山區麵包王
我是山區麵包王。 我是一名高級打雜經理。 我最喜愛到日本,台灣,馬來西亞旅遊 , 最鍾意遊覽自然景觀,歷史建築/遺跡,鄉郊農田,動物園/植物園/水族館, 住宿通常會揀3星酒店,渡假村。
留言  留言給此旅遊家
  遊記數目 62
  上載相片 3000
  上載影片 29
最近分享過的旅程
新加坡4天輕渡小周末
國家/地點: 新加坡
旅程日期: 2014-06-28 至 2014-07-01
馬來西亞9天暢玩南北4地
國家/地點: 馬來西亞
旅程日期: 2014-03-15 至 2014-03-23
北再宜嬉盡享郊區之旅
國家/地點: 台灣
旅程日期: 2013-11-30 至 2013-12-06
肯亞野生動物15天大歷險
國家/地點: 肯亞
旅程日期: 2013-07-20 至 2013-08-03
韓冬風遊釜慶濟
國家/地點: 韓國
旅程日期: 2012-12-12 至 2012-12-19
懶懶hea遊澳門
國家/地點: 中國
旅程日期: 2012-01-08 至 2012-01-09
新加坡優休悠遊
國家/地點: 新加坡
旅程日期: 2011-09-13 至 2011-09-16
輕裝飲食逛馬交
國家/地點: 中國
旅程日期: 2011-07-01 至 2011-07-02
雲南省東遊記.羅平油菜花海
國家/地點: 中國
旅程日期: 2011-03-19 至 2011-03-25
台南高雄墾丁自在遊
國家/地點: 台灣
旅程日期: 2010-08-30 至 2010-09-04
共找到 62 篇遊記, 正顯示第 41 至 50 篇遊記
韓冬風遊釜慶濟 (韓國)
(旅程日期: 2012-12-12 至 2012-12-19 ,  旅程性質: 觀光攝影, 飲食購物, 消閒度假)
 整個旅程  (共8篇遊記)
 分享至Facebook 
發表日期: 2013-02-17

10多年前跟團到訪過首爾,當時仲稱為漢城,今回再次踏足韓國,目的地喺釜山、慶州、濟洲三地。香港人到外地自由行,喜歡「喪食」、「狂玩」、「瘋買」,我哋一行4人(小弟、太太、姨仔、舅仔)都喺「風遊」,只喺寒風伴遊,去到邊就吹到邊,寒風凜凜,吹到頭暈

原打算11月中去喺最佳時節,但多方因素,難以成行,所以才推遲至12月中起行,開始此趟8天艱辛之旅。除咗寒風,讓我哋食咗唔少苦頭仲有氣溫同天氣,氣溫長期徘徊晌-1℃~6℃,晌慶州整日嘅長命雨,又食錯嘢,令我哋痾嘔肚痛發燒都嚟埋,亦喺小弟第一次外遊病到要睇醫生,仲有仲有……,想知我哋嘅行程喺點,請繼續觀看下文。

坐港龍飛釜山,開凌晨02:35機,對於唔慣捱夜嘅我哋,其實有啲辛苦,但每日就只得依個航班。06:40抵達釜山金海國際機場,第一時間去酒店寄存行李先,再去海雲臺Spa Land體會一下地道汗蒸幕,順道「恰一恰」瞓陣先。食完午飯逛下好出名嘅海雲臺海水浴場逛,而路經嘅海雲台市場,亦值得打個轉了解當地(街)市況,黃昏時份,行完沙灘就啱啱好行到冬柏島,喺市內嘅睇日落勝地

大家行得攰,搵間麵包咖啡店嘆杯啡兼歇一歇,晚上再返回南蒲洞,逛一逛光復洞美食街,一嚐當地美食。因為我哋住晌中央洞附近嘅東橫Inn酒店,都喺隔一個地鐵站,行返去都喺十多廿分鐘嘅事。第一日行程到此結束,大家都要好好休息回下氣,明日再戰。

是日天氣:2℃ ~ 5℃ 天晴

時近聖誕,有薑餅人送行。
時近聖誕,有薑餅人送行。
02:35起飛
02:35起飛
大部份客瞓住覺等上機
大部份客瞓住覺等上機
少有見機場人影都唔多隻
少有見機場人影都唔多隻
唔該醒醒!上機喇!上機喇!
唔該醒醒!上機喇!上機喇!
輕便餐盒,唔食袋走都方便。
輕便餐盒,唔食袋走都方便。
芝士火腿包,普普通通啦!
芝士火腿包,普普通通啦!
第一次坐通宵機,真喺幾辛苦,因為機程短,只得3個鐘。依次坐港龍航班KA318,02:35準時起飛,06:30(韓國快香港1小時)就到釜山金海國際機場,晌機上小休一會就派「宵夜」,所以都幾難瞓到。

由於喺宵夜關係,每人獲派一份輕怡餐盒加一小樽蒸餾水,餐盒內有一小份什錦生果,一個芝士火腿包同一件香蕉蛋糕,仲有一條朱古力。質素普普通通啦,因為個人都幾攰,有啲似夢遊中食嘢,好似食緊,又好似瞓緊。個餐盒唔食袋走都方便,我見好多人都只管瞓,拎走份飛機餐當早餐
每人消費: 約0港元 (宵夜)
評分: 味道3   服務3   環境3   衛生3   抵食3
釜山金海國際機場頗細
釜山金海國際機場頗細
機場內韓英文對照,時有中文註解。
機場內韓英文對照,時有中文註解。
有指示去輕電鐵站,唔難搵。
有指示去輕電鐵站,唔難搵。
釜山金海輕電鐵機場站-售票處。
釜山金海輕電鐵機場站-售票處。
售票機有中文,唔拍唔識用!
售票機有中文,唔拍唔識用!
月台指示清晰
月台指示清晰
由於此線路屬輕鐵,每車卡只有兩節。
由於此線路屬輕鐵,每車卡只有兩節。
車廂亦都唔喺好大。
車廂亦都唔喺好大。
搞入境,等行李,07:30就真正踏入釜山市。釜山金海國際機場其實都幾細,以前去韓國自由行都幾麻煩,因為多喺韓文,睇唔掂,依家韓英文對照,時有中文註解

入市區,以前只有機場巴士,依家開通埋輕電鐵(等同我哋香港嘅輕鐵),對遊客就方便得多喇
場內有晒指示點去輕電鐵站,唔難搵,實際位置就晌場出門口右邊,同時右邊亦喺內陸機場,幾日後飛去濟洲就喺要晌內陸機場搭機。

金海輕電鐵,主要走外環一帶,要經2號線沙上站或3號線大渚站駁釜山地鐵,咁先真喺入到市中心,不過,金海輕電鐵同釜山地鐵喺兩個系統,要分別買車票。收費分兩區間,由金海輕電鐵機場站搭去釜山地鐵2號線沙上站轉車,屬1區間,盛惠KRW1,300,其實只喺需要搭3個站

大堂自助售票機有中文介面,唔拍唔識用,而售票機、月台均指示清晰,對搭開地鐵嘅港人應該無乜難度。由於此線路屬輕鐵緣故,每車只有兩卡,而且車廂亦都唔喺好大,載客量不多。
評分: 值得去3  
地鐵入口(中央洞站)
地鐵入口(中央洞站)
部份地鐵出入口附設扶手電梯(Centum City站)
部份地鐵出入口附設扶手電梯(Centum City站)
地鐵內雖出入口多,但以數字分類,指示充足。
地鐵內雖出入口多,但以數字分類,指示充足。
售票機,有中文介面,買票程序清楚易明。
售票機,有中文介面,買票程序清楚易明。
舊式月台未設有幕門,人多時需小心。
舊式月台未設有幕門,人多時需小心。
大部份月台已設置有幕門
大部份月台已設置有幕門
幕門前嘅指示
幕門前嘅指示
地鐵間嘅地下街
地鐵間嘅地下街
講完金海輕電鐵,點唔可以提埋釜山地鐵,佢哋以「Humetro」作為品牌名稱,意思喺:「懂得尊重他人的城市地铁,热爱市民的釜山交通公社」(摘自釜山地鐵網頁)。

釜山地鐵一共有4條鐵路,分別叫1,2,3,4號線,每個站除咗有站名外,亦以3位數字號碼為代號,1號線址為1字頭,如之前轉車嘅2號線沙上站,代號喺#227。跟輕電鐵大同小異,收費分兩區間,KRW1,200(1區間:距始發站不超過10公里的地方) / 1,400(2區間:距始發站超過10公里的地方),而自助售票機一樣有中文介面,買票程序清楚易明。如果好好利用地鐵,其實可以慳唔少,因為有一日票選擇,都喺KRW4,000,以小弟當時匯率,折返港紙都唔使HKD30,全日無區間無限次任搭,好抵,真喺搭3程都回本。仲有隻7日票KRW19,000,7日間不受區間限制可使用20次,但喺相信遊客會使用嘅唔多。

記得去佢個網頁睇睇,了解路線圖及收費模式固然需要,但最正喺晌「地鐵乘車觀光」一欄,有晒4條線沿線主要景點,以及點樣前往及所需轉駁嘅巴士,好有參考價值,而大部份景點主要集中晌1,2號線。

此外,釜山嘅地鐵站都幾長,內有好多出入口,全以數字劃分,指示充足。記低要去嘅地鐵站代號,以及出口數字,搵景點就輕鬆得多。題外話講講,部份地鐵站與站之間,都有地下街,都幾長幾多嘢買,天熱可過吓「冷河」,落雨又可以避避雨

評分: 值得去4  
SPA Land正門入口
SPA Land正門入口
收費及場內地圖指南
收費及場內地圖指南
環境裝修雅致閒適
環境裝修雅致閒適
不同休息區,又有小食亭,最正其中一個休息區有埋獨立電視機(右下圖)。
不同休息區,又有小食亭,最正其中一個休息區有埋獨立電視機(右下圖)。
室外露天溫泉,低溫下浸腳,大呼過癮呀!
室外露天溫泉,低溫下浸腳,大呼過癮呀!
最具特色嘅「蔥頭」韓式黃土汗蒸幕
最具特色嘅「蔥頭」韓式黃土汗蒸幕
部分蒸浴室內觀
部分蒸浴室內觀
場內有cafe,又有韓式餐廳,價錢都合理。
場內有cafe,又有韓式餐廳,價錢都合理。

睇韓劇久唔久見啲男女主角去嘆汗蒸幕,好似幾得意,想試好耐架喇。既然搭通宵機,酒店要4:00pm先可入住,姨仔一早提議去嘆汗蒸幕,舉腳贊成啦

釜山有唔少汗蒸幕場所,要數最齊最新應該喺海雲台新世界百貨Centum City內嘅SPA Land,場內配套極現代化及齊全。據介紹,從地下千米深引入2種天然溫泉水(碳酸氫納溫泉、氯化納溫泉),打造出22個溫泉池、13個主題汗蒸慕、桑拿、戶外足浴池等

1/F - 三溫暖及熱療區
天然溫泉浴池、三溫暖及熱療室盡在此層。溫泉浴池一天36次全面殺菌,大可安心享用。而汗蒸慕、桑拿花款多,有芬蘭桑拿浴、黃土泥浴、羅馬室、金字塔室、木炭室、土耳其浴室、峇里室、SEV室、冰房、Body Sound房……等等。另外又有個小食亭,口渴買吓水飲都方便。

2/F - 娛樂區
此樓層有休閒室、護膚室、頭皮及足部護理、商務室、餐廳、咖啡廳。

汗蒸幕跟焗桑拿有啲似,將體汗排出嚟舒緩神經緊張,所以見當地人焗到衣衫盡濕。我就無咁犀利,個個蒸浴室都試吓,志在體驗。多種設計不同、溫度不同嘅蒸浴室,又真喺幾有趣,記得最高一個蒸浴室叫「火釜」,真喺頂唔到30秒,因為成67.6℃,見裡面幾位「阿豬媽」排排坐有講有笑,佩服!佩服!焗完一輪汗蒸幕,上二樓有個大型休息區,幾大排梳化床,有獨立電視機,較點輕音樂,瞓番陣補足少少精神,臨尾再去浸浸溫泉,真喺疲勞盡消

收費又點計?入場費成人收KRW12,000(平日)/ KRW14,000(週末/例假日),如果想再慳啲,早場(朝早8點以前入場)或夜場(晚上8點以後入場)都非常抵,成人收收KRW7,000(平日)/ KRW9,000(週末/例假日)。提提你,入場費唔喺任玩全日,每次入場費最多可享用4小時,超時每個鐘加收KRW3,000,記緊唔想俾「罰款」就要準時還匙。講真,為番起港紙HKD90都唔使,嘆足4個鐘,又焗又浸又瞓,真喺好抵嘆囉

參觀時段: 早上
入場價錢: 每人12000韓圓
評分: 值得去5  
室內裝潢簡約,但氣氛柔和!
室內裝潢簡約,但氣氛柔和!
餐牌內容一眼睇晒
餐牌內容一眼睇晒
돌솥비빔밥 牛肉石頭窩飯 KRW8,500
돌솥비빔밥 牛肉石頭窩飯 KRW8,500
나지돌솥비빔밥 八爪魚石頭窩飯 KRW9,000
나지돌솥비빔밥 八爪魚石頭窩飯 KRW9,000
순두부찌개 石頭豆腐窩 KRW7,000
순두부찌개 石頭豆腐窩 KRW7,000
저주저통비빔밥 全州式牛肉飯 KRW9,000
저주저통비빔밥 全州式牛肉飯 KRW9,000
韓菜必包嘅前菜小碟及芽菜湯
韓菜必包嘅前菜小碟及芽菜湯

嘆完汗蒸幕都成2:00pm,所以費事周圍再搵食,索性晌番新世界9/F餐廳樓層搞掂,當中有日式,有西餐,有café。作為釜山嘅第一餐,食韓國菜好似有啲理所當然咁

因為已過咗午飯高峰時段,食客唔算太多,而室內裝潢簡約,但氣氛柔和,感覺幾舒服。餐牌內容一眼睇晒,兩頁半紙,多款石頭窩飯及熱窩。點好菜之後,韓式餐廳喺唔喺都送上一大堆前菜,有泡菜、八爪魚、蝦乾、黑豆、海帶蘿蔔絲,款款小巧精緻,味道又各有特色,小弟就最鍾意啲黑豆,煙煙韌,又甜甜哋。除前菜多之外,韓式餐廳另一特色就喺佢哋唔興供應熱茶、熱水,通常一大樽白開水放晌枱上自斟。

翻開餐牌,韓英日對照,加上圖文並茂,大概會知道所有菜式喺乜。我哋點咗2個石頭窩飯、1個豆腐窩加1個全州式牛肉飯,無加一,埋單按價加埋KRW33,500,平衡折返港紙每人HKD60+,雖然晌大百貨公司裡面,又唔算貴喎

돌솥비빔밥 牛肉石頭窩飯 KRW8,500
韓國菜賣相一向都幾別緻,好似兩個石頭窩飯,飯面伴以5色蔬菜,甚有養生意味,又寧捨好睇。飯粒分明又熱辣辣,不過飯焦唔多,5色蔬菜有洋蔥絲、蘿蔔絲、冬菇絲、菠菜及金針菜,加埋隻生雞蛋,伴飯幾好。雖然叫牛肉石頭窩飯,但牛肉唔多,且碎濕濕,變咗大配角咁!

나지돌솥비빔밥 八爪魚石頭窩飯 KRW9,000
相比起個牛肉石頭窩飯,依個八爪魚下得多好多,味道都幾辛辣,質感柔軟有咬口。而5色蔬菜又用咗另外幾款:大豆芽、紫椰菜絲、甘筍絲、椰菜絲及生菜。味道同樣不俗!

순두부찌개 石頭豆腐窩 KRW7,000
周時都見到有依個石頭豆腐窩,印象上,基本喺韓式餐廳都見佢蹤影。豆腐嫩滑,惹味刺激,但真喺幾辣,嗜辣嘅人一定鍾意,小弟唔好辣,所以要成日灌水

저주저통비빔밥 全州式牛肉飯(Jeonju style rice topped with wild vegetables and meat)KRW9,000
小弟見識少,食完個全州式牛肉飯,都真喺唔知特別在晌邊。跟上面個牛肉石頭窩飯晌用料9乘似,唯一明顯咪就喺無用石窩。不過,依個牛肉飯都OK嘅!

每人消費: 約8375韓圓 (午餐)
評分: 味道4   服務4   環境4   衛生4   抵食4
一出地鐵,就會見到高高嘅Savezone/Hotel Riviera,段面就喺海雲台市場
一出地鐵,就會見到高高嘅Savezone/Hotel Riviera,段面就喺海雲台市場
海雲台市場門口有個大牌坊,好易認!
海雲台市場門口有個大牌坊,好易認!
乾貨檔,亦兼買日用品。
乾貨檔,亦兼買日用品。
濕貨檔
濕貨檔
海雲台市場即喺我哋叫嘅街市,晌臨近海雲臺海水浴場嘅一節橫街,唔喺好長,大概200m左右,花廿零分鐘逛逛望望,可以知下當地市民日常生活事,以及物價指數

因市場內有唔少食肆,大可晌度食番餐,餐廳有韓式、有海鮮、又有小販檔。此外,有濕貨賣,又有乾貨、日用品……等等。
參觀時段: 下午
入場價錢: 每人0韓圓
評分: 值得去4  
望向迎月嶺嘅一邊
望向迎月嶺嘅一邊
望向冬栢島嘅一邊
望向冬栢島嘅一邊
海雲臺遊客中心,不妨攞啲旅遊資料。
海雲臺遊客中心,不妨攞啲旅遊資料。
大大個公仔話你知:全灘禁煙!
大大個公仔話你知:全灘禁煙!
釜山水族館,就晌沙灘旁。
釜山水族館,就晌沙灘旁。
經過釜山水族館之後回望
經過釜山水族館之後回望
就快行到沙灘尾喇!
就快行到沙灘尾喇!
行到沙灘尾,嚟一張海雲臺海水浴場全景。
行到沙灘尾,嚟一張海雲臺海水浴場全景。

海雲臺海水浴場稱得上釜山代表性嘅沙灘,因為擁有美麗嘅海岸線,灘長足足1,800米、寬50米。每年夏天遊客絡繹不絕,韓國人都會嚟釜山避暑,到時真喺擠得水洩不通。雖然依家冬天不宜下水,但在灘上漫步,看看藍天碧海,聽聽海風輕拂,感受一下冬日暖陽,美景伴以海鷗傲翔,加上遊人稀少,很有一份讓人寧靜,令人安心嘅感覺

除沙灘,海雲臺海岸線週邊有唔少配套,如高級飯店、娛樂設施、釜山水族館(부산아쿠아리움),鄰近又有冬柏島、五六島……等景點,真喺足以消磨大半天。

參觀時段: 下午
入場價錢: 每人0韓圓
評分: 值得去5  
冬柏島導遊地圖
冬柏島導遊地圖
冬柏島一邊架起木梯級散步道,途經人魚像。
冬柏島一邊架起木梯級散步道,途經人魚像。
小吊橋
小吊橋
冬柏島西南端嘅觀景台
冬柏島西南端嘅觀景台
觀景台遊人唔多,可以影日落影個飽!
觀景台遊人唔多,可以影日落影個飽!
觀景台上嘅燈塔
觀景台上嘅燈塔
黃昏夕陽,燦爛餘暉。
黃昏夕陽,燦爛餘暉。
觀景台右側就喺世峰樓,遠處喺廣安大橋!
觀景台右側就喺世峰樓,遠處喺廣安大橋!

