因為晌億載金城逗留時間唔耐，比預期早咗好多好多，又咁啱對面就係伍角船板，在台中已聽聞其名，估唔到今趟晌台南有幸遇上，原本都無計劃去依間嘢，既然咁啱，稍事休息，入去嘆杯嘢都好丫！

佢個鋪位，真係幾偏，周圍都無乜商廈或住宅，依家係晏晝3:30pm左近，所以，全間廳餐就只有我同老婆兩個客，簡直係包場！伍角船板出名於佢嘅建築，可稱得上建築神話食店，店主收集各類建築材料，憑建築夢想，將一磚一木一瓦堆砌成形。台南店嘅建築風格係「樹與鳥美麗註足」，外觀綠葉成蔭，內觀藝術樹林。因為「無皇管」，晌餐廳內係咁影。

晌咁正嘅環境，點可以雞咁腳咁走，點咗兩杯嘢，慢慢嘆，又細心欣賞店主對「建築」嘅苦心。依個下午茶，視覺與味覺同樣有甜蜜享受！

梅香桔汁（Plum with fresh kumquat tea ）TWD120
太太叫嘅梅香桔汁，顏色鮮黃，味道酸甜醒胃，飲落很清新。每杯飲品附送兩件曲奇，都幾香脆，不過只係塊普通牛油曲奇啫。

焦糖瑪其朵（Caramel macchiato）TWD150
賣相好搶，底層係牛奶，跟住一層咖啡，杯面唧滿咗一個個忌廉花，最後加上焦糖漿。撈勻之後，味道很和，咖啡同焦糖味很香，又夠冰凍，真係好飲！

因為始終係一間有晒服務嘅西餐廳，要加一係自然不過嘅事！