尋日講過Siloso Beach Resort嘅環境，依家輪到講食，住宿包雙人自助早餐，餐廳Alfresco Café就晌酒店「後門」一入隔離個地下度，所以，都唔使再搵邊度食早餐。

餐廳環境貫徹整間酒店嘅風格，一樣好有叢林、野外嘅感覺。雙眼所見，有過半數都係露天位，細細張嘅膠枱、有柄嘅藤椅，啱晒2、3個人；亦有啲小稻草亭，亭下係可坐6-8人嘅長木枱，環境非常之咁寫意！雖然有室內部份，但基本上都好少客坐，感覺無露天咁正咁舒服。

食物種類同款式唔係大堆頭，但保證有啖好食整體質素都OK。熱盤有炒薯、雞肉腸、豬肉腸同茄汁焗豆；即煮檔口有喇沙、班戟、煎太陽蛋、炒蛋同一啲中式包點、點心；而最正係有個大焗爐放晌度，經常有新鮮出爐即焗牛角酥；仲有幾款新鮮生果、乳酪、粟米片…等等，而咖啡、紅茶、鮮果汁就任君選擇，多少隨意。

樣樣食啲，比起晌香港一個包一杯嘢飲，好豐富啦！最正都係晌個咁正環境hea住食，真係有幾何食早餐都食成個鐘架。

餘慶節目，晌酒店成日都見到有啲松鼠周圍走，係依度都見，你搵啲嘢食引吓佢，佢就乖乖走過嚟，好易氹，我都係第一次氹松鼠，好鬼得意啫！

既然晌Siloso Beach依頭住，無理由唔行吓個灘啫，所以，食飽早餐就去行海灘，一則欣賞吓個海灘有幾靚，二則影吓相留個念，三則散散步幫助消化。

個海灘都幾長幾寬闊，又種咗好多椰樹，都稱得上風景如畫，而且水清沙幼，就算晌度唔游水，齋行吹吹風都好舒服。再者，今日仲係閒日，成個灘望勻人唔多，視覺上仲正好多添，感覺更有渡假風情呀！偶有當地人晌度玩沙灘排球，雖然話有各式各樣嘅水上活動，但似乎時間尚早，又係星期五朝，就見唔到有咩水上活動有人玩緊。而對岸有幾個人工小島，當中有一個係設有浮橋可以橫過對面嘅。

海灘嘅盡頭，除見到香格里拉度假村外，仲有餐廳、咖啡座，可以嘆番個tea先走，而唔少得人人都會走埋去影相Siloso Beach嘅地標 - "Siloso"大字粒喇！6個大英文字，唔同顏色，擺法不一，影相幾盞鬼。如果再晌香格里拉度假村前嘅小石級向上行，可以去到西羅索炮台、海底世界、海豚樂園……等地方繼續玩。 

之前見到酒店內個泳池咁正，點可以唔游吓水架？所以，就趁行完沙灘，嚟酒店泳池落落水，游番一陣先！老婆游水麻麻哋，都話就算浸吓都一定要嚟囉！

其實個泳池究竟有幾正？去開公眾泳池嘅我哋，依度直情可以當係世外桃源啦，泳池環境成個熱帶雨林咁款，足足95米長，周圍高天大樹，泳池又唔係死死實實「直筆甩」，彎彎曲曲，甚有原始森林氣色，晌度游水感覺真係超爽架，玩完個人仲醒神咗，依啲先叫做享受嘛！

而且，晌泳池一頭又設計咗一個人工瀑布，成4、5層樓高，瀑布衝撞落嚟嘅水聲，令到置身泳池中嘅我哋，更覺得好似晌森林裡面咁，幾得架。瀑布下方仲有兩條專俾小朋友玩嘅滑水梯，以及幼童池，酒店又提供巨型車呔水泡，所以，細路仔多數玩到唔捨得走呀！

如果唔識游水都唔係問題喎，泳池邊擺有好多沙灘椅、太陽傘、原木嘅小茶几同吊床，椅背又可校高校低，曬曬日光浴幾咁舒服，又或撐住太陽傘，叫杯凍飲，睇睇書，聽聽音樂，都寫意到痺啦！再唔係，就晌泳池對下嘅花園草地，搵個小草亭抖涼，休息放鬆，都係件賞心樂事架。而靠近客房下面仲有個開放型嘅健身室，雖然器材唔多，但做做運動，強身健體丫嘛！

