一整晚至朝早都掛住搵房，都冇理個肚，終於喺Salil 放底咗行李後，就叫咗出嚟，加上又未係時候check in，出去搵嘢食先。

由Salil 向BTS Nana站方向行約幾個舖位，見有一小巷，右旁一面有湯粉小食檔，走入去，小橋流水，竹棚下有小高台作用餐區，入內亦有其他的用餐位，幾特色，而且亦兼有學泰菜班。

我哋因太餓，除咗辣嘢外，餐牌上的粉麵飯及小食都叫哂，好食：

海南雞飯，40B，油飯不太油，雞亦滑；

魚蛋肉丸河，40B，雖然細粒D，但算爽，粉亦滑，湯底係清鷄湯，配合唔錯；

酸辣肉碎飯，40B，好野味，唔算好辣，加埋隻荷包蛋，好食；

炸雞翼，40B，外表好似乾身，但實質幾juicy，味道好好，想再叫多兩碟，但已賣晒，噢!

總括食店環境唔錯，雖然冇冷氣，但唔算好熱，唯一係有蚊，可能係食店種咗好多植物，有造了條小河（好似坑渠），所以要注意蚊患，食品唔錯，價錢唔貴。