過到嚟海雲臺海水浴場,如果唔行埋去冬柏島真喺好嘥。沿沙灘行到尾,就會見到釜山威斯汀朝鮮酒店,依部份喺酒店嘅後面,有條小路可以入到冬柏島公園,當中有950m散步道直去觀景台,而途經木梯級、人魚銅像、小吊橋等等,煞是有趣

冬柏島出名在於2005年11月召開嘅第13屆世界首腦峰會就晌島上嘅世峰樓Nurimaru APEC House(누리마루 APEC하우스)舉行,喺釜山引以為傲嘅建築,Nurimaru即喺韓文嘅Nuri(世界)、Maru(頂峰),不過小弟就對此興趣不大,反而睇日落喺我杯茶

冬柏島本身擁有茂密嘅冬柏樹和松樹,風景本己不錯,座落晌世峰樓側嘅觀景台,位置絕佳,環回270度海景,一眼望盡五六島、廣安大橋等壯觀美景。剛好今日天氣唔錯,算得天朗氣清,夕陽西下,餘暉裊裊,睇得令人陶醉

推介項目: 睇日落
參觀時段: 下午
入場價錢: 每人0韓圓
評分: 值得去4  
主打買麵包
主打買麵包
亦有曲奇供應
亦有曲奇供應
又有朱古力買
又有朱古力買
Cappuccino KRW4,200
Cappuccino KRW4,200
Cafe Mocha KRW4,700及小圓包
Cafe Mocha KRW4,700及小圓包

晌冬柏島睇完日落,外間本已經幾凍,一入黑就仲凍。加上行得攰攰哋,姨仔提議坐吓休息兼飲杯嘢,就晌出咗冬柏島,過咗釜山威斯汀朝鮮酒店,再過埋橋晌十字路口對面,見到間麵包咖啡室,一於小休取暖嘆杯啡

小店名字叫Arbor,其中一個意思喺由藤蔓攀爬或樹枝交織而成嘅涼亭或棚架,不過依家就變咗我哋個暖窩。其實隔幾個鋪位仲見到有間星巴克,不過,倒想支持吓啲本土小店。想像當地鋪租唔喺好貴,因為鋪內不單擺麵包嘅包櫃,抑或咖啡室嗰邊嘅枱櫈,都比較鬆動唔緊迫,好有空間感;再者,內裡裝修簡約,燈光柔和,確喺叫人輕鬆自在嘅好地方

我哋各自點咗咖啡或熱茶,再揀啲小圓包墊墊肚。熱咖啡價錢由最平嘅美式咖啡KRW3,800到摩卡、焦糖咖啡KRW4,700,而熱茶均賣KRW4,000,有伯爵茶、茉莉香片、綠茶。此外,仲有啲果汁、沙律,甚至乎brunch都有。

Cappuccino KRW4,200
意大利泡沫咖啡沖得幾香濃,泡沫幾豐厚,口感唔錯

Cafe Mocha KRW4,700
摩卡嘅賣相就靚啲,奶泡之上唧咗啲朱古力糠漿打個旋風造型。咖啡及朱古力味都幾夠平衡,不過,天寒地凍,只要一杯燙口熱飲,已足夠暖暖心窩

小圓包
忘了價錢,唔喺咩好特別嘅包,有點西餐廳餐包嘅影子,難得店員主動幫我哋翻熱,雖然出嚟嘅效果唔喺好熱,但感受到佢哋一番心意。

每人消費: 約5000韓圓 (下午茶)
評分: 味道4   服務4   環境4   衛生4   抵食4
時值聖誕,滿街相關燈飾佈置。
時值聖誕,滿街相關燈飾佈置。
街頭買藝者
街頭買藝者
偶有傳統民族雕像
偶有傳統民族雕像
內街有多好食肆,相對行人少啲。
內街有多好食肆,相對行人少啲。
 南浦洞日景
南浦洞日景

南浦洞喺釜山市中心出名嘅購物點,加埋光復洞、新昌洞,購物飲食共聚一處。每年10月嘅釜山國際電影節,就為南浦洞帶嚟多好熱鬧,因為其中為紀念電影節而建成嘅PIFF(Pusan International Film Festival)廣場,每年刻有獲獎人手掌、腳印、得獎作品名稱嘅銅盤皆會被鑲晌廣場地面上。

大街小巷兩旁大大小小商鋪,有成過百家,由低價到名牌嘅時裝店,以至珠寶、相機、音響、電子產品、民俗工藝品……等等,加上到處皆有休憩區、雕刻作品,我哋去嘅時候正正臨近聖誕,滿街掛上相關燈飾佈置、璀璨照明,好值得一逛

再者,附近周邊仲有龍頭山公園、札嘎其市場、釜山近代歷史館、國際市場(南浦洞雜貨街)、光復洞美食街……等等,夠你行半日喇

參觀時段: 晚間
入場價錢: 每人0韓圓
評分: 值得去4  
座無虛席,好爆場,多喺本地人!
座無虛席,好爆場,多喺本地人!
門外多款豆腐鍋推介
門外多款豆腐鍋推介
例送嘅餐前前菜,以及任取紫菜碎(右下)。
例送嘅餐前前菜,以及任取紫菜碎(右下)。
게살순두부蟹肉豆腐鍋KRW6,000
게살순두부蟹肉豆腐鍋KRW6,000
햄치즈순두부火腿芝士豆腐鍋KRW6,000
햄치즈순두부火腿芝士豆腐鍋KRW6,000
굴순두부蠔豆腐鍋KRW6,000
굴순두부蠔豆腐鍋KRW6,000
두루치기炒豬肉KRW15,000
두루치기炒豬肉KRW15,000
白飯都唔喺普通白米,喺有味飯。
白飯都唔喺普通白米,喺有味飯。


閒逛完南浦洞,走過嚟光復洞搵食就最好,因為光復洞美食街,街道細細,兩旁卻開咗好多食店,但似乎都喺以韓式餐廳為多。我哋無跟書搵邊間「指定」,反而兜咗一轉,發覺依間멋있는門面醒目,裡面坐得座無虛席,人氣旺場,望落去似喺本地人居多,所以投佢信心一票!

睇門口個餐牌,就知佢專賣soft tofu stew & steamed kimchi,其實佢招牌都有寫明,不過喺韓文唔識睇啫,而門外易拉架又有多款豆腐鍋(순두부)推介。店內裝修頗為時尚,一室橙色為主系,好搶眼醒目,其實啲橙色咪就喺啲豆腐鍋嘅顏色。餐牌韓英日文對照,亦只喺少部份有圖片,行咗成日,晚餐當然要食得好,最後揀咗3款豆腐鍋及一份炒豬肉。

未嚟主食,先嚟前菜已經喺指定動作,前菜主要都喺啲醃菜,晌度唔多講,絕對喺韓式風味

게살순두부 蟹肉豆腐鍋KRW6,000
幾款豆腐鍋外觀都差唔多,都喺橙紅色,辣度有番咁上下,對唔食辣嘅我真喺一項挑戰,小弟只好慢慢食啦。蟹肉豆腐鍋顧名思義,就喺蟹肉同豆腐,蟹肉唔算好多,而豆腐已經搗碎咗,味道不俗。

햄치즈순두부 火腿芝士豆腐鍋KRW6,000
第二個豆腐鍋喺配以火腿芝士,幾得意嘅組合,火腿芝士好平常,但夾落豆腐度,韓式煮法,效果OK喎,但稍嫌味道單一,就喺辣辣辣。

굴순두부 蠔豆腐鍋KRW6,000
蠔肉大大粒,味道頗鮮,釜山果然近海食海,海鮮產品靚又平。

두루치기 炒豬肉KRW15,000
要份細嘅炒豬肉,嘩!嚟到原來喺滿滿成一大盆,真喺錯估形勢。睇落材料十分之豐富,仲要明火滾住滾住食,真喺未食見到都要除咗件面褸,食咗就邊食邊滴汗呀!味道猶如泡菜鍋,酸酸辣辣,豬肉份量唔少,好似食極都有。

공기밥白飯KRW1,000
初頭見其他人猛添白飯,仲以為唔使錢任添,原來成千銀一碗,當然講韓圜啦。雖然喺白飯一碗,但唔喺普通白米,喺有味多穀米,口感黏糯有咬口。

費用已包咗銷售稅,但無加一,食到飽飽,非常抵食。

每人消費: 約8500韓圓 (晚餐)
評分: 味道4   服務4   環境4   衛生4   抵食5
大堂對住門口位
大堂對住門口位
大堂另一側
大堂另一側
房間比較細小狹窄,但非常乾淨企理。
房間比較細小狹窄,但非常乾淨企理。
陳設簡單基本
陳設簡單基本
洗手間最正有個自動坐廁
洗手間最正有個自動坐廁

東橫Inn晌釜山車站有兩間酒店,一間正正晌釜山站側,另一間就晌釜山站同中央洞站之間,而小弟今次就喺住晌後者「Toyoko Inn Busan Station 2 (東橫Inn釜山車站2號店)」。其實離地鐵1號線中央洞站幾近,大概只有5-10分鐘腳程,而附近內街又有很多韓式、日式食肆及Cafe,附近仲有一個40階梯文化觀光主題街,距南浦洞、龍頭山公園、札嘎其市場等景點亦不遠

睇名你都知,佢喺由日本人管理,屬集團式經營,晌日本好多地方都有其酒店設立。客房雖然有點逼狹,但整潔,又有wifi,免費早餐,Toyoko Inn 2確喺個經濟實惠不二之選!但有啲地方要留意,根據當地【資源節約和促進循環再利用有關的法律實施令】,法律上禁止免費提供牙具、剃鬚刀等消耗用品,所以一喺晌櫃台購買,一喺就自己帶去,而房內則有沐浴乳、洗髮水、潤髮露免費供應。其他酒店或房內設施,上佢網頁就一目了然。

最正喺洗手間內有自動坐廁,全電子控制,天冷都唔怕坐「冷板櫈」。相反,最唔好喺4:00pm先可以登記入住,10:00am就要退房,確實,退房時間10:00am就未免訂得有點早,如要延遲退房需額外付費KRW11,000 / 小時,好唔划算喎!

每晚價錢: 537港元 (雙人房)
評分: 設備3   服務4   環境4   衛生4   抵住4
  0 個留言    |  加入你的留言
懶懶hea遊澳門 (中國)
(旅程日期: 2012-01-08 至 2012-01-09 ,  旅程性質: 結婚紀念)
 整個旅程  (共2篇遊記)
 分享至Facebook 
發表日期: 2012-08-19

第二朝起身,就一試房內嘅蒸餾咖啡機,嘆杯醒神嘅咖啡,食埋尋日晌法蘭度帶走嘅農夫包,塗點牛油。跟住去咗行黑沙水庫健身徑,呼吸吓大自然空氣,一早行山,空氣特別清爽

返回酒店休息下,收拾好行裝就過去氹仔食個晏,再搵酒店穿梭巴士去關閘,純粹睇下依邊嘅澳門係點,原來感覺好唔同。沿路去澳門市中心行,逛一逛孫中山紀念公園、望廈公園、望廈炮台,臨尾再去三盞燈買啲手信,晌雅韾緬甸餐廳食埋晚飯先搭夜船返香港。

唔單只黑沙,其實路環仲有好多行山徑!
唔單只黑沙,其實路環仲有好多行山徑!
黑沙水庫內嘅指示牌
黑沙水庫內嘅指示牌
黑沙水庫,下面就係「水上樂園」!
黑沙水庫,下面就係「水上樂園」!
無啦啦晌水庫上加建嘅吊橋,另一邊就係咖啡茶座。
無啦啦晌水庫上加建嘅吊橋,另一邊就係咖啡茶座。
黑沙水庫一景
黑沙水庫一景
黑沙水庫水壩,相中上面就係滑草場。
黑沙水庫水壩,相中上面就係滑草場。
水壩下嘅黑沙水庫公園,有羽毛球、籃球場。
水壩下嘅黑沙水庫公園,有羽毛球、籃球場。
黑沙水庫公園燒烤場,環境企理架!
黑沙水庫公園燒烤場,環境企理架!

跟老婆一向都鍾意行吓山,尋晚玩咗水,今朝咪遊吓山囉,咁先真正叫遊山玩水丫嘛。因為黑沙呢邊嘅巴士比較鬆落,與其唔知等幾耐,索性由酒店行過去黑沙水庫,點知原來都要行半粒鐘先到,當做定行山前熱身啦

黑沙水庫公園就晌水壩前面,有燒烤場,環境幾企理,夜晚仲有燈光設備,聽啲公園管理員講,個燒烤場都幾受歡迎,好多人鍾意夜晚嚟燒烤。此外,仲有羽毛球、籃球場,不過,對於遊客如我,依啲設施未必用得着。上水壩時,側旁仲有個滑草場,不過依日無開放,我估幾啱小朋友玩

不過,條行山徑就幾唔錯,一個小時乜都行晒,成條徑沿住個黑沙水庫兜一個圈,景色就無乜,勝在易行,係無啦啦晌個細細嘅水庫上加建咗條吊橋,而另一邊有個咖啡茶座,對下有個所謂水上樂園,即係可以扒吓艇之類。

如果成日困晌鬧市裡,偶爾逃離繁囂,行下山,享受下短暫安寧,都係洗滌心身好去處

參觀時段: 早上
入場價錢: 每人0澳門元
評分: 值得去2  
左邊係餐廳入口,右邊係餅屋入口,但內籠係互通。
左邊係餐廳入口,右邊係餅屋入口,但內籠係互通。
雪利斯內在環境,係咪好茶記呢?
雪利斯內在環境,係咪好茶記呢?
中西葡炒粉飯麵一應俱全
中西葡炒粉飯麵一應俱全
葡式馬介休炒飯
葡式馬介休炒飯
葡國雞飯,做得唔馬虎!
葡國雞飯,做得唔馬虎!
雪利斯餅#匡鋪前餅櫃
雪利斯餅#匡鋪前餅櫃
木槺布甸($8杯)
木槺布甸($8杯)
杏仁薄脆,禮盒裝(左)、普通裝(右)
杏仁薄脆,禮盒裝(左)、普通裝(右)

由酒店出番嚟,其實晏晝餐飯無乜心水,不過酒店架穿梭巴士係路經路氹,就隨遇而安,落車後再行過去氹仔有咩好食。

經過地堡街,發現依間雪利斯寫住葡式咖啡美食,又見好多工友幫襯,格局好街坊,成間茶記咁,就入咗碰碰運氣。

嘩,果然係茶記一間,午餐,中西葡炒粉飯麵一應俱全,全部都係廿零三十蚊一碟,午市仲送熱飲,真係實惠非常。雖然係茶記,都盡量點番啲葡式嘢:葡式馬介休炒飯同葡國雞飯。

葡式馬介休炒飯 $28
好似我哋嘅鹹魚雞粒炒飯咁,不過鹹魚就用咗葡國貨,又多咗少少黑橄欖,味道鹹鹹香香,飯粒炒得爽身不油,仲要包杯奶茶,抵得無嘢講啦

葡國雞飯 $28
兩公婆食唔晒,已經叫少飯,點知嚟到個飯一樣咁大碟。估唔過個葡國雞飯做得一啲唔馬虎喎,一大兜葡國雞,唔單只撒滿椰絲,內裡加咗唔少椰奶,所以個汁好香。再者,配料亦好多,甘筍、洋蔥、薯仔;雞件斬得大大件,不過就唔係好多,4件左右。加埋杯檸水,咁又一餐喇!

雪利斯除經營茶記,另一邊鋪面仲有做麵包、西餅、蛋糕,所以,橫掂依餐食得咁平,就再晌度買個木槺布甸($8)埋位食,底面兩層瑪莉餅碎,中間一朕煉奶忌廉,都唔錯喎,唔算太甜,口感又幾細滑。除木槺布甸,仲有其他蛋糕,如意大利芝士餅、栗子蛋糕、朱古力蛋糕、拿破崙蛋糕……等等,都係$11-$15,非常之抵

臨走,見佢有啲自家出品嘅杏仁薄脆,有禮盒裝(MOP49)同普通裝(MOP19.5),前者買嚟俾同事食,後者買嚟梗係自己食啦。薄脆好似啲金錢餅咁,當中加埋杏仁碎,所以杏仁味頗香

每人消費: 約32澳門元 (午餐)
評分: 味道3   服務2   環境3   衛生4   抵食4
園中嘅中式園林同九曲橋
園中嘅中式園林同九曲橋
公園中央嘅迴廊,種有多夥老榕樹!
公園中央嘅迴廊,種有多夥老榕樹!
睇氣根,就知夥夥榕樹有番咁上下年資。
睇氣根,就知夥夥榕樹有番咁上下年資。

坐酒店穿梭巴士去關閘,嗰邊感覺好唔同,周圍啲樓又高又舊,啲靈台、窗口架晒鐵籠,好似返咗上大陸。晌附近有個「紀念孫中山市政公園位」,順道行下,介紹就講到好似好正,正入口豎立著孫中山先生嘅全身塑像,中式設計有人工湖、曲橋、涼亭、小樓,西式設計又有多功能體育設施同溫室,去到打個轉,不過真係無乜好睇,似我哋維園咁,好多阿叔阿伯打躉,鋤啤玩十五胡

園中有個人工小山丘,上到去望過對面,就係珠海拱北,近在咫尺呀,好似望過對面村咁近,全部都係高樓大廈。反而最吸引我嘅,係公園中央嘅迴廊,種有多夥老榕樹,長滿氣根,值得細味 

參觀時段: 下午
入場價錢: 每人0澳門元
評分: 值得去1  
臨上望廈砲台前嘅小斜路
臨上望廈砲台前嘅小斜路
望廈砲台入口
望廈砲台入口
砲台上面嘅大炮
砲台上面嘅大炮
晌望廈砲台所望到嘅澳門,唔係酒店、賭場,而係平民百姓家。
晌望廈砲台所望到嘅澳門,唔係酒店、賭場,而係平民百姓家。
從晌望廈砲台望到嘅賽狗場
從晌望廈砲台望到嘅賽狗場
砲台內嘅火葯庫?
砲台內嘅火葯庫?
哈哈,物盡其用,街坊曬吓菜乾!
哈哈,物盡其用,街坊曬吓菜乾!
有啲人就上嚟放狗
有啲人就上嚟放狗

1997年建成嘅望廈山市政公園,晌望廈山上面,由望廈炮台斜坡一路上,經過旅遊學院、望廈賓館,斜坡盡頭就係公園嘅羅馬式廣場,有噴泉、人工湖、瀑布、長廊、古老炮台等等,環境格外空曠。

沿一條舊斜坡再上,就搵到望廈砲台,晌19世紀末,佢係重要軍事防禦據點嚟架,不過,到1960年炮台就停用。砲台位置可監察關閘一帶嘅情況,依家,從炮台兜個圈,睇到望廈山周圍大部分地方,景觀都幾開揚架。黃昏,都見有啲市民上嚟做吓運動添。 

參觀時段: 下午
入場價錢: 每人0澳門元
評分: 值得去2  
三盞燈(嘉路米耶圓形地)
三盞燈(嘉路米耶圓形地)
店舖在大廈內,不過都有大大招牌「指路」。
店舖在大廈內,不過都有大大招牌「指路」。
店舖正門門面
店舖正門門面
內在環境比較「屈質」
內在環境比較「屈質」
紫米香豆漿 MOP10,口感比較糊,唔係太鍾意。
紫米香豆漿 MOP10,口感比較糊,唔係太鍾意。
魚湯粉
魚湯粉
椰汁雞撈麵
椰汁雞撈麵
湯汁香滑得嚟好掛麵
湯汁香滑得嚟好掛麵

作為是次「懶懶hea遊澳門」之旅嘅最後行程,最後一站就係嚟嘉路米耶圓形地,咩地方?咪即係有小緬甸之稱嘅三盞燈囉,因為附近緬甸華僑多,實際應該四盞燈先啱,三細一大嘅波燈嚟架。其實過嚟三盞燈行,都係搭單,主要都係晌上船前食多餐先返香港,目的地就係「雅香粉麵咖啡」,點知嚟到剛閂門,就去佢隔離無幾遠嘅姊妹店「雅馨緬甸餐廳」,不過有心幫襯都宜早,店家收7:30pm。(題外話,佢哋仲有一間分店晌媽閣嗰邊,叫「雅香咖啡甸餐廳」,好似將兩間店個名夾埋咁。)

內裡環境比較「屈質」,但因為時間尚早,人客唔算多,順利搵到位之餘,亦唔算太過逼狹。由於早已諗定食乜,睇睇餐牌都只係想望望仲會唔會有咩特別嘢食

紫米香豆漿 MOP10
剛啱睇到一版「特別推介」,紫米香豆漿、香滑鮮豆漿、營區烏豆漿、白果腐竹意米水,支支10蚊,就叫咗一支紫米香豆漿。色澤深紫色,紫米味頗濃,可惜蓋過豆香,而且可能太真材實料喇,質感過杰,口感比較糊口,唔係太鍾意

魚湯粉MOP19
係緬甸常見嘅一種粉麵,我就正正坐晒拍牆位,睇住牆上剪報嘅介紹:將塘虱魚烚湯折肉,混合香茅、黑椒粉、咖喱粉、粘米粉,由於後四種材料甚燥,加上蕉樹心這種寒涼物作中和,務求湯底不燥不寒啱啱好。燥定寒就好難即刻知,不過個湯底味道幾特別,老實講,又唔係話好好食,但亦唔係難入口,係覺得比較油,而湯裡透明一條條應該就係蕉樹心,無乜味咬落爽爽咁。面頭仲放有兩塊馬豆餅,好似送粥嘅薄脆咁,都OK嘅,一試無妨。

椰汁雞撈麵MOP21
除咗撈麵,仲有個係放湯嘅椰汁雞麵(MOP19),當然係撈麵正啦,多數人都係為個汁嚟食依個麵啫。麵條以油麵為基本,無咗爽口彈牙,換嚟有咬口感;咖喱咁色嘅湯汁,以黃薑粉、緬甸咖喱粉為主,加上椰汁,帶有濃郁椰香,稠身而不糊,香滑得嚟好掛麵。雖然只係賣廿蚊碗,雞件份量無將貨就價,確係抵食

睇佢卡片,印住「since 1978」,不愧為開業30多年,價錢相宜,俱特色又有風味,值得一訪。

每人消費: 約25澳門元 (晚餐)
評分: 味道4   服務3   環境3   衛生4   抵食4
  0 個留言    |  加入你的留言
懶懶hea遊澳門 (中國)
(旅程日期: 2012-01-08 至 2012-01-09 ,  旅程性質: 結婚紀念)
 整個旅程  (共2篇遊記)
 分享至Facebook 
發表日期: 2012-08-17

就快又到結婚周年,啱啱見到渣打信用卡出咗個推廣,迎新禮品係平價換澳門旅游套票(一張新卡)或免費換取(兩張新卡),咁著數當然唔執輸啦。遇著冬至、聖誕、新年,同屋企人、親友食幾餐飯都夠數達標簽帳額,所以,就以幾百蚊換咗個澳門假期返嚟

