旗津風車公園位處旗津島中部海邊，對住西面，而面向台灣海峽，於2003年完工啟用，叫得風車公園，賣點就係7座三葉式風車，但其實賣點豈只於此！

7座三葉式風車，油上鮮黃色，十分醒目搶眼，不過，只有7座，而且風葉比較細，好聽就係造型獨特，唔好聽就有啲似小兒麻痺，做到好似南丫島風車嗰類先有番啲氣勢嘛！所以，個人覺得風車未係咁吸引。反而，有其他嘢仲有睇頭。

第一，就係園區裡面色彩繽紛嘅海洋生物拼貼創作，有海螺、有魚、又有蟹……，造型生動有趣，散佈園區多個地方，有啲仲整到有成個人咁大，同蟹仔玩包剪揼，佢凈係識出剪，必贏啦。所以，同啲海洋生物可以影出好多有趣嘅相片。

第二，係睇「泊浪」，對出嘅台灣海峽，海水不斷一進一退，朝向岸邊嘅防堤一碰一撞，澎澎聲之餘，擊出數尺浪花，幾有動感。

第三，由於公園面向西邊，不妨晏啲先嚟，睇埋日落先走，夕陽永遠係美景；如果遇埋碧海藍天，吹吹清涼海風，感覺舒暢極啦！