原先海生館唔係我哋打算去嘅景點，因為以往去過香港嘅海洋公園、大阪嘅海遊館，諗住都差唔多，所以未被列入行程之一。但出面打大風落大雨，既來之，則安之啦，書都有介紹海生館有全球最大活珊瑚，亞洲最長海底隧道，結果，就搵咗海生館做我哋嘅避風塘，總好過晌酒店齋hea浪費時間啦！結果晌度消磨咗3個鐘，查實又幾多嘢睇，都值得一去。

海生館分三個展區：台灣水域館、珊瑚王國館及世界水域館，仲有個特展區定期舉辦特展。入場無耐，又有個迎賓廣場，其中一個叫鯨魚親水廣場，有大鯨同幼鯨躍出水面嘅實體模型，地標性影相位，哈哈！

台灣水域館
「以水的循環為故事主軸，藉由一滴小水滴的旅行，呈現台灣從冷冽的高山溪流到一望無際的海濱外洋等等，多樣的水域生態環境。並逐一介紹棲息於其中的各式物種及其生物多樣性。」
我就最鍾意個「觸摸池」，因為係個可接近嘅生物池，可以親手去觸摸如海星、海參、海膽、螃蟹……等等！最搞嘢係池中個告示牌：「觸摸池小叮嚀：可以摸我，不要抓我、不要捏我，不然我會痛痛喔！」另外，一個大洋池，係海生館最大嘅生態展示區，闊16M，高4M，展示數十種大型魚類：鯊魚、魟魚、鰹魚、石斑等。

珊瑚王國館
「以珊瑚礁漂潛為故事主軸，藉由逐漸下潛海底所看到的海底生物景觀及沈沒的海上交通工具「沉船」，是如何成為海底生物的樂園。最後，介紹全球努力拯救珊瑚的觀念在告訴遊客珊瑚在海洋中的重要性。」
依部份最有睇頭係一入展館嘅珊瑚礁預覽區，三個超巨型水缸提供珊瑚礁不同嘅生態區域的預覽，從斜緩嘅礁緣，到陡峭嘅礁壁。另一個係有成81M長嘅海底隧道，號稱亞洲最長，穿梭依個巨型人造海洋中，體驗下海洋世界。

世界水域館
「以時空探查艇遨遊時空及各海域為故事主軸，藉由即時運算之虛擬科技，配合3D或2D的成像方式，重新呈現無法到達或難以到達之水域。並透過展示手法的運用，讓遊客穿梭於虛擬與真實之間，感受遠古時期的海洋、巨大的海藻森林，深不可測的深海水域及寒冷的極地水域。」
依部份叫做大包圍，全世界水域乜都有，最有趣自不然係極地水域分區，因為有企鵝、海鸚鵡睇。至於3D部份，個人覺得「流流哋」！

特展區
不時推出唔同嘅專題，好似我去嘅時間係做緊個「海洋X檔案」，即係利用X光透析海洋生物結構嘅相片，都幾得意有趣。