酒店揀咗晌黑沙灣嘅威斯汀渡假酒店,原因有4:
1. 未住過渡假式酒店,想住一住吓,睇吓係點;
2. 之前嚟澳門已去過澳門半島、氹仔同路環市區,係未到過黑沙灣;
3. 唔使跑景點,想hea啲,多留晌酒店,所以就想搵個環境幽靜啲嘅;
4. 佢係澳門少有(唔知係唔係唯一?)無賭場嘅酒店

雖然話威斯汀位處澳門最南最偏,但由外港碼頭,坐酒店嘅免費穿梭巴士都係30min就到。搞好登記手續,上房小休,之後再參觀一吓酒店。

黃昏時份,漫步黑沙海灘,細賞夕陽斜照。其實酒店對出已經就係黑沙海灘,唔需刻意搵。行到黑沙海灘另一盡頭,就係我哋搵食嘅地方:法蘭度葡國餐廳,嘆番餐葡國菜

晚上嘅餘興節目就係享受酒店嘅設施,有游水、浸按摩池、焗桑拿、嘆蒸汽室,其實仲有健身室,不過一晚真係玩唔到咁多嘢。雖然外面天氣幾凍吓,但焗桑拿、嘆埋蒸汽室,個人成身暖晒。啱啱好電視播英超,仲可以睇埋先瞓覺。

威斯汀酒店正門外觀,對正黑沙海灘。
威斯汀酒店正門外觀,對正黑沙海灘。
酒店免費接駁專車
酒店免費接駁專車
酒店大堂
酒店大堂
依排就係面向南中國海嘅客房
依排就係面向南中國海嘅客房
戶外泳池,雖然仍有開放,但天氣咁凍,就無人游水喇。
戶外泳池,雖然仍有開放,但天氣咁凍,就無人游水喇。
從泳池望返客房樓層
從泳池望返客房樓層
酒店內有好多室外園林空間,環境都特別怡人。
酒店內有好多室外園林空間,環境都特別怡人。
酒店園林空間十足,隨意都搵到啲座椅輕鬆安坐。
酒店園林空間十足,隨意都搵到啲座椅輕鬆安坐。

住澳門,威尼斯人酒店好多人都識,尤其佢個大堂嘅天花油畫,同個運河商場,專燈朝拜嘅賣點。但講到威斯汀,就未必有幾多個人知。

位處路環篤篤嘅威斯汀,位置真係幾偏僻,坐酒店專車由外港碼頭(港澳客運碼頭)去到酒店都要近半粒鐘。不過,環境又確係幾正,一方座擁南中國海嘅無敵海景,另一方側靠景致怡人嘅黑沙海灘,少咗份繁囂,多咗份清幽。酒店外觀僕實,1993年開幕,近廿年歷史,以澳葡式建築風格為主,沿山坡而建嘅斜梯形設計,大部份客房都有個寬敞露台,望海一流,嘆杯啡食件餅就仲完美。最正佢係晌澳門少有無賭場嘅酒店,太太特別鐘意,話無咁俗氣,唔會成日見住大堂滿滿人患,拜金到死,所以,喻為城中清泉都未為過呀

有人話周圍靜都死,食店都唔多間,交通又唔太方便,夜晚實悶爆,咁又未必,視乎你想要啲咩。我同太太就係想寧靜咁歇息下,又享受下酒店內嘅設施,消消工作積壓而嚟嘅悶氣

每晚價錢: 0澳門元 (雙人房)
評分: 設備4   服務4   環境5   衛生4   抵住4
中式大櫃打開後,上格係大電視,下面係雪櫃仔同個迷你水吧!
中式大櫃打開後,上格係大電視,下面係雪櫃仔同個迷你水吧!
呢張就係天夢之床(Heavenly Bed®)喇!
呢張就係天夢之床(Heavenly Bed®)喇!
大大張書枱之上,就放有一部蒸漏咖啡機,亦有齊所需材枓。
大大張書枱之上,就放有一部蒸漏咖啡機,亦有齊所需材枓。
浴室設備都齊全雅緻
浴室設備都齊全雅緻

酒店嘅客房類型分好多等級,有高級客房、尊貴客房、尊貴豪華客房……套房、總統套房,今次入住嘅本應係高級客房,但就升格咗尊貴客房,地方都好大吓,有成700多平方呎,大過小弟屋企好多添,空間感非常十足。

今期住晌611號房,房租原價要成MOP2,500,嘩!真係估唔到門市價要咗貴喎。威斯汀啲房最大賣點自然落晌佢啲獨立私人露台之上,間間房都有,不過低層可能只有酒店園景,高層海景全包,一望無際嘅中國南海,正!點正?下篇再講。此外,小弟覺得仲有一個亮點,就係房內書枱上,有部蒸漏咖啡機,等我第二朝一早可以嘆番杯新鮮蒸漏咖啡先

房內有個中式大櫃,好搞嘢,打開一睇,原來上格係部大電視,下面係雪櫃仔同個迷你水吧。而其他基本設施,都一應俱全,如:有線頻道、衛星頻道、風筒、浴袍、拖鞋、免費寬頻……;浴室又一樣寧舍闊落,乾淨企理但較為騎呢少少係浴室同時有齊方浴缸同企缸,真係唔覺有咁嘅必要喎。不過要做得全面嘅,自然要有多選擇俾啲客嘅。

要瞓得好一張靚床係唔少的嘅,據介紹,客房嘅床大有名堂,叫天夢之床(Heavenly Bed®),係Westin集團花好幾千萬美金研發,以絨毛、羽毛1:1比例做成嘅羽毛枕頭,床單針織數180-250高密度織縫,每張床都用上三條,天堂之床共有900個獨立捲筒同十層特殊床墊組合,配上冬暖夏涼嘅羽毛被,觸感細膩,俾人有種無與倫比嘅舒適。自己瞓過,真係幾正,非常舒服

每晚價錢: 0澳門元 (雙人房)
評分: 設備4   服務4   環境5   衛生4   抵住4
打橫望其他客房嘅露台
打橫望其他客房嘅露台
望落下層嘅露台,其實面積都好大架。
望落下層嘅露台,其實面積都好大架。
酒店內熱帶園林景色
酒店內熱帶園林景色
往外望就係遼闊無界嘅中國南海
往外望就係遼闊無界嘅中國南海

因為酒店沿山坡而建,刻意設計成梯形,令到絕大部份房間都有獨立私人露台。小弟所住嘅尊貴客房,露台正正對住成個海,下望就係酒店內蔥蔥花草樹木,又帶有幾分熱帶園林景色,向外望就正正係遼闊無界嘅中國南海。可惜係天氣有啲凍,否則嚟個下午茶,睇睇書,望望海,不知幾「梳扶」

每晚價錢: 0澳門元 (雙人房)
評分: 設備4   服務4   環境5   衛生4   抵住4
酒店對出嘅石堤,種咗好多椰樹,幾有大馬feel架。
酒店對出嘅石堤,種咗好多椰樹,幾有大馬feel架。
石堤亦吸引啲本地人嚟釣魚
石堤亦吸引啲本地人嚟釣魚
從黑沙灘向後望留威斯汀渡假酒店
從黑沙灘向後望留威斯汀渡假酒店
見到一班年青人打波,不過唔知打緊嘅沒有咩名堂。
見到一班年青人打波,不過唔知打緊嘅沒有咩名堂。
夕陽下嘅黑沙海灘,都幾靚架。
夕陽下嘅黑沙海灘,都幾靚架。
黑沙公園,樹影處處。
黑沙公園,樹影處處。
黑沙海灘內劃分好嘅露營營地
黑沙海灘內劃分好嘅露營營地

黑沙灘算係威斯汀周圍唯一一個較著名嘅景點,講少少資料覺啦:海岸線全長1,200多米,因其沙粒獨特地呈黑色所以得此名,除咗長長嘅海灘之外,附近仲有一個遊樂設施完善嘅黑沙公園,同一個露營營地、燒烤場,一到週末、假日,更有唔少澳門居民去玩。

其實要行晒成個沙灘,唔使幾耐,半個鐘頭乜都搞掂;不過行吓,影吓相,欣賞吓日落,嗅一嗅海風嘅味道,感受一下浪漫嘅氣氛,都可以hea成粒鐘架

參觀時段: 下午
入場價錢: 每人0澳門元
評分: 值得去2  
餐廳正門,望入去都見到唔係好多人。
餐廳正門,望入去都見到唔係好多人。
餐廳內嘅花園仔,本意係俾人等位時hea 吓!
餐廳內嘅花園仔,本意係俾人等位時hea 吓!
初到時,真係無乜人。
初到時,真係無乜人。
兩個餐前巨型農夫包
兩個餐前巨型農夫包
什菜湯 $32
什菜湯 $32
燒沙甸魚 $98
燒沙甸魚 $98
葡式燒乳豬 $152
葡式燒乳豬 $152

住威斯汀,又行完黑沙海灘,晌度比較有名氣嘅葡菜館,首推法蘭度,除咗嘢食煮得有一手外,其「串串貢」規條更係為人談論:全年都無冷氣供應,話之理晧熱警告;雖然伴菜跟薯條,講明無茄汁;只收現金,無免費水提供(其實澳門大多數葡國餐廳都無免費水供應);又唔俾訂枱喎。

初時睇定啲食評做參考,講到依間嘢好旺好多人排,同老婆星期日晚去,都驚等位耐,所以寧願食早啲,6:00pm就去定攞位。餐廳正正晌巴士站旁,但望過去門口,不單無人龍,入去睇睇,正門嘅大廳,人數寥寥可數,再經走廊、小花園,轉入另一幢紅磚小屋,先叫做人氣旺盛番啲,不過都只無四乘滿。7:00pm打後,又再多番啲人,可是,頂多只可以叫有八乘多人。始終黑沙海灘都幾偏遠,加上法蘭度嘅形象又負面啲嘅!

我哋被安排坐晌紅磚小屋,近窗口嘅二人枱,可以一覽無遺咁望晒成個場。講真,處身於紅磚小屋之內,昏黃燈光,有幾分晌歐洲用餐嘅氣氛。屋外周圍都係樹,幾有田園氣息

未翻餐牌,燒乳豬已係指定一試嘅招牌菜,其次,上次無試嘅燒沙甸,老婆又好想試吓,加多個什菜湯,相信好夠飽喇。

先送上兩個重量級農夫飽,粗獷外型嘅歐陸包,外皮烤得香脆,包心細密煙韌。食開港式麵包嘅鬆軟,到食歐陸麵包,有啲人真係唔太慣。個人覺得最好食法,都係搵手搣一小舊一小舊塗牛油食,感覺唔會太韌

什菜湯 $32
賣相認真麻麻,灰灰沉沉,一池死水咁,材料有薯仔、紅腰豆、洋蔥粒……感覺普通,味道算係OK。

燒沙甸魚 $98
一客有4大條,配兩大舊烚薯仔,加埋蕃茄、青椒、洋蔥沙律。沙甸魚燒得非常之香,幾有種鹹香味,要小心食,細骨頗多。烚薯仔,做得比較粗糙,齋烚無乜味

燒乳豬 $152
期待嘅主菜上枱喇,問過服務員,原來啲豬仔得三個月大,一隻豬仔做到6份,所以,基本上廚房都會密密燒,所以,落單後都唔會話等得太耐,而且,保證上枱時熱辣辣。除乳豬外,仲有薯條墊底,洋蔥、沙律菜、青橄欖做伴菜。乳豬真係幾得,唧少少檸檬汁,減一減油膩,因為睇樣你唔覺得啲乳豬肥,但食落真係「幾漏」。外皮十分之酥脆,肉質算幾嫩,唔似食燒肉咁「實淨」,不過,始終係得三個月大嘅豬仔,豬肉味就必然稍欠。

兩公婆食到飽飽,拖住手仔又慢慢行返酒店!但係,入夜外面天氣有點寒。

每人消費: 約140澳門元 (晚餐)
評分: 味道4   服務3   環境4   衛生4   抵食4
戶外小型草場
戶外小型草場
威斯汀兒童俱樂部
威斯汀兒童俱樂部
健身室一角
健身室一角
健身娛樂中心
健身娛樂中心
室內全天候恆溫池
室內全天候恆溫池
按摩池,水力強勁架!
按摩池,水力強勁架!
桑拿室
桑拿室
蒸汽室,成個太室倉咁,哈哈!
蒸汽室,成個太室倉咁,哈哈!

今晚食飯食得早,所以返酒店都早,但是日精彩節目未完,上房抖一抖,依家先係餘興節目嘅開始

酒店提供健身、娛樂多項設施,有獨特海濱環境,懾人氣勢嘅標準18洞高爾夫球場(小弟唔識打,所以無諗過會玩)、沿海緩跑徑、戶外小型草場、健身室、室內外游泳池、按摩池、桑拿室、蒸汽室、spa水療中心、活動室(可進行乒乓球、瑜珈活動),仲有個威斯汀兒童俱樂部

威斯汀兒童俱樂部,每日朝10:00晚6:00,提供多種遊藝設施,又有多元化室內或室外活動,例如:臉部與手部彩繪、工藝與美術、兒童尋寶之旅、海灘遊戲、間諜探險……等等,內容精彩,包啲細路開心成日呀!(溫馨提示:全天活動需另收費,但係包括午餐同一個裝滿零食和紀念品嘅探索包,抵番晒啦

咁「夜媽媽」,最好係游水啦,室內全天候恆溫池,無救生員當值,但泳池唔係好大,而且水深都係一米多,絕對安全。同老婆游咗一陣水,再晌隔離個按摩池浸下,夠熱,水力又夠勁,衝得肌肉好爽,疲勞盡消。而更衣室內嘅桑拿室同蒸汽室,又點可以錯過,個人比較鍾意蒸汽室,周不時打啲蒸汽,比桑拿乾煎無咁辛苦,所以,嬉水嬉汽得好愉快

其實焗完桑拿同蒸汽室,個人醒神番晒,仲想玩下健身室,因為見到好多簇新嘅器材,跑步機、樓梯機、划艇機……應有盡有。之不過,個人就好精神,可惜唔多夠體能,下次吧!

每晚價錢: 0澳門元 (雙人房)
評分: 設備4   服務4   環境5   衛生4   抵住4
  0 個留言    |  加入你的留言
新加坡優休悠遊 (新加坡)
(旅程日期: 2011-09-13 至 2011-09-16 ,  旅程性質: 觀光攝影, 消閒度假)
 整個旅程  (共4篇遊記)
 分享至Facebook 
發表日期: 2012-02-23

去到新加坡行程嘅尾聲,雖然整日天氣時陰時晴,但又唔算好熱好熱,保持住27-30C。尋日早瞓,所以今朝就可以輕鬆早起身

8:30am晌酒店嘅餐廳食番個自助早餐先,嘆飽嘆夠喇,就去行吓沙灘,幫助消化。尋日嘅活動範圍晌晒「中部」嘅巴拉灣海灘,故此,今日個範圍就輪到酒店依邊「靠西」嘅西羅索海灘。晌沙灘都逛咗成個鐘,跟住返酒店泳池游早水,然後先施施然收拾行李,辦退房。

中午時段,就去行程最後一個景點,就晌酒店後山上嘅「蝴蝶公園、昆蟲王國」,聖淘沙西邊本身有好多行山小徑,佢哋叫「Nature Walk」,經依啲小徑好快就可以由酒店兜去蝴蝶公園。完成埋依個行程,返酒店拎行李,再出番怡豐城(Vivo City),晌大食代美食廣場食埋個午餐先直踩前往機場

都聽聞樟宜機場好大,共3座客運大樓(查實唔止,下文有分解),不過時間上預得有啲緊咗,未有機會去睇睇T1同T3,就只有晌要上機嘅 T2兜個圈,同向日葵打個招呼影影相,旁晚機返香港,未夠10:00pm已經返到屋企,正式結束4日嘅「新加坡優休悠遊」,真係輕輕鬆鬆咯

有過半數都係露天位,環境非常寫意!
有過半數都係露天位,環境非常寫意!
有個焗爐即焗牛角酥,新鮮熱辣到不得了,絕對要試!
有個焗爐即焗牛角酥,新鮮熱辣到不得了,絕對要試!
自助早餐食物之一,橙汁(後左)、石榴汁(後右)
自助早餐食物之一,橙汁(後左)、石榴汁(後右)
煎雙蛋係即叫即做嘅,流住蛋黃汁配麥方包一齊食,超好味!
煎雙蛋係即叫即做嘅,流住蛋黃汁配麥方包一齊食,超好味!
整多碗濃香喇沙先!
整多碗濃香喇沙先!
仲有多款新鮮生果、乳酪,嘆埋杯咖啡先。
仲有多款新鮮生果、乳酪,嘆埋杯咖啡先。
周圍都見到松鼠,你有嘢食佢就一定走過嚟架啦,好得意呀!
周圍都見到松鼠,你有嘢食佢就一定走過嚟架啦,好得意呀!
部份室內位,一定無露天位咁正咁舒服。相片所見,都無乜人會揀嚟坐,除非落雨啫!
部份室內位,一定無露天位咁正咁舒服。相片所見,都無乜人會揀嚟坐,除非落雨啫!

尋日講過Siloso Beach Resort嘅環境,依家輪到講食,住宿包雙人自助早餐,餐廳Alfresco Café就晌酒店「後門」一入隔離個地下度,所以,都唔使再搵邊度食早餐。

餐廳環境貫徹整間酒店嘅風格,一樣好有叢林、野外嘅感覺。雙眼所見,有過半數都係露天位,細細張嘅膠枱、有柄嘅藤椅,啱晒2、3個人;亦有啲小稻草亭,亭下係可坐6-8人嘅長木枱,環境非常之咁寫意!雖然有室內部份,但基本上都好少客坐,感覺無露天咁正咁舒服。

食物種類同款式唔係大堆頭,但保證有啖好食整體質素都OK。熱盤有炒薯、雞肉腸、豬肉腸同茄汁焗豆;即煮檔口有喇沙、班戟、煎太陽蛋、炒蛋同一啲中式包點、點心;而最正係有個大焗爐放晌度,經常有新鮮出爐即焗牛角酥;仲有幾款新鮮生果、乳酪、粟米片…等等,而咖啡、紅茶、鮮果汁就任君選擇,多少隨意。

樣樣食啲,比起晌香港一個包一杯嘢飲,好豐富啦!最正都係晌個咁正環境hea住食,真係有幾何食早餐都食成個鐘架

餘慶節目,晌酒店成日都見到有啲松鼠周圍走,係依度都見,你搵啲嘢食引吓佢,佢就乖乖走過嚟,好易氹,我都係第一次氹松鼠,好鬼得意啫!

每人消費: 約0新加坡元 (早餐)
評分: 味道4   服務4   環境5   衛生4   抵食4
"Siloso"大字粒係Siloso Beach嘅地標
"Siloso"大字粒係Siloso Beach嘅地標
成個灘都椰樹棕棕!
成個灘都椰樹棕棕!
沙灘盡頭係香格里拉渡假酒店,而個灘又長又闊。
沙灘盡頭係香格里拉渡假酒店,而個灘又長又闊。
有啲浮橋可以橫過對面嘅小島。
有啲浮橋可以橫過對面嘅小島。
個灘都算得上水清沙幼,就算唔游水,行吓吹吹風都好舒服。
個灘都算得上水清沙幼,就算唔游水,行吓吹吹風都好舒服。
沙灘旁嘅更衣室都好有渡假風情。
沙灘旁嘅更衣室都好有渡假風情。
估唔估到依個係乜?其實係更衣室門口!
估唔估到依個係乜?其實係更衣室門口!

既然晌Siloso Beach依頭住,無理由唔行吓個灘啫,所以,食飽早餐就去行海灘,一則欣賞吓個海灘有幾靚,二則影吓相留個念,三則散散步幫助消化

個海灘都幾長幾寬闊,又種咗好多椰樹,都稱得上風景如畫,而且水清沙幼,就算晌度唔游水,齋行吹吹風都好舒服。再者,今日仲係閒日,成個灘望勻人唔多,視覺上仲正好多添,感覺更有渡假風情呀!偶有當地人晌度玩沙灘排球,雖然話有各式各樣嘅水上活動,但似乎時間尚早,又係星期五朝,就見唔到有咩水上活動有人玩緊。而對岸有幾個人工小島,當中有一個係設有浮橋可以橫過對面嘅。

海灘嘅盡頭,除見到香格里拉度假村外,仲有餐廳、咖啡座,可以嘆番個tea先走,而唔少得人人都會走埋去影相Siloso Beach嘅地標 - "Siloso"大字粒喇!6個大英文字,唔同顏色,擺法不一,影相幾盞鬼。如果再晌香格里拉度假村前嘅小石級向上行,可以去到西羅索炮台、海底世界、海豚樂園……等地方繼續玩。 

參觀時段: 早上
入場價錢: 每人0新加坡元
評分: 值得去4  
甚有原始森林氣氛嘅泳池,晌度游水超爽呀!
甚有原始森林氣氛嘅泳池,晌度游水超爽呀!
泳池設計咗一個人工瀑布,幾得架。
泳池設計咗一個人工瀑布,幾得架。
專俾小朋友玩嘅滑水梯
專俾小朋友玩嘅滑水梯
泳池近尾嘅一角
泳池近尾嘅一角
池邊擺有好多沙灘椅,椅背可校高校低,曬日光浴好舒服。
池邊擺有好多沙灘椅,椅背可校高校低,曬日光浴好舒服。
泳池靠近客房下面,有個開放型嘅健身室,令人覺得好似晌大自然度做運動。
泳池靠近客房下面,有個開放型嘅健身室,令人覺得好似晌大自然度做運動。
小草亭下,趟晌吊床之上,瞓個晏覺都寧捨過癮!
小草亭下,趟晌吊床之上,瞓個晏覺都寧捨過癮!
依度係天台花園,落地玻璃欄柵,下面就係成個西羅索海灘全景。
依度係天台花園,落地玻璃欄柵,下面就係成個西羅索海灘全景。

之前見到酒店內個泳池咁正,點可以唔游吓水架?所以,就趁行完沙灘,嚟酒店泳池落落水,游番一陣先!老婆游水麻麻哋,都話就算浸吓都一定要嚟囉

其實個泳池究竟有幾正?去開公眾泳池嘅我哋,依度直情可以當係世外桃源啦,泳池環境成個熱帶雨林咁款,足足95米長,周圍高天大樹,泳池又唔係死死實實「直筆甩」,彎彎曲曲,甚有原始森林氣色,晌度游水感覺真係超爽架,玩完個人仲醒神咗,依啲先叫做享受嘛!

