「梅丘寿司の美登利総本店」嘅渋谷分店位於大型商場Mark City內，方唔方便就見仁見智。八口子十一點左右到步，一如所料，長長嘅走廊及門前早已排滿及坐滿攞咗飛嘅食客等位。

門外貼出日英雙語告示，指繁忙時間限定用餐時間為兩小時及店內並冇足夠空間擺放行李，亦展出附有彩圖嘅推介及節令菜式，方便貴客候座時諗定食乜。聽到哥哥仔話分兩張四人枱會快啲有位喎，當然係立即接納啦！

用餐大堂座無虛席，迫到真係連轉身都唔易。服務生忙得團團轉，想搵個人落單都有啲難度，唔怪得知連薑片都同醬油及牙籤一樣玩自助式。嘻嘻，雖然太陽未升到頭頂，但XO仔已慣性地點咗杯生啤。

厚本餐牌共有十五頁，有齊日、英、中三個語言，大多項目亦印有彩圖，非常易明。三張散頁餐牌中，其中一張為渋谷分店嘅限定菜式，另外兩頁為節令蠔王嘅三種食法。

1)      冬物語（3,024円）：哥哥教落，因推廣品嘅流量高，其新鮮度亦應相對地高，所以就點咗個聖誕套餐四個人分。色彩繽紛嘅壽司拼盤同海報上嗰幅相可以話係一模一樣，有齊拖羅、白子、海膽、蝦、蟹等。壽司外表震撼，不過食落就覺得質素遙不可及之前喺銀座分店食過嘅咁正囉。跟餐嘅麵豉湯、沙律、燉蛋亦屬正常普通貨。

2)      中卜口刺身（2,000円）：姨媽話中拖羅刺身雖則色澤紅潤，肉質軟滑，可惜食落太多筋，不吃也吧。

3)      牡丹蝦壽司（400円/件）＋車海老壽司（600円/件）：唔知係咪師傅有意俾個機會大家比較一下呢，兩款蝦壽司拼埋一齊上。相中上方晶瑩透光嘅為車海老壽司，而下方連翠綠色蝦籽嘅則為牡丹蝦壽司，兩者均厚潤爽脆，鮮甜無比。

4)      極上大卜口壽司（500円/件）、北寄貝壽司（500円/件）、赤貝壽司（500円/件）、火灸吞拿魚壽司（200円/件）、帶子壽司（500円/件）、鮑魚壽司（500円/件）、象拔蚌壽司（250円/件）：其餘散點嘅壽司一口氣以大大塊木板呈上。六款中以粉嫩嘅極上大卜口壽司最為肥美香潤，好食到姨媽姨丈要立即追加咁堅！赤貝壽司橙美爽甜，最抵就係軟嫩鮮濃嘅火灸吞拿魚壽司，反而最失敗係超硬且味道欠奉嘅鮑魚壽司。

5)      吞拿魚根串燒（250円/串）：吞拿魚根硬得黎食到成口油，完全唔掂！

6)      極魚王かきグラタン（600円/件）：藏於芝士下嘅巨蠔身肥飽滿，爽嫩滑溜，熱辣辣嘅芝士尤其滋味！

7)      烤魚鰭（700円/件）：大肥爸爸大讚烤魚鰭嘅魚肉幼滑鮮甜，魚皮則香脆惹味，700円絕對超值！

全日空航空公司嘅商務搭客於成田機場出境後共有兩個「ANA Lounge」貴賓室可選，團長好自然地就揀咗離閘口較近嗰個。

接待大堂擺放出超型嘅Star Wars版模型飛機，震撼到連唔係星粉嘅小肥都忍唔住要影返幅相留念。睇到展出嘅金牌先知原來航空公司同酒店一樣有一至五星等級分，全日空榮獲五星殊榮當真係實至名歸！

樓上貴賓室內嘅大廳前方擺有幾張二至四人嘅圓枱仔，後方則排出幾行獨立式梳化位，或許後者私隱度較高，所以一早已坐滿旅客。隔離就係光鮮企理嘅自助餐飲部。拍牆嘅飲品區有精選酒品、咖啡機、鮮奶、汽水、果汁等等。XO仔最興奮就係見到部朝日生啤機！專業到啲啤酒杯全部都係雪喺雪櫃入面，有哂日英對照兼附彩圖嘅操作說明，有得玩又有得飲，絕對歡樂！

