依間小店，係其他港客介紹，老闆小杜，花兩年研究做包子，中式包做基礎，不過同我哋飲茶食開嘅叉燒包唔同，佢啲包身應近似奶皇包一類，表面比較光滑，包肉唔太厚，同樣成個包鬆軟唔黐牙，而餡料有中又有西，有成10款選擇！同老婆各揀一款，坐晌店門口外嘅小凳，趁熱快嘆。

洋蔥烤肉包TWD40
包內夾有大量洋蔥炒豬肉絲，食落好濃郁胡椒香，而洋蔥鮮甜，確實豬肉絲比正常厚身，叫做有咬口，但感覺比較粗疏。

起司包TWD35
餡料就係得芝士一樣咁簡單，一定要趁熱即食，一咬開包身，連包帶芝士一扯，即時拉起幼幼長長嘅芝士，而芝士味濃香，真係好正。

仲見有一款麻糬泡芙包，個名睇落好神奇，望吓張樣辦相，真係包裡面係個芙包，芙包裡面係麻糬，麻糬帶有濃濃奶香，雖然無試，但幻想吓個包都覺得好搞嘢。