|  去完清邁, 跟著嘅行程就係去芭堤雅同曼谷, 朋友一家未去過, 所以指明想今次泰國之行兜一轉, 亦希望喺芭堤雅陽光與海灘, 仲想去曼谷Shopping.......為咗朋友嘅要求, 好啦, 所以就用隨遇而安嘅心態去計劃呢5日嘅行程。 沙灘上九成的女士們係著比堅尼, 而且大部份都係歐洲人 芭堤雅公眾碼頭內去珊瑚島的櫃位, 出船時間及價錢150B 17/07/2013 一早起床出外食早餐，然後坐爽條去公眾碼頭搭9：30船去珊瑚島嘅沙美灘。
朝早8：00，整個芭堤雅都仍在休息，想入去Central Festival 食早餐，又未開，原來真係「食宵夜易，食早餐難」。最後去咗Subway食咗個豐富嘅三文治，馬上截咗架爽條去公眾碼頭。
去到啱啱9：00，船家話剛走了一班船，叫我哋搭9：30，原本就係咁打算。
去Samae Beach 較去Koh Larn其他沙灘貴，一般公眾船去Koh Larn Na Ban pier係35B，到達後再坐電單車（即雞車）去一般跟團去嘅Tong Lang 沙灘或Twaen 沙灘。當日所見，較多強國人去坐35B公眾船，而去Samae 或Tien就較多外國人，買咗船票，船家已叫我出去上船位置，但另一半話太曬，想過15分鐘至行出去，點知.........
其實應該聽船家講，即刻行出去。我哋喺響9：15行出，行到C碼頭時，仲差5分鐘就開船，原來船上已坐滿乘客，下層只得四個位，所以都係應該聽人講嘅。約坐咗45分鐘，就到Tien Beach，呢處冇泊岸碼頭，要坐駁艇上岸，然後再坐船家安排嘅電單車或爽條去Samae Beach，呢程車都係船家包嘅，唔駛再比額外錢，約5分鐘就到喇！船家帶領我哋進入沙灘，一排綠色沙灘椅，船家會問要幾多張椅，40B一張連太陽傘，平布吉蛋島好多，我哋要3張，另外佢哋又細心問會唔會玩水上活動、又問要唔雪糕汽水啤酒，甚至小食午餐，都一條龍服務，真係好叻做生意。當然我哋都樂意幫襯。講番嗰灘，都幾清，沙亦滑，雖然冇布吉或沙巴那邊咁靚，亦冇魚睇，又冇得玩浮潛，但都有75分，只因較大浪，所以亦不太適合游水，不過可在近岸玩浪亦唔錯喎。另外Samae 好多歐洲人，特別係俄羅斯人，亞洲人只有我哋同另一強國人家庭，直至到下午1：00之後，至有多幾組年青港人到。總括而言，Samae感覺係舒服，冇旅行團，幾正。 PS : 回程時, 全船逼爆, 主要在Tien Beach再上超多人, 連企位都冇, 但船家仍然照舊上人, 所以船家非常草管人命, 妄顧遊客安全, 希望泰國旅遊部關注吧! 參觀時段: 早上
入場價錢: 每人150泰銖
評分:
值得去5
 冬陰公好多蝦, 好好味; 中蝦沙律好清新 甜酸蝦好啱送飯 菠蘿炒飯主要材料是蝦同菠蘿, 炒得好乾身 蕃茄洋蔥炒海鮮意粉, 同甜酸蝦味道差唔多, 海鮮好新鮮 到中午，船家拎住餐牌過嚟問每家人是否要叫嘢食，我哋見價錢唔貴，而且周圍都冇乜食肆，都決定幫襯船家，點完菜，佢話安排好，就會過嚟叫我哋埋位。15分鐘後，佢哋已擺好位，餸菜就跟住上，我哋全叫中size，所以都算夠份量。
冬蔭公，微辣，海鮮材料多，特別係蝦，班港童個個讚。
