講完BED, 要講BREAKFAST喇!   真係要比5個LIKE呀! 因為實在太「華麗」喇！

我哋好榮幸住咗四晚，所以有四次早餐享用。 Early Bird 共提供6款不同類嘅早餐，每晚，民宿職員Green同New都會溫馨提示每位客人明早食哪一種早餐，佢哋兩位體貼到暈，細心講解各早餐的材料。

Early Bird 嘅早餐不作外銷, 只供應比每位住客; 而份量方面係好足, 男人都話好夠飽, 而且款款味道都好, 尤其是蘑菇奄列, 個奄列又大又足料, 除蘑菇外, 仲有洋蔥同蕃茄粒, 好味又夠飽呢!

飲品有熱花茶、咖啡、奶茶及椰青，食完仲有每人一大片西瓜，超豐富到午餐都可以延遲食。

食完大餐，順便去埋網上人人讃好嘅Love At First Bite食番個甜品。

Love At First Bite其實好近Duke's, 𣎴用過馬路，由Duke's出門轉右，約走數分鐘，見有一小路，路口處有一小招牌，轉入再走多三分鐘，就到終點。 

入到Love At First Bite， 鳥語花香，一片小草地旁，枱唔係太多又唔密，果然係一處High Tea 好地方，可惜蚊太多，所以坐外面嘅，最好就做好防蚊措施。

講番蛋糕, 由於我哋仲好飽, 所以都係叫咗四件蛋糕一齊食, 總括蛋糕出品都唔錯, 不過比較馬拉嘅Secret Receipt, 我會較喜歡後者, 因Love At First Bite 嘅蛋糕出品較甜。

但我就欣賞Love嘅鮮果沙冰, 好爽好清新, 我哋叫咗芒果, 菠蘿, 熱情果, 好正呢!

星期六市場顧名思義就係逢星期六嘅夜市, 小攤檔在長長的Wualai Road上一路伸廷.......

小食, 小飾物, 小文具, 衣履鞋襪, 通通都可以喺度搵到, 雖然亦有DIY自家製的小品擋攤, 但就冇星期日市場咁種類繁多, 不過有D攤檔喺星期六市場擺完, 星期日市場都仍然會見到佢哋嘅踪影。

我哋喺星期六市場完全冇斬獲, 只係幫襯咗D食檔, 主要係擺買攤檔嘅貨品唔夠特色, 只係一般類似女人街嘅款式, 而飾物文具亦好普通, 真係吸引唔到我哋喺處駛錢買手信囉!

行咗粒幾鐘星期六市場, 都買唔到嘢, 肚仔又開始打鼓喇! 於是班港童又到處覓食.....

沿Wualai Road星期六市場一直行至中後段, 右邊另有一幅小地, 入面有上面小狗表演踏單車, 抄粉麵及泰式小食, 仲有零星攤檔, 再走入去就有檔抄雪糕檔, 非常籍得推薦。

檔仔有一幅大banner manu, 清楚說明雪糕配搭, 以及加料價錢等, 所有配搭都可以由自己選擇, 由自已揀料配製雪糕, 正啊!

靚仔年青人應是少東, 由佢負責抄雪糕, 可惜係佢英文唔好, 解釋唔到雪糕嘅材料同醬料配搭比我哋知, 不過好彩有Banner, 有相片睇, 而佢都非常落力抄雪糕, 仲抄得D雪糕好靚添！

抄雪糕, 首先見靚仔將奶昔混合埋我哋所選嘅味道, 然後倒到平板鍋上, 跟住佢起手就抄, 又拉平, 約兩三分鐘, 佢就把雪糕壓成一塊一塊, 再用鏟張D雪糕片捲成小圓桶, 數量剛好全數放入紙杯裡, 最後由老闆娘(應該係靚仔嘅阿媽)加醬及生果餅乾之類嘅配料, 咁就完成咗喇!

味道方面, 我哋各自選咗自己嘅心水, 我所選嘅士多啤梨+芒果, 只加Yogrut, 冇加其他配料, 只係40B, 味道配合得好好, 最正係唔甜又夠凍, 我哋個個行到成身汗, 食咗呢杯雪糕認真爽呀!

