味並重。

第二道「Herring on the buckwheat chip」嘅木盒擺盤同樣有種大自然feel。一口吃下富彈性嘅鯡魚刺身及墊底超脆嘅蕎麥脆片，脆中帶韌嘅同時又散發著清香微甜。

冷盤最後一味為色彩鮮黃嘅「Squid & citrus fruit with dried mullet roe」。半透光嘅烏賊粒粒質感爽柔，以清新嘅日向夏及鮮濃嘅烏魚子點綴調味已夠芬芳醒神。

進入第二段嘅熱食環節，即由靚仔經理續一喺面前為「Oxtail with Scallop & Cauliflower」淋上熱熱嘅忌廉汁，於碟子上繪出一幅精美嘅食物圖。藏喺椰菜花幼絲下嘅牛尾極之軟腍，連同乾巧脆薄嘅椰菜花、香脆惹味嘅瑤柱碎及濃滑嘅忌廉汁食，口感有層次得黎味道非常和諧。

接著嘅「Abalone sauter with lotus root & apios」係咁多味最綠色嘅一款，當中鮑魚鮮甜厚潤得黎帶陣陣香草嘅氣色，都幾得意。

試問法國大餐又點可以少舊魚呢，何況仲係兩星名法國料理嘅「La Cime」？！「Yellow Grouper "Aohata" with mountain vegetable & yogurt sauce」以鮮綠嘅蕗薹菜汁唧成葫蘆邊界綑著簾鯛魚件，菜式嘅外表實在吸睛。厚身嘅簾鯛魚肉白滑幼嫩，輕巧嘅乳酪泡沫剛好提升鮮度，效果極之簡潔！

整頓午餐以主菜「Pork from "AMAMI Island" with black radish & black rice」最為鮮紅艷麗。原來奄美大島正正係主廚嘅家鄉，唔怪得知主角會選以鄉下盛產嘅靚豬烹調。煮至粉色嘅島豚不單肥瘦均勻，而且爽口彈牙，兼肉汁豐盛，師傅以微酸嘅醬油及黑米點亮即減低膩感，何其精妙！

最後輪到甜品出場啦！打頭陣嘅「Compote kumquat with ginger flavored fromage blanc」外觀已夠橙光閃閃，亮麗晶瑩，入口更覺清甜爽潤，芳香柔滑。

味蕾以微涼嘅金橘及乳酪洗滌一番後，即由「Warm chocolate in baked pie with "Sakura" & "Sakekasu" sorbet」接棒。呈球狀嘅朱古力批外脆內軟，可可味香濃得黎完全唔會過甜，塗上清涼清新嘅酒粕櫻花雪葩未有互搶之餘，仲出奇地各自為對方突出其獨有嘅香氣，極之神奇！

法式九大簋以精美嘅法式小點配餐茶或咖啡劃上完美嘅感嘆號！

全因「Mの焼肉」喺多本旅遊刊物都有出現，當中主打嘅松阪牛肉插圖又相當吸引，眼見本店離入住嘅「希爾頓酒店大阪」唔遠，小肥唔洗多諗即以網上訂座，流程十分簡易。

餐店合共兩層高，環境雖然較為暗黑，但感覺仍不失衛生企理。四人被安排入座二樓之半獨立式廂房，好夠私人空間。店員中仲有位香港留學生，全晚可以廣東話溝通，份外親切。

打開餐牌一睇，最少有十一頁都係賣緊「松阪牛肉」，迅即明白到店名「Mの焼肉」中嘅「M」就係「松阪」（Matsuzaka）嘅縮寫。既然黎到松阪牛燒肉專門店用膳，肥肥家族就先點咗個包羅萬有嘅四人用「特選松阪牛のぜいたく盛り6種」（27,600円），另加壽司及飯麵。

1)      松阪牛赤身肉炙り寿司（480円/件）+ 松阪牛霜降り肉炙り寿司（580円/件）：餐店有兩款火炙松阪牛肉壽司，四人同屬牛魔王，故亦想即場試齊並作出比拼。平心而論，如果一次只係試一件，兩款獨立黎食都絕對肉香味佳。不過當同場加影時，如相所示，兩者色澤一鮮一暗，入口更覺赤身肉炙り寿司不及霜降り肉炙り寿司肥美軟潤，後者依100円真係抵加同抵俾架！