菠蘿炒飯，菠蘿好多但肉唔多，只有火腿，但味道都OK，炒得幾乾身。
甜酸蝦意粉，汁好多，送飯一流，唔辣，班港童搶哂嚟食。
大蝦沙律，酸辣味，有好多青瓜作底，so fresh。又飲又食又雪糕啤酒，加埋3張沙灘椅連傘，都只是850B，真係好抵，比布吉平好多。總括而言，船家的一條龍服務非常到位，雖然每樣都要收錢，但價錢合理唔貴，食物質素都唔錯，令我哋感到非常滿意。 每人消費: 約150泰銖 (午餐)
評分:
味道5
服務5
環境5
衛生4
抵食4 去完沙美灘，完成一個鐘嘅船程，就去搵爽條去Health Land，問咗幾架爽條，佢哋都企硬價30B，算喇早去早按摩，上車出發。 其實由碼頭到Health Land 都幾遠。
Health Land Pattaya 分店貫徹Health Land style，乾淨企理，豪華中帶平實，最重要係平做Spa麻，朋友非常喜歡。推油淨做價係800B/1.5 小時，我哋亦是買6500B/10張coupons，佢哋嘅coupon可以喺其所有分店使用，返到曼谷，我哋亦會去Asok嘅分店做推油。完成1.5小時舒服嘅享受，大家都一致讚好，所以都比按摩師每人50B，真係非常感謝佢哋嘅手勢。 推介項目: 推油
參觀時段: 下午
入場價錢: 每人650泰銖
其他消費: 貼士50B
評分:
值得去5
义燒拉麵, 仲有餃子白飯, 好飽呀! 180B 最貴係呢set壽司刺身套餐, 320B 燒豬排定食 180B 最平嘅蛋丼豬排, 120B 做完Spa, 都已經成下午6：00，係時候醫肚喇，所以截番架爽條返Central Festival搵食。班港童話要食日本菜，梗係帶佢哋去Fuji啦，又唔貴，仼佢哋叫定食都唔算大出血。
Fuji喺芭堤雅其中一間分店就在Central Festivial地下，對我哋嚟講相當方便。大家一致叫定食，每人一份，最貴係320B嘅壽司刺身定食 ，最平係炸豬排蛋丼定食，120B，豐儉由人，泰國嘅連鎖食店嘅價錢真係唔貴。讚！ 推介菜式: 定食
每人消費: 約150泰銖 (晚餐)
評分:
味道5
服務4
環境5
衛生4
抵食5 香蕉船 65B 西瓜汁做特價, 45B/2杯, 好抵呀! 火鍋紙巾盒, 好鬼盞呀! 食完日本菜，班港童又話要食甜品，朋友就行過對面嘅MK Restaurant 睇Manu，原來MK除食火鍋外，都有甜品食，咁方便，唔諗喇，就行入去食。除咗我，大家都叫咗一個香蕉船，而我就叫咗個特價鮮果汁，45B兩杯，有西瓜、橙、同蜜瓜。其實我哋都想再去MK食火鍋，可惜泰國美食多，未能食到，下次吧！ 每人消費: 約60泰銖 (晚餐)
評分:
味道4
服務5
環境5
衛生5
抵食5 凍Mocha及凍Latte, 65B/大杯 蝦餅 95B/6件 卡邦屁煙肉意粉 108B, 份量太少 蕃茄汁蘑菇肉碎飯, 85B 汁多過飯, 雖然味道唔差, 但賣相唔靚囉 炸薯條含有香濃薯味, 62B, 唔似麥記出品, 好食! 甜酸蝦炒金邊粉, 98B 排骨意粉, 中西合壁, 108B 18/07/2013 今日返曼谷，約咗Tim哥架靚Van 2:00pm，所以可以瞓晏D，約定大家11：30出外搵食。當然就腳去番Central Festival啦！昨晩去咗Fuji同MK，今日上1樓，經過Black Canyon，有個特價咖啡大招牌喺門口，凍Mocha同凍Latte 大杯都係65B，班港童一見，即刻衝入去坐底，順利成章我哋就喺處開餐喇！除咗咖啡，我哋各自叫了自己嘅心水。