由Early Bird 做中介，參加呢個Safari Elephant Riding，價錢亦係5間中介隔價中最抵，每人只須800B，包來回接送，騎大象一小時，騎牛車，睇大象show, 午餐及竹筏游河。本身曾在出發前兩個月寄電郵到漢清及另外3間當地旅行社詢問，包括問埋Eagle Track Zipline ,結果係Early Bird 報價最平最實惠，Eagle Track 報價亦比其他中介及直接平每位150B，詳情以下再講。 

7:30AM 導遊就嚟Early Bird接我哋，我哋係佢第一班，嚟接嘅車係架10人VAN，都蠻舒服; 跟住順路接多6個人，就離開舊城，坐差唔多一個鐘至到大象公園。

大象公園真正嘅名就唔清楚， 睇完整個公園都唔見招牌，而導遊亦叫大象公園做Saifri Park。

公園旁亦有得玩Jungle Flight， 不過見D設備就好似好簡陋，冇參與都係唔好評論喇。

導遊首先帶領我哋行入Canteen，同我哋Briefing一次整日嘅行程:

騎大象 > 坐牛車 > 睇大象Show > 食飯 > 坐竹筏遊河 > 離開大象公園 > 蘭花園 > 送回所住酒店 

由於時間尚早，騎大象唔係太多人，而呢處嘅大象唔係好大隻，屬中等Size，每隻象可載兩個人，如單身前往，佢哋亦會拼人坐象。

上象後，搖晃都頗厲害，真係要緊手崗位，扶實呀!  沿途風景都算幾好，上上落落，穿梭森林外圍， 去到中段， 象伕會停下為遊客拍照，亦會幫遊客用番自已嘅相機影，我坐個隻一見相機影，就擺甫士， 又伸象鼻，好鬼攪嘢呢!

騎大象最寫意嘅就係落河段, 河水淙淙, 清風送爽, 好relaxed呀!

約半小時後，就返到起點位， 導遊已在此等候我哋去下一個項目 - 坐牛車。

參觀蘭花園係呢個local tour 嘅最後一個項目，由大象公園到此約15分鐘車程。

起初對蘭花園冇咩感覺, 因網上嘅評語大致都話較悶, 冇咩嘢睇等等...... 但其實都唔係嘅, 呢度嘅蘭花品種頗多, 蘭花卉好靚, 如喜愛蘭花者, 此處係賞蘭的好地方。

落車冇耐, 本想行出外圍賞蘭, 可惜落起大雨, 為有留在室內觀賞; 另外, 裡面亦有多架古老房車作展覽，仲有售賣同蘭花有關的紀念品, 行完就坐喺裡面嘅Cafe' 飲杯咖啡, 食杯雪糕休息吓, 呢度嘅咖啡價錢都唔係好貴，都係85b-95b左右。

玩咗成日，導遊準時3:30 將我哋送返Early Bird 門口，雖然有D攰，但大家都想嘆番個下午茶至返回民宿梳洗，就決定近近地去Early Bird 隔離嘅The 3 Sis B&B裡嘅cafe' 試試。  

其實The 3 Sis B&B 外觀比Early Bird 吸引，格調較高檔，大家都話呢間B&B應該幾掂，後尾check 咗價，都要港幣500以上，以民宿嚟講唔平架。住唔到，索性試試食嘢啦！ 以環境，The 3 Sis Cafe' 係一間幾寧靜嘅餐廳，可坐室外或室內，當然天氣咁熱，清邁又多蚊，梗係坐室內啦!

食物方面，我哋叫咗公司三文治兩份，160B/份，形象似大家樂嗰D，當然呢份公司治嘅材料豐富好多啦，伴碟嘅薯條又非常好食，所以encore 多兩份炸薯條，80B一份，班港童第一時間搶哂嚟食； 另外批淮港童飲Mocha，我哋大人就飲Latta同Ice Coffee，80至95B。 難得係可以偷得浮生嘆下午茶。

想買平靚正又有心思嘅手信, 星期日市場啱哂......

食完Tea, 立刻返去B&B梳洗下, 旁晚5:00就行出Ratchadamnoen Road (即上面相中的Seven Eleven), 就係出名多嘢睇嘅星期日市場。 小攤都係啱啱開檔, 成條Ratchadamnoen Road加埋D橫街小巷, 通通都擺滿小地攤, 有食, 有買, 有歌聽, 有舞跳, 好熱鬧呀!

