為咗要喺舞前快速充飢，旁晚時份日籍舞友就帶咗XO仔及團友們去酒店附近一家人氣連鎖店「すしざんまいSushi Zanmai」食壽司作晚飯。

二十四小時營業兼全年無休嘅壽司屋佔用面積全層，晚飯時段壽司吧內嘅師傅門都忙得團團轉，門外企滿食客輪座，幸好我地一早已訂定位，方才免去等候嘅時間。食店其實有少少半快餐店形式經營，除咗壽司吧位外，散座全為合併式，餐具亦全為自助式，上菜速度高，忙碌嘅服務生態度都尚算良好友善。

由於飯後諗住會狂跳熱舞，小肥就同哥哥及舞友分咗幾個壽司拼盤，佢地唔夠就各自點咗啲熱食及湯品：

うるおい set （1,980円）：只售二千円嘅雜錦拼盤有成十幾件壽司卷物，多款壽司雖未為頂級貨色，但魚材絕對新鮮味佳，單睇價錢已覺抵食。

まぐろざんまいset （3,000円）：比雜錦拼盤貴一千円嘅吞拿魚壽司拼盤同樣有成十幾件之多，當中用上吞拿魚嘅不同部位，包括中卜口及大卜口，極之豐富，其中亦有兩件火炙壽司，質高肥美，全桌人都大讚價廉物美！