沐戀商旅真係好鬼方便，捷運後驛館站步行5min就到，而且勝在夠抵，雙人房每晚折返港紙都係HK$264一晚（旅遊網站價），包早餐，房間比較大，尤其個洗手間，雖然設施簡單，但都夠齊全（例如：沖涼設備、日用品、雪櫃仔、風筒機…），最緊要都係乾凈企理，令人瞓得舒服啫！房間本身有空調，但房內仲有把負離子電風扇，幾搞嘢！

不過，第一日朝早到咗酒店，真係被佢個地下大堂嚇死，好似大陸啲舊商廈咁，又殘又舊咁款，連燈都唔開多盞，因為要3:00pm後先可以攞房，所以只有先寄存行李，去咗玩，夜晚先可以返房，心諗依鑊實被老婆咋形，好彩係地獄天堂，大堂疑似地獄，啲房雖唔可能叫得做天堂，但同個大堂相比，啲房絕對令人瞓得安心。

上文提過包早餐，唔好諗住酒店話包早餐就一定自助餐，沐戀商旅嘅係輕便早餐，一份蛋牛治加一杯凍麥茶，好在係直送，一早按人頭掛晌你門口，咁又幾好喎，快快食完開始行程！