貨品方面, 個人覺得星期日市場出售嘅較靚較吸引, DIY嘅飾品亦較多, 五彩繽紛, 趣緻可愛, 我哋都喺呢度買到心頭好, 而價錢又唔貴, 真係比曼谷平好多, 而且連兩旁店舖嘅貨品都拎埋出嚟售買, 而有D星期六市場亦見過嘅小攤, 喺星期日市場都會再出現, 如錯過咗星期六市場嘅, 星期日市場亦可補番數, 不過如喺星期日市場見到嘅手製貨品, 建議見到就講價即買, 通常都打個七折起講價, 佢哋都係約八折至九折還價, 但有D都鐵價不二, 要睇個人牙力了。

行行吓星期日市場，突然一場大雨灑下， 梗係搵地方避雨啦! 咁就入咗呢間以橙色為主題嘅Coffee Shop - Kaldi Coffee。

剛巧時間亦差唔多8:00PM，順便食埋晚飯，頭先掃街時食咗好多小食， 於是就主打叫D較飽肚嘅炒粉麵飯，呢間Cafe'，裝修幾好， 坐得幾舒服，佢哋好似係家庭式經營，一家大少都喺店裡幫手。

首先嚟咗飲品， 雖然呢間係Coffee shop，但唔係淨係賣咖啡嘅，我哋都叫咗D特飲，味道都唔錯，另外主食嘅粉麵飯，味道的確得，只係份量少D，所以我哋都打孖上，好彩價錢唔貴，埋單都係600B，認真抵食。

15/07/2013 一早起身，食完Early Bird個豐富早餐，Eagle Track嘅車就嚟接我哋，嚟清邁其中嘅「戲玉」，今日終於實現。 

Eagle Track 嘅網站直接訂就冇折扣，如經旅行社訂就反而有平D，我問過五間旅行社，經漢清或Early Bird  訂Golden Package 嘅價都係一様同是1800B(打折後)，但漢清嘅Silver同Bronze就跟Eagle Track網上價一樣，冇得平，而Early Bird就比到我Bronze 1450B，都平到150B，個價都唔錯。所以我哋都係由Early Bird 安排。

由於怕班港童唔知醒，又怕太晏好熱，所以㨂咗早上10：00 嗰埸，約8：00，Eagle Track 就有車嚟接我哋，同車就有兩對外籍男女，佢哋都係編埋同一組玩Golden Package，而有小朋友嘅，多數都會揀Bronze，其實我係想揀Golden嘅，有35個plantforms玩, 而Bronze 只係得15個Plantform ，而且刺激度及抵玩度當然係Golden 啦!   價錢只係相差少少，再者班細路都唔係小朋友啦，但朋友就話怕佢哋太驚，玩到一半唔玩仲麻煩，點知剛好相反，最後班港童嘈住話唔夠喉添！

由於我哋都有七個人，所以有兩個教練跟我哋。一個就領先用我嘅相機幫我哋影相，一個就負責睇住我哋飛越叢林。

首先由教練為我哋配對適合嘅安全帶及頭盔，帶頭盔玩之前，我哋都要戴上不織布帽，保障衞生，(雖然如此，但不織布帽只衛生到頭頂，衛生唔到條頭盔索帶，條索帶有一浸濃烈嘅臭汗味，真係好臭味，玩完要馬上洗頸呀! )跟住就坐幾分鐘車到達起點。教練先同我哋briefing 注意嘅事項，特別係強調Eagle Track係雙威也，非常安全云云.....  的確，比起在大象公園哪邊又真係新淨好多，畢竟Eagletrack 都係開業一年多呢!

起初心情的確有點緊張，玩到第四五個plantform就開始習慣了，而且越玩越順暢，好快就過咗個多小時，話咁快就玩完，而那兩對外籍人士都同我哋差唔多時間完，原因係我哋人多過佢，等侯時間比我哋短吧!

玩完就去食飯，雖然話係buffet，但選擇唔多，不過都唔錯、炸魚、肉片、蔬菜菇類，白飯炒麵都有供應，生果就係西瓜、清水、咖啡及茶亦係無限添飲。

臨走時，教練每人送一件Eagle Track T-shirt, 好彩要大一碼，原來洗後會縮水；而我哋亦比咗兩位教練各200B 作為小小心意，下次再嚟一定玩Golden Package。

做緊Spa嘅時侯, 已行雷閃電落大雨, 做完Spa仍然落住中雨, 原本打算係Naimmanhaemin Road搵地方食晚飯, 當時約5:30PM, 但有D食店因之前落大雨而關門, 只有少數酒吧同幾間Pizza店有開門, 行咗兩個圈, 因落雨而要叫停, 就在停嘅位置, 有位哥哥仔擺咗個小攤檔响個騎樓底, 見都幾多人幫襯, 班港童就埋去睇吓係咩嘢嚟, 原來係賣甜薄餅, 有好多口味, 材料自選, 有朱古力, 香蕉, 各式果醬等, 當然每人整番件啦!

