晌新加坡食海南雞飯多少都係指定動作，唔通搵星洲炒米咩！其實睇旅遊書都有好多介紹，如：文東記、天天、幸運……多不勝數，無咩可能試得晒，就揀間近近哋，又就腳，「五星」就較為順路，睇完土生華裔祖屋，行一陣就去到。五星都有好幾間，但好似以東海岸路依間較為人氣同多被介紹。

東新加坡依邊唔係咩旅遊區，出名嘅景點都無乜，所以依間五星位處都係住宅區，去到單睇周圍環境已經有啲街坊，鋪內亦無咩特別裝潢，平實得很，眼見嚟食飯嘅人都係以附近嘅打工仔同街坊為住，睇落唔多見有遊客。

睇睇菜牌，就點咗一個海南雞飯，同一個炸魚，加多個白飯，夾埋晒都係SGD15.7，無銷售稅，無加一。菜牌中英對照，部份菜式有相，一目了然，再者啲侍應一係同你講廣東話，一係同你講普通話，點菜無難度。

海南雞飯 SGD10．Rice SGD0.7
據書描述，老闆堅持用走地雞，雞隻由馬來西亞進口，雞身較細，但肉質結實。食落，無乜皮下脂肪，雞肉都幾嫩滑，又好有雞味。墊底仲有啲青瓜，好爽脆。而個雞油飯好香、好油潤，枱上已放有成盤醬料，點雞三寶：薑蓉、黑豉油、辣椒醬，多少隨意。

Fried Sambal "Salad" Fish SGD5
睇返張單個英文名係咁寫，無記到個菜牌印咩中文名，所以唔係好知條咩魚。不過，條魚炸得非常之香脆，魚肉唔乾又唔嚡，食落又唔係話好油。最正淋晌魚身上面嘅汁，係爆香洋蔥再加入參巴醬，極之惹味。其實參巴醬係東南亞嘅辣椒醬，以十多種唔同嘅辣椒、蒜頭、乾蔥、炸過嘅乾貝同無去殼嘅蝦一齊炒製，辣辣哋，富有層次。