2)      特選松阪牛のぜいたく盛り6種（27,600円）：松阪牛肉拼盤上枱當真如餐牌上嘅彩圖般鮮紅奪目，非常吸睛。拼盤上合共有六種松阪牛肉，每款形狀不一，但厚度就差唔多。個人覺得松阪牛肉大多燒至四五成熟，仍帶少少紅就最軟熟香潤，不過其中亦有幾件真係學哥哥話齋要熟多少少先更富肉香同肉汁。總括黎講，松阪牛肉不同部位都一樣高質美味，點選拼盤可一次過品嚐多種款式，份量適中，個人誠意推介。

3)      塩タン（850円）：牛脷雖則超薄，但咬落勁爽脆柔潤，正！

4)      Mの肉丼（980円）：丼物嘅白飯底粒粒飽滿軟綿，只係舖面嘅牛肉肥膩咗少少，加上份量唔算好大碗，細佬會情願散叫松阪牛肉自己燒，想食飯就另點白飯。

5)      松阪牛すじラメン（680円）：拉麵個湯底清香熱辣且唔油膩，麵條亦煙韌彈牙，熟透嘅松阪牛肉薄片又一啲都唔乾嚡，680円可謂超值！

相信有睇開細佬寫作嘅朋友都會知道XO仔對阿根廷探戈熱愛嘅程度近年已開始國際化，去外國遊埠都會專登參加當地嘅晚會，務求一會各國舞林高手。

多得日籍好友穿針引線，小肥得以認識並參與大阪地下酒吧「Cafétin de Buenos Aires」舉行之週五晚阿根廷探戈舞會。駐場嘅探戈發燒友不但全為跳得之人，眼見生面口嘅XO仔初黎報到，更續一上前自我介紹及閒聊一番，面對著外出寒冷嘅天氣，感覺猶如雪中送炭般，既親切又溫暖。

其實喺之前o既遊記都已多次介紹過香港航空商務艙o既獨立座位有幾舒適、服務有幾貼身、航班有幾準時，原本都冇諗住為今次大阪之旅再多作評論。無奈今次所搭o既HX 618班機o既飛機餐實在係大失水準，令細佬不得不在此向大家訴訴苦。

從餐牌上得知航空公司正與酒店中菜廳「海景軒」合作，找來名廚炮製咗幾道特色菜餚供搭客於機上享用。肥肥家族四人因座位不同，故點菜時間亦不一致，結果只有哥哥一人可嚐到特色主菜「翡翠夜明珠」。自己未能一試當然係有啲失望，但當四人中只有一人可以叫得到o既時候，心諗如果香港航空有心推廣，係咪可以俾貴客預早訂定主菜呢？！

雞件過腍且偏嚡，當真唔係咁掂。成份餐最好食反而係個蒜蓉包。。。

由關西機場乘搭「関空快速列車」（KIX Rapid-service）前往大阪市中心只需1,190円，一個鐘頭左右即達梅田。由車站行去「希爾頓酒店大阪」路程其實不用花上十分鐘，無奈站內指示不甚清晰，四周多個通道又以梯級為主，手持行李搵路當真吃力非常。後來經過多次出入酒店後，方才發覺酒店位置原來好方便，除咗有地下通道直達車站外，更學會只要認住「梅田大丸」就可容易地找回酒店，周邊又有多個購物熱點，唔怪得知嗰區咁旺。

商務客房

我地所入住o既商務房間除咗包有自助早餐之外，四人更可於32樓o既商務貴賓室內免費享用精選下午茶小點及咖啡、歡樂時光酒品及小食。

先出街慢慢搵食。點知會所層早已坐滿貴客，必需排

及質素又認真麻麻，吸引指數奇低，結果未飲完第一輪大肥爸爸已忍唔住話要快啲去食飯。

由於冇人可以預料航班會有幾準時，為怕引起不愉快事件，哥哥早已吩咐細佬唔好訂定晚餐，免得遲到收場，阻到人地做生意就唔好啦。XO仔參閱過旅遊書，知悉離酒店不遠有條美食街「曽根崎お初天神裏参道」，步行只需八分鐘左右，街上有多間食肆任君選擇，旁邊仲有間開到深夜o既露天神社，所以就決定第一晚去嗰頭覓食。

黎到日本，父母都想第一時間食壽司，行到去「曽根崎お初天神裏参道」亦好順理成章地先搵壽司店。XO仔較單純，諗住喺大街o既地舖會最安全啦，所以當路經「市場ずし」鮮紅搶眼o既門面時，迅即提議入去試試。

