住澳門，威尼斯人酒店好多人都識，尤其佢個大堂嘅天花油畫，同個運河商場，專燈朝拜嘅賣點。但講到威斯汀，就未必有幾多個人知。

位處路環篤篤嘅威斯汀，位置真係幾偏僻，坐酒店專車由外港碼頭（港澳客運碼頭）去到酒店都要近半粒鐘。不過，環境又確係幾正，一方座擁南中國海嘅無敵海景，另一方側靠景致怡人嘅黑沙海灘，少咗份繁囂，多咗份清幽。酒店外觀僕實，1993年開幕，近廿年歷史，以澳葡式建築風格為主，沿山坡而建嘅斜梯形設計，大部份客房都有個寬敞露台，望海一流，嘆杯啡食件餅就仲完美。最正佢係晌澳門少有無賭場嘅酒店，太太特別鐘意，話無咁俗氣，唔會成日見住大堂滿滿人患，拜金到死，所以，喻為城中清泉都未為過呀！

有人話周圍靜都死，食店都唔多間，交通又唔太方便，夜晚實悶爆，咁又未必，視乎你想要啲咩。我同太太就係想寧靜咁歇息下，又享受下酒店內嘅設施，消消工作積壓而嚟嘅悶氣。

因為酒店沿山坡而建，刻意設計成梯形，令到絕大部份房間都有獨立私人露台。小弟所住嘅尊貴客房，露台正正對住成個海，下望就係酒店內蔥蔥花草樹木，又帶有幾分熱帶園林景色，向外望就正正係遼闊無界嘅中國南海。可惜係天氣有啲凍，否則嚟個下午茶，睇睇書，望望海，不知幾「梳扶」。

黑沙灘算係威斯汀周圍唯一一個較著名嘅景點，講少少資料覺啦：海岸線全長1,200多米，因其沙粒獨特地呈黑色所以得此名，除咗長長嘅海灘之外，附近仲有一個遊樂設施完善嘅黑沙公園，同一個露營營地、燒烤場，一到週末、假日，更有唔少澳門居民去玩。

其實要行晒成個沙灘，唔使幾耐，半個鐘頭乜都搞掂；不過行吓，影吓相，欣賞吓日落，嗅一嗅海風嘅味道，感受一下浪漫嘅氣氛，都可以hea成粒鐘架。

住威斯汀，又行完黑沙海灘，晌度比較有名氣嘅葡菜館，首推法蘭度，除咗嘢食煮得有一手外，其「串串貢」規條更係為人談論：全年都無冷氣供應，話之理晧熱警告；雖然伴菜跟薯條，講明無茄汁；只收現金，無免費水提供（其實澳門大多數葡國餐廳都無免費水供應）；又唔俾訂枱喎。

初時睇定啲食評做參考，講到依間嘢好旺好多人排，同老婆星期日晚去，都驚等位耐，所以寧願食早啲，6:00pm就去定攞位。餐廳正正晌巴士站旁，但望過去門口，不單無人龍，入去睇睇，正門嘅大廳，人數寥寥可數，再經走廊、小花園，轉入另一幢紅磚小屋，先叫做人氣旺盛番啲，不過都只無四乘滿。7:00pm打後，又再多番啲人，可是，頂多只可以叫有八乘多人。始終黑沙海灘都幾偏遠，加上法蘭度嘅形象又負面啲嘅！

我哋被安排坐晌紅磚小屋，近窗口嘅二人枱，可以一覽無遺咁望晒成個場。講真，處身於紅磚小屋之內，昏黃燈光，有幾分晌歐洲用餐嘅氣氛。屋外周圍都係樹，幾有田園氣息！

未翻餐牌，燒乳豬已係指定一試嘅招牌菜，其次，上次無試嘅燒沙甸，老婆又好想試吓，加多個什菜湯，相信好夠飽喇。

先送上兩個重量級農夫飽，粗獷外型嘅歐陸包，外皮烤得香脆，包心細密煙韌。食開港式麵包嘅鬆軟，到食歐陸麵包，有啲人真係唔太慣。個人覺得最好食法，都係搵手搣一小舊一小舊塗牛油食，感覺唔會太韌。

什菜湯 $32
賣相認真麻麻，灰灰沉沉，一池死水咁，材料有薯仔、紅腰豆、洋蔥粒……感覺普通，味道算係OK。

燒沙甸魚 $98
一客有4大條，配兩大舊烚薯仔，加埋蕃茄、青椒、洋蔥沙律。沙甸魚燒得非常之香，幾有種鹹香味，要小心食，細骨頗多。烚薯仔，做得比較粗糙，齋烚無乜味。

燒乳豬 $152
期待嘅主菜上枱喇，問過服務員，原來啲豬仔得三個月大，一隻豬仔做到6份，所以，基本上廚房都會密密燒，所以，落單後都唔會話等得太耐，而且，保證上枱時熱辣辣。除乳豬外，仲有薯條墊底，洋蔥、沙律菜、青橄欖做伴菜。乳豬真係幾得，唧少少檸檬汁，減一減油膩，因為睇樣你唔覺得啲乳豬肥，但食落真係「幾漏」。外皮十分之酥脆，肉質算幾嫩，唔似食燒肉咁「實淨」，不過，始終係得三個月大嘅豬仔，豬肉味就必然稍欠。