蝦餅，幾厚，蝦膠算實及爽。煙肉卡邦尼意粉，分量略少，味道不過不失，另一半話自家製好食D。泰式酸辣蝦炒河，蝦爽，河粉較濕，唔夠乾身，但味道唔錯少辣少酸，啱啱好。 肉碎鮮茄飯，我就覺得太水汪汪，唔吸引，但班港童就話好食。日式咖哩炸豬排飯，朋友話好隱陣，雖然普通，但味道唔錯。總括唔差又唔貴，環境舒服，而且泰國好多地方都有分店，推薦！ 推介菜式: 凍Mocha
每人消費: 約200泰銖 (午餐)
評分:
味道4
服務4
環境4
衛生4
抵食5 標準大床房, 床係4呎半, 房間好細, 牆紙好舊, 但好過雙床房 雙床房, 只得床旁的梳妝台燈及一盞小射燈, 所以房間好黑暗, 呢間房地毯有霉味 Receiption嘅職員外表都好Professional架, 可惜笑容欠奉 酒店門口唔好亂過馬路呀!唔止巴士的士, 仲有火車, 頭頂就係机鐵, 轟隆隆啊! 18/07/2013 由芭堤雅去到曼谷Nasa Vegas只須個半鐘，比由曼谷去芭堤雅快15分鐘。去到曼谷NASA Vegas係3：30 pm。Tim 哥收我哋呢程2,050B。
呢間酒店係響12年12月喺AirAsiaGo訂嘅，當時係做promote，標準雙人房連稅一晚只係港幣88元，睇咗其網站及房相，又睇埋其他訂酒店網站及評語，大概比分都有7.2分左右，又話交通方便、房間幾好唔錯等等，而以前亦曾響AirAsiaGo訂過平酒店，諗住博一鋪，就訂三間房住三晚，但訂完後唔知點解，仍然忐忑不安，一路出發前幾個月都有留意住呢間酒店嘅評語同周圍嘅環境，而且都做埋後著，搵定後備酒店.....點知真係用得著。
落車時，朋友見間酒店外型新淨宏偉，又有Bell Boy出嚟幫我哋搬行李，大堂lobby都唔差，Reception女職員一律穿紫色泰式製服，又有大電腦螢幕指引客人如何遊曼谷，又提供Gym房比客人，器材唔差架，只係冇冷氣咋，朋友同另一半都猛講平靚正喎，但我就話睇埋間房先至讚啦！
我所訂都係大床房，全部係13樓，入房後，大家都緊係打個突啦! 尤其係班港童，嚷著要upgrade間房，佢哋覺得間房好陰暗好唔舒服，我哋大人都唔滿意啦！但諗住咁平，都打算忍三晚，但.....
房好細、好舊、好黑、燈好暗、牆紙甩、地毯臭，唯一係廁所乾淨，有洗頭水護髮素沐浴露提供。落去同reception講，我哋想upgrade，但佢哋竟然唔建議，只話同我哋換雙床房，轉上18樓，Bell Boy帶我哋睇完ok至轉，最後港童𨍭，為方便照顧，我哋都跟住𨍭，而朋友就按兵不動。行完街，10點半至返到酒店。晚上酒店亮燈後，外形都討好架，但內部真唔得囉。而最基本嘅風筒竟然冇提供，打電話到服務部要求，佢哋話冇呢個服務，話比錢租，都話唔能夠幫到我，令我哋要等到差唔多凌晨三點，頭髮只有七成乾都要瞓喇，在等瞓期間，就用番之前嘅兩手準備再搵酒店......
