鐵板燒專門店「ステーキ　オクソン」（Steak Ox On）為貌似小屋嘅地舖。正門有塊紅地毯，配上磚牆及玻璃門，感覺極之洋化。步入店子，迅即由年長嘅嬸嬸招待，先為各人掛上外套大衣，再帶領入座鐵板前嘅吧位。四口子埋位先從皮套酒牌各自點選酒品。然後全體一致都要咗客8,640円嘅特選午餐「Special Lunch」，並要齊兩款極上黑毛和牛。

午餐由是日前菜「オードブル」之法式鹹批作序。鹹批清涼輕巧，個人自係略嫌質感偏硬同乾。接著嘅時令沙律「季節の野菜サラダ」夠就夠爽口，不過細佬就唔係太鍾意其淡而無味嘅沙律醬囉。

師傅以猛火燒煮極上黑毛和牛牛柳及西冷「へレステーキ、サーロイン」前，非常友善地提點小肥要準備相機捕捉熊熊火光。主菜和牛四人每款都分到有兩件，較為細食嘅靚靚媽咪就分多咗兩件出黎俾乖仔們食。燒至四成熟嘅和牛牛柳軟腍潤澤，而和牛西冷則更有口感，兩者均肉汁豐盛，配上碟上脆卜卜嘅蒜片最為惹味可口。其實和牛一啲都唔油膩，不過同一時間食咁多件都會覺得溜，中途夾入酸爽消滯嘅蕃茄「漬物」即令胃口大增。再黎多碗熱辣辣、香噴噴嘅「鐵板燒燒飯」都好似唔係好夠飽咁。熱食環節以一碗暖胃嘅麵豉湯「味噌汁」作結。

之後嬸嬸就叫我地移玉步往下層嘅客廳度食甜品。好不幸地，大肥爸爸就喺落樓梯時誤傷咗媽咪。。。

西式客廳大方雅致，闊落且有氣派。坐下不久，點完咖啡及餐茶後，每人先有一客爽甜嘅節令柚子味雪葩「旬のシャーベット」。甜品為芝麻蛋糕「ケーキ」伴鮮果。灰黑嘅芝麻蛋糕鬆軟微甜，配上爽甜多汁嘅特別柚倍添清香，簡單味佳。午餐正式由熱茶或咖啡劃上句號。

法日混血嘅「ステーキ　オクソン」（Steak Ox On）環境優雅，年長嘅嬸嬸態度有點高傲，肥師傅就友善客氣得多。肥肥家族同點嘅特選午餐質高美味，唯一份量唔多夠飽，每人成萬幾円依個價位感覺就唔係咁抵食囉！

為方便父母可以飯後早啲返酒店執行李，XO仔就揀咗喺離酒店只需步行八分鐘就到嘅「焼肉の牛太本陣梅田店」食多次燒肉做晚飯。

商場餐店好爆場，好在細佬早喺出發前於網上訂座，唔係肯定有排等。由於店內實在太迫人，座位冇得埃又唔係特別舒適，要影環境相絕對會影響到其他食客，還望大家體諒未有拍下。明白到全場滿座，服務生全都忙得團團轉，所以都好感激佢地仍可保持笑容及友善嘅態度，四口子對餐牌及餐飲有咩問題都好有耐性咁回答我地，絕對值得一讚。

肥肥家族於日本食飯全由小肥一人作主叫食物，一家人最易話為，所以細佬就點咗份燒和牛套餐「本陣セット」黎分，唔夠食先再追加飯麵。

1)      本陣セット（9800円）：本陣套餐包有火炙壽司三種、上生黑牛脷、五款特選牛肉、三式泡菜、燒野菜、及本陣沙律。本陣沙律清爽、三式泡菜惹味，燒野菜都好新鮮爽脆。五款特選牛肉均鮮紅美艷，雲石紋理紅白分明，食落有香軟、滑潤、嫩滑、爽薄，各有特色，可謂色香味俱全。三種火炙壽司如相般有六片生牛肉，另跟六粒細小嘅壽司白飯球。食客只需燒煮牛肉至理想嘅熟度，再連同白飯即可自製出火炙和牛壽司。火炙和牛壽司熱辣軟熟，白飯剛好中和牛肉嘅油份，組合確真無敵。

2)      和牛大判ハネシタ焼きすき（590/枚）：由於本陣套餐中嘅火炙和牛壽司太過出色，四口子都決定每人都要追加多一件配上蛋黃汁嘅壽喜燒火炙和牛壽司。同為壽司飯另上嘅壽喜燒火炙和牛壽司都係由客人自己燒煮和牛薄片。嘩，點上蛋黃汁嘅壽喜燒火炙和牛壽司不單柔軟腍潤，入口仲要多咗份香滑，美妙極！

3)      黑毛和牛みすじ（1850円/90g）：講真肥肥家族對牛隻不同部位嘅認識唔深，何況餐牌上全為日文，大家都只能單靠漢字挑選。厚身嘅黑毛和牛みすじ五成熟仍好夠軟腍，食落又唔會成口油，非常好味。

4)      石鍋牛肉飯（650円/小）：細碗飯份量真係唔多，一個男人絕對唔夠飽，個人略嫌牛肉唔夠，質量亦不及自己燒嗰啲咁靚，建議大家如果真係有飯癮就叫碗白飯黎送啲靚牛肉。

大阪梅田區其中一個地標就係離遠都可以望得到嘅摩天輪。摩天輪位於「HEP FIVE」購物商場內，入口處喺七樓，開放時間每天由朝早十一點到晚上十一點，五歲以下嘅小童可免費乘坐，其他人則一率收費500円。

鮮紅色嘅卡箱相當奪目，每卡可最多坐四個人，環繞一圈約十五分鐘。講真大阪嘅夜景實難與東方之珠媲美，此摩天輪唯一獨特之處就係卡箱內有個可以接駁手提電話嘅喇叭，搭客可一邊欣賞大阪景色嘅同時播放出自選歌曲

喺「HEP FIVE」一訪梅田火紅色嘅景點後，喺商場竟然有緣地遇上星巴克咖啡屋「スターバックスコーヒー」（Starbucks Coffee），店子仲要推緊紅粉緋緋嘅櫻花特飲喎，XO仔即抵擋唔住誘惑。。。

咖啡店內四周嘅裝潢都用上櫻花圖案，就連印章及手機遊戲都用上櫻花作主題，真係夠哂粉紅。

Sakura Blossom Cream Frappuccino（570円/Tall）：小肥所選嘅「櫻花盛放忌廉星冰樂」外表雪白，粉紅元素源自頂面嘅白朱古力脆脆及櫻花粒粒，成功營造出片片櫻花花瓣漂落之情景，當真極有思意！櫻花忌廉星冰樂清香柔滑，微甜中有櫻花粒粒帶黎少少醒神清新嘅酸甜，粉紅色嘅白朱古力花瓣又增添多份脆甜，這杯粉紅色櫻花誘惑實在美妙動人啊！