小肥同哥哥由細到大都極愛吃公仔麵，所以一睇到旅遊書介紹橫濱有兩間同麵有關o既博物館時，已經立心最少要去其中一間度參觀。

我地喺横滨中华街食完晏，就喺大街度乘搭市內每人只需支付100日圓o既「赤い靴」（Akai Kutsu「紅鞋」）巴士往World Porters購物中心，再步行約五至十分鐘，到達「安藤百福発明記念館」（「杯麵博物館」Cupnoodles Museum）。「安藤百福発明記念館」咖啡色o既外表平凡，一啲都唔起眼，好容易會錯過，所以細佬建議大家去前先上網睇睇啲相，認一認。

博物館共五層，開放時間為上午十時至下午六時，觀館者必需於下午五時前進館，成人入場費為500日圓。請留意，個人覺得一個鐘頭o既觀覽時間係絕對唔夠，起碼要預兩個鐘頭，而且最好朝早去參觀，大家睇咗小肥以下詳盡o既報導就自然會明白點解：

1）入口處設於被稱為「一樓」o既地面，為最底層。正門轉右為精品店；直入大堂中央為售票部；大堂左手邊展放住一個有兩個人咁高o既超級大型合味道杯麵，成功謀殺遊客們不少菲林。

2）二樓為展廳，共分開五大區域，但必需為持票者先可進入：

a)      展廳o既第一個區域為「速食麵歷史方塊展覽廳」（Instant Noodles History Cube），展示出來自世界各地三千多種o既即食麵，並以各款o既初售日期舖排成即食麵o既歷史演變過程；唔講真係唔知原來第一包公仔麵就係一九五八年安藤百福先生研製出o既「雞湯拉麵」！團友們一路順序睇都認得出好多食過o既麵品，當中更勾起不少回憶，大家一邊睇一邊講，睇展覽睇得小肥咁輕鬆都係第一次！

b)      展廳o既第二個區域為「百福電影廳」（Momofuku Theater），係一間迷你電影院，循環地播放一套有關即食麵o既歷史動畫，當中大部分為博物館主角安藤百福先生o既創作生涯，包括佢喺自己間研究小屋發現麵條要先經炸製先可造成即食效果，為何要以叉食用，如何將麵餅放入杯內等。動畫有趣生動，又夠簡短，連最怕歷史o既XO仔都唔覺悶，真係好難得！此外，雖然動畫全為日文，但不懂日語o既哥哥都話好易明，絕對值得一睇。

c)       展廳o既第三個區域為安藤百福先生於一九五八年成功研製出第一個即食麵o既工作室「百福研究小屋」（Momofuku's Work Shed）複本。小屋門外擺放有假麵餅，屋內有個大炸鑊、書枱、少許餐具等，就連掛牆月曆都係一九五八年嗰頁，製作非常認真！

d)      展廳o既第四個區域為「創造思考廳」（Creative Thinking Boxes），入面有六間房，觀賞者可以一邊睇、一邊玩，運用唔同角度思考，從活動當中了解百福先生o既創作思維，都幾得意架。

e)      展廳o既第五個區域為「安藤百福廳歷史」（The Momofuku Ando Story），係一幅五十八米長o既牆，以文字及圖片敘述出安藤百福先生o既一生及其世界性o既影響力。單從佢研製即食麵o既過程中，其實已經可以睇得出其不屈不撓o既精神，但當睇到佢於二千零五年，以九十歲高齡，成功研造出太空即食麵時，大家更可肯定佢o既創作思維並無因年紀而減弱，真係令人欽佩！

3）三樓為「工廠層」，設有兩間不同形式o既製麵工作坊（博物館稱為「工廠」），拱參觀者親自製作即食麵，攞返屋企細嚐，或留作紀念：

a)      「雞湯拉麵工廠」（Chicken Ramen Factory）：參觀者可因應年齡，支付300或500日圓，參加雞湯拉麵製麵班，由揉搓麵粉開始，續個步驟自製出雞湯杯麵。雞湯杯麵製作過程長達九十分鐘，每日只有八班，時間分別為10:15，11:00，11:45，13:15，14:00，14:45，15:30，16:15。因製麵班深受本地兒童及遊客歡迎，博物館亦有提供電話及互聯網上預約服務；如果人數夠多，仲可以申請開私人班添，所以日本好多不同區o既學校都會組團去橫濱旅遊，參觀「安藤百福発明記念館」，並為學生預約製麵私人堂。

b)      「我的合味道工廠」（My CUPNOODLES Factory）：參館者可付300日圓購物一個合味道杯，為杯加以設計，並加入麵餅及自選調味料，製作出獨一無二o既合味道杯麵。

4）記念館四樓分開兩部份，一部份係為小朋友而設o既「合味道遊樂區」（300日圓可玩30分鐘），另一部份係老小咸宜o既「麵條街」（Noodles Bazaar）。食客可於「麵條街」以每半碗300日圓，食盡安藤百福先生於意大利、哈薩克斯坦、中國、韓國、越南、泰國、馬來西亞及印尼親嚐過o既拉麵口味，哈哈，似乎早、午、晚訪館都唔會餓親！

5）據小冊子所講，第五層為特別活動大廳及The Ando Foundation，普通觀訪者應該不準進入。