由於房細，根本冇櫈或椅喺房內，唯有坐在床上上網，而就坐在床上呢三個幾鐘，我所瞓嘅床係呈U形，中間床褥位置簡直係下陷，真係令我決心𨍭酒店。而朋友嘅大床同港童嘅雙床都有此情況，但冇我嗰張咁嚴重呢!另一要提上網每位計24小時要400B，冇電視，加上我嗰間房有兩盞射燈壞咗，只得一盞黃燈，令我更感房間陰森。真係唔明白網評會有平均7.1分囉？？ 每晚價錢: 88港元 (雙人房)
評分:
設備2
服務1
環境1
衛生2
抵住5 19/07/2013 我整晚搵酒店嘅幸勞都冇白費，最後搵咗三間4星，價錢都約四百多元左右，至四點至瞓。
第二朝，同朋友商量後，馬上晌酒店大堂上網訂房，最後都係揀Salil，舊年我住過Salil Though Lor，覺得唔錯，包早交通又方便，今次試下呢間開業不到一年嘅另一分店- Sali Sukhumvit Hotel，見相中裝修精緻華麗，班港童一見相就鍾意。
馬上check out Nasa Vegas, 打的直去Salil，果然冇揀錯。
由於時間尚早，酒店未能check in，酒店櫃台職員亦好細心將我哋嘅行李擺好，叫我哋先出外食午餐，而且有禮貌地向我哋解釋希望能提供一個乾淨舒適嘅房間給我哋，有禮親切同冇禮木口木面嘅reception女職在一小時內都見識過，真係強烈嘅對比啊！更加令我冇決定錯誤，放棄其餘兩睌cheap 房。
講番間房，由於標準房嘅twin bed room已滿，我哋要咗三間大床房，房裡裝修果然典雅華麗，同網站相片一樣，我們三間房都分別在一樓、二樓及三樓，四樓起係Delux Room。三間房嘅面積都唔一樣，最大係三樓嗰間，應該有二百多呎，浴室都幾寬敞，花灑水力好夠，五尺大床好舒服，枕頭床褥軟硬適中，同Nasa Vegas差好遠，真係一分錢，一分貨。 每晚價錢: 1900泰銖 (雙人房)
評分:
設備4
服務5
環境5
衛生4
抵住4 雙蛋泰式肉碎飯, 40B 雖然肉碎好辣,但非常冶味 魚蛋+肉丸河, 40B, 好味, 只係丸較細粒 泰式雞翼, 好味唔油膩, 想再叫多碟都冇喇, 賣哂! 海南雞飯, 好食, 40B 小食店內自成一角, 自製園林, 小橋流水, 係幾特別, 但就好多蚊呢! 小食店在後巷內, 日頭唔太多人行, 晚上整條後巷熱鬧非常 一整晚至朝早都掛住搵房，都冇理個肚，終於喺Salil 放底咗行李後，就叫咗出嚟，加上又未係時候check in，出去搵嘢食先。
由Salil 向BTS Nana站方向行約幾個舖位，見有一小巷，右旁一面有湯粉小食檔，走入去，小橋流水，竹棚下有小高台作用餐區，入內亦有其他的用餐位，幾特色，而且亦兼有學泰菜班。
我哋因太餓，除咗辣嘢外，餐牌上的粉麵飯及小食都叫哂，好食：
海南雞飯，40B，油飯不太油，雞亦滑；
魚蛋肉丸河，40B，雖然細粒D，但算爽，粉亦滑，湯底係清鷄湯，配合唔錯；
酸辣肉碎飯，40B，好野味，唔算好辣，加埋隻荷包蛋，好食；
炸雞翼，40B，外表好似乾身，但實質幾juicy，味道好好，想再叫多兩碟，但已賣晒，噢!
總括食店環境唔錯，雖然冇冷氣，但唔算好熱，唯一係有蚊，可能係食店種咗好多植物，有造了條小河（好似坑渠），所以要注意蚊患，食品唔錯，價錢唔貴。 推介菜式: 海南雞飯
每人消費: 約100泰銖 (午餐)
評分:
味道5
服務4
環境4
衛生3
抵食5 搭ASIATIQUE 免費船嘅碼頭, 要等15至20分鐘船 除小商店及小攤檔外, 亦有好多食肆及Food Court 除了Food Court及連鎖式食店外, 仲有小食攤檔, 迎合喜歡掃街人士 去完大路嘅 Siam Centre 同Siam Pigenon等遊客必去嘅商場, 我哋就出發去Asiatique。
我哋由Siam BTS 站搭BTS 深綠線去S6 Saphan Taksin 站, 喺2號出口出, 大把人都喺去呢個方向, 行到Central Pier, 轉左邊, 已有條長龍排隊等上免費船, 我咃約等咗15~20分鐘, 隻船雖然大, 但人實在太多, 好多人要硬企, 完全企滿, 根本就係超載.....泰國流行麻。
Asiatique 前身係貨倉, 現活化成河岸夜市, 我覺得佢哋好成功, 店舖食肆林立, 人流當旺。
上岸有幾間較高檔嘅餐廳, 價錢OK嘅, 再入就有泰式小攤檔, 煎炒煮炸甜品壽司樣樣齊, 迎合大眾, 豐儉由人。
經過完小食攤檔, 就係衣履飾品小店, 係小小型嘅翟道翟, 雖然冇翟道翟咁多選擇, 但就好行好多, 而且店與店之間夠寬敞及涼爽, 冇翟道翟咁焗促同熱, 最緊要係價錢唔算好貴麻。
行過小店及食店, 盡頭會見到地標 - 摩天輪, 由於時間關係, 我哋為有下次至幫襯啦!