晌酒店已見過佢哋有介紹，海灘區嘅後花園，有好多環保小山徑，其實位置就正正係酒店正門嘅後山，亦即係Imbiah森林裡邊，1.8公里嘅自然之旅，透過多條高架浮橋連接，蜿蜒通過依個熱帶小雨林。

由於有很多指示牌，兼且整個山頭又唔係好大，基本上都唔會點盪失路。沿途仲有可能碰上一啲小動物，如：松鼠、長尾獼猴、超過20多種嘅雀鳥。我哋都係隨隨意意輕鬆咁行，志在親親大自然，享受吓叢林嘅優美！

雖然都成晏晝兩點幾，但因為今朝早餐都食得比平時多，所以，到依家又唔算好肚餓。不過，去到機場食可能仲唔抵，故此，既然怡豐城（Vivo City）係個必經中轉站，嗰度又有個大食代Food Repbulic，就不如食埋個輕怡午餐先再上路啦。

依度嘅大食代都幾大，佔地成27,000 呎，可容納900個食客，設計用上咗懷舊嘅新加坡風情，希望令人感到恍如置身於20世紀初嘅新加坡。場內有10多個攤檔，賣嘅都多數係地道星馬美食。我哋無乜點刻意搵，咁啱見有一檔客家嘅「擂茶」嘢，橫掂都未試過，就好奇一試。都有唔少選擇，如擂茶飯、擂茶糙米米粉、韭菜冬粉……同一啲小食。

收銀處有啲單張攞，原來擂茶都幾多功效，降低膽固醇，開胃健脾，明目清肝，平五臟，降血壓，睇落幾犀飛利。而且，店鋪講明不含有豬肉同豬油，係健康美食。兩公婆，要咗一個擂茶飯套餐，再加一客家鄉雞肉餅，唔夠先再加！

擂茶飯套餐 SGD7
大碗內裝有米飯、花生、豆角粒、菜粒、魚乾仔……等材料，細碗就裝有擂茶，兩者撈埋就食得。擂茶係客家人招待貴賓時嘅一種茶點，「擂」有研磨之意，以綠茶，加埋研磨後嘅芝麻、花生，就成為擂茶。雖然有益健康，但自覺味道麻麻。既為套餐，仲有一碟客家豆腐同九層塔煎蛋，前者一大磚三角形炸豆腐，幾香脆，不過豆腐唔算嫩滑；而後者就有趣啲，普通煎蛋餅，但落咗大量九層塔香料，味道多份個性。

家鄉雞肉餅SGD5
外貌有啲似炸豆皮卷，大大條，一客都有成10件，外層炸得鬆脆，內裡填滿免治雞肉，份量頗多，味道唔錯！

好喇，食飽就要起行。

都聽聞樟宜機場好大好有名氣，多次獲得全球最佳機場評比第一名。一直以為佢有3座客運大樓，原來有4個先啱，除經常聽到嘅T1、T2、T3外，晌機場南面仲有一座廉航嘅客運大樓。T1、T2、T3係相互連接，旅客可透過捷運同高架列車，或者徒步行路來往依3個客運大樓；廉航嘅客運大樓就要晌T2搭免費穿梭巴士來往喇。

其實，樟宜機場特別多大自然嘅「主題風景」，T1有仙人掌公園，T2亦有蘭花園、向日葵園、錦鯉池，T3則有蝴蝶園、錦鯉池，各有特色。而且，T3仲有一條巨型大滑梯，足足12米四層樓咁高，不過，要晌機場內單一消費滿SGD10嚟換取一次滑梯溜！如果時間有鬆動，值得走訪一下3座客運大樓哩！由於時間上有啲緊，只有晌T2同啲向日葵影影相，跟住等上機返香港，5:20pm機，9:00pm返到香港，飛機餐啱啱好當晚餐，題外話，香港航空嘅飛機餐都OK喎。