兩層高o既壽司屋門外睇起上黎就好光鮮，但樓上環境較為簡陋，眼見店內有多枱醉客，茶餐廳格局又冇乜好影，為怕惹上不必要o既麻煩，細佬都冇刻意四周拍照。

離開咗壽司店即重踏上「曽根崎お初天神裏参道」，一直向著返回酒店o既方向走，離遠其實都已聽見有好多人聲，行近先知原來幾位年輕人正為樓上炸串屋「串かつじゃんじゃん」拉緊客。由於店子鮮黃色o既招牌實在吸睛，加上幾位店員咁落力，大肥爸爸又明顯唔想再行，小肥同哥哥打個眼色就決定一戰大阪名菜之一o既炸串。

樓上小店面積唔大，空氣又唔算好流通，室內油煙味都幾勁吓。當晚餐店因只剩餘榻榻米散座，七旬雙親都被迫要除鞋並屈膝而坐，見佢地用餐時不停更換位置都知佢地唔係咁自在，唯有希望食物美味可搭救，並且可速戰速決。地道小店只有日文餐牌，年輕o既服務生得知細佬只可以簡單日語溝通時，佢都好有耐性地講解炸串食法、翻譯餸名、及推薦人氣菜式，友善客氣得很。

肥肥家族應推介點咗幾款炸串及小食：

1）　伝說の手羽先（180円/本）：餐牌上知悉「傳說中有款雞翼巧巧味。。。」，因深知靚靚媽咪最愛食雞翼，孝子當然係要叫俾媽媽食啦！傳說雞翼乾巧香脆又惹味，超正！

2）　エリンギ（杏鮑菇；100円/串）：杏鮑菇炸串每串均為原條菇菇，肥厚爽潤，芳香可口。

3）　豚バラ（豬肋骨肉；170円/串）：個人略嫌豬肋骨肉炸串乾嚡咗少少，係咁多條炸串中較為失色o既一道。

4）　チューリップ（雞槌；180円/串）：雞槌炸串鬆脆富彈性，香口味佳。

5）　エビ（蝦；160円/串）：蝦炸串皮脆蝦鬆爽，咬落真係索索聲架。

6）　若雞のから揚げ（炸雞；590円）：炸雞件脆巧肉嫩又夠肉汁，一樣咁掂！

番薯Uncle退休後，每年遊日本嘅日數絕對多過小肥啲年假，對成田機場內有啲咩店舖食肆都可以用瞭如指掌黎形容呀！將行李寄好艙，佢就帶隊去「とんかついなば和幸」食炸豬扒做午餐。

Uncle一早已提到炸豬扒專門店「和幸」舖位唔算好大，午飯時間門外都會企滿人龍，我地人多必需分開入座，千祈唔好揀位坐。小店裝潢簡潔企理，門外嘅玻璃陳列架上可清楚睇到多款菜式套餐嘅模型，方便食客於候座時可預先選定食物。可能進出機場嘅多為外國人，餐牌全為日英對照，友善嘅店員更會以簡單英語溝通，不過最令XO仔感動嘅就係當收銀姐姐見到細佬手持大袋銀仔慢慢數出尾數時，佢仲主動提出幫忙用盡大銀，以減輕背包嘅負荷，父母見狀亦不禁連聲道謝。

鶏の唐揚（500円）：炸雞乾巧熱辣，皮脆肉嫩又多汁，500円有五件，絕對抵食！

「香港航空」HX 609班機準下午3時55分起飛，由東京飛回香港只需五個多小時。客機商務機艙嘅獨立座位寬敞闊落，私人空間足，個人娛樂系統播放嘅節目又夠新，唯一親友都覺得機上嘅冷氣唔係好夠，就連一向怕凍嘅長輩都熱到出哂汗，仲罕有地要叫杯凍水黎降一降溫。

其實之前坐過「香港航空」好幾次都已經覺得機上嘅飛機餐好唔錯，尤其係早餐提供嘅法式西多士，確真令人一試難忘！真係估唔到今次坐下午機回港，居然有幸一嚐限量供應嘅「日式牛肉壽喜燒」作晚餐，美食配上航空公司嘅招牌雞尾酒「Bauhinia Blossom」，成功為旅途添上繽紛嘅色彩。

