「雄鎮北門」相信都無乜人聽過依個景點，書都唔會點介紹，點解我又去咗，都係一個機緣！話說去完壽山動物園，等咗好耐未有公車，咁啱有個的士大佬林長信師傅，見我哋等車，佢問咗知我哋去打狗英國領事館，而佢又係去接老婆返西子灣屋企，問我哋介唔介意載埋佢老婆，車費就收少啲，正所謂一家便宜兩家著，睇佢個樣又老老實實，而且依幾日嚟，遇到啲高雄人都幾友善，咁樣就跟咗佢車！

沿途林師傅不停介紹高雄嘅景點，到打狗前，佢無啦啦車咗我哋先上雄鎮北門（其實只係大路向左屈上斜路少少），極力推介，話個景點正點正，又介紹埋個歷史背景，成個導遊上身，喂！真係好得喎。查實，雄鎮北門係哨船砲臺嘅門額題字，清光緒元年建造，為國家三級古蹟，與對岸旗津南岸嘅旗后砲臺同時期建成，鎮守住打狗港。不過，大砲就無咗，得番個弧型砲座。

當然，依家殘留嘅古蹟唔算好吸引，最得係佢開闢咗近海個灣位，對正港口。近距離睇住啲超大貨輪出出入入，多多少少都有啲震撼力，望過對岸就見到尋日去過嘅旗津燈塔，所以，尋日晌燈塔就可以高抄影貨輪，今日晌雄鎮北門就可以少少低抄影貨輪，感覺好唔同！而且，向出一望，就係成個海洋，幾爽呀！睇完依個景，林師傅又繼續車我過隔離嘅打狗英國領事館，又熱情咁介紹一番！真係出門遇貴人呀。