自選食物都算幾國際化吓，不過就唔算特別吸引，當中有三文治、沙律、壽司、飯團、味噌湯、麻婆豆腐、肉丸等。嘻嘻，有旅遊達人哥哥帶領，八人當然係唔會錯過最入位置頗為隱蔽嘅「Noodle Bar」啦！麵檔其實有多款熱食可選，包括烏冬、蕎麥麵、拉麵，咖哩飯等，即叫即煮，好似快餐店咁等機仔一響就有得食。細佬所點嘅豚骨拉麵呈奶白色嘅豚骨湯底甜濃香滑，拉麵煙韌彈牙，份量剛剛好唔會太多，加配一杯清爽嘅朝日生啤確真歡樂！

全日空NH 811選用B767-300型號班機，商務機艙嘅獨立式座位本身已經超級闊落，2-1-2嘅排位令兩邊走廊更具空間感，加以提升舒適度！除咗座位嘅所有控制之外，此機連座廁都一樣為電動化，仲要係大肥最愛嘅噴水型號，高科技得真夠全面！

仔異常地口渴，仲不斷斟添開水及香檳，細心貼心得很！航班包咗嘅晚餐小肥揀咗「

名店集中地「Ginza Six」新建於2017年，屬銀座區內規模最大嘅購物中心，地庫層嘅商店主要都係同飲食有關，吸引到XO仔嘅係舖面尤其鮮明嘅「10FACTORY 銀座店」！

小店源於「柑橘王國」愛媛縣，品牌以不同品種嘅愛媛縣柑橘製出果汁、汽水、果醬、糖果、朱古力、雪糕等柑橘美食。店內有售肥肥家族最愛嘅朱古力柑橘乾；由於家人都比較抗拒白朱古力，細佬可以慳返少少。兩款朱古力柑橘乾中，「Orangette」（324円/件）嘅柑橘果乾明顯較為厚潤，朱古力脆皮同柑橘果香兩者嘅甜味好夾。不過更為乾脆嘅「Chocolate Mikan Rusk」（324円/件）就少咗份嚼勁，而且味道冇咁甜濃，唔係咁啱細佬口味。

全店最具人氣就係要排隊購買嘅柑橘飲品及甜品，有果汁、茶、汽水、酒、雪糕等七款可選。小肥第一杯先飲橙亮嘅柑橘果汁「Fresh-Squeezed Mikan Juice」（680円/杯）。鮮榨果汁十分清涼，而且鮮甜無比，實不用錯過，必喝推介也！至於杯柑橘啤酒「Mikan Biiru」（680円/杯）其實即係柑橘果汁溝啤酒，飲落唔似啤酒之餘仲失掉咗柑橘本身嘅鮮甜，組合有啲不知所謂，超唔掂囉！

長輩要求食天婦羅，除咗要好食之外另附條件係要好坐，結果當然係要搵地膽幫手，由哥哥位日本女朋友推薦擁有六十多年歷史嘅老字號「てんぷら山の上 ギンザ」（Tempura Yamanoue Ginza）。如店名所示，「山嶺上的天婦羅」母店位於「Hilltop Hotel」山頂位置，為東京第一間能成為酒店餐廳嘅天婦羅店，神級地位不容忽視。

天婦羅專門店於2017年首設分店，所選嘅銀座區及Ginza Six商場均份量非凡！店子以木為主嘅裝潢簡約樸實，門面及用餐大堂嘅空間感一樣咁足，完全不失格調或氣派。店內並無花巧之裝飾或擺設，用上嘅全為木造餐桌及椅櫈，令開揚嘅間隔更覺通爽。最入一邊為最旺場嘅吧位，圍繞著幾位即炸美食嘅師傅。離廚房最遠嘅就係窗邊有靚景睇嘅散座。八人派對被安排入座最中央嘅長枱，每位席上都有自用嘅隔油網架及餐具，講究得黎好衛生。

