環境衛生：
大家黎之前一定要訂位，唔係有排等。依間串燒只有牛同豬，係冇雞食既。細細間，有兩層，上層牆上有個漢字餐牌，方便我地日文麻麻既人。雖然係一間串燒店，但係油煙比想像中少，而且店舖簡潔乾淨，我地食得好舒服。滿分。

服務：
喺日本係完全唔須要擔心服務既問題。由入門口歡迎我地光臨到坐下餐前第一條熱毛巾到走時向我地行鞠躬禮，真係好到有少少難以相信。所以都係滿分。

味道：
所有食物熱辣辣，正！醃料味道一流，甜咸適中，讚！
豬肝超爽，連我媽咪唔食肝既人都要encore。我地大家食得最多既一味。推介一。
牛利係厚嗰隻，但係唔硬唔刃，爽中帶啉，推介二。
軟骨好脆，唔怕咬崩牙，不過個人比較喜歡雞軟骨。都係值得推介既，推介三。
燒肉丸個皮脆脆地，肉身軟啉啉，好鍾意佢甜甜地既汁。推介四。
個牛肉好似一塊迷你牛扒咁，好鬆軟，唔會過生或過熟，真係好難挑剔。推介五。
（我地其實食左其他串燒，不過因為冇帶筆記又唔記得影相，所以記唔到。）
食完串燒，哥哥仔問我地飲唔飲湯，食唔食飯。我地依班旅客就問佢係咪麵豉湯。佢好有耐性咁話比我地知個湯係用牛骨同豬骨同其他聽唔明既野餚出黎既，客人可以選擇加飯入去煮。白飯我地成日都有得食，所以我地就叫左幾個湯加飯黎share。認真dum dum dum!!! 好食到一滴都冇得剩。推介六。
插曲：一去到第一樣就叫腎，不過已經賣哂。跟住想食pork belly五花腩，不過因為語言問題，黎錯左豬腸，不過都ok。
因為怕熱氣，所以我地每人叫左杯啤酒飲。正！

最欣賞酒店有來回新宿車站既巴士，每20分鐘一班。

酒店房間大，而且設備齊全。毛巾，牙刷，風筒，鬚刨，拖鞋，夾萬，電視，雪櫃，上網，應有盡有。

大堂，房間，餐廳，升降機，走廊，洗手間，所有地方都好闊落，好乾淨，而且唔會有任何異味。真係比到你一個一塵不染既感覺。

日本人既服務認真一流，去到邊都同你鞠躬，打招呼，開門，而且有問別答。酒店所有人都講英文，所以我地要訂位食飯全部靠哂concierge。

真係巴閉~門口有兩條隊：一條排甜品餐廳，另外一條排cake shop。
餐廳只有14個位，但係唔會同一時間比你坐哂。因為我地同行有11個人，我地都係分批入既。叫好哂甜品，我同哥哥就走去cake shop行，買左好多野。請留意，所有野既賞味限期都唔超過兩個禮拜，証明d野夠新鮮。

1) Egg Soufflé: 差唔多所有人都叫左個黎試。（我叫左朱古力黎試，而且我掛住買小食，所以冇影到相）個個都話係佢地一生食過最好食既soufflé!!! 咁我都唔執輸，試左媽媽少少。好有驚喜，因為個Soufflé好鬆，一d都唔乾，味道清中帶甜，而且個蛋好特別。媽媽切開個Soufflé黎睇，發覺經過咁高温去焗，個蛋既形狀冇變之餘，個蛋黃重要係流心架，真係精彩。

2) Biscuit Coulant Chocolate Griottines: 作為一個朱古力愛好者，我就點左餐牌上唯一一款朱古力甜品。食完個咁好食既Soufflé，在比較只下對依個甜品有少少失望，因為佢太普通，同埋太甜。原本如果佢唔係咁溜，我真係好想叫番個Soufflé黎食。
個心太軟好夠軟，熱同流心。值得一讚既係個雪糕真係好滑。由于佢配milk chocolate既雪糕，如果係用dark chocolate黎做個心太軟效果應該會更好，因為唔會咁甜同咁溜。受到朱古力甜既味道影響，rasberry都變得好酸。

行街時經過見到有趣所以影左幾幅相：

1)　銀坐站出口處見到一間叫＂九龍＂既餐廳，話係食香港料理wor。想問下乜野為之香港料理呢?