兩公婆食到飽飽，拖住手仔又慢慢行返酒店！但係，入夜外面天氣有點寒。

今晚食飯食得早，所以返酒店都早，但是日精彩節目未完，上房抖一抖，依家先係餘興節目嘅開始。

酒店提供健身、娛樂多項設施，有獨特海濱環境，懾人氣勢嘅標準18洞高爾夫球場（小弟唔識打，所以無諗過會玩）、沿海緩跑徑、戶外小型草場、健身室、室內外游泳池、按摩池、桑拿室、蒸汽室、spa水療中心、活動室（可進行乒乓球、瑜珈活動），仲有個威斯汀兒童俱樂部。

威斯汀兒童俱樂部，每日朝10:00晚6:00，提供多種遊藝設施，又有多元化室內或室外活動，例如：臉部與手部彩繪、工藝與美術、兒童尋寶之旅、海灘遊戲、間諜探險……等等，內容精彩，包啲細路開心成日呀！（溫馨提示：全天活動需另收費，但係包括午餐同一個裝滿零食和紀念品嘅探索包，抵番晒啦）

咁「夜媽媽」，最好係游水啦，室內全天候恆溫池，無救生員當值，但泳池唔係好大，而且水深都係一米多，絕對安全。同老婆游咗一陣水，再晌隔離個按摩池浸下，夠熱，水力又夠勁，衝得肌肉好爽，疲勞盡消。而更衣室內嘅桑拿室同蒸汽室，又點可以錯過，個人比較鍾意蒸汽室，周不時打啲蒸汽，比桑拿乾煎無咁辛苦，所以，嬉水嬉汽得好愉快。

其實焗完桑拿同蒸汽室，個人醒神番晒，仲想玩下健身室，因為見到好多簇新嘅器材，跑步機、樓梯機、划艇機……應有盡有。之不過，個人就好精神，可惜唔多夠體能，下次吧！

跟老婆一向都鍾意行吓山，尋晚玩咗水，今朝咪遊吓山囉，咁先真正叫遊山玩水丫嘛。因為黑沙呢邊嘅巴士比較鬆落，與其唔知等幾耐，索性由酒店行過去黑沙水庫，點知原來都要行半粒鐘先到，當做定行山前熱身啦！

黑沙水庫公園就晌水壩前面，有燒烤場，環境幾企理，夜晚仲有燈光設備，聽啲公園管理員講，個燒烤場都幾受歡迎，好多人鍾意夜晚嚟燒烤。此外，仲有羽毛球、籃球場，不過，對於遊客如我，依啲設施未必用得着。上水壩時，側旁仲有個滑草場，不過依日無開放，我估幾啱小朋友玩。

不過，條行山徑就幾唔錯，一個小時乜都行晒，成條徑沿住個黑沙水庫兜一個圈，景色就無乜，勝在易行，係無啦啦晌個細細嘅水庫上加建咗條吊橋，而另一邊有個咖啡茶座，對下有個所謂水上樂園，即係可以扒吓艇之類。

如果成日困晌鬧市裡，偶爾逃離繁囂，行下山，享受下短暫安寧，都係洗滌心身好去處！

由酒店出番嚟，其實晏晝餐飯無乜心水，不過酒店架穿梭巴士係路經路氹，就隨遇而安，落車後再行過去氹仔有咩好食。

經過地堡街，發現依間雪利斯寫住葡式咖啡美食，又見好多工友幫襯，格局好街坊，成間茶記咁，就入咗碰碰運氣。

嘩，果然係茶記一間，午餐，中西葡炒粉飯麵一應俱全，全部都係廿零三十蚊一碟，午市仲送熱飲，真係實惠非常。雖然係茶記，都盡量點番啲葡式嘢：葡式馬介休炒飯同葡國雞飯。

葡式馬介休炒飯 $28
好似我哋嘅鹹魚雞粒炒飯咁，不過鹹魚就用咗葡國貨，又多咗少少黑橄欖，味道鹹鹹香香，飯粒炒得爽身不油，仲要包杯奶茶，抵得無嘢講啦。

葡國雞飯 $28
兩公婆食唔晒，已經叫少飯，點知嚟到個飯一樣咁大碟。估唔過個葡國雞飯做得一啲唔馬虎喎，一大兜葡國雞，唔單只撒滿椰絲，內裡加咗唔少椰奶，所以個汁好香。再者，配料亦好多，甘筍、洋蔥、薯仔；雞件斬得大大件，不過就唔係好多，4件左右。加埋杯檸水，咁又一餐喇！