參觀時段: 晚間
評分:
值得去5
細牛肉飯, 加錢有沙律, 牛肉較吉野定鹹些少 日式咖哩牛肉飯, 附加溫泉蛋, 港童最愛 細雞飯, 雞肉都幾多, 豉油味重D 豚肉豆角飯, 豚肉同豆角味配合得宜, 冇牛肉咁鹹 豬排飯, 同雞飯味差唔多 喺Aisatique買完又行到咁上下, 又喺食晚飯嘅時候, 左睇睇, 右睇睇, 真係好多選擇, 搜索一輪, 因為仲有其他地方未行, 所以想坐低速食一餐後再買過, 就揀咗呢間日式牛肉飯店 - Sukiya。
香港冇Sukiya分店, 牛肉飯嘅味道完全同吉野家唔同, 我就覺得偏鹹D, 跟餐加錢有沙律及麵豉湯, 唔太貴; 而Sukiya唔止牛肉飯, 仲有好多款式嘅飯餐揀, 我哋仲叫咗不同嘅飯餐試吓:
日式咖喱牛肉飯, 唔辣帶甜, 牛肉約有五件, 算係咁啦, 朋友話滿意。
細雞飯, 同吉野家完全唔同口味, Sukiya冇把雞烤焗及煎過, 只用炆煮方法, 豉油味幾重, OK啦!
最好味係豚肉豆角飯, 肉片簿身入味, 配合豆角一齊送飯, 好正!
至於沙律, 有兩種汁揀, 我哋全部揀咗千島汁, 生菜+青瓜及栗米, 穩陣。
總括嚟講，牛肉飯以吉野家較合口味，但試吓其他亦冇妨。
每人消費: 約100泰銖 (晚餐)
評分:
味道4
服務5
環境5
衛生5
抵食5 Soi Sukhumvit 11 近街尾BTS站, 已有多間藥房 Soi Sukhumvit 11周圍有好多Live Band 餐廳同Pub 夜晚嘅Breakfast & Lunch Sukhumvit 唔係食早午餐, 變成一間Pub Nana區嘅日與夜完全係兩個世界。
日頭唔係太多人行, 周圍有垃圾, 清潔工人忙於清理, 遊人不多; 而夜晚人來人往, 車又多, 熱鬧到不得了, 酒吧, 餐廳, 小販, 通通係為夜鬼服務, 住呢區嘅酒店住客完全唔駛擔心個 "悶" 字跟住尾！
參觀時段: 晚間
評分:
值得去5
除店舖, 有四五檔小食檔在做生意, 我哋幫襯咗三檔 呢檔主要係賣泰式湯粉及粉卷, 呢個素粉卷入面好多菜, 好清新, encore咗兩次, 40B 第二檔主要係泰式濃味菜式為主, 靚姐主理, 亦係即叫即做 21/07/2013 一早10:00便到翟道翟行咗三個鐘，當然未行完啦! 另一半都話唔夠喉，但朋友已投降，要搵地方休息吓，仲要食吓嘢！
雖然當日天氣唔算熱，仲有風添，但我知另一半一定唔肯响翟道翟嘅大排檔食，所以諗住坐地鐵去番Asok食，一落Kamphaeng Phet MRT站，就見有一條商店街，雖然得十多間小商店，但感覺唔差，最重要係有冷氣，小街內仲有幾檔小食粉麵，而且又設有枱櫈，方便食客，相當體貼，順理成章，就喺度開餐啦！
我哋主要揀咗相中兩位阿姐級主理嘅小食檔，肥阿姐那檔主要食湯粉類及泰式春卷，味道較清新，魚蛋粉及素粉卷做得唔錯，特別係素粉卷，我哋encore咗兩次。
另一檔靚太阿姐主要提供煎炒類食品，味道較濃，冬蔭公湯粉味道吸引，炒飯乾身蝦仁又爽，泰式炒河夠鑊氣，雖然阿姐用電爐炒。
最好係兩檔價錢唔貴，平均都係40至50銖，同翟道翟大排檔價錢差唔多，而呢處有冷氣，唔駛食到大汗疊細汗呢！
參觀時段: 早上
評分:
值得去5
好有心思嘅T-shirt店, 門口有小豬模型作裝飾 