個皮即叫即做, 熱辣辣, 仲脆卜卜, 我就要咗朱古力碎+香蕉+朱古力醬, 唔落Cream, 好好味呀!真係又平又正呀!

喺街邊食完個甜pizza, 真係精神爽利, 可惜仍然落住中雨, 原本打算喺Naimmanhaemin Road搵飯店食晚餐嘅計劃為有取消。

為有返Montha Massage 店, 請老闆娘車回我吔返舊城, 我要求佢車我哋去到Moon Muang Road嘅Dash! Restaruant, 但佢唔識呢間餐廳, 佢就响Moon Muang Road路口放底我哋, 我哋行咗幾分鐘, 就見到一座泰式木屋, 馬上入去問有冇位食飯, 唉呀! 佢哋話Full Booking喎! 失望之餘, 突然有位身型細小, 面孔係外國人樣嘅一位較高級餐廳主持人走嚟問我哋是否現在就可以食飯, 因為當時都係約6:00, 時間尚早, 其實餐廳只得三張枱有客人, 其他枱係空嘅, 我哋表達咗我哋非常有誠意嚟食嘢云云....佢就用普通詰答我哋比5分鐘佢準備一吓, 好嘢! 即係有位啦!

就在等枱期間, 我哋就周圍影相, 餐廳後面其實係佢哋附屬嘅民宿, 呢度鳥雨花香, 住同食都不失為一個環境幽美嘅好地方 (佢哋係提供3房一廳2浴室嘅家庭式住房, 約6000B/晚)。

終於坐低, 餐應內裡燈光較昏暗, 情調唔錯, 餐廳主持人親自過嚟招呼我哋, 當然問佢有冇好介绍, 佢就用普通話跟我介紹餐廳嘅出名菜式, 咁就一於跟佢嘅介紹而order, 果然冇跟錯.......

椰子雞湯 85B, 湯底係白色, 有香葉, 冇胡椒, 味濃唔辣, 一定要點呀!

鮮蝦春卷 125B, 唔係炸嘅, 菜多蝦鮮, 好清新!

青木瓜沙律伴花生 125B, 酸中帶辣, 醒胃又醒神呀!

泰式炸麵伴湯85B, 炸麵好脆, 冇油益味, 加湯伴食好得呀!

少辣肉碎沙律伴生菜 85B, 好好味呀!

老抽豬肉炒飯 85B, 粒粒米飯, 穩陣又飽肚!

蠔油炒茄子75B 及泰式炒通菜 75B, 好中式嘅炒法, 唔辣!

再叫埋啤酒及特飲, 好滿足的一餐呀!

值得一讚係餐廳CEO講嘅普通話好好, 樣子雖然似外國人, 但佢話佢祖籍福建, 上兩代已嚟清邁定居, 所以佢一見客人係華人, 佢會主動同客人講普通話, 練習一下自己的母語呢! 真佩服佢啊!

其實嚟清邁唔一定參加local tour，嚟呢處無所事事都好呀！喺舊城周圍行吓、食吓、買吓，hea吓, 真係非常優悠寫意, 比起曼谷嘅城市購物等指定項目, 清邁顯出平淡但有實際; 比起芭堤雅或布吉嘅陽光海灘同夜夜笙歌, 清邁更顯出其自身的自然生態更清麗脫俗, 所以我一定會重遊清邁, 更想入清萊等地區呢!

對呢間酒店真係又愛又恨呀! 愛佢超方便同算舒適, 恨佢哋D酒店大堂職員超冇禮貌......

16/07/2013  當日朝早別過清邁Early Bird B&B 嘅New及Gel, 就搭的士去清邁機場坐12:05嘅AirAsia FD3436航班到曼谷, 再乘一早已訂定Tim 哥嘅十人豪華兼超舒服嘅Van直去芭堤雅, 真係要讚Tim哥安排嘅十人靚Van, 我唔知佢係咪好貴, (第一程 : 曼谷舊機場至芭堤雅Sabai Wing 2300B ; 第二程 : 芭堤雅Sabai Wing至Nasa Vegas Hotel 2050B 及由Salil Sukhumvit Hotel 至曼谷舊機場1200B) 但我覺得值, Tim 哥已聲明佢所有嘅車係十人VAN, 如果少人就唔好搵佢, 如一有7-10人, 搵佢就化算D, 而且Tim哥係香港移民去嘅, 大家同聲同氣, 好有交帶, 所以坐長途車坐得非常有信心呀!

