當然遊湖看樹未必人人啱，但如果你比較鍾意花花草草，自然美景，又想閒逸啲洗滌吓心靈，澄清湖確係幾令人舒服，值得一遊。湖區總面蹟300多公項，湖面100多公項，建有環湖路7公里，沿線區分為八景：

1. 梅隴春曉

2. 曲橋釣月

3. 柳岸觀蓮

4. 高丘望海

5. 深樹鳴禽

6. 湖山佳氣

7. 三亭攬勝

8. 蓬島湧金

啲名作得頗有意境，個人感覺就有少少誇，不過，好幾個景區確係幾靚，例如中興塔、千樹林、吊橋、九曲橋，都唔錯！小弟建議，可以晌入口載架的士，入到最盡頭嘅景點「中興塔」開始，沿環湖路向番入口行，咁就無回頭路，又輕鬆啲！

「斑鳩的窩」以專業嘅日式炸豬排連鎖店經營，店鋪以專業、品質、服務、衛生四大基本信念努力，確實今次試過之後，真係值得推介！每款炸粉定食（即係吉列）都係TWD200-220，差唔多係香港價錢嘅1/2至1/3，已有齊主菜、椰菜絲、味噌湯、醃菜、蒸蛋、白飯，仲送咗樽朱古力牛乳布甸俾我哋做甜品！當然，佢哋仲有丼飯定食、拉麵定食、冷麵定食、紅咖哩燒定食、咖哩乾拌麵、日式鍋物……等等。

地方頗闊落，坐得舒服，加上我哋被安排坐四人枱，更稱心！先嚟兩杯熱水，係麥茶，好濃郁麥味，而且個茶壺又好雅緻，不過就幾墜手。

太太點咗個咖喱魚定食，因為係日式咖喱，所以都係唔太辣，帶少許甜，而且，個咖喱魚唔係凈係得咖喱汁晌面，仲有好多蛋漿，真係滑溜嘅蛋漿，質感係半凝固嘅，配埋啲魚食落很柔滑！此外，味噌湯、醃菜、蒸蛋都做得有水準，唔馬虎。

我就要日式炸豬扒飯定食，吉列豬扒色澤金黃，賣相以厚切為形，多配上特別醬汁點吉列豬扒食。豬扒肉嫩，外層又鬆脆，兼且無話肉還肉，皮還皮散開，行攰咗食好嘢，特別滋味！試咗兩個定食，果然價錢平，質素高！

額外送嘅朱古力牛乳布甸，一樣好食，朱古力唔算好濃，但布甸做得非常軟滑，充滿牛奶香。

舊火車站建於1941年，車站外觀由三層大小唔同嘅正方體所組成，主要特徵係站體採用西方古典建築型式，而屋頂則採用日本大寺廟或皇宮建築慣用嘅帝冠式樣，是一座和洋混合式建築。

2002年，為配合三鐵共構工程嘅施工，為咗保存依座具有歷史建築象徵嘅火車站，成座車站站體被搬移有82m遠嘅空地，規劃成為「高雄願景館」，介紹高雄市過去、現況與未來展望嘅願景館，讓不單可重溫老火車站復古懷舊嘅氣息，成為高雄市民嘅集體回憶，亦藉此展示了解市政發展藍圖。

如果舊紅磡火車站仲晌度，唔係凈得幢鐘樓，感覺會幾唔同呢！

雖然舊火車站搬過咗，起咗新站，但鐵路依舊，去到月台，依然感受到古舊氣息，好似仍然見到舊嘅列車、小賣店啲鐵路便當……等等，頗有韻味！

遊完赤坎樓，都成7:00pm，其實在附近周圍都好多嘢食，好似民權路、國華街……等等，不過，既然樓旁就有一間度小月擔仔麵，遇其相請，不如偶遇，無謂周圍團團轉，反正台南度小月個名都夠響啦！而依間正正晌1895年由洪芋頭公創立，真係具歷史文化代表性。

