估唔到嚟到墾丁第一餐就係食車仔麵，無辦法，外面風大雨大，「一品滷味」就係晌酒店隔無耐，好一餐，唔好又一餐，醫飽肚先講！

小弟都係第一次晌台灣食「車仔麵」，用個筲箕自己揀餸，因為唔係好知價錢，費事逐樣逐樣問幾錢（其實檔口上面有個細細個嘅價錢牌，不過橫風橫雨，無留意啫），所以，見啱食就夾，唔覺唔覺夾咗成TWD270出嚟，為起港紙$60-$70，晌香港真係未試過食車仔麵食得咁豪。初頭以為又好似香港咁，麵餅放湯，餸料晌上面，原來係餸一兜，麵又一兜，仲好大份添，三個人都夠食呀！

結果揀咗7樣餸，加兩個麵，所以叫佢做七品車仔麵。
1. 蘭花干，即係豆腐干，鹵好之後色澤醬紅，以精細刀工正反兩面鎅切，再拉開就形似蘭花，所以見佢得意就揀咗嚟試。不過變咗車仔餸之後，細細件咁切開晒，就睇唔番個蘭花形。味道OK嘅，就如食一般豆腐干咁！
2. 鴨翼，滷水味幾醇，鴨翼都幾厚肉。
3. 糯米腸，無腸衣嘅腸，純粹以糯米做成香腸形，查實係食緊一舊舊糯米飯，不過添咗滷水香。
4. 白蘿蔔，清甜無渣。
5. 大貢丸，無咩特別。與其叫貢丸，似肉丸多啲，因為裡面都無餡嘅！
6. 滷蛋，滷水嘢算唔錯，依個滷蛋都入味。
7. 豬大腸，去咗肥膏，食落唔算肥。

總括而言，的確唔錯，仲食得我好飽！