講回呢間Sabai Wing, 我分別在Booking.com訂咗一間豪華池景露台房及Agoda訂咗兩間普通房; 點解會咁訂呢? 原先我一早已在Booking.com訂咗三間豪華池景露台房, 每房約HK$345連稅, 算係合理價; 後來Agoda比咗個9折碼比我, 如訂以上房就冇Booking.com咁平, 但訂普通房就平過各大酒店網站, 只須HK$247.5/房連稅, 可惜只得兩間雙床房, 所以我為有先訂住兩間普通房, 睇吓到時情況如何, 如豪華房OK, 咪試吓可唔可以換或Upgrade囉, 點知........

當在大堂櫃枱check in 時, 那位三十多歲嘅女招待已黑口黑面, 問一句, 唔答你, 問到第三句, 佢至勉強回應, 我唔知道是否在我之前有中國人激親佢, 唔理解佢為何有此態度, 我當然亦有問可否upgrade 啦! 但佢就串樣話唔會比我upgrade, OK...妳話唔比咪唔比囉, 而普通房又話唔同層等, 佢只有冷漠拒絕, 完全唔係做服務業嘅有禮態度; 最後我回應佢可否體諒一下比兩間普通房比班港童可近我哋其中一pair大人呀! 佢就免為其難話只能比大床房....... 唉! 態度好差囉!

首先就去睇吓間豪華池景露台房啦! 該位女招待比咗3樓起首的第二間房比我哋, 但該房係完全睇唔到池景, 因為喺二樓有一大簷篷, 根本係遮檔整個景, 我要求換房, 佢竟然比我更不滿, 把房匙大聲放在枱上, 我朋友已感覺佢嘅態度好有問題, 但我就話睇哂D房先.......  而呢間係5樓起首嘅第五間房, 終於可望到整個泳池, 但房內嘅感覺唔好, 玄關位好黑, 地毯及衣櫃傢俱都係用上深啡色, 而且有股霉味, 加上整間房嘅燈光昏暗, 我哋係三點幾上房架, 但房內都好黑, 唯一係兩張床有潔白的床上用品反射, 未至於太差, 原先想比班港童用此房, 佢哋即刻拒絕喇!  睇埋個露台, 地面根本冇清潔, 煙頭, 紙巾, 灰塵都可以比人用肉眼見到, 咁都得呀!  在門口見到執房阿姐, 馬上告知, 佢就係咁咦同我掃哂D垃圾, 露台地上及傢俱嘅灰塵就原裝喇! 朋友好激氣, 算啦! 呢間房比我同另一半啦!  原來房內都有好多問題陸續浮現, 浴室面積頗大, 係80年代嘅裝修, 沖涼中會有小蟑螂同一隊隊嘅黃絲蟻同客人打招呼, 深啡色嘅地毯是歷史久遠嘅酒店產物, 就送比客人一股酸臭味, 最好算係張床, 床褥同枕頭都好合心意, 算係唯一嘅安慰, 所以決定第二日轉普通房, 雖然冇得退回差價, 但都覺冇選擇錯誤吧!

而兩間普通房竟然比貴百多元嘅豪華房舒適好多, 可能剛裝修不久, 牆身白油新淨, 地板係白色地磚, 床都係一樣乾淨舒適, 果然決定冇錯。

其實Sabai Wing Hotel只係豪華池景露台房較舊外, 新翼呢邊嘅普通房雖然景觀冇咁好, 不過新淨光猛, 如果豪華房那邊重新裝修, 加上唔好用地毯, 我諗都唔差架, 而且兩個泳池嘅環境都幾好, 如果在清潔同客戶服務加把勁, 佢可以攞高分D, 唔駛比客人咁多批評啦!

另一有讚嘅地方係超方便, 行去前面係沙灘路, 行去後面就係Big C 同Central Festivial, 整條旺街, 晚上非常熱鬧呢!

喺Sabai Wing check 完in, 就向沙灘路方向行, 一路慢行沙灘路, 見路邊有一檔Kebab小檔, 班港童又係第一時間走埋去買嚟試吓! 好香嘅燒牛肉同燒豬肉, 仲有雞肉, 佢哋真食得, 每人叫牛及豬各一份, 我哋班大人就食佢哋嘅口水尾, 不過D Kebab真係好好食, 原本真係想再買嚟食, 但係我哋將會食大餐, 所以都係留肚吧!

一路在沙灘路慢步, 一路覺得芭堤雅又改變了不少, 始終什麼事及地方都要有新建設, 至會有進步......