依間度小月正正晌角位，都好易搵！街邊檔風格，有肉燥飯、粿仔條、担仔麵、虱目魚丸湯……等等，價位唔貴，飯麵都係TWD50一碗，加蛋就TWD60。

試了一碗擔仔麵（加蛋）同一碗粿仔條，兩者配料都係有蝦，有肉燥，分別在於一個係麵同粿條，前者擔仔麵麵身比我哋廣東麵厚少少，咬落煙韌一啲，嚼勁十足；後者粿仔條似係加厚再加厚版嘅河粉，有咬口，彈性十足，跟台灣人講法，好香Ｑ耶！湯頭醇香不膩，確實好食！無負三代祖傳‧百年老店之名呀！

鍾意食肉燥嘅老友，仲可以晌度買肉燥罐頭走：
TWD130：古早味肉燥，豬油成份拌炒
TWD140：芥花油新配方，植物油成份拌炒
肉燥罐頭附精美禮盒裝，詳洽店內，真係做生意之道！

原先海生館唔係我哋打算去嘅景點，因為以往去過香港嘅海洋公園、大阪嘅海遊館，諗住都差唔多，所以未被列入行程之一。但出面打大風落大雨，既來之，則安之啦，書都有介紹海生館有全球最大活珊瑚，亞洲最長海底隧道，結果，就搵咗海生館做我哋嘅避風塘，總好過晌酒店齋hea浪費時間啦！結果晌度消磨咗3個鐘，查實又幾多嘢睇，都值得一去。

海生館分三個展區：台灣水域館、珊瑚王國館及世界水域館，仲有個特展區定期舉辦特展。入場無耐，又有個迎賓廣場，其中一個叫鯨魚親水廣場，有大鯨同幼鯨躍出水面嘅實體模型，地標性影相位，哈哈！

台灣水域館
「以水的循環為故事主軸，藉由一滴小水滴的旅行，呈現台灣從冷冽的高山溪流到一望無際的海濱外洋等等，多樣的水域生態環境。並逐一介紹棲息於其中的各式物種及其生物多樣性。」
我就最鍾意個「觸摸池」，因為係個可接近嘅生物池，可以親手去觸摸如海星、海參、海膽、螃蟹……等等！最搞嘢係池中個告示牌：「觸摸池小叮嚀：可以摸我，不要抓我、不要捏我，不然我會痛痛喔！」另外，一個大洋池，係海生館最大嘅生態展示區，闊16M，高4M，展示數十種大型魚類：鯊魚、魟魚、鰹魚、石斑等。

珊瑚王國館
「以珊瑚礁漂潛為故事主軸，藉由逐漸下潛海底所看到的海底生物景觀及沈沒的海上交通工具「沉船」，是如何成為海底生物的樂園。最後，介紹全球努力拯救珊瑚的觀念在告訴遊客珊瑚在海洋中的重要性。」
依部份最有睇頭係一入展館嘅珊瑚礁預覽區，三個超巨型水缸提供珊瑚礁不同嘅生態區域的預覽，從斜緩嘅礁緣，到陡峭嘅礁壁。另一個係有成81M長嘅海底隧道，號稱亞洲最長，穿梭依個巨型人造海洋中，體驗下海洋世界。

世界水域館
「以時空探查艇遨遊時空及各海域為故事主軸，藉由即時運算之虛擬科技，配合3D或2D的成像方式，重新呈現無法到達或難以到達之水域。並透過展示手法的運用，讓遊客穿梭於虛擬與真實之間，感受遠古時期的海洋、巨大的海藻森林，深不可測的深海水域及寒冷的極地水域。」
依部份叫做大包圍，全世界水域乜都有，最有趣自不然係極地水域分區，因為有企鵝、海鸚鵡睇。至於3D部份，個人覺得「流流哋」！

特展區
不時推出唔同嘅專題，好似我去嘅時間係做緊個「海洋X檔案」，即係利用X光透析海洋生物結構嘅相片，都幾得意有趣。

係外地，我哋都鍾意參觀吓一啲靚酒店，雖然未必會住，但去見識吓都無妨！今次晌墾丁，就去咗由墾丁大街行遠少少嘅墾丁凱撒大飯店，1986年落成，雖然都成廿幾年，但外觀都保持得唔錯，一入酒店，到處都充滿五星級水準，無論大堂裝修、酒吧、員工招待，都感受到確係一間五星水準大飯店。