蒜蓉包及紫菜包：熱辣辣嘅蒜蓉包香脆惹味，同樣暖手嘅紫菜包則鬆軟甜美，各具特色。

頭盤之醃製三文魚及青瓜伴薄餅及柑桔鮮忌廉：頭盤三文魚有三塊之多，並以軟腍嘅薄餅墊底及爽脆嘅青瓜隔開，喺面塗上柑桔鮮忌廉，食落效果非常清新。

主菜之日式牛肉壽喜燒配黑芝麻飯卷及日式雜菜：日式牛肉壽喜燒香濃甜美，牛肉薄片軟潤唔嚡口，伴上白飯及芋絲可索盡靚汁，超好味！

機會，可謂雙贏。

的士叔叔依照導航指示抵達餐店門前。嘩，大家真係冇諗過L’Osier個門面居然會如酒店般咁壯麗有氣派，大門仲要係由身穿制服嘅靚仔哥哥開關，唔怪得知店主要設下服裝限制，穿著牛仔褲、短褲或波鞋者均不得內進，當中男士更必需穿上西裝。

服務生衣觀整齊，有禮好客，每個動作都能反映出對用餐禮儀嘅講究及尊重。十三人被安排入座三張圓枱，雖然一早已訂好餐單，但經理哥哥依然喺送上每道餸菜時詳盡講解菜式嘅食材及烹調方法，而且有問必答，態度極之誠懇。最令人印象心刻都應該係每當貴客離座前往洗手間時，服務生都會第一時間換上全新餐巾，衛生分爆哂燈呀！

電話訂座時，XO仔好大擔地為男士點咗九道菜嘅Les Belles Gourmandes（14,000円）及為女士揀咗八道菜嘅Menu Dejeuner（10,000円）。兩款套餐都包有麵包、開胃前菜、粟米湯、海鮮頭盤、紅肉主菜、甜品、咖啡或茶，分別只在於前者多咗味魚，及頭盤主菜所選用嘅食材。

Amuse-Bouche：三件的骰嘅開胃前菜均由又薄又脆嘅外層包住，香脆得黎味道清香淡薄，輕盈健康，極易入口。

Corn Soup with Fresh Cornbread：未有列入餐牌上嘅粟米湯不單呈金黃色，師傅仲巧妙地加插咗不少蔬果為湯品繪添色彩，造成一幅美食圖咁，實令眼前一亮。粟米湯幼滑香甜，襯上同樣帶甜而又暖手嘅粟米麵包食用可謂完美！

Thin Sliced Akagai, Mirugai, Hokkigai w/ Sea Scallop Mousse Topped w/ Seaweed Jelly “Barbajuan” Fried Squid Ink Small Ravioli：海鮮頭盤用上幾款貝類刺身，混入海藻啫喱及帶子慕絲組合而成，口感軟潤爽嫩，清新鮮甜。應經理哥哥介紹，喺另上黑墨墨、熱烘烘嘅墨魚汁雲吞塗上刺身啫喱，雲吞頓變得腍潤帶脆，鮮美可口，確真一絕！

Onagadai-Fish – Vegetables, Tomato-Confit, Black Olive and Basil Soup, Lettuce Balls Zucchini, Lemon, Shiso Flower：廚師選以大大件尾長鯛作第一道熱食，鮮色嘅外觀已夠吸睛，食落嚐到魚皮嘅香脆、魚肉嘅嫩滑、及汁液酸甜中散發出陣陣紫蘇香，清爽得很是醒胃。

Akaushi Beef from Kumamoto – Roasted, Girolles Mushrooms & Green Asparagus-Fricassee, Summer Truffle, “Violine” Red Wine Sauce：經理哥哥唔講真係唔知，原來此道赤牛和牛乃熊本縣名產，因牛隻毛色呈啡紅而被名為「赤牛」。如相所示，碟上嘅赤牛鮮紅潤澤，毫無半點雪花油脂！可以話俾大家聽，三成熟嘅赤牛入口鬆軟柔滑，而且肉味香濃，吃畢亦不感到絲毫溜滯，係整頓午宴嘅亮點，美味程度實難以用筆墨形容，一定要親嚐方才領略得到。

