Crystal安排o既免費穿梭巴士於上海市中心o既臨時站設於外灘黃浦公園內「上海市人民英雄纪念塔」前o既空地。空地旁邊有洗手間同幾間食肆，旅客唔需要喺外面等巴士時吹西北風。

讀書時代，XO仔因有學習障礙，歷史科目無一不肥，居然而家年紀大咗，精神先能夠集中，聽取長輩講述上海o既傳說故事，當中最令小肥印象深刻o既就係當佢地提到「華人與狗不得入內」！原來建於十九世紀末o既「黃浦公園」係中國第一個現代化公園，建成後卻不開放給華人享用，直到1928年先允許華人進入。傳說當年公園門外有個刻有「華人與狗不得入內」o既告示牌，但是否屬實，則無從稽考；大肥爸爸話個牌其實喺電影「精武門」都有出現過，戲內其中一幕經典場景正正就係李小龍怒踢及踢碎告示牌，淨聽都覺得精彩！

外灘除咗有現代五星級「上海半島酒店」之外，區內仲有一間歷史更為悠久o既「上海和平飯店」。飯店前身為「沙遜大廈」，舊門牌仍貼於門外，其墨綠色金字塔頂係外灘一個較突出o既標誌。

上海和平飯店係中國國內唯一一間被評為「世界著名飯店」o既酒店，最出名就係其九國特色套房及爵士酒吧，好多名人、國家領導，包括英女王都曾經入住過。聽講爵士酒吧入面有隊老年爵士組合，成員全為八十歲以上o既band友，每晚都會表演一啲經典爵士曲樂，深受遊客歡迎。 

由外灘步行往豫園「南翔饅頭店」，必先穿過「古城公園」。公園係老城廂地區內第一塊大型綠地，係十多年前為綠化環境而建成，園內有大草坪、茶座、咖啡廳、釣魚點等區域供市民休息或進行強身健體o既戶外活動。

郵輪上o既導遊教路，如果要一嚐名小籠包店「南翔饅頭店」，就建議我地去豫園嗰間，因為地點最為方便，由外灘步行不需半小時。小肥未曾到過上海，但成日都會聽到同事提到上海有幾繁榮幾先進，真係完全冇諗過豫園會如上文提到般遍地「黃金」，污穢不堪，衛生欠佳！

位於城隍廟九曲橋邊o既「南翔饅頭店」創建於清朝，為餐館之總店，以其小籠包聞名。店舖兩層高，地面為不設座位o既外賣部，價錢較平，門口亦排滿人龍；二樓雅座就分咗平同貴兩邊，相差幾遠就唔知，因為只有貴嗰邊有位。我地八人總算有張大圓枱坐，但枱與枱間之通道狹窄，枱上塊玻璃轉盤又多污漬，開放式廚房內o既師傅又冇帶口罩，感覺並不舒適衛生；店內服務生以女為主，無一好客，全為黑面分子，見到佢地都唔開胃，坐下唯有希望食物好食補返條數。

「南翔饅頭店」最出名食小籠包，所以我地當日主攻不同口味o既小籠包及蟹粉灌湯包，不過就認真教人失望啦！小籠包有好多種，我地只係叫咗RMB 35六隻o既「鮮肉小籠」及RMB 55六隻o既「蟹黃（鮮肉）小籠」，價錢明顯比中國好多餐館貴。如相所示，小籠包外皮超厚，咬落更覺皮層偏硬，肉餡不但唔夠軟嫩，而且毫無湯汁，味道一啲都唔出眾，唔講真係分唔出邊啲有蟹黃，邊的係淨肉，大家都覺得喺香港食嗰啲好食得多，莫非上海啲師傅都走哂去香港？！哈，嗰隻「蟹粉灌湯包」仲離譜，皮厚都唔在講，個包入面真係只有味道淡淡o既熱湯同零星蟹膏，一口已飲清，每隻RMB 35真係有搵笨之嫌！ 

正當大家諗住喺上海食小籠包理應最正宗最美味時，市內最有名氣o既「南翔饅頭店」居然令肥肥家族及團友們失望萬分！南翔饅頭店不但環境不甚優雅，衛生欠奉，服務生亦不大友善，主打食物更加係質低手勢劣，貴夾唔好食，小肥絕不推介！ 

離開咗骯髒o既豫園，鞋底於閘口消毒過後，上返郵輪，空氣都頓覺清新得多！XO仔短短逗留上海大半天，印象負面多於正面，幸得Crystal安排一群當地年青人上船演出特備節目，小弟臉上終露笑容，為演出者高呼拍掌。