雪利斯除經營茶記，另一邊鋪面仲有做麵包、西餅、蛋糕，所以，橫掂依餐食得咁平，就再晌度買個木槺布甸（$8）埋位食，底面兩層瑪莉餅碎，中間一朕煉奶忌廉，都唔錯喎，唔算太甜，口感又幾細滑。除木槺布甸，仲有其他蛋糕，如意大利芝士餅、栗子蛋糕、朱古力蛋糕、拿破崙蛋糕……等等，都係$11-$15，非常之抵。

臨走，見佢有啲自家出品嘅杏仁薄脆，有禮盒裝（MOP49）同普通裝(MOP19.5)，前者買嚟俾同事食，後者買嚟梗係自己食啦。薄脆好似啲金錢餅咁，當中加埋杏仁碎，所以杏仁味頗香。

坐酒店穿梭巴士去關閘，嗰邊感覺好唔同，周圍啲樓又高又舊，啲靈台、窗口架晒鐵籠，好似返咗上大陸。晌附近有個「紀念孫中山市政公園位」，順道行下，介紹就講到好似好正，正入口豎立著孫中山先生嘅全身塑像，中式設計有人工湖、曲橋、涼亭、小樓，西式設計又有多功能體育設施同溫室，去到打個轉，不過真係無乜好睇，似我哋維園咁，好多阿叔阿伯打躉，鋤啤玩十五胡。

園中有個人工小山丘，上到去望過對面，就係珠海拱北，近在咫尺呀，好似望過對面村咁近，全部都係高樓大廈。反而最吸引我嘅，係公園中央嘅迴廊，種有多夥老榕樹，長滿氣根，值得細味！ 

1997年建成嘅望廈山市政公園，晌望廈山上面，由望廈炮台斜坡一路上，經過旅遊學院、望廈賓館，斜坡盡頭就係公園嘅羅馬式廣場，有噴泉、人工湖、瀑布、長廊、古老炮台等等，環境格外空曠。

沿一條舊斜坡再上，就搵到望廈砲台，晌19世紀末，佢係重要軍事防禦據點嚟架，不過，到1960年炮台就停用。砲台位置可監察關閘一帶嘅情況，依家，從炮台兜個圈，睇到望廈山周圍大部分地方，景觀都幾開揚架。黃昏，都見有啲市民上嚟做吓運動添。 

作為是次「懶懶hea遊澳門」之旅嘅最後行程，最後一站就係嚟嘉路米耶圓形地，咩地方？咪即係有小緬甸之稱嘅三盞燈囉，因為附近緬甸華僑多，實際應該四盞燈先啱，三細一大嘅波燈嚟架。其實過嚟三盞燈行，都係搭單，主要都係晌上船前食多餐先返香港，目的地就係「雅香粉麵咖啡」，點知嚟到剛閂門，就去佢隔離無幾遠嘅姊妹店「雅馨緬甸餐廳」，不過有心幫襯都宜早，店家收7:30pm。（題外話，佢哋仲有一間分店晌媽閣嗰邊，叫「雅香咖啡甸餐廳」，好似將兩間店個名夾埋咁。）

內裡環境比較「屈質」，但因為時間尚早，人客唔算多，順利搵到位之餘，亦唔算太過逼狹。由於早已諗定食乜，睇睇餐牌都只係想望望仲會唔會有咩特別嘢食。

紫米香豆漿 MOP10
剛啱睇到一版「特別推介」，紫米香豆漿、香滑鮮豆漿、營區烏豆漿、白果腐竹意米水，支支10蚊，就叫咗一支紫米香豆漿。色澤深紫色，紫米味頗濃，可惜蓋過豆香，而且可能太真材實料喇，質感過杰，口感比較糊口，唔係太鍾意。

魚湯粉MOP19
係緬甸常見嘅一種粉麵，我就正正坐晒拍牆位，睇住牆上剪報嘅介紹：將塘虱魚烚湯折肉，混合香茅、黑椒粉、咖喱粉、粘米粉，由於後四種材料甚燥，加上蕉樹心這種寒涼物作中和，務求湯底不燥不寒啱啱好。燥定寒就好難即刻知，不過個湯底味道幾特別，老實講，又唔係話好好食，但亦唔係難入口，係覺得比較油，而湯裡透明一條條應該就係蕉樹心，無乜味咬落爽爽咁。面頭仲放有兩塊馬豆餅，好似送粥嘅薄脆咁，都OK嘅，一試無妨。

椰汁雞撈麵MOP21
除咗撈麵，仲有個係放湯嘅椰汁雞麵（MOP19），當然係撈麵正啦，多數人都係為個汁嚟食依個麵啫。麵條以油麵為基本，無咗爽口彈牙，換嚟有咬口感；咖喱咁色嘅湯汁，以黃薑粉、緬甸咖喱粉為主，加上椰汁，帶有濃郁椰香，稠身而不糊，香滑得嚟好掛麵。雖然只係賣廿蚊碗，雞件份量無將貨就價，確係抵食！

睇佢卡片，印住「since 1978」，不愧為開業30多年，價錢相宜，俱特色又有風味，值得一訪。