節慶酒店（Festive Hotel）嘅Fiesta西餐廳，係由早到晚提供自助餐或散叫西餐嘅地方，偶然從旅遊書發現，原來佢有個好抵食嘅前菜、甜品自助晚餐，價錢都係SGD19.9，為番港紙都係百鬆啲。如果你怕唔夠飽，就算加個主菜變成為半自助晚餐，都係SGD25-38（視乎揀咩主菜），都唔算貴，仲係可以由6.30pm食到10.30pm添。不過，溫馨提示，半自助晚餐供應日係星期一至四，而星期五、六、日就轉為BBQ自助晚餐（SGD58）喇。

同老婆都少咗食自助餐，因為佢覺得食唔得幾多嘢，俾嘅錢又唔係平，無理由為咗回本搏命質，撐爆自己個肚皮，係好反智嘅行為。相反，俾四、五百食嗰少少嘢，不如搵間有情調，高質素架啦。

之不過，既然依度咁抵，又係個半自助晚餐，當然，老婆唔會反對食得好啲、食得豐富啲嘅！睇過有多款前菜、自助沙律吧、生果、朱古力噴泉、甜品，對我哋嚟講，已經好夠食，結果就連主菜都無叫，一樣滿載而歸。

環境闊落光猛，裝修摩登型格，一室以橙色為主調，十分醒神，包唔會食到恰眼瞓。雖然我哋只係食前菜、甜品自助餐，無加主菜，招呼依樣殷勤有禮。

野菌湯
餐前先由侍應奉上每人一客野菌湯同一個小餐包，餐湯頗大碗，但最緊要就係好有水準，菌香味濃，幼滑柔順。小餐包則中規中矩，只提供橄欖油蘸點。

前菜
大致上有8款，小弟覺得都係精選，包括：露筍沙律、烤蔬菜拼盤、雞肉腸（當然比樂奇牌高好多檔次啦）、新薯沙律、蕃茄配水牛芝士、西班牙火腿搭哈蜜瓜……等等，款款味美有質素。當中又以烤蔬菜、水牛芝士、西班牙火腿作為翻兜又翻兜嘅對象，無辦法啦，好食丫嘛！

沙律
主要有3款沙律菜，如羅馬生菜、火箭菜；主配料多達14款，如車厘茄、橄欖、雞心豆、醃青瓜、粟米粒、鵪鶉蛋……，要數較特別係意大利風乾蕃茄、羊奶芝士粒；而仲有6款副配料：乾麵包粒、合桃粒、杏仁片、雜乾果、煙肉碎、芝士粉，再加埋5款醬汁，如意大利油醋汁、蜜糖芥末……，左拼右搭，食沙律都可以食飽。我前後食咗兩大碟沙律，先試勻所以材料！

生果
未落甜品之前，先嚟一輪生果，有火龍果、西瓜、士多啤梨、木瓜、蜜瓜、哈蜜瓜、菠蘿多款選擇，自選一個綜合生果拼盤，食得我何等滿足。

甜品
最後，要為此晚餐畫上完美句號，甜品當然唔少得。除朱古力噴泉外，有10款甜品，除前菜有名牌介紹外，其他食物都欠介紹，所以甜品時間就係考各人嘅「味力」喇。總體，離不開慕絲、奶凍、布甸、蛋糕……等等，雖則唔叫得好突出，令人一食難忘，但尚算平穩，唔會話太差嘅！呷著杯熱咖啡，慢慢嘆，絕對輕鬆咁KO成碟甜品無難度。

食半自助餐有依樣好（加上我哋又無叫主菜），真係樣樣試勻無走雞，食到飽一飽，但又唔係硬撐咁食落肚喎，話明要休悠，唔係買難受嘛！不過，講嚟有啲怪，咁嘅價位，咁嘅質素，睇勻成個場，真係客人唔多，頂多叫做3乘客左右，可能今晚係閒日啦。