環境衛生:
1)　裝修簡潔，間隔和式，但房間西式，所以唔洗除鞋或坐tatami。
2)　接待處對面有個好特別既鱈場蟹池。（見圖）
3)　店內共有8間房：最細4人房，最大10人房。我地同行有成十個人，佢最大間房先啱啱容納到。請留意：每人要多付525yen 房租費。
4)　房間既裝修同大堂差唔多都係較簡單，用既全部係木枱同木櫈。
5)　洗手間比較狹窄，不過好乾淨。

服務:一流
1)　一入門口自動幫我地掛外套。
2)　雖然有少少語言問題，不過大家都好落力地溝通。
3)　走時重陪我地撘lip落到地下送到大門口。

味道:
1)　櫻花涷豆腐：豆腐上既櫻花應景得好有意思。味道清甜，好refreshing。
2)　醃左既前菜拼盤：其中一味係魷魚，略咸，不過配碟內既酸菜又幾ok。
3)　魚生頭盤：魚生新鮮，拖羅夠肥美，蟹肉鮮甜，連塊紫蘇葉都特別香。
4)　鱈場蟹 shabu-shabu：份量十足，顏色亮澤，肉質嫩滑，味道清新鮮甜，跟本唔需要配任何醬汁，冇得彈。
5)　和牛 shabu-shabu：睇相就知夠哂marble，肉色鮮紅，雖然只有四片，不過每片打開先知好大好薄，食落重好有肉味。
6)　清湯麵：係姐姐用我地食shabu-shabu剩低既湯喺我地面前親自烹調既。佢先問我地想食邊款麵，我地就揀左佢提議既日式麵。嘩，好彈牙呀！味道清甜。食完咁多肉，依碗麵黎得剛剛好，好暖胃。
7)　杏仁豆腐：姐姐仔話係日本人最鍾意食既中式甜品。我地中國人食落去第一個感覺就係非常之日式，好似係開出黎咁，所以扣左分。

抵食:　
1)　最唔抵就係個房租費。其實有少少覺得比人屈，因為雖然係我地人多，但係打電話黎既時候訂位既姐姐係可以問我地分開坐會唔會有問題，如果唔分開坐就要坐有房租既房。（服務分被扣原因）
2)　咁高質素既食物收依個價錢都算合理，不過收得房租費會覺得房內裝修會high少少。