埋位先送上熱毛巾。得悉家人來自香港，哥哥仔即主動以國語溝通及推介餐飲，並換上中文版餐牌，既親切又周到！大家都應推介揀咗12,000円/位或8,000円/位嘅「廚師發辦」作午餐，分別在於前者多兩味天婦羅及包有更豐盛嘅主食選擇。每客「廚師發辦」均配備調味三寶，即蘿蔔蓉、天婦羅秘汁、鹽。小肥所點嘅8,000円「廚師發辦」包有八款天婦羅：兩件活海老、兩款魚、星鰻、蓮藕、舞茸菇、茄子、伏見青椒。哥哥點嗰客12,000円「廚師發辦」就多咗慈菇同紫蘇海膽兩款天婦羅，另外魚魚亦為升呢版。新鮮炸出嘅天婦羅由姐姐仔索油後續件分配於各人嘅私家隔油網架上：

1)      兩隻天婦羅蝦嘅頭同身係分開上嘅，新鮮即炸嘅蝦頭極易入口，咬落鬆脆冇渣。

2)      修長嘅蝦身層炸皮巧薄不油膩，橙白紋理鮮明嘅蝦肉爽脆彈牙，十分清甜。

3)      天婦羅蓮藕超級厚身，幸好炸漿輕盈，蓮藕入口清爽得很，真係食到索索聲架！

4)      伏見青椒半爽半腍，意外地除咗有陣獨特嘅香味之外，仲有點回甘。

5)      茄子同蓮藕一樣咁厚，質感爽中帶腍。

6)      最後件舞茸菇芳香脆潤，可口味佳。

7)      唔係幾夠飽嘅幾位男仕結果要追加精選項目。所選嘅蠔隻名為「牡蠣」（1,500円），肥嘟嘟嘅外表已覺吸引，吃畢個個都有讚冇彈，証明堅掂！

8)      各款午市套餐可選嘅單尾不同，餐廳特意印出圖文並茂嘅「主食餐牌」，另貴客簡單易明得多。細佬所點嘅「蓋飯」包有甘甜味雜錦天婦羅蓋飯、醬菜、味噌湯。甘甜味雜錦天婦羅蓋飯個白飯底粒粒飽滿肥潤，舖面嘅雜錦天婦羅巧脆惹味。味噌湯內含蜆肉，味道鮮濃。伴配嘅醬菜清新爽脆，可一解熱氣。

9)      甜品可選咖啡味或綠茶味雪糕，均伴上紅豆蓉，清涼不溜滯。

早兩日先見識過日本卡通精品天堂「東京駅一番街」（Tokyo Character Street），買到XO仔同媽咪手仔都軟埋，真係冇諗過一山還有一山高，喺原宿竟然發現到個向上發展嘅精品天堂大廈「Kiddyland」，比「東京駅一番街」絕對有過之而無不及呀！

「たでの葉」（Robatayaki Tadenoha）隱藏於青山區內一幢不起眼嘅大廈二樓，從附近四周嘅環境及門外嘅氣味當真難以察覺到爐端燒店嘅存在。行上樓梯，步入餐室，發現全店十二個吧位均圍繞著老闆兼主廚小鶴清史氏（Kiyofumi Kozuru）先生嘅爐端大舞台，一人負責哂切、串、燒、煮等工序，透明度極高，唯一室內光線較暗，令拍攝難度增加。

小店由小鶴伉儷主理，男主內、女主外，合拍得非常之有默契。XO仔啲日文屬有限公司，小鶴太太特意寫埋漢字黎溝通，態度堅認真！小鶴先生提及自己家鄉好多狩獵者，所以有窿路入到高質嘅野味食材。餐店只有一款廚師發辦晚餐，10,000円/位，節令菜式當日先會知有乜，故未有餐牌提供。