單看外表及身形，表演者應大多為未滿十八歲o既青少年。佢地以「平衡」及「人體力學」為主題，一言不發就以柔軟體操舞出一連串綜合雜技劇。起初細佬都有拍下精彩鏡頭，但中途經工作人員告知，先發現原來咁會影響到台上o既表演者，所以就立刻放下相機。當晚最緊張o既環節就係小女孩一邊彎曲身段，以拱橋、倒立等姿態，用身體各大小部位如頭、手、腳等，穩固多件雞蛋、蠟燭、玻璃等易碎道具，做出高難度動作，真係令觀眾手心冒汗，嘆為觀止！

小肥嘗試於網上找尋該團體過往o既演出短片，無奈未有所獲，不過為咗想大家有機會一睹類似表演，所以就收集咗以上一段國內綜藝盛典官方頻道o既影片。

喺「南翔饅頭店」食咗頓貴價而又唔飽肚o既小籠包餐，返到上船因趕住去睇show，又唔夠時間停留於咖啡廳及Crystal Cove酒吧區嘆個下午茶，所以到咗晚飯時間個肚打哂鼓，落到Crystal Main Dining Room一口氣叫咗五道菜，嚇到我幾位「Uchitelj」（即「老師」）O哂嘴，勁搞笑。

廚師推介之Jumbo Prawn Cocktail – Roast Pepper Remoulade：大大隻珍寶蝦清甜爽脆，食完三隻唔多夠，當然係encore啦！

Curried Chicken Lumpia – Mango-Chili Sauce：小肥見識少，從未聽過「Lumpia」，要哥哥講解先知原來此乃「菲律賓春卷」，據說係由中國「潤餅」演變出黎，「潤餅」之福建話讀音「Lunpia」同「Lumpia」的確好相似。可能郵輪上有多位菲律賓藉船員教路，個菲律賓春卷炸得好乾爽，一啲都唔油膩，外皮鬆化之餘，惹味o既咖哩雞餡唔會過多，點上酸甜少辣o既醬汁分外提神醒胃，好睇又好食！ 

Cream of Asparagus & Lemon Croutons：露荀忌廉湯質感滑溜，一啲都唔杰，露荀鮮甜，配上檸檬味o既croutons更覺清新脆口。

Giuseppe Special Pasta - Spaghetti Aglio e Olio：因為午餐實在太過驚嚇，大肥特別要求Giuseppe叔叔再一次即場烹製其拿手意粉菜式「Spaghetti Aglio e Olio」。每天在家必為家人炮製美食o既Giuseppe叔叔當然係冇令大家失望啦，意粉麵條煙韌彈牙，簡單o既調味足以煮出清香美味o既意大利粉。

Seared Kurobuta Pork Chop – Brioche Bread Pudding, Honey-Champagne Braised Sauerkrut & Caraway Demi Glaze：意外地，厚厚o既黑豚豬扒一啲都唔實，肉質爽脆且肉汁豐富，塗上蜜糖醬汁簡直係一絕！ 

Chocolate Hazelnut Trifle – Chocolate Pudding, Spanish Sponge Cake, Vanilla Ice-Cream & Frangelico Foam：食完主菜，老師們清咗張枱就呈上甜品牌，並重點推介朱古力甜品「Chocolate Hazelnut Trifle」。身為朱古力迷o既小肥聽到口水都流哂，又點會唔試呢？！甜品用杯上，杯面有一球雲尼拿雪糕、酒味濃醇o既忌廉泡沫及一塊三角形o既薄片蛋糕，底層則為香滑o既朱古力布丁。喺軟綿綿o既蛋糕上搽上甜美o既布丁、涷涷o既雪糕同滑溜o既忌廉，四位一體於口腔內溶解，感覺好似食緊一件走咗咖啡同朱古力粉末o既tiramisu咁，超正！ 

唔知係咪有感上海餐飲未必會合搭客口味，Crystal喺上海第一晚特設咗一頓「宵夜自助餐」，肥肥家族亦特意於晚餐後先步行上兩小時消化食物，再落返Crystal Plaza食多餐。

一小時o既宵夜自助餐都好豐富架，除咗有芝士、餅乾等甜品及健康o既沙律、水果之外，更有多款肉類、蔬菜及鮮製意粉等熱食，雖然都成十點，但係客人們食慾無減，繼續食牛扒同意粉，真係幾誇張！大肥估計，有部份客人可能於外出用膳，未能接受上海餐飲，故晚上返回郵輪仍餓著肚子，而Crystal搞o既宵夜自助餐就正好填補腸胃o既空虛。