唯一冇變的是海裡仍然有很多垃圾, 沙灘窄了, 廿年前來時都是如此, 十年前來亦是垃圾處處, 今次也是不枉多樣, 海水都是污濁得很, 可能是旅遊的代價吧!

所以一直以來對此海灘無甚感覺呢!

點解唔買卡巴食, 就係要搵地方食大餐, 原因係同行的朋友當日正日生日呢!

原本係訂房時, 我已經透過Booking.com同Agoda留言，希望酒店能有驚喜比我的朋友，始終3星即係3星，冇驚喜就只有激氣。

咁就靠自己搵地方同朋友食飯慶祝吧!  沿住沙灘路走, 經過呢間A-One酒店, 一股燒烤味就從酒店飄出來, 班港童就走咗入去看個究竟, 一出嚟就話好抵食嘅自助燒烤晚餐云云..... 朋友見環境都唔錯, 就決定係處食生日飯。

酒店標榜係以燒烤海鮮為主題, 主要是中蝦, 小瀨尿蝦, 枇杷蝦, 麵包蟹, 小肉蟹及中型龍蝦, 亦有魚塊及多春魚, 蚌類有扇貝, 青口,蠔及一般燒烤肉食等.......

熱食就有魚蛋湯粉, 茄汁或白汁意粉(只有汁, 冇料架), 仲有义燒同燒鴨, 冷盤有齋壽司(青瓜/蟹柳/黃瓜)及火腿, 亦有沙律吧, 生果就只有兩樣 -  西瓜同菠蘿, 甜點就只得四款西餅及啫喱糖, 咁就已經講哂呢餐自助餐嘅食品喇! 可以用寥寥可數同全屬cheap 品嚟形容最啱!

酒店好叻轉移視線, 除咗燒海鮮同中式燒味檔得一處外, 其餘嘅食物都會在其他區重複擺放, 所以望落整個用餐區好似好多款食品提供, 其實都係假象嚟架......

款式少都算, 品質都係好一般, 除咗中蝦同枇杷蝦有D鮮味外, 其餘嘅海鮮都冇味嘅, 而且每次叫完D海鮮都要等好耐, 最快都要成半個鐘至有得食, 事關得一個哥哥仔燒, 梗係做唔切啦!  燒味可以用合格嚟形容, 跟住兩款生果都算鮮甜, 湯粉算係呢處嘅上品, 其餘都係唔合格, 特別係煮意粉, 可以講係全場最差, 難食! 而且亦冇茶或咖啡汽水供應，認真cheap!

至於價錢，大人就800b, 雖然優惠唔駛加一， 但完全唔值，因為客人應該食唔到800b, 就算全部點哂以上海鮮嚟食，事關order3次，佢都係只送上一次，根本佢哋就會miss 咗客人嘅order, 送上一次就算係佢記得同比番個安慰啫，所以我真係好後悔喺處為朋友慶祝生日。

17/07/2013 一早起床出外食早餐，然後坐爽條去公眾碼頭搭9：30船去珊瑚島嘅沙美灘。

朝早8：00，整個芭堤雅都仍在休息，想入去Central Festival 食早餐，又未開，原來真係「食宵夜易，食早餐難」。最後去咗Subway食咗個豐富嘅三文治，馬上截咗架爽條去公眾碼頭。

去到啱啱9：00，船家話剛走了一班船，叫我哋搭9：30，原本就係咁打算。

去Samae Beach 較去Koh Larn其他沙灘貴，一般公眾船去Koh Larn Na Ban pier係35B，到達後再坐電單車（即雞車）去一般跟團去嘅Tong Lang 沙灘或Twaen 沙灘。當日所見，較多強國人去坐35B公眾船，而去Samae 或Tien就較多外國人，買咗船票，船家已叫我出去上船位置，但另一半話太曬，想過15分鐘至行出去，點知.........

其實應該聽船家講，即刻行出去。我哋喺響9：15行出，行到C碼頭時，仲差5分鐘就開船，原來船上已坐滿乘客，下層只得四個位，所以都係應該聽人講嘅。約坐咗45分鐘，就到Tien Beach，呢處冇泊岸碼頭，要坐駁艇上岸，然後再坐船家安排嘅電單車或爽條去Samae Beach，呢程車都係船家包嘅，唔駛再比額外錢，約5分鐘就到喇！船家帶領我哋進入沙灘，一排綠色沙灘椅，船家會問要幾多張椅，40B一張連太陽傘，平布吉蛋島好多，我哋要3張，另外佢哋又細心問會唔會玩水上活動、又問要唔雪糕汽水啤酒，甚至小食午餐，都一條龍服務，真係好叻做生意。當然我哋都樂意幫襯。講番嗰灘，都幾清，沙亦滑，雖然冇布吉或沙巴那邊咁靚，亦冇魚睇，又冇得玩浮潛，但都有75分，只因較大浪，所以亦不太適合游水，不過可在近岸玩浪亦唔錯喎。另外Samae 好多歐洲人，特別係俄羅斯人，亞洲人只有我哋同另一強國人家庭，直至到下午1：00之後，至有多幾組年青港人到。總括而言，Samae感覺係舒服，冇旅行團，幾正。 PS : 回程時, 全船逼爆, 主要在Tien Beach再上超多人, 連企位都冇, 但船家仍然照舊上人, 所以船家非常草管人命, 妄顧遊客安全, 希望泰國旅遊部關注吧!

