Sunday Jazz Brunch Buffet所提供o既菜式琳琅滿目，麵包、沙律、芝士、意粉、蝦山、冷盤、熱食等各有一個專區，食物圍繞住Crystal Plaza擺放，中間有靚靚冰雕作裝飾，視覺效果頗為壯觀！每個區域都有幾位服務生駐守，負責增添食物、保持整潔衛生、幫忙食客夾取食物及護送往餐桌，服務非常貼身！客人可隨意選擇於Crystal Main Dining Room、Crystal Cove或六樓咖啡室用膳，氣氛輕鬆。

自助餐十一點半正式開始，但十一點三左右，水吧已不斷斟出橙味香檳雞尾酒「Mimosa」，清新爽甜。眾多冷盤中，小肥獨愛三味海鮮菜式：爽脆o既Jumbo Shrimp、味濃刺激o既Lobster Shooter及鮮嫩幼滑o既Gravlax。熱食方面，XO仔主攻即叫即切o既牛扒、即叫即煮o既奄列同意大利粉，貪食物夠新鮮熱辣！甜品就最健康啦，細佬選擇咗食生果，嘻嘻，不過係Chocolate Fondue嗰隻，亦即「打朱古力邊爐」，個人覺得朱古力味菠蘿、芒果及桃最為美味！

雖然小肥所寫o既郵輪遊記及上載o既相片中，大多講述吃喝玩樂，但其實團友們極度注重健康，每天必定抽空於外出步行約一小時，一邊運動，一邊吸收新鮮空氣。

Crystal Serenity不但房間配套豪華齊全、餐飲豐富美味、娛興節目精彩多元化，郵輪上其實亦建有健身室及多項戶外設施讓搭客做不同室內外運動，如打網球、打高爾夫球、游水等。團友八人主要為七旬長輩，並不適宜做太多劇烈運動，為咗要增進血液循環及強身健體，大家就選擇咗以最簡單o既步行作每天適量o既運動。Crystal真係周到，將郵輪七樓定名為「Promenade Deck」，盡量空置甲板，好讓乘客圍繞郵輪步行或跑步，並於牆身貼上每天步行方向、牆鐘同圓周資料，以便計算里程及時間。

只要完整地搭乘Crystal一次長達七日或以上o既郵輪河，每位新搭客都會自動成為「Crystal Society」o既一份子，會籍並無任何費用，並可終生受用。會員除咗可享有特價船票及房間升級優惠等之外，Crystal於每一個航程都會舉辦雞尾酒會，報告郵輪公司新動向及表揚搭次率最高o既Crystal粉絲。

今次係肥肥家族第二次坐Crystal Serenity，故亦有幸被邀請出席「Crystal Society Pre-Dinner Cocktail」。是次雞尾酒會中，Crystal非常隆重其事地請哂全船o既高級職員上台，包括船長，表揚Crystal有史而來最捧場o既日籍女乘客第三百次乘坐Crystal郵輪，並頒奬、獻花、祝酒及合照，大家情緒都好高昂，不斷歡呼拍掌。

Crystal Serenity有兩間主題餐廳，分別為日本料理「Silk Road」及意大利餐廳「Prego」。記得第一次搭郵輪時，只要預先訂座，乘客可無限次於主題餐廳進食，但係今次就改咗例，每位客人只可以免費於各餐廳用膳一次，如果要食多一次必需繳付美金三十元人頭費；哥哥估計此舉可能係因為郵輪收到好多初次搭客投訴未能成功訂座所致。

Prego無論係裝修定餐單都冇變，唯一不同o既就係唔見咗之前o既「Daryl Picasso」，Carpaccio上冇咗佢以橄欖油繪畫出o既獨特圖案。今次換上經理Earnesto全程招待，從其名牌上得知佢原來同Zdravko老師係同鄉，小肥當然係要show吓quali同佢講翻兩句鄉下話啦，頓時令佢O哂嘴，氣氛亦唔再拘束！

既然餐牌冇乜大變動，團長就依舊叫咗最啱口味o既頭盤大家分黎食，而主菜同甜品就各自叫。Prego水準仍然高企，菜式美味程度無減。

Fritto Misto di Pesce, Crispy Fried Calamari, Shrimp, Bay Scallops, & Oysters with Aioli：意式炸魷魚海鮮拼盤，香脆惹味，微微加上檸檬汁，特顯鮮味，更覺醒胃，真係百吃不厭！

Carpaccio of Black Angus Beef with Mustard Sauce & Caravaglio Capers：雖然冇咗「Daryl Picasso」揮毫，但生牛肉肉質依然幼嫩， 肉味仍舊香濃！

King Crabmeat Salad – Avocado & Sicilian Orange：蟹肉沙律蔬菜份量唔多，正合小肥心意。蟹肉撈埋牛油果一齊食，質感變得更加香滑，配上橙塊味道則更為鮮甜，正！

Spaghetti "Pescatore" – Tossed with Fresh Tomato Sauce & Assorted Fresh Seafood：喺意大利餐廳食飯又點可以唔食意大利粉呢？！Prego出品o既意粉麵條同郵輪上其他餐廳一樣咁al dente，配料中o既蟹肉同帶子同樣香嫩，醬汁份量剛剛好，唔會太乾、太濕、太杰或者太稀，味道清香而且食落一啲都唔滯，簡直係完美！

Roasted Rack of Baby Lamb with Fresh Herbs New Potatoes, Fennel-Carrot Timbalo & Balsamic Demi-Glaze：Earnesto極力推介之主菜也！因餐廳內燈光較暗，拍照時又未懂得提高exposure，相片有點模糊，但其實羊肉色澤呈粉紅色，肉質香嫩無比，毫無膻味，絕對係正菜之選！

Lemon Zest Soufflé with Strawberry Sauce：此道檸檬味梳乎厘乃Prego鎮店甜品，兩年以黎小肥喺街上都未有再食過，今次當然係要懷舊吓。酸酸甜甜o既梳乎厘清香滑溜，配上士多啤梨汁又能加強消滯之效，個肚當堂冇咁脹，食完覺得好似自己減咗肥咁，真係開心！眼見小肥食哂碟上o既士多啤梨汁，Earnesto就叫細佬下次喺樓下Main Dining Room食飯時，問Zdravko老師攞啲「Yagoda」，即「士多啤梨」做甜品！