而且,晌泳池一頭又設計咗一個人工瀑布,成4、5層樓高,瀑布衝撞落嚟嘅水聲,令到置身泳池中嘅我哋,更覺得好似晌森林裡面咁,幾得架。瀑布下方仲有兩條專俾小朋友玩嘅滑水梯,以及幼童池,酒店又提供巨型車呔水泡,所以,細路仔多數玩到唔捨得走呀

如果唔識游水都唔係問題喎,泳池邊擺有好多沙灘椅、太陽傘、原木嘅小茶几同吊床,椅背又可校高校低,曬曬日光浴幾咁舒服,又或撐住太陽傘,叫杯凍飲,睇睇書,聽聽音樂,都寫意到痺啦!再唔係,就晌泳池對下嘅花園草地,搵個小草亭抖涼,休息放鬆,都係件賞心樂事架。而靠近客房下面仲有個開放型嘅健身室,雖然器材唔多,但做做運動,強身健體丫嘛

每晚價錢: 1366港元 (雙人房)
評分: 設備4   服務4   環境5   衛生4   抵住4
「蝴蝶公園、昆蟲王國」嘅正門入口
「蝴蝶公園、昆蟲王國」嘅正門入口
展板介紹,地方唔係好大。
展板介紹,地方唔係好大。
一入園區,園林範圍活生生嘅蝴蝶。
一入園區,園林範圍活生生嘅蝴蝶。
園區內,仲養咗好多鸚鵡,其實係俾遊客跟佢哋客合影,賺賺錢。
園區內,仲養咗好多鸚鵡,其實係俾遊客跟佢哋客合影,賺賺錢。
另外一啲活體昆蟲,養在大玻璃瓶內。
另外一啲活體昆蟲,養在大玻璃瓶內。
標本館內有好多展板,作出唔同嘅介紹。
標本館內有好多展板,作出唔同嘅介紹。
部份蝴蝶標本,但真係好多,仲會講埋出自咩地方。
部份蝴蝶標本,但真係好多,仲會講埋出自咩地方。
有啲蝴蝶真係估唔到咁靚
有啲蝴蝶真係估唔到咁靚
隱身小昆蟲

其實,最原先以為係一個人造景緻嘅園林,養殖咗唔同種類、色彩斑斕嘅蝴蝶,任意咁周圍飛,所以,就打算入嚟影蝴蝶。不過,雖然園內係有活體嘅蝴蝶,但仍以展示標本為主

如果你係個好鍾意蝴蝶,又鍾意研究吓昆蟲嘅人,依個標本世界都幾啱你。當然,係親子遊,想令啲細路知道世界之大,都可以帶佢哋嚟見識吓嘅。因為,晌城市中要觀賞蝴蝶、昆蟲確實不易,但晌度就可以輕易睇到超過1,500隻蝴蝶標本、多種昆蟲嘅形態,仲有啲係活生生嘅,有啲係極為罕見嘅。最鍾意係嗰啲曉隱身嘅昆蟲,成日扮晒嘢,玩睇我唔到!睇我唔到!

從旅遊書介紹,個昆蟲王國仲有一個亮點,就係園裡有個70公尺長嘅洞穴,可以睇到螢火蟲,不過,唔知何解,唔見有指示。唔知係唔啱季節丫,定已經無咗喇?由於整個地方唔係好大,預一至兩個小時都應該夠晒睇。

參觀時段: 下午
入場價錢: 每人16新加坡元
評分: 值得去3  
有關附近嘅環保小徑,酒店已有介紹。
有關附近嘅環保小徑,酒店已有介紹。
沿途很多指示牌,唔怕盪失路。
沿途很多指示牌,唔怕盪失路。
部份高架浮橋路段
部份高架浮橋路段
部份山徑路段
部份山徑路段
搞鬼涼亭,啲蛇係假嘅!
搞鬼涼亭,啲蛇係假嘅!

晌酒店已見過佢哋有介紹,海灘區嘅後花園,有好多環保小山徑,其實位置就正正係酒店正門嘅後山,亦即係Imbiah森林裡邊,1.8公里嘅自然之旅,透過多條高架浮橋連接,蜿蜒通過依個熱帶小雨林

由於有很多指示牌,兼且整個山頭又唔係好大,基本上都唔會點盪失路。沿途仲有可能碰上一啲小動物,如:松鼠、長尾獼猴、超過20多種嘅雀鳥。我哋都係隨隨意意輕鬆咁行,志在親親大自然,享受吓叢林嘅優美!

參觀時段: 下午
入場價錢: 每人0新加坡元
評分: 值得去3  
怡豐城嘅大食代Food Repbulic,內裡裝修係以懷舊嘅新加坡風情。
怡豐城嘅大食代Food Repbulic,內裡裝修係以懷舊嘅新加坡風情。
多數檔口都係賣地道星馬美食
多數檔口都係賣地道星馬美食
所幫襯嘅檔口,叫「擂茶」,全新加坡都有好幾家分店。
所幫襯嘅檔口,叫「擂茶」,全新加坡都有好幾家分店。
擂茶飯套餐 SGD7
擂茶飯套餐 SGD7
擂茶飯內加入咗好多配料
擂茶飯內加入咗好多配料
家鄉雞肉餅SGD5
家鄉雞肉餅SGD5
雞肉餅內裡填滿免治雞肉
雞肉餅內裡填滿免治雞肉

雖然都成晏晝兩點幾,但因為今朝早餐都食得比平時多,所以,到依家又唔算好肚餓。不過,去到機場食可能仲唔抵,故此,既然怡豐城(Vivo City)係個必經中轉站,嗰度又有個大食代Food Repbulic,就不如食埋個輕怡午餐先再上路啦

依度嘅大食代都幾大,佔地成27,000 呎,可容納900個食客,設計用上咗懷舊嘅新加坡風情,希望令人感到恍如置身於20世紀初嘅新加坡。場內有10多個攤檔,賣嘅都多數係地道星馬美食。我哋無乜點刻意搵,咁啱見有一檔客家嘅「擂茶」嘢,橫掂都未試過,就好奇一試。都有唔少選擇,如擂茶飯、擂茶糙米米粉、韭菜冬粉……同一啲小食。

收銀處有啲單張攞,原來擂茶都幾多功效,降低膽固醇,開胃健脾,明目清肝,平五臟,降血壓,睇落幾犀飛利。而且,店鋪講明不含有豬肉同豬油,係健康美食。兩公婆,要咗一個擂茶飯套餐,再加一客家鄉雞肉餅,唔夠先再加!

擂茶飯套餐 SGD7
大碗內裝有米飯、花生、豆角粒、菜粒、魚乾仔……等材料,細碗就裝有擂茶,兩者撈埋就食得。擂茶係客家人招待貴賓時嘅一種茶點,「擂」有研磨之意,以綠茶,加埋研磨後嘅芝麻、花生,就成為擂茶。雖然有益健康,但自覺味道麻麻。既為套餐,仲有一碟客家豆腐同九層塔煎蛋,前者一大磚三角形炸豆腐,幾香脆,不過豆腐唔算嫩滑;而後者就有趣啲,普通煎蛋餅,但落咗大量九層塔香料,味道多份個性

家鄉雞肉餅SGD5
外貌有啲似炸豆皮卷,大大條,一客都有成10件,外層炸得鬆脆,內裡填滿免治雞肉,份量頗多,味道唔錯!

好喇,食飽就要起行。

每人消費: 約6新加坡元 (午餐)
評分: 味道4   服務3   環境3   衛生4   抵食3
行程終結時 ok喇2012-02-23
2號客運大樓
2號客運大樓
2號客運大樓嘅室內向日葵小花園
2號客運大樓嘅室內向日葵小花園
仲有其他地方都種有向日葵,被人感覺個機場都爽朗啲!
仲有其他地方都種有向日葵,被人感覺個機場都爽朗啲!
回程時,晌香港航空食嘅飛機餐,OK喎!我要雞肉飯。
回程時,晌香港航空食嘅飛機餐,OK喎!我要雞肉飯。
太太就要煎魚配蔬菜。
太太就要煎魚配蔬菜。

都聽聞樟宜機場好大好有名氣,多次獲得全球最佳機場評比第一名。一直以為佢有3座客運大樓,原來有4個先啱,除經常聽到嘅T1、T2、T3外,晌機場南面仲有一座廉航嘅客運大樓。T1、T2、T3係相互連接,旅客可透過捷運同高架列車,或者徒步行路來往依3個客運大樓;廉航嘅客運大樓就要晌T2搭免費穿梭巴士來往喇。

其實,樟宜機場特別多大自然嘅「主題風景」,T1有仙人掌公園,T2亦有蘭花園、向日葵園、錦鯉池,T3則有蝴蝶園、錦鯉池,各有特色。而且,T3仲有一條巨型大滑梯,足足12米四層樓咁高,不過,要晌機場內單一消費滿SGD10嚟換取一次滑梯溜!如果時間有鬆動,值得走訪一下3座客運大樓哩由於時間上有啲緊,只有晌T2同啲向日葵影影相,跟住等上機返香港,5:20pm機,9:00pm返到香港,飛機餐啱啱好當晚餐,題外話,香港航空嘅飛機餐都OK喎。

參觀時段: 下午
入場價錢: 每人0新加坡元
評分: 值得去3  
  0 個留言    |  加入你的留言
新加坡優休悠遊 (新加坡)
(旅程日期: 2011-09-13 至 2011-09-16 ,  旅程性質: 觀光攝影, 消閒度假)
 整個旅程  (共4篇遊記)
 分享至Facebook 
發表日期: 2012-02-19

嚟到新加坡嘅第三日,由於尋晚去唔成Night Safari,所以早瞓咗,故此,今朝就可以早早起身!朝早收拾好行裝,先退房,再搞行李寄存,就可以安心出去玩

第一站,係去食早餐。尋日去亞坤咖央吐司咖啡店,衰咗,今朝就計劃好去食黃阿細肉骨茶,好彩無甩拖,係位置偏咗啲,搵咗段時間。食完早去附近嘅小印度行吓,都有少少特色,但就唔算好特別,所以就兜咗大半個鐘左右就走喇。

跟住坐MRT去番東新加坡嗰頭,搵一搵土生華裔祖屋影吓相,然後去五星海南雞飯食晏,兩者都好相近。搭番兩個站MRT,就返到酒店攞番啲行李,再直踩入聖淘沙!

入聖淘沙都好方便,MRT直到Harbour Front站(NE1),再轉Sentosa Express入島,入到去有巴士同沙灘電車,全部唔使再俾錢,方便又慳錢。約莫4:00pm去到酒店,一如過往,行程尾段我哋都會住得好啲、舒服啲、輕鬆啲,所以就揀咗仿如置身晌森林嘅Siloso Beach Resort(新加坡喜樂聖淘沙度假旅館)。

由於我哋2007年去過一趟關西旅行,所以新加坡環球影城唔係我哋嘅目標景點,反而一眾悠閒玩樂才是主菜。

聖淘沙南面海灘區一共有3個海灘,最西係西羅索海灘 (Siloso Beach),最東就係丹絨海灘 (Tanjong Beach),而較中間位正正就晌聖淘沙捷運嘅海灘捷運站對出嘅就係巴拉灣海灘 (Palawan Beach)。巴拉灣海灘有幾個「景點位」,所以今日玩「中部」嘅巴拉灣先,首站係巴拉灣嘅動物天地睇動物匯演,之後再去亞洲大陸最南點影影相。6:30pm左右,去節慶酒店嘅Fiesta,因為有個好抵食嘅前菜加甜品自助餐(Appetizer & Dessert Buffet),食到飽飽,再睇住時間落番沙灘區睇8:40pm場次嘅「海之頌」表演。然後,梗係散散步啦,行吓去魚尾獅塔,欣賞吓月色,返到酒店都先係十點鬆啲,早啲沖涼早啲抖,咁先玩得閒適。 

黃亞細肉骨茶餐室嘅鋪面
黃亞細肉骨茶餐室嘅鋪面
鋪內裝修得幾骨子、幽雅。
鋪內裝修得幾骨子、幽雅。
我哋嘅肉骨茶早餐,盛惠SGD15.7。
我哋嘅肉骨茶早餐,盛惠SGD15.7。
招牌肉骨湯 SGD5.5
招牌肉骨湯 SGD5.5
鮮灼豬潤
鮮灼豬潤

問人星洲肉骨茶邊檔正,總有人推介「阿水」,佢係乜水,咪就係「亞細」黃亞細肉骨茶餐室囉,「阿水」係老一輩由福建嚟嘅移民發嘅音

出咗MRT,行咗好耐好耐都唔見,仲以為好似尋日咁要食白果,原來「黃亞細」真係離最近嘅MRT有一大段距離,搵得佢好苦。現場所見,都未係好多人,至少鋪內仲有大把位任坐,不過,店旁隔離嘅草地封咗,無得晌大樹蔭下食番餐。

睇資料話肉骨茶分為新加坡嘅潮州派同馬來西亞嘅福建派,前者就落較少藥材,味道比較清淡,反而多咗朕稍重嘅胡椒味,夏天飲有醒神嘅感覺;後者就下得藥材較多,所以味道比較濃郁,略帶甘苦,冬天飲有暖胃嘅作用,仲可提高身體抵抗力。

身處星洲,食到嘅自然係較淡嘅潮州派肉骨茶啦。點餐紙,長形一張睇晒,前面羅列咗十數款嘢食,背面就係功夫茶同其他飲嘢。唔好見佢係間老鋪,裝修幾骨子,服務員仲一人一台PDA,用嚟幫客人點菜添。由於係早餐,所以都係點夠就OK,佢哋無加一,但就另收7%銷售稅,總供食咁SGD15.7。

招牌肉骨湯 SGD5.5
好得意,佢哋個餐牌中文用咗肉骨湯,又唔係肉骨茶喎。份量唔係好多,一碗有3條肉骨,其實淨肉得幾啖,不過,湯裡嘅胡椒幾香,飲起嚟確係比加重藥材嘅福建派清新啲。可能慣咗以為肉骨茶都係濃味,所以,初頭飲時覺得怪怪咁!

鮮灼豬潤 SGD5.5
依個都算係人氣之一,同肉骨茶個樣一樣,只係肉骨換咗豬潤啫。豬潤食落新鮮無臊豬味,切得夠薄,口感帶爽,當然成兜湯係重點,一定要飲晒啦。

炸油條 SGD2.0、白飯 SGD0.5(細)0.7(大)
肉骨茶通常都撈白飯或油條蘸嚟食,再配醬油、碎紅椒嚟吊吊味。所以,我哋當然都叫咗客炸油條(折番港紙成十幾蚊,都幾貴)同一碗大白飯同食。

自制羅漢果涼茶 SGD2.0
有時老婆都會晌屋企煲羅漢果水,我都幾鍾意飲,加上外間依刻都幾熱,所以都叫咗一杯嚟試試,果真有啲驚喜,冰凍嘅羅漢果涼茶,飲落很順喉,令人感覺很清涼,好過飲汽水啦。

少少題外話,明明係湯,點解叫「肉骨茶」呢?網上就查咗3個典故,熟真熟假,就自行取捨喇
1. 「肉骨」如其名,是以肉與骨配合中藥煲成的湯。而「茶」字則是源自品嘗此餚時常配茶以解油膩感,故得肉骨茶之名。
2. 使用豬骨和一些普遍常用的中藥,以及一些家傳的偏方一起熬成湯,這就是最早的肉骨茶。當時的中國人也把藥湯稱為「茶」。
3. 據說肉骨湯的創始人名字是「林文地」,因為賣肉骨湯而被顧客稱作「肉骨地」,福建話中的「地」與「茶」音近,故後來被稱為「肉骨茶」。 

每人消費: 約8新加坡元 (早餐)
評分: 味道3   服務4   環境4   衛生4   抵食3
小印度最熱鬧嘅主街實龍岡路( Serangoon Road )
小印度最熱鬧嘅主街實龍岡路( Serangoon Road )
較出名嘅加寶路藝術地帶
較出名嘅加寶路藝術地帶
連個公廁都咁有色彩!
連個公廁都咁有色彩!
隔兩、三個鋪位就見有一檔賣花環嘅小鋪
隔兩、三個鋪位就見有一檔賣花環嘅小鋪
一大串一大串五顏六色花環吊晌鋪前,幾搶眼。
一大串一大串五顏六色花環吊晌鋪前,幾搶眼。
晌小印度見到依間咖啡店,特別在於……
晌小印度見到依間咖啡店,特別在於……
啱喇,唔係常見嘅芝士餅、慕絲蛋糕,而係一啲印度特色嘅甜點。
啱喇,唔係常見嘅芝士餅、慕絲蛋糕,而係一啲印度特色嘅甜點。

新加坡都算係個多元民族嘅城市,當地印度人都唔少,否則都唔會有個「小印度」啦。跟太太對印度文化唔係好認識,亦唔係好熱衷,尤其印度廟宇(雖然啲塔頂雕有好多不同造形嘅雕像,色彩繽紛),更加唔啱睇,所以都係晌依度花個幾鐘打個轉,行行逛逛一吓。

小印度唔係好大,但見得最多除咗印度人之外,就係賣花環嘅小檔,隔兩、三個鋪位就見有一檔,一大串一大串五顏六色吊晌鋪前,真係幾靚幾搶眼。此外,賣雜貨、香料嘅鋪頭都唔少,確係幾有趣。唯一可惜係,因為預咗朝早食肉骨茶,晏晝去食海南雞飯,所以,就無晌依度試咖喱。旅遊書都介紹咗好多咖喱食店,所以不愁無得揀,最好就係以竹腳市場(Tekka Centre)做起點,一來嗰度有極之多印度特色小食同甜點,二來又有好多小商鋪,仲係家庭式經營,所以,可以讓人感受吓印度人生活嘅點點滴滴

參觀時段: 早上
入場價錢: 每人0新加坡元
評分: 值得去3  
第一組所見嘅土生華裔祖屋
第一組所見嘅土生華裔祖屋
街尾保留得較有特色嘅一組土生華裔祖屋
街尾保留得較有特色嘅一組土生華裔祖屋
外觀好有特色,每戶又油上唔同柔和嘅顏色!
外觀好有特色,每戶又油上唔同柔和嘅顏色!
有中文字嘅牌額,係理所當然嘅事。
有中文字嘅牌額,係理所當然嘅事。
牆上可見好多動物浮雕
牆上可見好多動物浮雕

近二百年前初嚟新加坡嘅華人,大多數聚居晌牛車水,同族聚居自然同聲同氣,隨後一代又一代嘅土生華人,當然開始陸續會散居新加坡唔同地區。

要數土生華裔嘅祖屋,保留得較好較完整嘅晌東新加坡依邊有好幾處,而正正晌Koon Seng Road嘅就算係最好。其實,由MRT開始行過嚟依區,感覺同芽籠嗰邊(相等於深水埗)已經好唔同,所見都係一啲好靚、矮細嘅平房,樓高一般兩層(相等於又一村),覺得係相對有錢人住居多。

講番啲土生華裔嘅祖屋,沿路行都見有幾組,而街尾嘅一組又確係保留得幾好,外觀好有特色,每戶又油上唔同柔和嘅顏色,外牆又見到有好多龍呀、雀呀、馬呀……嘅浮雕,依啲房屋顯示咗華人對裝飾華麗嘅熱愛,如路線好好安排一下,值得造訪!

