因為正正係我哋所住嘅華王大飯店斜對面，所以，之前嘅行程都無乜點買啲食得嘅手信，諗住係度一鋪過，唔使走嚟走去周圍搵，慳番時間又唔使麻煩！

入到去，鋪仔細細，擺咗好多款手功糕餅，前後左右都擺滿晒。得個疑似老闆娘嘅婆婆係度招呼我哋，佢人就非常熱情，猛咁叫我哋試食啦試食啦，當然我哋就梗係東試試西試試，先再決定大手入咩貨啦！佢都有好多產品賣，如鳳梨酥、手工壽桃、古仁片、坦克酥、幸運餅、台式銅鑼燒、水果酥……等等，但買手信始終都係想帶有當地特色，所以主打揀咗「旗鼓餅」同「木棉酥」，兩者都稱得上係「高雄市餅」。

「旗鼓餅」
好似日本啲銅鑼燒咁，不過餅型就唔係銅鑼而係個大鼓咁款，餡料只有3款：蕃薯、芋頭、紅豆味。咁旗鼓何解，原來「旗」與「鼓」係指旗津同鼓山，因為高雄最早嘅發源地就係始於依兩處。婆婆補充話，依家「旗」、「鼓」仲代表埋高舉大旗，擊鼓出發，奮勇前進，開創未來。真係咁有寓意！食起嚟口感就同食銅鑼燒差唔多，軟軟甜甜，可能用咗其他餡，所以相比感覺同銅鑼燒有少許分別。個人比較喜歡蕃薯味，因為鍾意食蕃薯嘛。

「木棉酥」
意思嚟得簡單，因為高雄市花就係木棉花，所以就以木棉花為型，整咗依個「木棉酥」，餡料有4款：柑桔、藍莓、小紅莓（台稱蔓越莓）、哈密瓜，口感較鬆軟，都唔錯！

「愛河栗子燒」
除咗上述嗰兩樣，婆婆嘅極力推介就係依個栗子燒，新產品，叫話起源自愛河河畔嘅幸福，真係難想像呀！但總之又幾好食，軟綿綿栗子蓉做餡，外層餅皮薄薄又帶有咖啡苦甜，真係幾得！

你想散買又得，而每款餅亦有獨立禮盒裝，仲加埋唔同分量配搭嘅綜合禮盒裝，即有齊旗鼓餅、木棉酥、栗子燒，共冶一爐，所以好有彈性，買吓買吓我哋都買咗成千幾銀喇，不過，係新台幣啫！