熱門旅遊點 - Terminal 21, 內部裝修主題係機場離境大堂，每層亦有不同國家作背景主題，所有店舖食肆都緊貼主題，最有特色係四樓嘅英國主題及六樓嘅美國金門橋，嚟呢處行街shopping外，仲可以當景點周圍影，設計師真識諗計。
最好係商場內的店舖唔係全部係連鎖式，好多都係小店舖，而且亦有自家設計，衣履配飾都好有創意，唔係大財團壟斷整個商場，但食肆就主要係連鎖式經營，不過唔算貴，頂層亦有food court，豐儉由人，唔怪得此處咁受大眾市民年輕一代歡迎啦！ 參觀時段: 下午
評分:
值得去5
炸魚炒飯+薯條, 這款係咁多樣中最夠份量了  三啖就飲完嘅忌廉湯 海鮮茄汁意粉, 好酸, 調味唔得
喺Terminal 21行完買完，梗係要搵食啦！
班港童話想食西餐，所以就選咗呢間美國餐廳。
當然Manhattan Fish Market 𣎴能同清邁嘅Duke's相比，無論格調、食物質素等，都係Duke's好好多呢！Manhattan係名符其實嘅連鎖式餐廳，莱式係一般，冇驚喜，但又唔係太差，只係份量冇想象中豐富及多。尤其餐湯，三啖飲完；海鮮意粉同炸魚意粉份量唔大，只夠女士們份量，男士一定唔夠，可再去食消夜。以上兩種味道oK，只係意粉未夠入味啫！
每人消費: 約200泰銖 (晚餐)
評分:
味道3
服務3
環境4
衛生4
抵食4 Salil Hotal 間房唔錯，但早餐就不過不失啫！
早餐是自助餐形式，熱盤主要係粥，有炒麫同白飯，其他都係冷盤為主，選擇唔多，OK啦！唔難食，最緊要可以填飽個肚。
評分:
味道3
服務4
環境4
衛生4
抵食4 海鮮湯飯套餐, 唔錯 雞飯套餐連三件雲吞, 都幾好味! 蝦撈麵套餐連炸雲吞, 都唔算太乾 燒肉飯套餐連燒賣兩粒, 算OK喎! 舊機場只得三四間食店, 選擇唔多 此間以套餐為主, 約250B - 350B左右 21/07/2013 嚟到最後一站，泰國舊機場 - 廊曼機場，此機場主要係以廉價航空為主，嚟呢處唔係太多公共交通，只得兩架機場巴士，冇新機場咁交通方便，我哋當然喺搵咗丅im哥車我哋去機場啦! 其實應該同佢講價，應該可以平D，因為Nana 區比NASA Vegas Hotel 較近舊機場。
去到機場，check 完 in， 朋友話有D肚餓，就响泰國食埋呢餐，舊機場食肆唔多，得3、4間㨂，遲D應該好D，佢哋依家裝修緊幾間餐廳，希望下次嚟可以多D選擇啦！
總結旅費, 泰國因貨品及飲食比較迎合港人, 所以特別用得多D錢 :
1) Early Bird B&B 4晚平均住宿 : 約HK$1600
2) Sabai Wing 2晚平均住宿 : 約HK$950
3) Nasa Vegas Hotel 3晚平均住宿 : 約HK$400
4) Salil Hotel 2晚平均住宿 : 約HK$1460
5) 唱錢 : HK$8500 (包括食, 玩, 交通及購物)
6) 澳門船票 : HK$420
7) 機票 (澳門>清邁, 清邁>曼谷, 曼谷>香港)共3程連稅, 行李及飛機餐 : HK4940
全程約每人: HK$18270/3 = HK$6090
每人消費: 約220泰銖 (午餐)
評分:
味道3
服務3
環境3
衛生3
抵食2  0 個留言
| 加入你的留言 |
店員馬上來清理災區，噢，正正倒在落地玻璃和桌子間的縫隙，極不易抹，店員仍面帶微笑，服務不錯，我卻覺得很尷尬呢！
2015-01-18
2014-09-30
2014-04-27