Pre Dessert：柚子雪葩伴上柑肉墊底，視覺上明亮得好似個發緊光嘅太陽咁，味道則倍感清爽甜美。

Different Texture of Raspberry/Lychee, Rose Ice-Cream：據說，此道火紅色嘅紅莓荔枝玫瑰雪糕甜品係師傅從「資生堂」化妝品系列中極人氣及有名嘅紅色唇膏取得靈感所創製而成，望落又真係幾似個抽象嘅紅唇喎。甜品o既紅莓荔枝味濃甜但不過火，中間夾入清涼芳香嘅玫瑰雪糕，加埋底層嘅朱古力就更添脆口，質感同味道豐富得好和諧。

Petit Fours：由於甜點應用手直接食用，拼盤旁亦早已放置一碗清水給賓客於食用甜點之作洗手之用，周到得很。

Sweet Delicacy Trolley：大家嘆緊咖啡之際，型男哥哥從側旁再推出甜點小車仔，車上擺放有琳瑯滿目嘅糖果、餅乾、朱古力，雖則話係任食，但經過八道餸後，XO仔都只能小試四件，睇黎下次再黎一定要玩空肚食法國餐。

親友，滿意程度明顯係超哂級嗰隻啦！

為咗要喺舞前快速充飢，旁晚時份日籍舞友就帶咗XO仔及團友們去酒店附近一家人氣連鎖店「すしざんまいSushi Zanmai」食壽司作晚飯。

二十四小時營業兼全年無休嘅壽司屋佔用面積全層，晚飯時段壽司吧內嘅師傅門都忙得團團轉，門外企滿食客輪座，幸好我地一早已訂定位，方才免去等候嘅時間。食店其實有少少半快餐店形式經營，除咗壽司吧位外，散座全為合併式，餐具亦全為自助式，上菜速度高，忙碌嘅服務生態度都尚算良好友善。

由於飯後諗住會狂跳熱舞，小肥就同哥哥及舞友分咗幾個壽司拼盤，佢地唔夠就各自點咗啲熱食及湯品：

うるおい set （1,980円）：只售二千円嘅雜錦拼盤有成十幾件壽司卷物，多款壽司雖未為頂級貨色，但魚材絕對新鮮味佳，單睇價錢已覺抵食。

まぐろざんまいset （3,000円）：比雜錦拼盤貴一千円嘅吞拿魚壽司拼盤同樣有成十幾件之多，當中用上吞拿魚嘅不同部位，包括中卜口及大卜口，極之豐富，其中亦有兩件火炙壽司，質高肥美，全桌人都大讚價廉物美！

親友不時都會去日本玩，不過去親都好少會揀食鐵板燒，對被稱為「鐵板始祖」o既「元祖 鉄板焼ステーキ みその」（Steak Misono）更加係聞所未聞，小肥其實都係做旅遊資料搜集時先認識到老店，眼見其中一家分店就喺酒店對面，步行都只需五分鐘，所以亦急不及待要去試一試。由於長輩都覺得晚餐食鐵板燒難以消化，今次就決定先嚐午市都有供應o既鐵板海陸大餐。

位於大廈高層o既鐵板燒專門店樓底高高，大堂中央有個方形o既開放式鐵板吧，有多個高櫈圍繞著，近窗位置及廂房則擁有無敵靚景，室內o既燒味一啲都唔勁，明顯抽氣系統強，環境可謂高雅大方，衛生潔亮。我地人多，又一早訂好位及套餐，故亦被安排入座一間榻榻米房內，私人空間更足，仲有專人服侍及烹煮料理，團友們都覺得好享受！

Lunch Set B（4,860円）：精選午市海陸套餐「B」每客均包有130g牛扒、海鮮、沙律、燒野菜、白飯、麵豉湯、醃菜及咖啡。師傅即場喺食客面前燒煮靚魚及牛扒，包保夠哂新鮮熱辣辣。燒魚用上柚子醋同薑碎醃煮，魚肉幼嫩，入口酸甜，很是開胃。燒煮牛肉前，師傅會先問各人要幾成熟，小肥最愛見紅，當然係越生越好啦！牛肉粒鬆軟多汁，輕輕點少少鹽，再連同脆巧金黃o既蒜片跟白飯食用已夠香濃味美。

份量啱啱好，配埋少少清酒就更上一層樓。為答謝大隊光臨，餐店仲每人送咗個木造清酒杯作為留念，認真客氣。

為咗滿足團友可狂購日本名牌服裝，午飯後揸fit人就帶隊前往青山區度行街街。行到咁上吓，消耗咗不少腳骨力後，小肥就跟住旅遊書推介，同班長輩們去區內一間頗人氣o既cutie咖啡店「Q-Pot Café」嘆咗個下午茶。