19/07/2013  我整晚搵酒店嘅幸勞都冇白費，最後搵咗三間4星，價錢都約四百多元左右，至四點至瞓。

第二朝，同朋友商量後，馬上晌酒店大堂上網訂房，最後都係揀Salil，舊年我住過Salil Though Lor，覺得唔錯，包早交通又方便，今次試下呢間開業不到一年嘅另一分店- Sali Sukhumvit Hotel，見相中裝修精緻華麗，班港童一見相就鍾意。

馬上check out Nasa Vegas, 打的直去Salil，果然冇揀錯。

由於時間尚早，酒店未能check in，酒店櫃台職員亦好細心將我哋嘅行李擺好，叫我哋先出外食午餐，而且有禮貌地向我哋解釋希望能提供一個乾淨舒適嘅房間給我哋，有禮親切同冇禮木口木面嘅reception女職在一小時內都見識過，真係強烈嘅對比啊！更加令我冇決定錯誤，放棄其餘兩睌cheap 房。

講番間房，由於標準房嘅twin bed room已滿，我哋要咗三間大床房，房裡裝修果然典雅華麗，同網站相片一樣，我們三間房都分別在一樓、二樓及三樓，四樓起係Delux Room。三間房嘅面積都唔一樣，最大係三樓嗰間，應該有二百多呎，浴室都幾寬敞，花灑水力好夠，五尺大床好舒服，枕頭床褥軟硬適中，同Nasa Vegas差好遠，真係一分錢，一分貨。

去完大路嘅 Siam Centre 同Siam Pigenon等遊客必去嘅商場, 我哋就出發去Asiatique。

我哋由Siam BTS 站搭BTS 深綠線去S6 Saphan Taksin 站, 喺2號出口出, 大把人都喺去呢個方向, 行到Central Pier, 轉左邊, 已有條長龍排隊等上免費船, 我咃約等咗15~20分鐘, 隻船雖然大, 但人實在太多, 好多人要硬企, 完全企滿, 根本就係超載.....泰國流行麻。

Asiatique 前身係貨倉, 現活化成河岸夜市, 我覺得佢哋好成功, 店舖食肆林立, 人流當旺。

上岸有幾間較高檔嘅餐廳, 價錢OK嘅, 再入就有泰式小攤檔, 煎炒煮炸甜品壽司樣樣齊, 迎合大眾, 豐儉由人。

經過完小食攤檔, 就係衣履飾品小店, 係小小型嘅翟道翟, 雖然冇翟道翟咁多選擇, 但就好行好多, 而且店與店之間夠寬敞及涼爽, 冇翟道翟咁焗促同熱, 最緊要係價錢唔算好貴麻。

行過小店及食店, 盡頭會見到地標 - 摩天輪, 由於時間關係, 我哋為有下次至幫襯啦!

喺Aisatique買完又行到咁上下, 又喺食晚飯嘅時候, 左睇睇, 右睇睇, 真係好多選擇, 搜索一輪, 因為仲有其他地方未行, 所以想坐低速食一餐後再買過, 就揀咗呢間日式牛肉飯店 - Sukiya。

香港冇Sukiya分店, 牛肉飯嘅味道完全同吉野家唔同, 我就覺得偏鹹D, 跟餐加錢有沙律及麵豉湯, 唔太貴; 而Sukiya唔止牛肉飯, 仲有好多款式嘅飯餐揀, 我哋仲叫咗不同嘅飯餐試吓:

日式咖喱牛肉飯, 唔辣帶甜, 牛肉約有五件, 算係咁啦, 朋友話滿意。

細雞飯, 同吉野家完全唔同口味, Sukiya冇把雞烤焗及煎過, 只用炆煮方法, 豉油味幾重, OK啦!