參觀時段: 下午
入場價錢: 每人0新加坡元
評分: 值得去3  
周圍環境好街坊
周圍環境好街坊
眼見本地人居多,遊客少!
眼見本地人居多,遊客少!
鋪內裝修平實
鋪內裝修平實
醬料自助,出名係老細自家製辣醬,可惜我唔好辣!
醬料自助,出名係老細自家製辣醬,可惜我唔好辣!
海南雞飯 SGD10
海南雞飯 SGD10
Fried Sambal "Salad" Fish SGD5
Fried Sambal "Salad" Fish SGD5
菜牌中英對照
菜牌中英對照

晌新加坡食海南雞飯多少都係指定動作,唔通搵星洲炒米咩!其實睇旅遊書都有好多介紹,如:文東記、天天、幸運……多不勝數,無咩可能試得晒,就揀間近近哋,又就腳,「五星」就較為順路,睇完土生華裔祖屋,行一陣就去到。五星都有好幾間,但好似以東海岸路依間較為人氣同多被介紹

東新加坡依邊唔係咩旅遊區,出名嘅景點都無乜,所以依間五星位處都係住宅區,去到單睇周圍環境已經有啲街坊,鋪內亦無咩特別裝潢,平實得很,眼見嚟食飯嘅人都係以附近嘅打工仔同街坊為住,睇落唔多見有遊客。

睇睇菜牌,就點咗一個海南雞飯,同一個炸魚,加多個白飯,夾埋晒都係SGD15.7,無銷售稅,無加一。菜牌中英對照,部份菜式有相,一目了然,再者啲侍應一係同你講廣東話,一係同你講普通話,點菜無難度。

海南雞飯 SGD10.Rice SGD0.7
據書描述,老闆堅持用走地雞,雞隻由馬來西亞進口,雞身較細,但肉質結實。食落,無乜皮下脂肪,雞肉都幾嫩滑,又好有雞味。墊底仲有啲青瓜,好爽脆。而個雞油飯好香、好油潤,枱上已放有成盤醬料,點雞三寶:薑蓉、黑豉油、辣椒醬,多少隨意。

Fried Sambal "Salad" Fish SGD5
睇返張單個英文名係咁寫,無記到個菜牌印咩中文名,所以唔係好知條咩魚。不過,條魚炸得非常之香脆,魚肉唔乾又唔嚡,食落又唔係話好油。最正淋晌魚身上面嘅汁,係爆香洋蔥再加入參巴醬,極之惹味。其實參巴醬係東南亞嘅辣椒醬,以十多種唔同嘅辣椒、蒜頭、乾蔥、炸過嘅乾貝同無去殼嘅蝦一齊炒製,辣辣哋,富有層次。

每人消費: 約8新加坡元 (午餐)
評分: 味道4   服務3   環境3   衛生4   抵食4
Sentosa Express,詢問處同售價處
Sentosa Express,詢問處同售價處
淺藍色嘅雙卡輕軌列車
淺藍色嘅雙卡輕軌列車
上面有晒中英文對照站名
上面有晒中英文對照站名
車箱內無乜凳,不過一陣就入到去,唔坐都不打緊!
車箱內無乜凳,不過一陣就入到去,唔坐都不打緊!
聖淘沙島上嘅海灘電車(Beach Tram),完全免費!
聖淘沙島上嘅海灘電車(Beach Tram),完全免費!

聖淘沙捷運(Sentosa Express)晌2007年1月15日通車,唔好睇佢只係得4個站,全程行車時間約莫得8分鐘,就已經耗資咗成1億4000萬坡元(相等港紙9億元),歷時3年時間先興建,以取代舊有嘅單軌聖淘沙列車。

雖然建築成本咁貴,但收費就超抵,因為俾低3蚊雞(新加坡元啦,折番港紙廿蚊左右),當為入島費,就包晒全島交通,正呀

坐MRT去到港灣站(HarbourFront),上去怡豐城(Vivo City)三樓,就係接駁入島嘅Sentosa Express。全線4個站係:聖淘沙捷運站(Sentosa Station)、濱海捷運站(Waterfront Station)、英比奧捷運站(Imbiah Station)、海灘捷運站(Beach Station)。島上嘅3個站已涉及多個景點,跟住去到海灘站,又有海灘電車(Beach Tram)分走海灘區東、西兩邊,加埋幾條線嘅巴士,就已經可以兜勻全島,無處不達,慳番唔少車費之餘,唔使下下搵散銀搭車呀。3蚊雞真係一餐飯都唔得啦!

參觀時段: 下午
入場價錢: 每人3新加坡元
評分: 值得去2  
酒店「後門」,搭Beach Tram直達!
酒店「後門」,搭Beach Tram直達!
依個先係酒店正門
依個先係酒店正門
酒店正門對住就係接待處
酒店正門對住就係接待處
俾人休息、坐吓嘅地方一樣好綠野!
俾人休息、坐吓嘅地方一樣好綠野!
左邊就係一層層嘅客房
左邊就係一層層嘅客房
園內多片草地及沙灘椅、小草亭!
園內多片草地及沙灘椅、小草亭!
荷花盛放,開得幾燦爛!
荷花盛放,開得幾燦爛!
蜻蜓都晌度休息吓,環境實在太寧靜!
蜻蜓都晌度休息吓,環境實在太寧靜!

有啲酒店網譯「喜樂聖淘沙度假旅館」,有啲就譯「西羅索海灘度假村」,總之都係講同一個度假村。位處聖淘沙島嘅西南面,酒店對出就係西羅索海灘,如果住晌高層,又或上到屋頂花園,可以俯瞰晒成個海灘,景觀可謂一流

酒店貴為Best Green Hotel,絕非浪得虛名,全新加坡只有兩間酒店係Best Green Hotel,另一間就係Regent Singapore。此外,佢仲獲得其他環保獎項,如新加坡嘅Eco Hotel。確實,佢真係有別於一般酒店,一入去完全同奢華對立,成間酒店都被大樹綠草包圍,好似住咗晌熱帶叢林裡面,佢抵死到仲整咗間樹屋,唔係裝飾,係客房之一嚟架!晌正門轉上去,仲有一排共12個獨立別墅(Villa)形式嘅客房,好有私隱度。

搭Beach Tram所到達嘅酒店門口,其實係佢個「後門」,正門晌半山上,不過從後門進入酒店都唔係咩問題,只係要搵番接待處就要轉嚟轉去啫。最講多少少佢個環境,除大樹環抱外,周圍仲有啲茂盛嘅花園同各種水景,好似天台就有個農圃,種有好多花同其他植物;二樓客房層外有一道長長嘅荷花池,荷葉漣漣。中央嘅95m長大泳池、人造瀑布、寬敞草地、藤椅、吊床,都令人感到好輕鬆自若、寧靜盎然,叫做彷彿置身晌世外桃源也不為過呀

雖然西羅索海灘度假村被定性為三星級酒店,有啲網站定為四星級,但絕對值得一住。

每晚價錢: 1367港元 (大床房)
評分: 設備4   服務4   環境5   衛生4   抵住4
二樓客房對外有一條長長嘅荷花池
二樓客房對外有一條長長嘅荷花池
房內無乜奢華嘅設備
房內無乜奢華嘅設備
超高樓底、大型玻璃窗,夕陽斜照!
超高樓底、大型玻璃窗,夕陽斜照!
床鋪、枕頭軟綿舒適
床鋪、枕頭軟綿舒適
免費樽裝水,亦有即沖紅茶、咖啡。
免費樽裝水,亦有即沖紅茶、咖啡。
浴室整潔、企理合衛生。
浴室整潔、企理合衛生。
沖涼液、洗頭水唔係一次性嗰隻,係較環保嘅「唧唧裝」。
沖涼液、洗頭水唔係一次性嗰隻,係較環保嘅「唧唧裝」。

講過晒度假村啲環境,依篇就講講住房係點。上一篇「棲息叢林裡-環境篇」已介紹過佢係間環保酒店,所以,內籠一啲奢華嘅設備都唔會有,換嚟就係平實、簡約、舒服嘅住宿環境,亦簡接成為佢唔係太高星級嘅原因。

整間酒店有172個客房、10個家庭大房、1間樹屋同12間獨立別墅,除後兩者,絕大部份客房都係面向西羅索海灘嘅,不過咁,又唔係個個房都睇到海灘,因為仲要睇你住晌邊個樓層。小弟被安排住晌222號房(據知因為有一批商務客嚟咗開會幾日,客房供應有啲影響),亦即以客房計,係最低嗰層,啱啱被酒店外嘅樹遮擋咗個景觀,但塞翁失馬,焉知非福,因為上文都有講,二樓客房對外有一條長長嘅荷花池,荷葉、荷花、蜻蜓,幾有意境嘅一幅圖畫

入到房間,感覺好寬敞,因為一來無太多餘嘅設施,二來就係佢樓底超高,成十幾呎,加上對海嘅一方,有個陽臺,配上大型玻璃窗,夕陽斜照,悶氣全消。如果住得高層啲,相信個景仲正。我就唯有上上屋頂花園,感受一下個景啫。

全房都係木地板,比起地毡感覺乾淨好多,而床鋪、枕頭都好軟綿舒適。每個客房都有免費提供樽裝水俾客人飲用,亦有啲即沖紅茶、咖啡。而浴室亦都好整潔,咁話明佢哋都盡量係環保,所以基本上唔提供牙刷、牙膏俾客人,不過,你亦可以去接待處免費索取;而梘液、沖涼液、洗頭水並唔係一次性嗰隻,已晌浴室安裝咗「唧唧裝」,確係較環保!

每晚價錢: 1367港元 (大床房)
評分: 設備4   服務4   環境4   衛生4   抵住4
巴拉灣劇場係一個戶外露天劇場
巴拉灣劇場係一個戶外露天劇場
首先出場係精靈馬騮仔
首先出場係精靈馬騮仔
鬼馬主持搭可愛鸚鵡
鬼馬主持搭可愛鸚鵡
觀眾亦有機會可以一試被大鷹「擒住」嘅感覺
觀眾亦有機會可以一試被大鷹「擒住」嘅感覺
自動請纓,可以有餵鸚鵡嘅機會。
自動請纓,可以有餵鸚鵡嘅機會。
專用嚟嚇觀眾嘅大白蟒蛇
專用嚟嚇觀眾嘅大白蟒蛇

晌巴拉灣嗰邊有個小露天劇場,首個「景點」係睇睇佢個動物匯演,話明依次旅行嘅優先係休悠,所以,做乜都要輕輕鬆鬆、休休悠悠,睇動物就最易引發樂趣

依個小劇場,每日有幾場表演,以及同小動物近距離接觸時段,全部都唔使錢,當然最啱帶住細路嘅親子遊,時間大致如下:
** 動物表演(每節20-30分鐘)-
12.30pm-12:50pm(靈長類動物類Primate Encounters)
3.30pm(雀鳥類Bird Encounter)
5:00pm(動物大集合,即係多種類Multi-Animal Encounter)
** 近距離接觸(每節15分鐘)-
12:00pm(爬蟲類Reptiles)
2:00pm(吸蜜鸚鵡Lories Feeding)
3:00pm(獼猴Macaque)
4.30pm(鸚鵡Parrot)

時間關係,我哋就啱啱好睇到5:00pm場嘅大匯演,黑人主持表情多多,動作鬼馬,主角陸續出場,有色彩繽紛嘅鸚鵡,有型有款嘅大鷹,敏捷靈巧嘅馬騮,雪白龐大嘅蟒蛇……等等,眨吓眼就渡過咗半粒鐘。臨尾,你唔驚嘅話,仲可以留多陣同條大蟒蛇影下相添

參觀時段: 下午
入場價錢: 每人0新加坡元
評分: 值得去3  
連接聖淘沙同對岸迷你小島嘅吊橋
連接聖淘沙同對岸迷你小島嘅吊橋
解釋何謂「亞洲大陸最南點」!
解釋何謂「亞洲大陸最南點」!
小島上「Sentosa」標記
小島上「Sentosa」標記
其中一座瞭望台,另一座被圍封,進行維修。
其中一座瞭望台,另一座被圍封,進行維修。
從瞭望台遠望魚尾獅塔及Imbiah Lookout一帶
從瞭望台遠望魚尾獅塔及Imbiah Lookout一帶
成個巴拉灣海灘,盡入眼簾。
成個巴拉灣海灘,盡入眼簾。
夕陽西下,椰林樹影,景致怡人。
夕陽西下,椰林樹影,景致怡人。

依個「最南點」位處巴拉灣海灘對出嘅一個迷你小島,由一道吊橋連接,而島上有兩座瞭望台。

唔係小弟拋書包,只係八八卦翻查吓網上資料啫,亞洲嘅最南點應係印尼嘅小巽他群島(Lesser Sunda Islands),但依度所講嘅係亞洲「大陸」最南點,但印象中新加坡好似香港咁,都係個島嶼啫,何以黐埋為「亞洲大陸」呢。上到個小島,有個介紹牌,啊!原來咁都得

一大段英文解釋,大意就係話依個小島透過一條吊橋連接住聖淘沙,而聖淘沙同新加坡本島又有橋樑相通,跟住新加坡同馬來半島嘅柔佛州又有長堤相連,所以,就叫做連繫住整個亞洲大陸喇!問你服未?唔怪之得馬來西亞人都「拿拿淋」晌柔佛嘅丹絨比艾國家公園立番個正版「亞洲大陸最南點紀念碑」,以示名正,天之涯、海之角。再講多少少,大家從地圖睇睇,就知最南點都唔係依個小島,因為聖淘沙係倒三角形,最南位應該係聖淘沙嘅南端尖角

雖然佢係A貨亞洲大陸最南點,但企上瞭望台回望聖淘沙景色唔錯,橫掃成個巴拉灣海灘,遠望仲見到魚尾獅塔,又遇著係黃昏時段,景致怡人。相反,南面對住新加坡海峽,本應大海一望無際,可惜外海好多貸輪,大煞風景啫!

參觀時段: 下午
入場價錢: 每人0新加坡元
評分: 值得去2  
一室橙色主調,十分醒神!
一室橙色主調,十分醒神!
環境闊落,裝修型格,坐得好舒服架!
環境闊落,裝修型格,坐得好舒服架!
高質嘅前菜同特色沙律,正!
高質嘅前菜同特色沙律,正!
餐前每人一客野菌湯,又係水準之作。
餐前每人一客野菌湯,又係水準之作。
部份前菜
部份前菜
部份沙律
部份沙律
芒果布甸(後左),雲喱拿奶凍(後右),朱古力醬棉花糖(前)
芒果布甸(後左),雲喱拿奶凍(後右),朱古力醬棉花糖(前)
最後一輪甜品拼盤,一個人食晒都係小事!
最後一輪甜品拼盤,一個人食晒都係小事!

節慶酒店(Festive Hotel)嘅Fiesta西餐廳,係由早到晚提供自助餐或散叫西餐嘅地方,偶然從旅遊書發現,原來佢有個好抵食嘅前菜、甜品自助晚餐,價錢都係SGD19.9,為番港紙都係百鬆啲。如果你怕唔夠飽,就算加個主菜變成為半自助晚餐,都係SGD25-38(視乎揀咩主菜),都唔算貴,仲係可以由6.30pm食到10.30pm添。不過,溫馨提示,半自助晚餐供應日係星期一至四,而星期五、六、日就轉為BBQ自助晚餐(SGD58)喇。

同老婆都少咗食自助餐,因為佢覺得食唔得幾多嘢,俾嘅錢又唔係平,無理由為咗回本搏命質,撐爆自己個肚皮,係好反智嘅行為。相反,俾四、五百食嗰少少嘢,不如搵間有情調,高質素架啦。

之不過,既然依度咁抵,又係個半自助晚餐,當然,老婆唔會反對食得好啲、食得豐富啲嘅!睇過有多款前菜、自助沙律吧、生果、朱古力噴泉、甜品,對我哋嚟講,已經好夠食,結果就連主菜都無叫,一樣滿載而歸

環境闊落光猛,裝修摩登型格,一室以橙色為主調,十分醒神,包唔會食到恰眼瞓。雖然我哋只係食前菜、甜品自助餐,無加主菜,招呼依樣殷勤有禮

野菌湯
餐前先由侍應奉上每人一客野菌湯同一個小餐包,餐湯頗大碗,但最緊要就係好有水準,菌香味濃,幼滑柔順。小餐包則中規中矩,只提供橄欖油蘸點。

前菜
大致上有8款,小弟覺得都係精選,包括:露筍沙律、烤蔬菜拼盤、雞肉腸(當然比樂奇牌高好多檔次啦)、新薯沙律、蕃茄配水牛芝士、西班牙火腿搭哈蜜瓜……等等,款款味美有質素。當中又以烤蔬菜、水牛芝士、西班牙火腿作為翻兜又翻兜嘅對象,無辦法啦,好食丫嘛!

沙律
主要有3款沙律菜,如羅馬生菜、火箭菜;主配料多達14款,如車厘茄、橄欖、雞心豆、醃青瓜、粟米粒、鵪鶉蛋……,要數較特別係意大利風乾蕃茄、羊奶芝士粒;而仲有6款副配料:乾麵包粒、合桃粒、杏仁片、雜乾果、煙肉碎、芝士粉,再加埋5款醬汁,如意大利油醋汁、蜜糖芥末……,左拼右搭,食沙律都可以食飽。我前後食咗兩大碟沙律,先試勻所以材料

生果
未落甜品之前,先嚟一輪生果,有火龍果、西瓜、士多啤梨、木瓜、蜜瓜、哈蜜瓜、菠蘿多款選擇,自選一個綜合生果拼盤,食得我何等滿足

甜品
最後,要為此晚餐畫上完美句號,甜品當然唔少得。除朱古力噴泉外,有10款甜品,除前菜有名牌介紹外,其他食物都欠介紹,所以甜品時間就係考各人嘅「味力」喇。總體,離不開慕絲、奶凍、布甸、蛋糕……等等,雖則唔叫得好突出,令人一食難忘,但尚算平穩,唔會話太差嘅!呷著杯熱咖啡,慢慢嘆,絕對輕鬆咁KO成碟甜品無難度

食半自助餐有依樣好(加上我哋又無叫主菜),真係樣樣試勻無走雞,食到飽一飽,但又唔係硬撐咁食落肚喎,話明要休悠,唔係買難受嘛!不過,講嚟有啲怪,咁嘅價位,咁嘅質素,睇勻成個場,真係客人唔多,頂多叫做3乘客左右,可能今晚係閒日啦。

每人消費: 約22.5新加坡元 (晚餐)
評分: 味道5   服務5   環境5   衛生4   抵食4
「海之頌」入場標記
「海之頌」入場標記
一排海灘邊上嘅小木屋實景
一排海灘邊上嘅小木屋實景
下面係標準座,上面係高級座,可見絕大多數都係「精打細算」嘅消費者。
下面係標準座,上面係高級座,可見絕大多數都係「精打細算」嘅消費者。
表演開始
表演開始
水幕、動畫,帶出不同場景
水幕、動畫,帶出不同場景
依個就係火神,佢仲晌沙灘上噴熔岩,效果迫真架!
依個就係火神,佢仲晌沙灘上噴熔岩,效果迫真架!
各種水柱舞動、燈光變幻嘅效果!
各種水柱舞動、燈光變幻嘅效果!
Songs of the Sea部分片段,噴熔岩效果幾得喎!

「海之頌」個表演場地,就係晌海灘捷運站對出嘅沙灘,數十步之遙,好易搵。依個星光水火海上大匯演,原來都耗資咗數百萬坡元,佢係以海上夢幻嘅實景(佇立晌海灘邊嘅一排小木屋),加以真人歌劇形式,再配合激光鐳射、水幕電影、電腦動畫、水柱舞動、燈光變幻、煙火特效、動感音樂嚟營造出令人嘆為觀止嘅舞台效果。收SGD10一位(標準座),真係值回票價,佢仲有一款高級座(Premium Seats),收SGD15,只係獨立座椅有得挨,個人覺得無必要買貴飛,除非閣下無腰骨啦,哈哈!

其實個故事好簡單,好童話,就係一個男仔點樣以其天籟之音嘅歌聲解救咗被禁錮嘅公主,就算英文聆聽水皮如我,唔知佢哋唱乜,唔知啲動畫講乜,都大意明佢哋做緊乜,最重要係欣賞到佢哋營造出嚟嘅各種效果

最可惜係小弟部DC仔能力有限,影唔到咩靚相,就算拍咗段短片都係得一小部份,不過,晌youtube大鬼把海之頌嘅影片,網上同樣大把精彩靚相添。當然,現場睇絕對感受唔同,值得捧場

參觀時段: 晚間
入場價錢: 每人10新加坡元
評分: 值得去5  
由英比奧捷運站一出,就係魚尾獅廣場。
由英比奧捷運站一出,就係魚尾獅廣場。
高37米,發晒青光嘅魚尾獅塔。
高37米,發晒青光嘅魚尾獅塔。
過咗魚尾獅塔,就係一段魚尾獅小徑,鋪滿馬賽克藝術。
過咗魚尾獅塔,就係一段魚尾獅小徑,鋪滿馬賽克藝術。
以馬賽克砌出嘅水池,水池仲要噴出水柱。
以馬賽克砌出嘅水池,水池仲要噴出水柱。
所有造型都係想表達出水底世界嘅奇形怪狀。
所有造型都係想表達出水底世界嘅奇形怪狀。
魚尾獅小徑嘅盡頭,係一啲小燈飾。
魚尾獅小徑嘅盡頭,係一啲小燈飾。
從魚尾獅小徑盡頭望向海灘捷運站,真係夜闌人靜。
從魚尾獅小徑盡頭望向海灘捷運站,真係夜闌人靜。

之前都有提過星洲仲有一條魚尾獅晌聖淘沙,就晌英比奧捷運站(Imbiah Station)前方,由英比奧捷運站一出,就係魚尾獅廣場,向海灘方向一望,就會見到聳立著高37米嘅魚尾獅塔。依條魚尾獅同市區見到嗰條好唔同,第一,係比市中心嘅高好多;第二,遊覽魚尾獅塔並唔限於晌外面齋睇,仲可以俾錢入去內籠,上到第9層,從魚尾獅個口睇番聖淘沙四周景色。

因為已入夜,俾你上到去都無嘢好睇,海灘嗰邊周圍更一片漆黑,所以我哋無入魚尾獅塔。反而過咗塔後,原來有一條長120米嘅魚尾獅小徑(Merlion Walk),小徑中央係一個又一個大小不一嘅水池連住,全部以馬賽克鋪成,奇形怪狀,色彩繽紛,似係要表達出水底世界嘅奇趣。偶有水柱噴出,都幾「過制」,如果早知有處咁嘅地方,就日頭過嚟行陣先,影相出嚟都靚啲丫嘛

夜闌人靜,兩公婆散散步,曬吓月光,都唔知幾爽,晌香港真係奢侈小玩兒呀,有幾何咁有細藝飽飯後落街散散步架!