設於橫街o既精品咖啡屋其實係同名o既「Q-Pot」首飾店所開辦。店主以其精美o既首飾設計特製出多款飾物甜點，賣相極之的骰可愛，而且極富藝術感。

小店粉色o既裝潢柔和得黎好有童話feel，都幾女性化，男生入到去或許會週身唔自在架。天花上o既倒吊茶壺燈飾正正道出店名「Q-Pot」，趣緻得很。店內o既服務生清一色為女生，個個都咁年輕溫馴，襯到絕呀！

多頁餐牌上o既項目全附有彩圖，唔識日文都一樣咁簡單易明。由於十二人都有意回酒店享用包咗o既歡樂時光酒水小食，我地就各自點選飲品，其中幾杯就跟埋個下午茶套餐，甜品上枱時先自行分黎食：

Ring Plate（1,650円）：戒指甜品真如其名，以馬卡龍及朱古力喺隻印有靚靚玉手o既碟上擺成戒指o既模樣，手腕位置仲好鬼馬地加咗條食得o既朱古力白珍珠手鍊，實在吸精，連過七旬o既蕃薯uncle見狀都忍唔住要影返幾幅相留念。朱古力味馬卡龍香濃鬆化，中間夾有幾粒閃令令o既朱古力寶石，咬落軟滑帶脆，絕對屬好睇又好食之選！

家人近年到東京遊玩都必定會入住「東京凱悅酒店Hyatt Regency Tokyo」，貪其地點夠就腳，會所層o既房間企理寬敞，除咗包有早餐之外，由朝到晚於不同時段更可喺會所酒廊享用咖啡、汽水、小食、酒品等，就算上次遇著大風雪都唔洗驚冇野食或者係悶親。

歡樂時光多咗靚酒選擇，食物中除咗芝士拼盤及多味熱食

親友全為酒客，個個退哂休後太陽未落山都已經可以嘆返幾杯，晚飯時間更加唔洗講啦，所以大多都愛食香口野。記得家人最近都話想試多幾間不同o既食肆，喺日本又冇乜點食過天婦羅，今次就專登揀咗間離酒店不遠，而且有成八十幾年歷史o既老店「天ぷら新宿つな八 総本店」，一嚐聞名o既天婦羅美食。

內外同為木造o既小店和風味濃厚，直入已可見師傅喺左方o既開放式廚房忙碌地炮製天婦羅菜式，令人期待萬分。由於我地一行成十二人，訂座時接線生已道明必需預訂埋套餐，以便師傅準備餸菜，小肥就應推介為全團人點咗個「江戶前膳」。到步並埋位後，各人都只需點上飲品就可以等待飯來張口。

出品高質又抵食！

郵輪河第二晚「Formal Dinner」名為「Captain’s Gala Dinner」，菜式明顯比平時豐富，除咗主菜有龍蝦之外，最後甜品上時仲要係由全場o既服務生合作唱歌、跳舞、拍手，圍住個圈咁攞出多份焗雪山，成功牽起一段高潮，好有氣氛。

1)      Tian of Crab, Scallop and Shrimp, duo of caviar, papaya dressing：蟹肉帶子蝦沙律鮮嫩軟潤，簡單配上香橙更覺清新。

2)      Ravioli di Vitello in Salsa di Funghi Porcini, veal pasta, porcini mushroom sauce：個人略嫌意大利雲吞過腍偏咸，有少少失望。

3)      Broiled Lobster Tail and King Prawns, grilled asparagus, rice pilaf, lemon butter：每隻龍蝦均連殼上，顏色鮮美，並由哥哥熟手地續一去殼，服務實在周到。龍蝦爽脆彈牙，且鮮甜無比，可以話係「鑽石公主」個廚房咁多餐飯入面煮得最正o既一道主菜！

細閱網上o既資料及於碼頭索取o既小冊子，得知青森有兩個同「A」字有關o既地標，其中之一個就係外型呈「A」字o既「青森県観光物産館アスパム」（Aomori Tourist Information Center, ASPAM）。

團長喺「ASPAM」地下層攞哂料後，即決定當日只到蘋果酒廠「A Factory」一個景點享受歡樂時光。因早上時間充裕，大多餐廳又要等到中午先開門，我地就上咗去「A」字塔十三樓個瞭望台度一覽整個城市o既風貌。

