問人星洲肉骨茶邊檔正，總有人推介「阿水」，佢係乜水，咪就係「亞細」黃亞細肉骨茶餐室囉，「阿水」係老一輩由福建嚟嘅移民發嘅音！

出咗MRT，行咗好耐好耐都唔見，仲以為好似尋日咁要食白果，原來「黃亞細」真係離最近嘅MRT有一大段距離，搵得佢好苦。現場所見，都未係好多人，至少鋪內仲有大把位任坐，不過，店旁隔離嘅草地封咗，無得晌大樹蔭下食番餐。

睇資料話肉骨茶分為新加坡嘅潮州派同馬來西亞嘅福建派，前者就落較少藥材，味道比較清淡，反而多咗朕稍重嘅胡椒味，夏天飲有醒神嘅感覺；後者就下得藥材較多，所以味道比較濃郁，略帶甘苦，冬天飲有暖胃嘅作用，仲可提高身體抵抗力。

身處星洲，食到嘅自然係較淡嘅潮州派肉骨茶啦。點餐紙，長形一張睇晒，前面羅列咗十數款嘢食，背面就係功夫茶同其他飲嘢。唔好見佢係間老鋪，裝修幾骨子，服務員仲一人一台PDA，用嚟幫客人點菜添。由於係早餐，所以都係點夠就OK，佢哋無加一，但就另收7%銷售稅，總供食咁SGD15.7。

招牌肉骨湯 SGD5.5
好得意，佢哋個餐牌中文用咗肉骨湯，又唔係肉骨茶喎。份量唔係好多，一碗有3條肉骨，其實淨肉得幾啖，不過，湯裡嘅胡椒幾香，飲起嚟確係比加重藥材嘅福建派清新啲。可能慣咗以為肉骨茶都係濃味，所以，初頭飲時覺得怪怪咁！

鮮灼豬潤 SGD5.5
依個都算係人氣之一，同肉骨茶個樣一樣，只係肉骨換咗豬潤啫。豬潤食落新鮮無臊豬味，切得夠薄，口感帶爽，當然成兜湯係重點，一定要飲晒啦。

炸油條 SGD2.0、白飯 SGD0.5（細）0.7（大）
肉骨茶通常都撈白飯或油條蘸嚟食，再配醬油、碎紅椒嚟吊吊味。所以，我哋當然都叫咗客炸油條（折番港紙成十幾蚊，都幾貴）同一碗大白飯同食。

自制羅漢果涼茶 SGD2.0
有時老婆都會晌屋企煲羅漢果水，我都幾鍾意飲，加上外間依刻都幾熱，所以都叫咗一杯嚟試試，果真有啲驚喜，冰凍嘅羅漢果涼茶，飲落很順喉，令人感覺很清涼，好過飲汽水啦。

少少題外話，明明係湯，點解叫「肉骨茶」呢？網上就查咗3個典故，熟真熟假，就自行取捨喇：
1. 「肉骨」如其名，是以肉與骨配合中藥煲成的湯。而「茶」字則是源自品嘗此餚時常配茶以解油膩感，故得肉骨茶之名。
2. 使用豬骨和一些普遍常用的中藥，以及一些家傳的偏方一起熬成湯，這就是最早的肉骨茶。當時的中國人也把藥湯稱為「茶」。
3. 據說肉骨湯的創始人名字是「林文地」，因為賣肉骨湯而被顧客稱作「肉骨地」，福建話中的「地」與「茶」音近，故後來被稱為「肉骨茶」。