參觀時段: 晚間
入場價錢: 每人8新加坡元
評分: 值得去3  
  0 個留言    |  加入你的留言
新加坡優休悠遊 (新加坡)
(旅程日期: 2011-09-13 至 2011-09-16 ,  旅程性質: 觀光攝影, 消閒度假)
 整個旅程  (共4篇遊記)
 分享至Facebook 
發表日期: 2012-02-07

今日新加坡天氣好反常,可以好好天,出猛太陽,又可以傾盆大雨,好似打風咁。

尋晚玩夜咗,所以今朝晏咗啲起身。朝早打算去牛車水,所以就諗住去附近丹戎巴葛區嘅亞坤咖央吐司咖啡店(21 Tanjong Pagar Road)食咖央多、嚐半生熟雞蛋,唔知係書嘅資料出錯,定係人哋搬咗,白行一趟。繼而轉去就近嘅麥士維熟食中心一餐過食早午餐。

餐後,就逛安祥山、牛車水,算係到此一遊,作為華人點都要去當地嘅唐人街兜個轉嘅。牛車水有條史密斯街,其實係條食街,不過,時間尚早,一檔都無開,無緣一試。下午,就去新加坡植物園,為嘅係內裡嘅國家胡姬花園(國家蘭花園),依個係老婆指定想去,因為佢有同事講裡面有好多唔同品種嘅蘭花,而且好靚,睇花影相,我都OK嘅。最終我哋兩個晌裡面逗留咗成3個幾鐘,一來我哋猛咁影相(老婆嗰時學緊影相),二來又要避雨(落咗一場細雨,一場大雨),所以先搞咁耐!

夜晚計劃咗去Night Safari,所以,去完新加坡植物園,就返番去烏節路嗰邊,晌ION Orchard嘅美食廣場食晚飯,然後再地鐵轉巴士入去Night Safari。正諗住晏晝落咗兩場雨,雨過天清,出返晒太陽,點知去Night Safari嘅巴士車途中,突然傾盆大雨得好緊要,去到Night Safari都仲落緊。去買飛入場時,個服務員有個溫馨提示,話啱啱落完大雨,園內嘅動物可能「咪」埋晒,會比正常情況下少好多嘢睇,甚至無乜動物睇到,被佢咁樣兇一兇,又真係被佢兇到,就決定原路走,逛陣商場返酒店休息算數!

好似返咗去香港嘅屋村咁
好似返咗去香港嘅屋村咁
角落仲有檔果欄,好鬼有親切感。
角落仲有檔果欄,好鬼有親切感。
出咗丹戎巴葛坊,見到好多色彩鮮明嘅戰前舊樓,好有南洋風。
出咗丹戎巴葛坊,見到好多色彩鮮明嘅戰前舊樓,好有南洋風。
好多樓下都成為商鋪或食肆
好多樓下都成為商鋪或食肆
戰前舊屋,都變成酒廊、酒吧同卡拉OK喇!
戰前舊屋,都變成酒廊、酒吧同卡拉OK喇!

基本上依個唔係一個景點,更唔係我哋行程嘅一部份,只係要去搵亞坤咖央吐司咖啡店,所以晌MRT (EW15站)出,順路經過依度。

但當嚟到依度,好鬼有親切感,簡直好似返咗去香港嘅屋村咁。無論環境同人,親切到不得了,啲樓嘅格局,好似我哋啲公屋,上面住人,下面有啲街市同商鋪,再入面有停車場,周圍又聽到好多廣東話對話,同聲同氣

搵唔成亞坤,就去麥士維熟食中心,出咗丹戎巴葛坊,見有好多矮矮細細、色彩鮮明嘅南洋古屋,不過,依家都變咗一排排嘅酒廊、酒吧同卡拉OK,但仍舊保留著二戰前優雅嘅形貌

參觀時段: 早上
入場價錢: 每人0新加坡元
評分: 值得去2  
麥士維熟食中心外觀
麥士維熟食中心外觀
雖然無冷氣,但環境都通爽。
雖然無冷氣,但環境都通爽。
炎記 - 招牌乾撈麵線
炎記 - 招牌乾撈麵線
福海(芳林) - 咖喱雞粗米粉
福海(芳林) - 咖喱雞粗米粉
東陵 - 酥皮咖喱角
東陵 - 酥皮咖喱角
848 Fruit Juice - 鮮榨果汁
848 Fruit Juice - 鮮榨果汁
左上角最大杯就係榴槤牛奶,超正!
左上角最大杯就係榴槤牛奶,超正!
咖喱雞粗米粉值得推介
咖喱雞粗米粉值得推介

麥士維熟食中心位處牛車水邊陲,離地鐵站有少少遠,但唔難搵嘅。佢係由菜市場改建而成嘅,所以都幾大,庭位排列都幾闊落,樓底好高,都幾通爽,至今都有成20多年歷史喇。而由於近牛車水,即係唐人街,所以食物較多偏向中國色彩。雖然係咁,但都好受當地人歡迎!

我哋一共試咗4檔嘢,有麵線、米粉、咖喱角同凍飲,樣樣都係一、兩蚊,兩、三蚊坡幣,唔貴唔貴。

炎記 - 招牌乾撈麵線SGD3
同佢晌檔口打出嚟嘅相有段距離,碗乾撈麵線唔係好大碗,加咗啲無乜味嘅肉碎、江魚仔(脆魚乾),淋上啲醬油,另加跟一碗清湯、4粒魚圓(魚蛋),整體味道一般。

福海(芳林)- 咖喱雞粗米粉SGD3
晌佢檔口放有一大盆滾住滾住嘅咖喱,所以,吸引到我去幫襯。可以配白飯、油麵、粗米粉(米線)、幼米粉,而咖喱內有雞肉、豆卜、薯仔同豆腐。咖喱味道濃郁,帶有好香椰奶味,有層次唔單調,好食!除咗咖喱雞,福海仲有叉燒賣,招牌就係蜜汁叉燒麵。

東陵 - 酥皮咖喱角SGD1.4
東陵獨賣3樣嘢:雞肉咖喱角、沙丁咖喱角、芋泥角,我哋見佢啲咖喱角大大隻,就買咗一隻雞肉咖喱角試吓,原來裡面唔只雞肉,仲有蛋,都幾得意,加上以酥皮包裹,形狀有別於我哋食開三角形嘅咖喱角,而係有啲似過年食嘅角仔咁,酥皮唔算好鬆脆,還可以啦!

848 Fruit Juice - 榴槤牛奶 SGD$2.5、蘋果百果香汁 SGD $2.5
新加坡無乜天然資源,好多物資都係由馬來西亞運嚟,嗰邊嘅物價又相對平喎,所以依類鮮榨即做嘅生果飲品都好抵飲。我要咗杯榴槤牛奶,好鬼大杯,成公升咁滯,夠晒冰凍,而且口感滑,榴槤味十足,貨真價實,正呀!老婆嘅係蘋果百果香汁,百果香即係我哋叫開嘅熱情果,比起我杯就細杯好多,百果香酸酸咪,加上蘋果嘅甜,飲落感覺好清爽,夏天飲好啱

推介菜式: 福海(芳林)咖喱雞粗米粉, 榴槤牛奶
每人消費: 約6.2新加坡元 (午餐)
評分: 味道4   服務3   環境3   衛生4   抵食5
Ann Siang Hill 安祥山
Ann Siang Hill 安祥山
環境悠然寧靜
環境悠然寧靜
建築物大都保留著原有特色
建築物大都保留著原有特色
處處都係頗具南洋風情嘅建築
處處都係頗具南洋風情嘅建築
古舊樓房現已改建成餐廳
古舊樓房現已改建成餐廳

晌麥士維熟食中心後面兜上去,就係安祥山。其實安祥山係由幾條街組成:Ann Siang Hill、Ann Siang Road、Club Street,整條街都係幾十年歷史嘅古舊樓房,有啲仲頗具南洋風情嘅建築,外表雖古老,內裏卻新潮,五顏六色嘅建築物內,早已被翻新成為一家家充滿潮味嘅型格個性小店,有賣傢俬、時裝、婚紗、書本,甚至Café都有,早已成為當地年輕潮人嘅蒲點

安祥山位屬牛車水,原本稱為史各士山,百多年前由嚟自馬六甲地主富商謝安祥買入依片小山丘,遂改名為安祥山。依家所見嘅房屋,大部分都係晌1903 - 1941年間建成,當中最有歷史價值係晌Club Street嘅76號屋,建於1891年,當時係有錢商人嘅俱樂部,現在已改建成餐廳。

雖然位處牛車水附近,但感覺就好唔同,無咁商業味重,環境亦都較寧靜。如去開麥士維熟食中心、牛車水,不妨到來逛逛欣賞地道嘅新加坡設計

參觀時段: 下午
入場價錢: 每人0新加坡元
評分: 值得去2  
牛車水、安祥山一街之隔!
牛車水、安祥山一街之隔!
史密斯街(食街)
史密斯街(食街)
上層五顏六色、南洋風情嘅建築,非常搶眼!
上層五顏六色、南洋風情嘅建築,非常搶眼!
牛車水跳蚤市場,就好似去咗女人街咁!
牛車水跳蚤市場,就好似去咗女人街咁!
牛車水原貌館
牛車水原貌館
時值中秋,好多燈籠裝飾。
時值中秋,好多燈籠裝飾。

牛車水係新加坡著名嘅唐人街,亦係新加坡著名旅遊景點之一,MRT設有牛車水站(NE4),一出就係牛車水,所以,嚟依度非常方便。

「牛車水」名字嘅由來,係由於早期當地居民每日都用牛車來運載用水,久而久之依處就取名為「牛車水」。由1821年開始,已開始有華人晌度聚居,足足近兩百年歷史,保留咗豐富嘅華人歷史同文化,從小巷中,可以搵到各式各樣傳統嘅手工藝品,如書法、雕刻、木偶……等,當然向香港長大嘅我哋,對依啲嘢就唔會有太大好奇;別以為牛車水只係老套古舊嘅地方,其實近10年都有唔少新式型格小店進駐,為該地注入創意同活力,正正係度結集咗新舊文化

牛車水內,仲有條史密斯街(Smith Street),係一條露天美食街,街道兩旁建築全都改為餐館,再加上十多檔路邊攤,美食應有盡有,讓人可以晌處品嚐美味嘅本地小食。可惜,我中午去到,只有少許餐館有營業,而路邊攤就一檔都未開,所以,「不時不食」嚟唔啱時間就未有得食。

此外,出名嘅星洲牛肉乾鋪「李志源」、「美珍香」,晌牛車水都有分店,可以買啲當手信!

參觀時段: 下午
入場價錢: 每人0新加坡元
評分: 值得去3  
新加坡植物園正門
新加坡植物園正門
園內有很多雕塑
園內有很多雕塑
天鵝湖
天鵝湖
薑園
薑園
棕櫚谷
棕櫚谷
熱帶雨林嘅入口
熱帶雨林嘅入口

睇慣咗城市嘅繁華景象,不妨走進新加坡植物園,逛熱帶雨林,賞花卉美態,野餐於草坪上,可以係一件賞心樂事。如果你係個鍾意「拈花惹草」嘅人,又鍾意玩攝影,依度就啱晒你喇

1860年興建嘅新加坡植物園,佔地成52公頃,可想而知有幾大。園內精心佈局下,分別有3個湖泊(天鵝湖、交響樂湖、生態湖)同多個主題部份(植物學中心、薑園、國家蘭花園、棕櫚谷、熱帶雨林、進化花園、生態花園、積格巴拉斯兒童花園……),非常多元化嘅一個城市綠洲,上上佢個網址就可詳細了解其中。要行勻晒都幾花時間,我同老婆都係行咗一半都未夠,已用咗幾個鐘,當然,因為我哋行得hea,又猛咁影相,尤其晌國家蘭花園,影唔停,所以先至行咗咁少地方啫。

沿棕櫚谷(Palm Valley)向下行落去,有個交響樂表演台(Symphomy Stage),遇啱時間,仲可以欣賞到新加坡交響樂團同新加坡華樂團嘅表演,費用全免。另外,熱帶雨林(Rain Forest)又係值得一逛,因為依幾片原始叢林留有高大嘅熱帶雨林樹木、新加坡原木材嘅樹木,感覺幾獨特。

如果係親子遊,可以帶佢哋去一去積格巴拉斯兒童花園(Jacob Ballas Children's Garden),嗰度有遊樂區、遊樂場、樹屋、滑梯、迷宮,又有唔少具啟發性、互動性嘅設施令細路仔明白大自然運作嘅知識,介紹光合作用嘅原理、製成咖啡、茶、可可嘅各種植物,頗為有趣

參觀時段: 下午
入場價錢: 每人0新加坡元
評分: 值得去3  
國家胡姬花園入口廳
國家胡姬花園入口廳
國家胡姬花園位置圖
國家胡姬花園位置圖
仙鶴噴泉
仙鶴噴泉
「霧室」裡一角
「霧室」裡一角

國家胡姬花園(國家蘭花園)係晌新加坡植物園內其中一個主題花園,亦係園內唯一一個要俾入場費嘅設施。

胡姬花係新加坡嘅國花,園內除了國花品種卓錦萬黛蘭外,還有超過1,000種純種胡姬花、2,000種配種胡姬花,不少更以世界名人命名,園內每年仍繼續培育出更多高質嘅配種胡姬!除胡姬花外,園內仲有瀑布、噴泉,令整體嘅設計更互相配合

同樣,胡姬花園都劃分咗好多分區,區區都有特色,如仙鶴噴泉、純種胡姬區、鳳梨科展覽室、貴賓胡姬園、霧室、冷凍室……等等!

參觀時段: 下午
入場價錢: 每人5新加坡元
評分: 值得去4  
Food Opera @Ion Orchard 入口處
Food Opera @Ion Orchard 入口處
人多起上嚟應該幾擠迫
人多起上嚟應該幾擠迫
印尼燒烤
印尼燒烤
套餐SGD5.5 - 8.0,價錢都OK啦!
套餐SGD5.5 - 8.0,價錢都OK啦!
烤雞套餐
烤雞套餐
永馨
永馨
蠔煎,比較油!
蠔煎,比較油!
臨走買多個Butterfly Bun,驚夜啲晌Night Safari肚餓。
臨走買多個Butterfly Bun,驚夜啲晌Night Safari肚餓。

新加坡嘅烏節路係著名遊客購物區,不過我倆公婆唔好買嘢,所以無安排嚟烏節路,只係當時去新加坡植物園嘅MRT (CC19) 仍未開通,要去MRT烏節路站再轉巴士先去到,故此回程都係要返去烏節路嗰邊先。

由於稍後要去Night Safari,所以就晌ION Orchard嘅美食廣場Food Opera食完嘢先出發,時間好用啲。由於時間仲早,都係5:30pm左右,個肚未算好餓,就叫了一碟烤雞飯同一個蠔煎就算,叫做有嘢到肚。

印尼燒烤
顧名思義,就係賣印尼燒烤,主菜離不開烤雞、咖喱雞、炸雞、烤魚、烤魷魚(佢哋叫烤蘇東,如果唔係睇番英文,睇中文反而唔明添哈哈!),共5款。可以散叫淨餸,SGD3.5 – 4.0,跟飯跟蛋成套餐,單選SGD5.5 – 6.0,雙拼就SGD7.5 – 8.0。

我哋要咗個烤雞飯套餐 (SGD5.5),烤雞好大件,淋上香濃醬油,味道非常惹味,而白飯又淋咗印尼咖喱,香而不辣,帶有稍重嘅香料同椰奶味;伴菜仲有片煎蛋角,加碗清湯,都唔錯喎!

永馨
依一檔賣炒福建麵、炒粿條、蘿蔔糕、蠔煎,我哋就要咗一份蠔煎 (SGD6.5),望落都幾大份,但蠔唔多,唔係好值,而且口感比較油

臨走晌迎門口位檔西得利買多個Butterfly Bun (SGD1.0個架),類似煎堆,炸嘅包,外形少少蝴蝶狀,買嚟係驚夜啲晌Night Safari肚餓啫。

ION Orchard係個8層高嘅大型購物中心,有新加坡嘅六本木山之稱,有不少國際名牌旗艦店進駐,更雲集咗唔少年輕潮流及生活品味嘅商戶,餐廳食肆又遍布各樓層,有國際知名嘅,有本地風味嘅,算係應有盡有。成個商場可謂集時裝、生活、娛樂、餐飲同藝術於一身,不過,都係嗰句,我哋唔好行商場,但如果你係鍾意買嘢就應該過嚟行吓喇

推介菜式: 印尼燒烤
每人消費: 約6新加坡元 (晚餐)
評分: 味道3   服務3   環境3   衛生4   抵食4
  2 個留言    |  加入你的留言
新加坡優休悠遊 (新加坡)
(旅程日期: 2011-09-13 至 2011-09-16 ,  旅程性質: 觀光攝影, 消閒度假)
 整個旅程  (共4篇遊記)
 分享至Facebook 
發表日期: 2012-02-05

成日聽人講去新加坡好悶,都係大城市一個,同香港差唔多啫,留3日都嫌多呀!不過,晌籌備依轉獅城之旅,發覺都有幾多地方想去,因為想玩得輕鬆、休悠,所以原先係計劃咗去5日,機票、酒店都一早搞好晒。不過,由於有個親友突然離世,守夜正正係回程嗰晚,所以行程縮短改早一日返,幸得老婆體諒兼配合。雖然好多安排打亂咗,但都只屬小事!