名稱，清晰透徹。十二人嗰朝早仲要包場，毫不拘束，爽呀！

要喺青森街上搵到啱家人口味o既食肆真係唔容易，十二人結果都係走咗入去一間香港不時都會見到o既「大戸屋ごはん処」。

店子木造o既間隔清爽光猛，簡單樸素。靚女姐姐態度溫婉有禮，見我地一行十二人實難坐埋一齊，故亦非常有善地主動提出安排我地分開坐，起碼唔洗多位長輩喺門外等，最後入座o既XO仔同哥哥就自己坐。

天口咁熱，點食物前當然係要先啤一啤佢啦！小肥兩兄弟比較大食，每人叫咗個包有前菜、麵豉湯、飯及燉蛋o既套餐之餘，仲加咗客唐揚炸雞。

1)      チキン唐揚げ（298円）：一客兩件o既唐揚炸雞炸得好乾身脆巧，一啲都唔油膩，肉質亦軟嫩非常，簡單美味。

2)      小牛たん + 五穀ご飯（1,360円）：牛魔王XO仔點咗個牛脷午餐，配健康o既五穀飯。五穀飯比想像中冇咁硬，好易入口；個人略嫌牛脷過熟咗少少，所以咬落偏韌，不過單睇價錢1,360円絕對收貨。

日本好多地方都有歷史悠久o既祭典，有關o既慶祝活動大多都係每年舉辦一次，青森咁大個城市都一樣唔例外，有個聞名o既「睡魔祭」。據悉，於八月舉行o既「青森睡魔祭」都會有熱鬧o既歌舞及大型o既睡魔燈籠遊行，用意係為驅趕炎炎夏日出動妨礙人民工作o既睡魔，祈求五穀豐收。

相信一提起青森，大多人都會諗起蘋果同蘋果汁，但其實青森亦盛產蘋果汽酒。市內有名o既超市廣場「A-FACTORY」鄰近睡魔博物館「ねぶた ワラッセ Nebuta House Warasse」，遊客觀賞完博物館如果覺得肚餓或口乾，又想品嚐以青森蘋果製出o既甜品及飲品，「A-FACTORY」真係一個好好o既歇腳點。

喺「A-FACTORY」樓上試完蘋果汽酒，大隊就走咗落去地下o既美食廣場中有甜品食o既「SKIP EGG」度嘆咗個下午茶。

小店一眼睇哂，樑上o既黑板寫出日英對照o既食物及飲品餐牌，桌上展出多款甜品西餅，由滿臉笑容o既妹妹仔一人獨自主理。

由於青森市o既商場當真唔及東京及北海道嗰啲好行，其中幾位團友離開咗「A-FACTORY」就立即返咗上船。太陽未落山，團長就提議留低o既團友早啲喺街上一間門外掛著「歡迎鑽石公主郵輪旅客光臨青森」字句o既「南大門」輕食頭輪晚餐，如果趕得切搭早一班車返碼頭就食多餐。

韓式燒肉店環境光鮮寬敞，抽氣都做得唔錯。樓面雖則只有一位姐姐仔忙碌地為全場人服務，其中一枱人仲要係好明顯地飲醉酒想鬧事嗰隻，但其態度仍能保持友善客套，實屬難得。

返回郵輪後，兩批團友就喺主餐廳集合再食晚餐。因深知「鑽石公主」號餐飲質素較為參差，XO仔同已熟落咗o既哥哥仔點上多道菜時，特別講明全部都只要頭盤份量，希望試多幾款。

1)      Kushi Yaki, Japanese eggplant, mushrooms, sea salt：燒茄子及蘑菇質感軟腍，不過調味欠奉，個人覺得好麻麻。

2)      Trio of Seafood, Citrus and Avocado, lobster, shrimp and squid with orange filets, lime-cilantro vinaigrette：海鮮三重奏含龍蝦肉、蝦仔及魷魚，酸甜醒胃，清新爽滑。

3)      Hiya-Yakko - fresh tofu with ginger, scallions & soy sauce：豆腐幼嫩清香，簡單可口。

4)      Caesar Salad：凱撒沙律新鮮爽脆，屬安全之選。

5)      Double Beef Consommé, mini choux buns and green onions：牛肉清湯鹽份過多，直頭多到細佬要咪埋眼黎飲。。。

