因為跟巴士團關係，鵝鑾鼻公園已經係我哋晌台灣最南嘅「最南點」，但實際上墾丁就真係有個叫「最南點」嘅景點，巴士行程無安排去啫，佢就名正言順台灣嘅最南點喇，依家，我哋唯有睇住個A貨先啦。

導遊介紹，問知唔知點解叫「鵝鑾鼻」，佢話曾經有人以為同奧運有關，「鵝鑾鼻」係Olympic嘅譯音，哈哈，美麗嘅誤會。「鵝鑾」係台灣某少數民族話，意思係「帆」，因為附近有塊出名嘅船帆石，故取其名；而依度形態如突鼻，所以就叫做「鵝鑾鼻」。

因為鵝鑾鼻公園唔算好大，當中又分咗幾條步道，長短隨意，就好似嚟個小遠足咁！一入園，好多草地，又種咗好多熱帶植物，好有東南亞風情。沿主步道走上啲，好快見到燈塔，一抹全白，晌今日灰濛濛嘅天色，燈塔就更突出。站在高地，又可以見到太平洋嘅景色，好靚廣闊嘅海景，係可惜在無蔚藍嘅天空幫吓手襯托。燈塔內又有個小型博物館，介紹吓鵝鑾鼻燈塔嘅歷史，以及曾以此為主題所發行過嘅郵票，及一啲燈塔模型。假如想「拎走」個燈塔，旁邊嘅特產店就有好多燈塔嘅手信，例如用砂石貝殼砌嘅燈塔、名信片、木刻書簽……等。真係值得花一、兩小時嚟行吓！仲有，好鍾意鵝鑾鼻介紹牌對下嘅幾句小語：「除了足跡，什麼都不留；除了攝影，什麼都不取。」到大自然地方旅遊應有嘅心態！