最好味係豚肉豆角飯, 肉片簿身入味, 配合豆角一齊送飯, 好正!

至於沙律, 有兩種汁揀, 我哋全部揀咗千島汁, 生菜+青瓜及栗米, 穩陣。

總括嚟講，牛肉飯以吉野家較合口味，但試吓其他亦冇妨。

 

21/07/2013 一早10:00便到翟道翟行咗三個鐘，當然未行完啦! 另一半都話唔夠喉，但朋友已投降，要搵地方休息吓，仲要食吓嘢！

雖然當日天氣唔算熱，仲有風添，但我知另一半一定唔肯响翟道翟嘅大排檔食，所以諗住坐地鐵去番Asok食，一落Kamphaeng Phet MRT站，就見有一條商店街，雖然得十多間小商店，但感覺唔差，最重要係有冷氣，小街內仲有幾檔小食粉麵，而且又設有枱櫈，方便食客，相當體貼，順理成章，就喺度開餐啦！

我哋主要揀咗相中兩位阿姐級主理嘅小食檔，肥阿姐那檔主要食湯粉類及泰式春卷，味道較清新，魚蛋粉及素粉卷做得唔錯，特別係素粉卷，我哋encore咗兩次。

另一檔靚太阿姐主要提供煎炒類食品，味道較濃，冬蔭公湯粉味道吸引，炒飯乾身蝦仁又爽，泰式炒河夠鑊氣，雖然阿姐用電爐炒。

最好係兩檔價錢唔貴，平均都係40至50銖，同翟道翟大排檔價錢差唔多，而呢處有冷氣，唔駛食到大汗疊細汗呢！

 

熱門旅遊點 - Terminal 21, 內部裝修主題係機場離境大堂，每層亦有不同國家作背景主題，所有店舖食肆都緊貼主題，最有特色係四樓嘅英國主題及六樓嘅美國金門橋，嚟呢處行街shopping外，仲可以當景點周圍影，設計師真識諗計。

最好係商場內的店舖唔係全部係連鎖式，好多都係小店舖，而且亦有自家設計，衣履配飾都好有創意，唔係大財團壟斷整個商場，但食肆就主要係連鎖式經營，不過唔算貴，頂層亦有food court，豐儉由人，唔怪得此處咁受大眾市民年輕一代歡迎啦！

喺Terminal 21行完買完，梗係要搵食啦！

班港童話想食西餐，所以就選咗呢間美國餐廳。 

當然Manhattan Fish Market  𣎴能同清邁嘅Duke's相比，無論格調、食物質素等，都係Duke's好好多呢！Manhattan係名符其實嘅連鎖式餐廳，莱式係一般，冇驚喜，但又唔係太差，只係份量冇想象中豐富及多。尤其餐湯，三啖飲完；海鮮意粉同炸魚意粉份量唔大，只夠女士們份量，男士一定唔夠，可再去食消夜。以上兩種味道oK，只係意粉未夠入味啫！

 

Salil Hotal 間房唔錯，但早餐就不過不失啫！

早餐是自助餐形式，熱盤主要係粥，有炒麫同白飯，其他都係冷盤為主，選擇唔多，OK啦！唔難食，最緊要可以填飽個肚。

21/07/2013  嚟到最後一站，泰國舊機場 - 廊曼機場，此機場主要係以廉價航空為主，嚟呢處唔係太多公共交通，只得兩架機場巴士，冇新機場咁交通方便，我哋當然喺搵咗丅im哥車我哋去機場啦! 其實應該同佢講價，應該可以平D，因為Nana 區比NASA Vegas Hotel 較近舊機場。

去到機場，check 完 in， 朋友話有D肚餓，就响泰國食埋呢餐，舊機場食肆唔多，得3、4間㨂，遲D應該好D，佢哋依家裝修緊幾間餐廳，希望下次嚟可以多D選擇啦！

總結旅費, 泰國因貨品及飲食比較迎合港人, 所以特別用得多D錢 :

1) Early Bird B&B 4晚平均住宿 : 約HK$1600

2) Sabai Wing 2晚平均住宿 : 約HK$950

3) Nasa Vegas Hotel 3晚平均住宿 : 約HK$400

4) Salil Hotel 2晚平均住宿 : 約HK$1460

5) 唱錢 : HK$8500 (包括食, 玩, 交通及購物)

6) 澳門船票 : HK$420

7) 機票 (澳門>清邁, 清邁>曼谷, 曼谷>香港)共3程連稅, 行李及飛機餐 : HK4940

全程約每人: HK$18270/3 = HK$6090