一早打算獅城係趟休悠之旅,所以行程安排得好寬鬆,去得幾多就睇幾多,一切以休悠為優先,故此個旅程名稱幫佢改咗叫「新加坡優休悠遊」。

由於中午機,9:00am到機場登記、行李寄倉,再晌機場Traveller lounge嘆早餐。12:15pm起飛,首次搭HK Airlines嘅機(Airbus 330),機上餐飲、服務,感覺唔錯,又有獨立視聽系統,睇齣尊尼特普配音嘅卡通馬拉高,好快(3:30pm)就到咗新加坡樟宜機場。

搭MRT(新加坡地鐵)先到酒店Hotel 81 Lucky安頓,小休後就出動喇。第一站係海濱區嘅濱海藝術中心、海濱長廊、新加坡河;再晌濱海藝術中心側嘅Makansutra大排檔食黑胡椒蟹、沙嗲……等。飽餐過後,再過橋遊魚尾獅公園,順新加坡河去埋碼頭區同酒吧街,今晚玩夜咗,差唔多成12:00mn先返到酒店。

大堂內一啲藝術展品
大堂內一啲藝術展品
晌魚尾獅公園望返過去濱海藝術中心
晌魚尾獅公園望返過去濱海藝術中心

依個大榴槤無咩臭味,但就好有藝術氣味。作為星州嘅第一個景點,無話刻意揀依度,純粹近Makansutra大牌檔同魚尾獅公園。

2002年落成嘅濱海藝術中心,佔地成6公頃,外形設計非常獨特,真係十足十一個大榴槤,由頭到尾起晒釘,原來係由7,000多塊鋁製三角形遮光罩組成,確係別樹一格,當地人都統稱叫依度做「榴槤」,正名都好少人講架喇。入夜之後著晒燈仲靚,無論近影定晌對面岸影番轉頭,都好靚吓

「榴槤」好似我哋香港嘅文化中心咁,內裡有音樂廳、大劇院、小劇場、藝術圖書館、購物中心及餐廳同一啲戶外表演場地,成為集文娛、購物、餐飲、娛樂於一身嘅綜合性建築

參觀時段: 下午
入場價錢: 每人0新加坡元
評分: 值得去3  
新加坡河旁兩邊都有海濱長廊
新加坡河旁兩邊都有海濱長廊
從濱海藝術中心對出嘅海濱長廊望去金沙綜合娛樂城
從濱海藝術中心對出嘅海濱長廊望去金沙綜合娛樂城
金沙綜合娛樂城到8:00pm就有激光表演
金沙綜合娛樂城到8:00pm就有激光表演
附近嘅商業樓群
附近嘅商業樓群
新加坡河旁嘅食店,多數賣海鮮!
新加坡河旁嘅食店,多數賣海鮮!
沿河一段嘅酒吧街,外國人較多。
沿河一段嘅酒吧街,外國人較多。

貫穿於整個城市嘅新加坡河橫跨好多區,河嘅兩旁有海濱長廊,亦有好多不同嘅新舊建築同地標建築。想輕輕鬆鬆暢遊整條河,搭由傳統駁船改裝而成嘅遊覽船,嚟個Singapore River Cruise,歷時約30分鐘,可一次過飽覽晒河畔兩岸景致。唔嫌辛苦少少,晚上晌度散步都幾爽。河嘅盡頭就出到海濱區,就見到濱海藝術中心、魚尾獅公園、摩天輪、金沙綜合娛樂城……等等。

如往入行,去到碼頭區(The Quays Area),見到由貨倉改成嘅娛樂場所,有餐廳、酒吧、零售商店,有著熱熱鬧鬧多樣化嘅夜生活。

參觀時段: 晚間
入場價錢: 每人0新加坡元
評分: 值得去3  
大大個招牌好易認
大大個招牌好易認
依晚啱啱落咗場雨,所以露天位濕晒兼無人坐!
依晚啱啱落咗場雨,所以露天位濕晒兼無人坐!
一邊大牌檔,一邊就係座位,環境算乾淨企理!
一邊大牌檔,一邊就係座位,環境算乾淨企理!
幫襯買黑胡椒蟹嘅水安煮炒
幫襯買黑胡椒蟹嘅水安煮炒
幫襯買沙嗲嘅Alhambra Padang
幫襯買沙嗲嘅Alhambra Padang
黑胡椒蟹
黑胡椒蟹
The Gluttons Bar嘅檸檬甘蔗汁(前$2.3)、洋桃西芹汁(後$3)
The Gluttons Bar嘅檸檬甘蔗汁(前$2.3)、洋桃西芹汁(後$3)

晌新加坡嘅第一餐必然試一試佢哋出名嘅黑胡椒蟹,正正濱海藝術中心隔離,就有一個露天熟食中心「makansutra gluttons bay」,其實星洲仲保留好多熟食大牌檔,除咗係當地嘅飲食文化,亦已經成為旅遊景點添,就好似台灣嘅夜市咁。

Makansutra大概有十來檔大牌檔左右,規模唔算大,但都已包括多款地道美食,如叻沙、炒貴刁、沙嗲串燒、炭燒雞翼、煎蛋蘿蔔糕、咖吷多士、新鮮螄蚶……。

大牌檔坐落海邊,並且以露天茶座為設計,晚間涼風陣陣,通爽非常,雖然係盛夏,但都覺得頗涼快。本來我貼老婆都揀咗露天木條長凳,但突然整咗場雨,就只好揀番啲有瓦遮頭(有太陽傘)嘅膠凳位,感覺係差少少。

食物分別試咗3檔嘢,包括「水安煮炒」嘅黑胡椒蟹、「Alhambra Padang」嘅沙嗲、「The Gluttons Bar」嘅檸檬甘蔗汁、洋桃西芹汁。

黑胡椒蟹SGD28
一份有兩隻蟹,不過咁嘅價位,你都知無可能係斯里蘭卡蟹架喇(厚肉又大隻好多),老闆亦有講明係本地蟹,勝在新鮮肉甜,而且檔前有晒「樣板」,童叟無斯欺。雖然隻蟹無咁有肉地,但正如老闆所講,肉質非常之鮮甜,而且黑胡椒炒得好香好惹味,食到要吮晒手指先罷休

牛肉、雞肉沙嗲SGD7.5
可以單點,我就要雙拼。一客有成8串,牛肉、雞肉各半,肉嫩有碳火香,靈魂在於兜沙嗲醬,成碗仔一大兜,絕對夠你啖啖肉都醮足沙嗲,最重要係濃稠度啱啱好,又有花生香,好味道!唯一唔OK係啲伴菜,好似啲米糕咁,無味,軟軟爛爛,口感較差啫

檸檬甘蔗汁(SGD$2.3)、洋桃西芹汁(SGD$3)
新鮮即榨,配搭又夠特別,難得唔會溝到不倫不類,而且夠晒冰凍,真係辣住食蟹,凍住解渴,爽呀!

每人消費: 約20.4新加坡元 (晚餐)
評分: 味道4   服務3   環境4   衛生4   抵食4
晌魚尾獅附近嘅The Fullerton Hotel,甚有氣派。
晌魚尾獅附近嘅The Fullerton Hotel,甚有氣派。

雖然老套,座落晌新加坡河口嘅魚尾獅雕像,始終都係獅城必看地標,唔嚟嘅話有啲啲枉然嘅感覺。查實依家新加坡共有3座魚尾獅,第一座魚尾獅雕像(高8.6米,重70噸),就即係依座;第二座(高2米,重3噸)嘅小型魚尾獅雕像,都係魚尾獅公園,就晌條大嘅魚尾獅後面;至於第三座(高37米)嘅巨型魚尾獅雕像座落晌聖淘沙島之上。

魚尾獅係一種虛構嘅魚身獅頭動物,據說魚尾獅頭嘅設計靈感來自關於新加坡歷史嘅一個傳說。根據《馬來紀年》嘅記載,公元11世紀時一位來自「三佛齊王國」名叫聖尼羅烏達瑪嘅王子,在前往馬六甲嘅途中來到新加坡。他一登陸就看到一隻神奇嘅野獸,隨從話俾佢知係一隻獅子。佢於是為新加坡取名為「新加坡拉」(Singapura,在梵文中意即「獅子城」)。而魚尾則因為新加坡係一個海島,她嘅一切都跟海密切相關。信不信由你喇!反正我信,哈哈

參觀時段: 晚間
入場價錢: 每人0新加坡元
評分: 值得去3  
酒店外觀
酒店外觀
酒店迷你大堂
酒店迷你大堂
絕對係兩星標準!
絕對係兩星標準!
酒店附近有好多食肆小店
酒店附近有好多食肆小店

當開始預備搵酒店時,真係覺得新加坡啲物價幾貴吓。偶然發現有啲平價嘅鏈鎖酒店,屬二、三星級,低價格真係平到暈,經一輪參考網上嘅評語同資料,就決定膽粗粗試吓Hotel 81 Lucky。

酒店位處芽籠區,環境就好似返咗去深水埗咁,平民化啲,而酒店離地鐵EW9站唔遠,約5-10分鐘步程,附近有很多街坊食肆。而從酒店去機場或市中心,搭地鐵非常之方便。所以,地點都幾OK架。

唯一唔好嘅,係附近有啲紅燈區。晚間確實有比較多流鶯,閒雜人也較多,但治安感覺都算良好,啲人都唔會理你、兜撘你,個人覺得就算係女仔入住,只要唔係一個人,有得三幾個,也可以考慮!如果你行過旺角嘅砵蘭街都唔怕,依度都應該無咩問題喇

上到房,第一時間睇下咩環境,簡單嚟講,整潔無異味,只係櫃比較少,焗住要把行李雜物放晌地上,幸好地板係木地板,感覺較地毯乾淨。洗手間掛勾亦太少,沖涼時掛衫有啲唔方便。牙刷有提供嘅,不過係無牙膏,原來牙膏已附晌牙刷之上,即係真真正正嘅「一次性」牙刷。整體而言,幾百蚊瞓一晚,可算為慳錢整潔之選。頭幾日就慳住少少先,留番最尾一晚先晌聖淘沙住得正啲!

每晚價錢: 388港元 (雙人房)
評分: 設備3   服務3   環境3   衛生3   抵住4
  0 個留言    |  加入你的留言
輕裝飲食逛馬交 (中國)
(旅程日期: 2011-07-01 至 2011-07-02 ,  旅程性質: 觀光攝影, 飲食購物, 消閒度假)
 整個旅程  (共2篇遊記)
 分享至Facebook 
發表日期: 2012-02-05

Hard Rock Hotel啲房真係幾好住,房內空間感十足,床褥、綿被都好舒服,雖然無發個甜蜜美夢,但就瞓得夠晒「淋」,所以,大清早起身之後,見出面陽光普照,就落去泳池游個早水。

之後就返房小休,收拾細軟,退房寄存行李。去氹仔大利來記食豬扒包、篤魚蛋作為早午餐,跟住再去石排灣郊野公園探探熊貓“開開、心心”,然後再落路環逛逛,晌海堤旁睇睇書、望望對面珠海嘅風車群,再嚟就去安德魯花園咖啡餐廳食個下午茶充充飢

訂咗飛睇5:00pm場次太陽劇團嘅ZAiA,而銀河又啱啱落成無耐,所以就趁仲有少少時間,先晌銀河打個轉攝一攝時間,跟手行番過威尼斯人睇表演,果然精彩。睇完之後,晌威尼斯人個運河商場行吓、抖吓、食吓嘢(food court),8:00pm左右返Hard Rock Hotel拎行李,再坐免費穿梭巴出氹仔碼頭,9:00pm夜船返香港,輕鬆愉快咁結束兩日馬交之旅!

泳池環境一角
泳池環境一角
人造沙灘+籐椅+太陽傘=渡假風情
人造沙灘+籐椅+太陽傘=渡假風情
泳池邊浸晌水中嘅籐椅,遠方係poolside bar。
泳池邊浸晌水中嘅籐椅,遠方係poolside bar。
大型按摩池,水力強勁,爽呀!
大型按摩池,水力強勁,爽呀!
池邊仲有間露天餐廳Wave Pool Bar & Grill,夜晚有BBQ Buffet提供添!
池邊仲有間露天餐廳Wave Pool Bar & Grill,夜晚有BBQ Buffet提供添!

以往好少花時間晌酒店啲設施上,酒店只係俾小弟瞓一覺嘅地方,但既然今次係輕鬆自由行,就要玩得輕鬆舒暢,唔好為景點趕趕趕,尋晚又瞓得咁好,就晌酒店游個早水,真係好彩有落一落嚟咋,如果唔係就走寶。

Hard Rock個泳池唔係標準嗰款直身長方形嘅泳池,係好休閒、好渡假感嘅一個圓形小泳池。泳池設計好特別,水深係分兩層,中間係較深嘅部份,不過都係1.2-1.3M左右,供人游水,加埋一啲吹氣道具,啱晒細路仔;外圍圓週就只得0.2M左右淺,但放滿晒籐椅,曬住太陽又輕軾浸住水,感覺真係好爽。此外,泳池一邊仲有個人造沙灘,同樣放有好多籐椅同太陽傘;另一邊就有個沙灘排球場,如果識打排球可以晌度一展身手。而且,泳池尾還有個poolside bar,坐晌籐椅嘆杯嘢又得,直情坐住吧位對開水池中嘅石凳都得。可惜晨咁早,未有服務提供。

游完水都仲有嘢玩,就係泳池隔離有個大型按摩池,衝擊力強勁,池水係熱嘅,被佢「衝擊」一陣,真係消除到肌肉嘅繃緊,最可惜係依家先發現,如果早知,尋晚已經預番早少少時間返酒店「衝擊」下!

每晚價錢: 0澳門元 (雙人房)
評分: 設備4   服務4   環境4   衛生4   抵住4
唔算多人,都易搵到位!
唔算多人,都易搵到位!
大利來記嘅「名物」餐牌
大利來記嘅「名物」餐牌
最新推介??
最新推介??
差唔多成舊水嘅早午餐
差唔多成舊水嘅早午餐
豬扒甜餐包 MOP20
豬扒甜餐包 MOP20
豬扒菠蘿包 MOP20
豬扒菠蘿包 MOP20
金皇蜂青檸柑桔蜜 MOP20、凍啡 MOP13
金皇蜂青檸柑桔蜜 MOP20、凍啡 MOP13

上次行色匆匆,嚟到大利來記見超長人龍,就無試。今次住得咁近,當然要嚟會一會佢啦,其實睇食評都知到佢劣評如潮,但唔試過又唔心息,就等小弟犯賤下啦!

差唔多11:00am嚟到,唔算多人,同當日嘅超長人龍不可同日而語。瞄瞄餐牌,就晌推介嗰張餐牌度揀晒。因為招牌硬豬仔包要晏晝3:00pm先有,所以就點咗豬扒菠蘿包、豬扒甜餐包、一份咖喱魚蛋、一杯凍啡同一杯青檸柑桔蜜,一共MOP95,感覺有啲貴。

豬扒菠蘿包 MOP20、豬扒甜餐包 MOP20
豬扒菠蘿包同豬扒甜餐包係佢哋嘅新推介,有個疑問,究竟佢哋有無試過依個配搭呢?其實,個包都幾大個,豬扒肉質鬆軟又醃得入味,煎得都幾香,但係一夾埋個包一齊食,無論係菠蘿包,抑或甜餐包,包嘅甜味同豬扒嘅鹹香,係絕對唔襯囉!加上依兩款包係軟身包,一「扲」就會扁晒,唔曉得彈番起,尤其菠蘿包更甚,好影響口感,因為件豬扒都要用少少力咬,結果就一咬包身扁埋變咗糰粉!

咖喱魚蛋 MOP22
一客有8粒魚蛋,個人覺得好普通咋喎,魚蛋唔算話好差,只係無咩亮點,無話好彈牙,又無話好有魚味,總之就係普通啦!咖喱,講到係秘製,散買仲收到MOP80樽,小弟只係覺得有咖喱味,但無層次嘅香啫。

凍啡 MOP13、金皇蜂青檸柑桔蜜 MOP20
睇人寫佢無禮貌都略知一二,今次招呼就無乜嘢。相反,杯青檸柑桔蜜收到成MOP20,勁俾足料呀,老婆話第一口飲落,真係甜到爆,飲幾啖再叫人加番啲水溝溝先易入口。

每人消費: 約47澳門元 (早餐)
評分: 味道2   服務1   環境2   衛生3   抵食2
大熊貓館外觀,入面係冷氣開放,炎夏入去幾爽!
大熊貓館外觀,入面係冷氣開放,炎夏入去幾爽!
部份動物(獮猴)
部份動物(獮猴)
藥用植物園
藥用植物園
澳門大熊貓禮品館,有好多可愛嘅熊貓公仔同紀念品架,無買都入去睇下。
澳門大熊貓禮品館,有好多可愛嘅熊貓公仔同紀念品架,無買都入去睇下。

我同太太都鍾意大自然景色多過金雕玉砌嘅景點,所以,就特別揀咗過嚟澳門第一個郊野公園「石排灣郊野公園」行吓,呼吸吓多點新鮮空氣

由氹仔過嚟好快,搭巴士幾個站就到。面積雖則話約20公頃之大,但除非你行埋佢啲山徑,否則主打動植物公園部分唔係好大,個幾鐘都行晒

園內設施都幾多樣化,有動物園(鴕鳥、山羊、獮猴、天鵝…)、趣異植物園、藥用植物園、觀鳥園、土地暨自然博物館(澳門農業同自然地理嘅濃縮版介紹),梗唔少得係2011年初先開放嘅大熊貓館及大熊貓資訊中心啦。基本上,石排灣郊野公園係免費開放,但大熊貓館就收費MOP10。當然唔係好多旅客願意嘥時間嚟依啲地方,但帶有小朋友嘅,就好應該帶佢哋過嚟行吓,親親大自然喇。

參觀時段: 下午
入場價錢: 每人10澳門元
評分: 值得去3  
好hea下午茶 ok喇2012-02-05
環境有啲逼
環境有啲逼
泰式雞肉沙律 MOP42
泰式雞肉沙律 MOP42
栗子芝士餅 MOP18
栗子芝士餅 MOP18
紅蘿蔔蘋果汁 MOP18、木瓜奶昔 MOP20
紅蘿蔔蘋果汁 MOP18、木瓜奶昔 MOP20

去到路環,逛過路環市區,搵個海堤旁樹陰位睇睇書,原來都成2:30pm,係時候下午茶去,一心一意想去安德魯花園咖啡餐廳嘅,同樣目標清晰

下午茶時段唔算多人,唔使點等位就有得入。環境有啲逼,啲枱拍得無乜位行,被安排最埋牆嘅二人枱,感覺上冷氣有啲唔夠。幸好食物仍有水準,否則就要俾個喊面佢!

葡撻MOP8
依度嘅葡撻唔係即做,係附近街嘅老店做,再拎過嚟。有位落單先再放入焗爐輕輕翻熱,所以,效果應該會打咗折扣。

泰式雞肉沙律 MOP42
晌安德魯食泰式沙律,都算有少少破格啩。不過,唔好理,個泰式雞肉沙律確係正,有芹菜、青瓜、紅蔥頭、蕃茜、車厘茄,以及好多雞肉,配以魚露、酸醋,非常醒胃,啱晒今日咁大熱天時食。

木瓜奶昔 MOP20、紅蘿蔔蘋果汁 MOP18
木瓜奶昔好大杯,食唔飽都可以飲飽。雖然木瓜好夠,但質感比較水,可能加奶或雪糕加得少,而且唔夠凍,要問侍應再加加冰先OK。相反,老婆杯紅蘿蔔蘋果汁正好多,飲落紅蘿蔔同蘋果嘅味道比例50/50,好平衡,無話邊個搶邊個味!

栗子芝士餅 MOP18
咁嘅價一件芝士餅,真係好抵吓。栗子味勁重,相對地芝士味就比較薄,而且餅身口感稍為實咗啲,唔係擺得耐嗰種「硬」,覺得係魚膠落得多出嚟嗰種「實淨」,欠缺咗芝士餅一向嗰個柔軟感

每人消費: 約53澳門元 (下午茶)
評分: 味道4   服務3   環境3   衛生4   抵食3
當日5:00pm場次張飛
當日5:00pm場次張飛

之前都未有認真考慮去睇太陽劇團依個表演,但啱啱遇到佢做推廣,除VIP票價(MOP1,288),原價成人一位由MOP388-MOP788,都咪話唔平,但依家推廣價最平只係MOP188咋,足足平一半有多,但只限星期六、日5:00pm嗰一場,其實時間仲啱我啦,反而睇8:00pm場次仲要搞到好夜先返到香港,結果,睇ZAiA就成為晌澳門最後嘅娛興節目。

ZaiA(薩雅)係一個少女嘅太空旅行之夢,個故事講到好玄,雖然睇落唔太覺得啲場景同個故事好有串連(可能小弟嘅領悟力低),但當中穿插好多獨特嘅舞蹈、創意嘅動作、飛行嘅特技同一啲輕巧嘅表演,足見70多名來自世界各地演藝家嘅真功夫。再配合燈光、音效,極盡視聽享受。全個表演大概90-100分鐘,無乜冷場,都可謂值回票價,絕對值得一睇

由於掛住睇,現場又唔俾影相,所以無相提供參考,但可以去佢個網址細閱,小弟就掃描咗當日張飛以作留念!

參觀時段: 晚間
入場價錢: 每人188澳門元
評分: 值得去4  
  0 個留言    |  加入你的留言
輕裝飲食逛馬交 (中國)
(旅程日期: 2011-07-01 至 2011-07-02 ,  旅程性質: 觀光攝影, 飲食購物, 消閒度假)
 整個旅程  (共2篇遊記)
 分享至Facebook 
發表日期: 2012-02-05

難得1/7係星期五公眾假,2/7係星期六放短週,唔使請假就可以過「馬交」輕鬆嘆番兩日,兼且唔影響星期日返教會,時間啱啱好配合晒

一向太太都唔鍾意太趕,加上唔係即日來回,所以唔會晨咁早扑去碼頭趕早船。選搭12:30pm船,輕鬆晌信德食埋個早午餐先上船。

由於今趟住晌Hard Rock Hotel,所以搭金光飛航(CotaiJet)落戶氹仔就非常方便。1:40pm就到咗氹仔,搭酒店免費穿梭巴士,未夠2:00pm就到酒店,由於要3:00pm先可以攞房,故此寄存行李先,然後輕裝開始逛馬交。

講明「輕裝飲食逛馬交」,第一站就去咗瑪嘉烈試葡撻;跟住就再去澳門旅遊塔睇景嘆下午茶,講起個下午茶實在有啲驚喜,睇到詳情先再講。然後再去松山,搭一搭超短途嘅松山纜車,遊完松山市政公園,再落山兜埋二龍喉公園,再到附近嘅塔石廣場hea吓。

晚上,返到新馬路一帶,唔係去議事亭前地、大三巴……,因為以前都已經去過,走過嚟係為食好嘢,目標就係位處大堂街隱隱蔽蔽賣葡菜嘅Restaurant Escade,慢慢享受完餐晚飯先打道回府返酒店,原來都已經好夜。

長龍撻鋪 ok喇2012-02-05
除葡撻外,裡面仲有好多其他產品,如蛋糕、麵包、曲奇……
除葡撻外,裡面仲有好多其他產品,如蛋糕、麵包、曲奇……
亦有即做三文治,可揀唔同包款!
亦有即做三文治,可揀唔同包款!
葡撻之上,仲有椰子蛋糕、西梅蛋糕、薯仔布甸、紅蘿蔔蛋糕……
葡撻之上,仲有椰子蛋糕、西梅蛋糕、薯仔布甸、紅蘿蔔蛋糕……
酥皮鬆化,蛋漿軟滑!
酥皮鬆化,蛋漿軟滑!