穿過大堂，出面係峇里熱帶風情嘅渡假式環境，椰樹棕棕、戶外泳池、池畔南洋櫸木步道……好似我哋依啲街坊客，一樣歡迎參觀，員工永遠笑容滿面。雖然未有機會睇睇各類客房係點，但置身晌椰林樹下，感覺令人好閒適，下次再去墾丁，值得豪一晚嘅飯店！

抄少少網上嘅介紹資料俾大家睇睇先：「旗后山頂上的旗津燈塔，又稱高雄燈塔，是台灣少數僅存的清代燈塔之一。建於西元1883年，是台灣本島上的第二座燈塔（第一座為屏東鵝鑾鼻燈塔）。1918年整修過後，塔身為磚造八角形白色建築，黑色圓形頂，高15.2m。」

由碼頭行過嚟，計埋上山到燈塔，大概預20min左右。不過，通往旗津燈塔嘅路隱身晌老街、巷弄內，啲指示被人塗鴉得唔太清楚，不過一般都搵到上山條路，因為山腳有大大個嘅圖形牌。燈塔位處旗津島嘅盡頭，一眼望晒成個島係點，而最正係晌眺望台上可以盡覽台灣海峽、高雄港、柴山、西子灣美景，以及近距離望到進出港口嘅大型船隻，景致真係一流。我哋仲晌燈塔旁嘅樹下吹吹風，幾鬼寫意，係差咗杯凍啡同件cake啫。

此外，燈塔園區裡其中一幢建築物開闢為小小博物館，有燈塔園區模型，燈塔嘅不同景觀相片及一啲相關物品嘅展示，所以，絕對值得一遊。

夜市就唔一定凈係食，瑞豐依度仲有玩嘅（懷舊玩意彈波波贏獎品）、買嘅（衫褲鞋襪、流行飾品），商品五花八門。不過，檔口雖多，但就過於擠逼，所以，總係人山人海，還好嘅係嚟到嘅人都頗有秩序，唔會左推右擠，算係好有氣氛，非常熱鬧。

無數過有幾多檔小食，總之就多，粗略斷估都上百檔，就係唔知點抉擇，真係心緒交戰。反正小弟食乜都無所謂，重任就交晌老婆手上，由佢發辦，我俾錢。

食過以下幾款，未必係最好，只係想食就想嘅決定：
日式鹽燒雞腿 - 慢工出細貨，等好耐，拎住個籌食完一兩樣嘢返去攞都未遲。TWD40一串，雞肉燒我鹹香惹味，肉質都唔錯，只係唔算太特色！
水煎餃 - 水煎變奏，餃底香脆，肉餡OK，此外就唔算有咩特別。
鹵味大雜會 - 色澤頗深，滷得入味，而無過鹹。
鮮果汁 - 飲嘢晌台灣永遠係最抵，真才實料，睇住佢落，又夠晒大杯喎。芭樂汁（即係番石榴）TWD25、芒果汁TWD30，前者味道帶酸，冰凍醒神；後者味道鮮甜，濃郁果香，正呀！

仲有好多嘢想試，但老婆話夠皮，而且都成十點幾，就咁算住先。

「壽山動物園」雖然位處高雄市壽山，但其實晌壽山東南方邊位，鄰近緊接著市區，所以交通相當之便利。原來，壽山動物園最早晌1978年成立於『西子灣風景特定區』，名為「西子灣動物園」，2年後因市政府想爭取中山大學設校，就將原處嘅動物園搬遷去現在嘅『壽山風景區』，所以都改埋名叫「壽山動物園」。1986年年中先完成園區內全部設施，隨後對外開放參觀，不過，個人感覺之前啲規劃有啲兒戲喎！

壽山動物園雖然佔地面積唔算好大，不過，園區內飼養咗成百多種來自世界各地嘅珍禽異獸，數量多達一千三百多隻，都算得上非常齊全，仲有啲稀有品種添，如台灣黑熊。而且，園區以多元化設計，有開放式（如「友禽天地」，以天網罩住上頂，所有雀鳥可隨意走動；或馬棚、羊棚）、半開放式（大部份動物區）、同封閉式（獅子、老虎、黑猩猩）。仲有，每個展區，都為每款動物製作介紹牌，各有故事，相當有寓教於娛樂嘅地方。加上動物園內仲有數百餘種嘅原生植物，所以令到「壽山動物園」環境更閒適！