2)　真係想試下點樣韓國藥食法... 會唔會有鹿尾巴?

3)　"Sushi To Dai For"係間壽司店既名。點解會用"dai" 而唔係"die"呢？係咪唔鍾意死死聲？定係唔試串字呢？不過最有形係佢18:00開到27:00 。

上野恩賜公園：日本第一座公園

盛開既櫻花看似一片花海，美不勝收。我地賞花既時候落著毛毛細雨，花瓣隨即輕輕掉落身上，感覺非常浪漫。有部份櫻花既高度係我地可以用手觸摸得到添。當然，公園有告示牌禁止我地摸花同採花；我地都好聽話。

公園內到處都見到有流動洗手間，似乎預計遊客們都會逗留好一段時間咁。細心d睇，花徑兩旁既地下劃左好多格仔，導遊叔叔話係用黎＂劃位＂賞花同野餐，真係好有系統。途中重有熟食車賣煨蕃薯同＂おでん＂（Oden：關東煮，包括有獅子狗魚蛋，蘿蔔等）。唔知係咪因為天氣涷，當日食嗰d新鮮滾熱辣既煨蕃薯甜到入心，真係正到暈。櫻花季節期間，依個公園想必係情侶拍拖勝地。

神谷バー：＂Denki Bran＂始祖

導遊叔叔帶我地去雷門參觀同祈福之前，話如果我地唔抗拒杯中物既話，就一定要買返樽＂Denki Bran＂返香港同朋友試下。此乃Kamiya Bar特產，以前酒精含量高達45%，不過而家就分兩種：30%或40%。顧名思義，＂Denki Bran＂係以Brandy（白蘭蒂）為基礎所調製既雞尾酒，味道亦比較甜。酒內既其他成份包括Gin（氈酒），Vermouth（苦艾酒），草藥等。飲得，又唔怕溝酒既朋友不妨試下。就算唔飲酒既人都可以買黎做手信：

（40%）720ml = 1,120yen
（40%）360ml = 630yen

除左我地光顧既外賣部，Kamiya Bar本身有三層樓：第一層為酒吧式，專招待單獨光臨既客人；第二層為餐廳，專招待一家大細或喜歡熱鬧既客人們食西餐；第三層都係餐廳，有獨立房間，氣氛比較靜，提供既係傳統日式料理。

人形町今半：高質素牛肉火鍋

今半係一家非常出名食日式牛肉火鍋既老字號。爸爸既老友記極力推介，話香港係冇可能食倒咁高質素既Suki Yaki，所以我地未出發前已經訂定位，真係誠意十足架。

因為天氣涷，一入到門口就已經感覺到強勁既暖氣，怕熱既我心想：食火鍋時唔知會唔會調低d呢，sorry ~ 原來係冇得調既。室外室內裝修都好有傳統日本味道，連幫我地煮野食既姐姐仔都係著和服既。黎左東京幾日，終於漸漸地習慣佢地殷勤既服務態度：不停既鞠躬禮，自動幫我地除外套，餐前既熱毛巾，不停地清理餐桌，真係好難唔比滿分架。

我地當晚叫左配特上牛肉既＂集 TSUDOI＂Suki Yaki套餐：
前菜：全部係綠色既蔬菜，非常清。

茶碗蒸し（日式蒸蛋）：味道比港版清，可能係因為蛋以外既配料冇香港既咁多。

唔知係咪見到我地班外國人唔係好識日本文化，言語又唔係好通，姐姐們好細心地幫我地煮其餘既食物：如圖所見，佢地烹調得非常整齊，好有系統。
特上牛肉Suki Yaki ：咁marble既牛肉唔單止睇得，重好食得。小弟唔怕生，所以半生熟已經放左入口：第一口完全唔需要咬，牛肉自然溶喺口，肉質軟棉棉，好嫩，食到我要眯埋眼慢慢享受。怕生既老人家就選擇食熟d，我都試左塊：個人比較喜歡冇咁熟，因為牛肉口感唔同哂，變得冇咁嫩，而且要咬多幾次。

蔬菜：好新鮮乾淨；用返煮牛肉既汁黎煮，好入味，yummy!!!

柚子雪糕：酸酸甜甜，幫助消化。

唔知係咪自己大食呢，食完個餐都好似唔係好夠飽。雖然牛肉質素高，不過要成過萬yen一個人又唔飽，真係覺得幾貴囉。