選乘大韓航空購下商務票，旅客可於「天合聯盟香港貴賓室」候機，不過室內並無廣播服務，大家要自己留意登機時間。

長形嘅貴賓室面積寬廣，最入嘅偏廳有多張獨立梳化櫈，大部份嘅白色枱仔都有插蘇位，方便旅客可邊等邊叉電。除咗個較輕鬆舒適嘅偏廳之外，中央有個大型少少嘅用餐大堂，散座嘅餐桌大啲又高啲，只係枱面唔係太乾淨。

尾段拍牆為自助飲品區，有咖啡機、啤酒雪櫃、汽水、蒸餾水等等。XO仔就當然係選擇飲酒啦！自選食物中有西式嘅麵包、三文治、沙律、甜品等。最有型都要數部班戟機，少入廚嘅小肥都係第一次見。亞洲菜中都有不少熱食及炸物。唯一要排隊嘅就係個麵檔，由專人即點即煮四款麵品。由於出門口前已經喺屋企食咗晚飯，細佬就簡單啲試咗碗台灣牛肉麵。牛肉麵只屬微暖，湯底稀而味淡，麵條同牛展塊一樣偏硬，個人覺得唔係好掂。