餐具下嘅餐墊以型格書法道出店子務求貴客可於歡樂時光中以美食充電嘅「Power Spot」（能量景點）理念，有意思極！大大頁飲品牌有張黃色皺紙墊底，配埋桌上嘅小燈籠，感覺好似返咗古代咁。酒鬼們應推介試咗樽有年份嘅「2017年新政天鷲絨ヴィリジアン（Viridian）」日本清酒（7,200円/樽）；帶有乳酸味嘅酒品清爽到好似有氣咁，相當獨特。

1)      晚餐由豐盛嘅九小碟前菜拼盤作序，不同大小及形狀嘅碟盤十分吸睛。建議由十一點方向開始順時針方向食，順序亦即三文魚籽、芝麻菠菜伴蓮藕、山葵腐皮、熊肉絲、炸慈菇、味噌白鴨肉、水魚啫喱、蘿蔔，中央為豆腐乾拼香菇：

a)      拼盤上嘅三款小杯中，晶瑩橙美嘅三文魚籽濕潤惹味；芝麻菠菜伴蓮藕清新帶爽；而腍身嘅腐皮食落有點兒微微辣勁，都幾得意。

b)      第一味食到嘅野味熊肉絲混入咗醃蘿蔔絲，食落好似火腿絲咁，其實唔係好食得出熊肉有咩特別味。

c)      慈菇一向俾XO仔嘅印象係粉粉地同苦苦地，師傅巧妙地將慈菇切碎後炸煮，炸慈菇變得香脆鬆爽，易入口及討好得多。

d)      長輩果然係學識廣博，一聽到葫蘆碟上為「味噌白鴨肉」時，即諗到「連城白鴨」乃清朝貢品，屬珍饈也！搓成肉丸形嘅味噌白鴨肉內含洋蔥碎，甜濃爽潤。

e)      九款小點中最得小肥歡心嘅就係半透明嘅水魚啫喱方磚！啫喱清涼厚潤，入面嘅水魚裙邊清脆甜美，滋補養顏，超正！最後中間件豆腐乾一啲都唔乾，濕潤得黎有彈性，簡單加上兩片火腿已成功加添咸香。

2)      食完九小碟後，師傅戴著特製厚手套於高溫嘅黑炭沙堆嘅熱爐燒煮出嘅野味亦迅即陸續登場。打頭陣嘅為貌似八爪魚嘅燒水魚！細佬炆水魚同水魚湯都有食過，不過似乎爐端燒嘅水魚肉先最鮮甜及有嚼口，骨膠原豐沛都毫不溜滯。

3)      如相所示，燒鱔粗身得黎閃出光澤，頂面以紫蘇葉碎點綴令菜式芳香撲鼻。大肥爸爸同姨媽姨丈們都大讚靚鱔皮脆肉滑，啲肉仲要係滑到不得了嗰隻喎！

4)      食完兩道濃味嘅海鮮後，先有一碗仔清香怡神嘅金菇菠菜為味蕾洗滌一番。

5)      接棒嘅野鹿好似比翼雙飛咁，小燈籠旁放上伴配嘅鹽粉，擺盤精美得很！燒野鹿肉嘅外表與牛扒無異，紅潤粉嫩嘅野鹿肉油脂不多，質感軟腍，輕輕塗上金黃嘅辣根及灑上鹽粉足已吊出鮮香嘅味道。

6)      整晚之最必選黑色圓盒內鮮紅潤澤嘅野鴨內臟刺身！金碗內嘅野鴨內臟分別有鴨肝、鴨腎、鴨心，撈埋隻亮麗嘅日本生鵪鶉蛋黃，三款刺身柔順嫩滑，鮮美醒神！

7)      食完頂級嘅野鴨內臟刺身後即輪到燒野鴨肉。嘩，燒鴨皮層香脆中仍保持滑溜，鴨肉軟嫩可口，拼上大蒜更覺鮮香惹味，冇得彈呀！

8)      好似牛肉咁，燒野鹿都可以有不同燒法、切法、食法。切成幼條嘅薄燒野鹿扒鬆爽得黎肉汁豐腴甜美，個人覺得比第一款燒鹿肉更堅！

9)      吃畢兩種紅肉，師傅就安排咗一小碗酸味消滯嘅海帶漬物間場。

10)  壓軸嘅野味為滾住上嘅芹菜野豬五花腩煲，由小鶴太太續一分派。上枱時已聞到翠綠嘅芹菜傳出嘅芬芳，菜下嘅野豬五花腩肉不單巧薄，肥瘦比例更加係層次分明，簡單烚過肉質已夠鮮爽香潤，真係食到嗦嗦聲架！