嚟瑪嘉烈故然因為佢個名夠晌啦,雖然都唔有少劣評,但好評都佔一面倒,況且心想都只係試個葡撻啫,蝕得幾多丫

係殷皇子大馬路轉入小巷就見,好易搵,人氣即係人氣,一望已十多廿人排緊隊,但流速快,因為個個都係買一兩件嘢就走。

好老實,佢哋嘅葡撻確實唔錯。首先葡撻去得快,自己個個手接住都熱辣辣,新鮮出爐嘅已佔咗少少優勢;其次,酥皮很鬆化,咬到一袋都係酥皮碎,又好有牛油香,因為無試過安德魯嘅,無得比較;蛋心方面,好軟滑,質感有啲似食炒鮮奶咁,不過覺得有少少偏甜,而撻面嘅焦香亦拿捏得不錯。只係$8一個葡撻,著實有啲偏貴。

撻雖好,但服務態度就欠奉喇。開始排到入鋪,舉起相機已鬧定你先:「依度唔俾影相架!」。去到買嘢位,如果你遲咗少少反應,佢又話你:「想要咩,快啲講先得架!」好彩唔係晌度食餐飯對佢哋成個鐘啫。

每人消費: 約8澳門元 (下午茶)
評分: 味道3   服務2   環境3   衛生3   抵食2
塔底下笨豬跳嘅安全墊,感覺唔知有無用呢?
塔底下笨豬跳嘅安全墊,感覺唔知有無用呢?
61樓觀光層,睇人玩「空中漫步」。
61樓觀光層,睇人玩「空中漫步」。
58樓觀光層,特製玻璃地板。
58樓觀光層,特製玻璃地板。
離地223米之高,直望到地面。
離地223米之高,直望到地面。

以往都好少去啲觀光塔,難得近近哋澳門有個,加上晌油麻地旅遊見到個套票「旅遊塔下午茶套餐連58及61觀光層門票」,都係HK$120位,因為事前睇過澳門旅遊塔本身觀光門票都要成舊水,就算同樣經油麻地旅遊買,都要HK$75,所以就諗住俾多少少可以晌60樓嘅旋轉餐廳嘆吓茶

塔身最高處達338米之高,而觀光層分別晌58樓(室內觀光層223米)同61樓(室外觀光層233米)。以玻璃子彈升降機,僅1分鐘時間左右,就可以攀升到塔內主要觀光層,於觀光層可遠眺四周,飽覽澳門半島、氹仔,以至珠海,一覽無遺,今日天氣幾好,陽光充足,無霧無煙霞,所以睇景一流,賞心悅目

最有趣係晌58樓觀光層,有數段地板以特製玻璃舖設,可以直望到地面,令人有一種懸空嘅感覺,雖然明知係安全,但初時踩上去都有啲心慌慌,哈哈,老婆試咗好多次都係無唔敢踩上去。而61樓觀光層設有一系列挑戰膽量嘅冒險刺激活動:健力士世界紀錄最高的「笨豬跳」、「高飛跳」、「空中漫步」或「百步登天」,小弟年紀唔算大,都唔係好敢玩,或者有一大班老友同行壯壯膽可能唔同啲。雖然無玩,但睇人玩都多少感受到嗰份刺激同興奮

參觀時段: 下午
入場價錢: 每人120澳門元
評分: 值得去4  
「下午茶套餐」廣告牌,寫住High Tea Set,成人每位MOP148+10%。
「下午茶套餐」廣告牌,寫住High Tea Set,成人每位MOP148+10%。
環境同景觀就一流架喇
環境同景觀就一流架喇
二人份High Tea Set,好豐富呀!
二人份High Tea Set,好豐富呀!
最下層有:朱古力曲奇、紅桑莓蛋糕、芒果奶凍、迷你士多啤梨果撻、士多啤梨林明頓。
最下層有:朱古力曲奇、紅桑莓蛋糕、芒果奶凍、迷你士多啤梨果撻、士多啤梨林明頓。
中層有:迷你燒牛肉漢堡、蟹籽煙三文魚雪糕筒、迷你泡芙、壽司卷。
中層有:迷你燒牛肉漢堡、蟹籽煙三文魚雪糕筒、迷你泡芙、壽司卷。
上層係多款新鮮水果
上層係多款新鮮水果
另一碟嘅係印度烤雞、咖喱豬肉卷、炸三文魚球、奶皇糯米糍。
另一碟嘅係印度烤雞、咖喱豬肉卷、炸三文魚球、奶皇糯米糍。

初時買油麻地旅遊依個套票時,「旅遊塔下午茶套餐連58及61觀光層門票」,價錢HK$120位,個名係寫住「下午茶套餐」,加上比淨買觀光層門票俾多幾十,當期時啲食評又無乜人講過佢個下午茶套餐,所以一心諗住佢個下午茶套餐應該係一份三文治、蛋糕之類,再配杯熱飲。就算去到旅遊塔等lift時,見佢有個「下午茶套餐」廣告牌,寫住High Tea Set,有晒相,都仲係半信半疑,因為個High Tea Set成人每位就收MOP148+10%喇,我個套票邊有咁數呀

準時上到餐廳,都未係好有人。登記好,安坐,好快侍應就送上食物,依刻仲唔嘩嘩聲咩,睇到我同老婆都眼突,原來個所謂「下午茶套餐」真係廣告牌上嘅High Tea Set嚟,完全會錯意呀!更喜出望外嘅係,除三層架嘅食物外,仲額外有另一碟嘅小食同甜品。我哋俾個套票價,真係連個下午茶套餐嘅價錢都未夠啦,兩公婆都覺得抵到暈呀

無諗過個下午茶完全係兩回事,所以有少少打亂小弟部署。原先諗住食個下午茶半粒鐘內就走,但既然今日天朗氣清,又對住一大份High Tea Set,就決定慢慢嘆,由3:30pm嘆到5:00pm收場,邊食邊睇景,間餐廳慢慢轉,就鳥瞰澳門唔同景觀。

餐廳環境同景觀就一流架喇,靠窗全是4人枱,排得又唔密,絕對坐得輕鬆舒服。落地大玻璃,又身處二百多米高,景觀無遮無擋,飽覽無遺,因為樓上就係61樓室外觀光層,久唔久就見有班人玩「空中漫步」經過。

食物方面,三層食物架,分別有十多款食物,款款兩件,絕對同老婆唔使爭。最下層有:朱古力曲奇、紅桑莓蛋糕、芒果奶凍、迷你士多啤梨果撻、士多啤梨林明頓;中層有:迷你燒牛肉漢堡、蟹籽煙三文魚雪糕筒、迷你泡芙、壽司卷;而上層係多款新鮮水果;至於另一碟嘅係印度烤雞、咖喱豬肉卷、炸三文魚球、奶皇糯米糍,啡茶任斟。當中有幾樣嘢有較深印象,好似士多啤梨林明頓,中間加咗士多啤梨林果占做餡,味道鮮活咗;蟹籽煙三文魚雪糕筒,內裡加咗牛油果芝士醬,感覺濃郁;印度烤雞,香料頗入味;咖喱豬肉卷,皮薄口感鬆脆;炸三文魚球,醮咗黑白芝麻脆炸,味就層次豐富啲!相反,芒果奶凍質感較為削身;而迷你燒牛肉漢堡個包身有啲硬。整體質素算屬於中上,兼且食得飽飽,所以晚餐就順延晏啲先食喇。

每人消費: 約148澳門元 (下午茶)
評分: 味道4   服務3   環境5   衛生4   抵食4
松山纜車車票,背後印有松山地圖。
松山纜車車票,背後印有松山地圖。
二嚨喉公園入口處纜車站
二嚨喉公園入口處纜車站
松山山頂纜車站
松山山頂纜車站

松山纜車就晌二嚨喉公園入口處,連接東望洋山山頂位,係澳門唯一一個纜車系統,1997年落成啟用,全程186米,只得個1分多鐘嘅途程,非常短,有可能係全球最短嘅纜車。而車廂細細好得意,話就每架供4個人坐,但坐晒就覺有啲逼。都未睇得徹周圍景色,位都未坐暖,就到咗頂喇

參觀時段: 下午
入場價錢: 每人2澳門元
評分: 值得去3  
山頂上有清晰指示
山頂上有清晰指示
唔能夠入去睇東望洋燈塔,只好係外邊望吓,影吓相!
唔能夠入去睇東望洋燈塔,只好係外邊望吓,影吓相!
山上可鳥瞰澳門全市景觀
山上可鳥瞰澳門全市景觀
估唔到山上竟然有個小型足球場
估唔到山上竟然有個小型足球場
回力球場
回力球場
多款康樂器械
多款康樂器械
防空洞
防空洞

松山有兩個公園,山腳就係二龍喉公園,山上就係依個松山市政公園。整個區域話大唔大,話細唔細,晌度有出名嘅東望洋燈塔(中國南岸最古老嘅燈塔)、聖母雪地殿小教堂,仲有一座古舊炮台、松山防空洞展示廊,又有大型露天劇場、小型足球場、回力球場(不過睇唔明點玩 =.=!)、多款康樂器械(又幾好玩架喎),真係估唔到山上有咁多嘢喎。此外,唔少得係依度景觀廣闊,另一鳥瞰澳門全市靚位之一

不過,有樣可惜,就係求先晌360 café嘆得耐,再嚟到東望洋燈塔就閂咗門,無得入去睇燈塔同參觀聖母雪地殿小教堂。行完松山市政公園,可以沿石級落山,松山算係城市綠洲,係輕鬆散步、呼吸一下新鮮空氣之選,再順路逛埋二龍喉公園。

參觀時段: 下午
入場價錢: 每人0澳門元
評分: 值得去3  
松山市政公園、二龍喉公園指引圖
松山市政公園、二龍喉公園指引圖
二龍喉公園正門,右側為松山纜車站。
二龍喉公園正門,右側為松山纜車站。
其中一組動物籠
其中一組動物籠

二龍喉公園,只係順路景點。賣點唔太多,只可叫做澳門半島依邊唯一放有動物園嘅公園,但其實動物不多,飼養咗多款哺乳動物、雀鳥同爬行動物,較特別咪有受保護動物,如黑葉猴、黑熊、獼猴等。驟眼所見都係附近嘅居民上山打吓波,行吓公園,跑吓步,無乜遊客到

二龍喉哩個名來自公園門口嘅兩個獸頭噴泉,前身係個荒丘,後來成為早期澳門總督嘅官邸,1931年因附近嘅火藥庫發生爆炸,做成多人傷亡,而建築物又受損。結果富商何東購買咗部分土地,闢為公園,故又稱為何東花園,其後在公園擴建時再將此地贈予政府。澳門總督遷出後,庭園開放埋供公眾遊賞,並於1959年改建成公園,其後再晌1996、1997年擴建為依家嘅模樣

參觀時段: 下午
入場價錢: 每人0澳門元
評分: 值得去2  
門面
門面
裝修古雅,有氣氛。
裝修古雅,有氣氛。
0.5L Sangria 紅酒雜飲
0.5L Sangria 紅酒雜飲
檸檬炒蜆 MOP95,正!
檸檬炒蜆 MOP95,正!
葡式焗鴨飯 MOP128,意外咁好食。
葡式焗鴨飯 MOP128,意外咁好食。
飯裡面鴨肉多到不得了,啖啖都有鴨肉絲!
飯裡面鴨肉多到不得了,啖啖都有鴨肉絲!

澳門有好多葡萄菜館,上次去澳門未有機會試到,今勻就揀定幾間心水,全部都無訂枱,視乎時間同玩到去邊區。最後,就決定去試吓晌大堂街嘅Restaurant Escade,位置就在郵政局後面上梯級,唔難搵

今日係星期五,都幾旺,由於無訂位,要多等半粒鐘,啱晒啦,因為晌360café食咗個好飽嘅High Tea Set,係估唔到咁飽,所以已經將食晚飯時間推晏啲,再等多陣都無妨。

之前已晌openrice做咗少少功課,所以點菜時雖睇勻個餐牌,但查實心裡有數,都無乜懸念

紅酒雜飲 Sangria 0.5L/MOP78, 1L/MOP148
澳門好多葡國餐廳都無免費開水供應,依間都無例外,所以索性先嚟半公升Sangria。我都係第一次飲依種葡式雞尾酒,本身小弟同太太都唔係好酒之人,可以飲,但唔多,而半公升大概倒到5-6杯(以每杯為半杯份量計),所以今晚都叫飲大咗,但因為隻酒係由紅酒再加啲蘋果、橙嘅果皮果肉,酒味少許濃,味道帶甜,易入口,真係唔錯唔錯,值得一試,所以清晒半公升Sangria無難度。

檸檬炒蜆 MOP95
炒蜆堆滿一大碟,份量頗大無呃秤,雖然蜆隻唔算好大,但感覺蜆肉肥厚、鮮甜無霉無爛,無乜死蜆,食落亦唔覺有沙。以檸檬同炒,所以蜆肉帶有一朕檸檬清爽鮮香,我哋連汁都唔放過,以麵包醺嚟食!

葡式焗鴨飯 MOP128
另一滿意嘅菜式,上枱時個賣相平平無奇,飯面就只有兩大塊煙肉、兩片葡式肉腸、蕃茜、黑橄欖而矣。但一滔起個鴨飯,真係禾稈冚珍珠,飯裡面鴨肉多到不得了,啖啖都有鴨肉絲,而且個飯又焗得夠香夠乾身,確係意外咁好食。唔好睇佢好似細細缽,查實份量可不少。

整晚食物好好味,環境亦都一流,餐廳設於一幢舊樓之中,樓高三層都係餐廳。內裡裝修古雅,一室潔白,懷舊吊燈,加上昏黃燈光,實在幾有氣氛。美酒,佳餚,浪漫情調,為今日行程畫完整美句號

推介菜式: 檸檬炒蜆, 焗鴨飯
每人消費: 約165澳門元 (晚餐)
評分: 味道4   服務4   環境5   衛生4   抵食4
酒店大堂
酒店大堂

位於澳門新濠天地嘅Hard Rock Hotel,屬4星嘅精品酒店,由於係獎品關係,所以可免費晌度住番一晚,舒舒服服瞓一覺,感覺真係好正

酒店嘅客房類型大致分為標準大床客房、標準雙人客房、雙連標準客房,除基本設施外,房內還配有多功能iPod播放器、視頻點播系統、視頻遊戲……等服務,當然,衛星電視頻道、吹風機、免費寬頻、無線上網依啲增值服務就唔使多講啦!

另一亮點係房間幾大吓,我住嘅係1673號房(雙床房,實質房租要成千三、四),一入門口左邊係超大入牆衣櫃、小酒吧,右邊就有個迷你吧台,放有兩張高腳凳,坐吓飲杯嘢都不知幾爽。話就話係雙床房,房中嘅單人床同我屋企張雙人床差唔多大咋,真係瞓4個人都得呀!房尾仲有一張復古風格嘅梳化,好鬼好挨啫。個房真係好鬼大,放咗咁多嘢,都仲係覺得啲空間好寬鬆。雖然有落地大玻璃窗,但我住嘅房就無乜景,對住新濠天地同澳門君悅酒店,其次就係路氹啲爛地盆

洗手間都好正,乾淨企理,同樣設備齊全,紅啡配搭,好夠型格。不過有個大疑問,沖涼房同廁所係分開嘅,其實咁設計都無問題,有時仲有啲方便,但奇在廁所無洗手盆,咁去完開大又好,開細又好,點都要洗洗手啩?

每晚價錢: 0澳門元 (雙人房)
評分: 設備4   服務4   環境4   衛生4   抵住4
  0 個留言    |  加入你的留言
雲南省東遊記.羅平油菜花海 (中國)
(旅程日期: 2011-03-19 至 2011-03-25 ,  旅程性質: 觀光攝影, 消閒度假)
 整個旅程  (共7篇遊記)
 分享至Facebook 
發表日期: 2011-08-15
去到行程嘅最後一日,個人心情比較輕鬆。因為,一來之前六日嘅行程,有部份都係有啲辛苦嘅,好似第二日去嘅九鄉,但今日就只係預景點一個;二來,所計劃要去嘅景點,大部份都去到,係去唔成陸良縣嘅彩色沙林,個人覺得可惜啲; 三來,重點嚟睇嘅油菜花田,一啲都無令我哋失望。所以,感覺上係好似如釋重負,一切都搞掂晒,今日就好好放鬆享受埋依日!

一覺瞓到足,就落去酒店餐廳食早餐,今朝完全無時限,所以晌餐廳Hea
嘆慢慢食,同埋依餐可能當埋食晏,故此一於食得豐富啲,食飽啲。

跟於就打的去遊昆明動物園,原來由酒店去動物園嘅「後門」係好近,打的都唔跳錶,去正門就遠啲,怪不之得個司機大佬見我哋咁近都打的覺得奇怪啦。睇動物、賞櫻,賞櫻?係,無錯,昆明動物園裡面都有個櫻花林,雖然規模未必及得上日本嗰邊,但對於未真得賞過櫻嘅我,都算唔錯啦!而且園內嘅孔雀園都好有睇頭喎,真係意外發現。

由於房間做咗延遲退房,所以行完動物園,就經翠湖行返酒店,稍稍休息吓先至出機場,搭3:25pm返
香港,完滿咁完成今次嘅行程。
十多款麵包,難得水準唔錯!
十多款麵包,難得水準唔錯!
佢哋標示為鬆餅,但有啲似孖寶蛋糕。
佢哋標示為鬆餅,但有啲似孖寶蛋糕。
自家特製多士,麥包底,煎蛋、煙肉、茄汁豆,正!
自家特製多士,麥包底,煎蛋、煙肉、茄汁豆,正!
臨尾加多一碗粟米片加乾果,食得我好飽呀!
臨尾加多一碗粟米片加乾果,食得我好飽呀!
難得住上間5星酒店,自助早餐又咁正,尋日要跟本地團要一早出發,未能好好享受個早餐,今朝就唔同喇,可以慢慢嘆,食到飽先走。

尋日嘅遊記都講過吓個早餐大概有咩食,依度唔重覆。但今朝同尋日食起嚟就有啲唔同,見佢咁多麵包,一於主打食包飽,都真係食咗好多包喎,大部份都有水準,尤其啲丹麥酥同牛角酥,嗒住杯咖啡,又食得悠閒,真係好爽好嘆。旅行就係咁,唔係日日都衝衝衝、趕趕趕,所以,依個早餐食得好滿足,有種滋味幸福嘅感覺!
每人消費: 約0人民幣元 (早餐)
評分: 味道4   服務4   環境4   衛生4   抵食4
昆明動物園「後門」,管理鬆散,真係可以唔買飛走入去都仲得!
昆明動物園「後門」,管理鬆散,真係可以唔買飛走入去都仲得!
當日有好多學生參選動物園,白孔雀就少見。
當日有好多學生參選動物園,白孔雀就少見。
開得燦爛嘅櫻花
開得燦爛嘅櫻花
園內有啲婆婆跳紙傘舞
園內有啲婆婆跳紙傘舞
古早味嘅「歡樂天地」
古早味嘅「歡樂天地」
裡內動物睇落比較無乜精神
裡內動物睇落比較無乜精神
除咗陸地上嘅,仲有好多其他湖上動物
除咗陸地上嘅,仲有好多其他湖上動物
雲南省昆明動物園---孔雀園
打的去到昆明動物園嘅「後門」,因為後門連住民居,見到好多公公婆婆出入,雖然入門口右邊有個賣飛嘅櫃位,但管理好鬆散,行入去時啲職員都無主動問我哋係咪入動物園,我估多數遊客都係晌正門位入,所以,真係可以唔買飛走咗入去都仲得!

以往去唔同城市、唔同地方,都鍾意逛吓動物園,因為每個動物園都有唔同嘢睇,梗有啲重點嘅特色,昆明動物園呢?我就覺得佢個「孔雀園」就最有特色同吸引力,因為我哋係由後門入園,第一個「景點」就係孔雀園,環境清幽,有假山,有水池,啲孔雀好似係無掩雞籠隨處走,有彩色,亦有純白色,好靚下,而且佢哋又唔驚人,你行到好埋佢哋都唔會走開,仲不時開屏演吓嘢!

此外,昆明動物園另一個賣點,就係一個賞櫻勝地,園內種咗上百棵櫻花樹,初春時節,開得正盛嘅櫻花樹,紅嘅白嘅布滿圓通山上,景致煞食到暈。不過,我哋今次到訪算係晌春尾,櫻花無咁盛放,此外,當然規模上未必及得上日本一啲知名嘅賞櫻公園,仲有,花種亦有所不同,日本常見嘅櫻花係五瓣嗰隻,依度見到嘅就成個繡球咁款。所以,整體效果唔算靚到嘩嘩聲,但都叫第一次睇到咁多櫻花,都心足架喇!聽說每年都會搞個櫻花節,有心嘅嚟嘅都可以留意吓。

1953年建園時,展出嘅動物僅有4種,共4只;目前,全園已有動物140多種,大小夾埋近千隻,如大象、野牛、棕頸犀鳥、黑尾蟒、小熊貓、黑長臂猿、金錢豹、葉猴、金絲猴、東北虎、大熊貓、大雕、袋鼠、美洲獅、非洲斑馬……等等,雖然種類多,但打理得唔多好,啲動物睇落好殘、好孤伶伶、兼且無乜精神。仲有個兒童娛樂區,竟然係廿多三十年前荔園見嗰啲,勾起啲孩童回憶。

參觀時段: 早上
入場價錢: 每人15人民幣元
評分: 值得去4  
  0 個留言    |  加入你的留言