上文介紹過打狗英國領事館環境真係幾正，而晌領事館側有個露天茶座，由Pu Lsate（舌尖舞芭蕾咖啡）經營，係度嘆番個英式下午茶，曬曬樹叢透下嘅陽光，望望海，望望山，幾賞心樂事呀！

雖然之前講到領事館個景點正點正，但露天茶座就縮晌一邊，景觀唔係咁全面，主要對住高雄市同旗津島，望正旗津渡輪站，不過，咁嘅景觀都好唔錯啦！但坐位你都要眼明手快，因為個場大概廿多張枱，只有近邊嗰6、7張至係揀手位，坐低都望到海，其他「內陸」位就當然差少少啦。之不過，整體個場都幾舒服，因為大樹好遮陰嘛，又架起咗太陽傘，唔怕有嘢跌落嚟。

講到食，其實唔單只嚟tea嘅，佢營業時間由朝到晚，選擇有風味餐點（如：義大利肉醬麵、和風咖哩雞腿飯……）、銅鑼燒、蛋糕、點心（如：東港鮮鮪魚捲、脆皮薯條……）、茶飲果汁（如：奶茶紅茶、有機鮮果汁、氣泡水……）、有機咖啡，所以話呢，食晏又得，晚飯開餐都得，得咗！

至於我同太太試嘅英式傳統下午茶，就只晌2:30om-5:00pm供應，TWD390一份兩人用，唔收10％服務費。傳統風格，三層架方式分層呈現，再配任何飲品兩杯，冷熱隨意，折番唔使港紙一百，有靚景睇，有嘢飲有嘢食，確係幾抵！

第一層（上層）：蛋糕加手工餅乾，而蛋糕三選一（重乳酪、提拉米蘇、黑森林），我哋揀咗重乳酪，即係焗嘅芝士蛋糕，質感就如同美國芝士餅，芝士打得頗挺身，芝味超濃；而手工餅乾係幾條朱古力餅乾條，唔算有咩特別。
第二層（中層）：時令鮮果拼盤，有哈蜜瓜、西瓜、菠蘿、提子、熱情果同番石榴（芭樂），都幾大堆頭！
第三層（底層）：一整份公司三文治，烘底麵包，餡料包括蛋、蕃茄、青瓜、火腿，用料較簡單。
老實講，整體食物唔算好突出，除咗件餅，其他只可用中不錯嚟形容。

反而，兩杯嘢飲又幾OK喎，一杯係熱嘅卡布奇諾咖啡，另一杯係凍嘅香柚綠茶；前者甘醇細滑、後者清甜有個性，正正各有所長。

小王子烘焙坊所賣嘅嘢都幾多元化，有歐陸麵包、特色麵包、西餅、蛋糕、手工曲奇……，應有盡有，仲以「精緻，天然，健康」製作忠旨。怪不得幫襯當日都唔少人買包買餅。

芒果慕斯蛋糕TWD55
長條形蛋糕，造型簡潔，牛油消化餅底，加一層芒果果肉，再上就係海綿蛋糕，面面唧出芒果忌廉花，簡單得嚟又見其心思，味道多層次，芒果果肉清甜，只係嫌佢少。

朱古力蛋糕TWD60
經典嘅朱古力蛋糕，黑朱古力來自比利時，以微微濕潤嘅朱古力蛋糕，配上黑朱古力同忌廉打做嘅朱古力醬，一層疊一層，再晌上面砌出朱古力裝飾，灑啲唂咕粉。味道苦甜而濃郁，柔軟而有質感，無可媲美嘅滋味。

丹麥酥麵包TWD75
見佢一磚磚金磚丹麥酥麵包新鮮出爐，一袋袋大概好似平時晌超市見嘉頓隻8片方包份量，只係賣TWD75，即係廿蚊唔使，真係撞鬼囉，抵食到咁。你晌香港出晒名嗰間博洛尼亞度買，都成十幾蚊先得一片，所以，順手買一袋走，拎返香港當第二朝早餐啦。雖然隔咗一日先食，但依然咁好食，外層丹麥酥外皮，酥香非常，裡面包身帶點嚼勁，烘番熱，搽點果醬，簡單而好味嘅早餐，雖然杯咖啡係三合一，但麵包先係主角，都無所謂啦！