洛杉磯Torrance區內不乏日本餐廳，要吸引到食客光顧真係要落啲功夫，「Miyabi Uni」就標奇立異地以海膽菜式作主打，實有諗頭。

餐廳面積寬廣，正門兩邊為可吸煙嘅室外座。用餐大堂中央有個方形嘅開放式廚房，被十多個吧位圍繞著，其餘嘅散座均為合併式木造餐桌。室內並冇花巧嘅裝潢，只係用上假花及酒瓶擺設，十分簡潔。

中年服務生態度並非惡劣，但水平只可以話一般過一般！除咗明顯冇乜幹勁，落單時對餐牌上嘅項目亦不太熟識，每問佢一個問題，佢都要入去請教其他同事後先可作答，效率自然唔高。姨媽們點咗枝日本清酒，居然要等成十幾分鐘先準備好，家人見狀都唔敢勞煩佢中途換碟或者加茶。

八人分別點咗幾款頭盤、魚生、意粉及天婦羅黎分：

1)      Fresh Kumiai Oyster from Baja California (USD 15/半打; USD 27/一打)：加州生蠔細細隻容易食，且每隻均爽甜鮮美。

2)      Miyabi Uni Shooter (USD 14/兩隻)：每羮海膽Shooter連同一隻生鵪鶉蛋上，質感滑溜非常，無奈混入咗大量酸汁作調味，入口時未能食到海膽原有之鮮味，令菜式略為失色。

3)      Chef Select Sushi (USD 24.50)：如相所示，所謂廚師精選嘅壽司色澤偏暗，不甚油潤，入口更覺蝦隻乾嚡，就連三文魚及吞拿魚都唔得肥美。

4)      Miyabi Uni Original (USD 19.95)：以店名取名嘅海膽意粉麵條煙韌彈牙，海膽鮮甜嫩滑，入口滲出陣陣紫蘇香，牛油味亦甚為香濃，相當不錯。

5)      Uni Aglio e Olio (USD 18.95)：另外一款冇用牛油煮嘅海膽意粉麵條同海膽一樣出色美味，換配橄欖油則更為清新輕巧，簡單伴入蒜片及紅椒已夠惹味。

6)      Shrimp & Vegetable Tempura (USD 16.95)：蝦及雜菜天婦羅係就係炸得好夠乾身，可惜炸漿偏厚且唔香脆，個人覺得唔係幾夠火喉囉。

繼復活節喺假日酒店「Terranea Resort」嘅「Catalina Kitchen」食咗個唔係太得嘅自助餐後，XO仔即表示失望萬分，點知隔咗兩日，姨媽們話叫細佬俾多個機會，試埋酒店另外一間餐廳「Mar'sel」先。

高級西餐廳以做晚餐為主，只有週日一天加設早午自助餐。店子嘅「Smart Casual」服裝限制唔可以話好嚴格，不過就絕對唔歡迎穿著短褲或人字拖嘅食客。餐店室內光線柔和，樓底唔算特別高，但勝在開揚通爽，左方有個闊落嘅酒吧區，同用餐大堂一樣都係用上厚墊皮櫈，十分舒適。選擇室外座嘅貴客可欣賞到無敵海景、太陽落山及黃昏嘅晚霞；入夜後吹住海風會感到有涼意，幸好餐店設有多個暖爐，大家不用擔心。

服務生友善客套，除咗送上餐牌時會主動推介節令美食，落單時亦有問及各人有否對任何食物敏感，聽到女士們怕主菜份量會過多，佢地仲提議安排廚房幫忙一開為二，當真細心得很！訂座時得知開瓶費為USD 40/樽，長輩研究過酒牌，計過條數後，覺得自己帶靚酒點都抵玩啲，所以就自攜佳釀，到步後即交由健談嘅型男侍酒師代為處理。

小肥點咗帶子頭盤、和牛主菜及朱古力甜品三道菜，食埋奉送嘅麵包及餐前小食份量剛剛好：

1)      Amuse Bouche：餐前小食三文魚多士香脆清新。

2)      Cornbread：新鮮出爐嘅粟米麵包熱辣辣、香噴噴，皮脆包鬆軟，微甜可口，超正！

3)      Diver Scallops, black truffle polenta, Norma’s tomato sofrito (USD 26)：香煎帶子油潤軟嫩，鮮甜無比，蕃茄辣醬則惹味醒胃，墊底嘅松露粟米蓉清甜芳香，實屬必吃推介也！

4)      Snake River Farms Wagyu Shortrib (USD 48)：和牛方塊質感雖則夠鬆，但可惜煮得過熟，所以就偏嚡同乾。其實食完個粟米麵包同香煎帶子都經已幾飽吓，好在和牛牛仔骨肉只有四件磚塊之多，吃畢仲可以食埋甜品。

5)      Spiced Chocolate Chiboust, dulce de leche, cocoa nib tuile, cinnamon milk crumble, horchata gelato (USD 15)：朱古力甜品柔潤軟滑，香甜濃郁，伴配雪糕一球即增添清涼。