6)      Linguine alla Vongole, noodles with littleneck clams in cream sauce and parsley：唔知係咪煮得太耐定係太過多汁所致呢，意粉麵條食落過腍，而且越食越咸，失敗之作也。

函館為北海道第一大港口，盛產海鮮，本地人及遊客都愛於市內規模最大o既魚市場「函館朝市」購買及即食魚鮮。

首次到臨函館，搵食就單靠旅遊書引導，喺「函館朝市」內一家老字號「道乃家」（Michinoya）度午膳。

兩層高o既食店地下為迫迫o既散座，十二人好好彩地被安排入座樓上大廳，空間感更足、更舒適，私隱度亦較高。估計餐店為家庭式作業，樓面位嬸嬸應為老闆娘，態度唔算惡劣，但就感覺唔多鍾意招待華人囉。

午市套餐同散叫項目價格一樣親民。個人覺得烏賊菜式只屬一般，反而幾款魚生丼就鮮甜美味得多，誠意推介

遊函館o既旅客早上都會選去「函館朝市」大擦海鮮，中午則會轉移往海邊散步及購物。近海除咗有多間有景睇o既餐廳之外，最多人出入o既就係中央幾座大型o既「金森紅磚倉庫」。

食店

同時不斷補充體力

獲稱為「東方之珠」o既香港擁有亮如明珠o既靚景，參閱過旅遊指南先知原來「函館」同香港一齊並列為「世界三大夜景」之一，而且同時亦為「日本三大夜景」及「北海道三大夜景」之一，來頭咁猛當然要去睇睇啦！

正當團友諗住坐的士前往「函館山ロープウェイ」（Mt. Hakodate Ropeway「函館山空中纜車」）搭纜車上「函館山」欣賞靚景時，頭髮灰白o既的士叔叔隨即告知因已接近黃昏時份，纜車站必定擠滿人群，恐怕團中年長o既親友排上個幾鐘頭隊會有感吃力，所以就建議由佢同另外一部六人的士載我地上山，可以節省不少時間之餘，大家又可以舒服啲，可謂一舉兩得。

「函館駅」附近餐廳唔多，午市時間想為晚餐預先訂座又唔成功，睇完函館夜色後大隊就約好已返回郵輪o既三位團友於主餐廳集合用餐。由於上船時喺碼頭發現有拉麵車擺檔，我地幾個愛吃湯麵o既為食貓就決意飯後再戰拉麵，當晚「鑽石公主」o既「Chef’s Dinner」（廚師晚餐）亦只能輪為配角，即該晚晚餐之序。

1)      Oshizushi - elegantly pressed prime tuna and salmon sushi：喺西餐廳不時都會食到刺身，食壽司都係第一次。洋化咗o既壽司以甜醬喺碟上繪出花紋，外表新穎雅致，無奈飯中夾入咗青瓜，再混入埋甜醬及山葵食用，組合o既味道好怪囉！

2)      Strawberry Sorbet - infused with lemon and wild thyme：上完頭盤同湯，每人都有一球士多啤梨味雪葩，清新又涼快。

今次函館一日遊，真係估唔到高潮位居然係臨離港前一刻喺碼頭食嗰碗「元祖バスラーメン」（元祖巴士拉麵）！小小o既巴士拉麵檔只有三人主持，屬家庭式作業；老伯伯喺車尾忙碌地不停煮製拉麵小食，巴士上及室外o既食客就交由兩位熟手友善o既姐姐同嬸嬸招待，整晚爆場運作都十分流暢。

我地一行六人剛好坐喺巴士內之散座，應該都算係最元始o既拉麵車風味。車上貼有餐牌及剪報介紹「元祖バスラーメン」，食過啱口味更可即場購買盒裝即食拉麵，送禮有特色，自己食都好有意思。小店貴精不貴多，只提供一款炒飯、兩款冷麵、六款拉麵、幾味小食及追加配料，價格100円至1,000円，相當便宜。

人家小本經營，座位不多，大家亦好識做地每人叫咗一碗拉麵黎食，細食o既長輩就揀咗500円o既細碗版鹽味拉麵黎試。XO仔點咗客份量都幾勁o既特製拉麵，鹽味湯底香濃而不油膩，拉麵麵條煙韌彈牙，除咗薄薄o既叉燒之外仲伴上大蝦及干貝，整體鮮味無窮，1,000円絕對抵食！