11)  吃畢多道咁補嘅野味混身熱血，大廚以野生山藥磨煮成糊仔狀作單尾，可一解熱氣及油膩，妙哉！

12)  甜品柑橘類水果二重奏為晚白柚拼凸頂柑（デコポン），兩者均微酸帶甜，輕盈得黎有助腸胃消化。

大肥爸爸個老友記每年都會去日本多個城市吃喝玩樂，其中去襯東京定必拜訪西洋料理「島」，肥肥家族聽得多自然心郁郁。非常慶幸聖誕假期間都訂到位去食晏，只係餐店隱蔽於地牢，位置有少少難搵，大家記緊要留意孖膽街燈及花花標記哦！

行落街燈旁嘅弧形樓梯確真有啲危險，因為又黑又高，落到底先知人地原來有部𨋢架。餐廳面積不大，前方為開放式廚房及吧位，由老闆兼主廚大島先生掌舵，後方則擺放出兩張多人長枱。室內並無花巧之裝潢，最搶鏡必數牆上掛出可愛嘅龍貓同貓巴士幅合照！店內只有年紀唔輕嘅老闆娘一人負責樓面工作，包辦落單、傳菜、換碟、結帳等，見佢出出入入實在忙透，故面對緩慢嘅上菜速度大家都完全冇催促過。嗜紅酒嘅長輩們埋位先從多頁酒牌中揀選佳釀襯托靚牛扒。要有氣嘅小肥就點咗半枝裝嘅香檳。邊飲邊等，發現「香檳」日本譯作「果實酒」，連個名都健康過人，結果不知不覺間就飲咗兩個半枝，早知一開頭就要樽大裝啦！

兩頁食物餐牌只有頭盤及主菜項目，非常簡單，價格卻極非一般。餐桌白色嘅枱布上有齊備嘅西式及和式餐具。見到菂薂可愛嘅臘腸狗筷子座確真令人心情輕鬆起來。

1)      師傅準備午餐時，食客可先細嚐三款鬆軟熱辣嘅麵包，個人只係略嫌黑炭麵包偏硬咗少少。請留意，牛油係要要求先會提供嘅。

2)      Fresh Raw Salmon with “Ohba”（3,800円）：橙亮嘅三文魚薄片柔軟香潤，以秘製嘅「Ohba」調味醒胃惹味得黎散發著芬芳嘅紫蘇香，清新得很。

3)      Fresh Oysters（600円/隻）：大大隻生蠔肥美亮澤，鮮甜爽滑，正！

4)      White Asparagus（900円/條）：蘆筍一向唔係細佬條菜，不過哥哥勁讚又粗又長嘅白蘆筍鮮嫩爽脆，一啲渣都冇，細佬只係覺得成千円一條好高級囉！

5)      Onion Gratin Soup （2,100円）：熱力十足嘅洋蔥湯香濃甜美，意外地冇預期中咁溜，湯料中嘅靚洋蔥嫩腍入味，滋味無窮。

6)      Wagyu Steak（13,000円/150g）：八人嘅主菜清一式要哂鎮店日本兵庫縣和牛，師傅喺燒煮牛扒前先攞咗個磅出黎，以証明和牛堅夠斤兩，透明度極高；相片碟中嘅兩件和牛左方為牛柳，右方為西冷，每款要咗四份。扒房選用日本名牌刀廠「旬」嘅靚刀，唔打得都睇得先！跟牛扒上嘅除咗有西餐常見嘅芥辣之外，仲有一小碟山葵豉油，流露出日式飲食文化嘅影響。三成熟嘅和牛西冷色澤粉嫩，肉質鬆潤香軟。分別連同伴碟金黃脆巧嘅蒜片及鮮爽多汁嘅生洋蔥，再輕輕點上山葵豉油已能增添惹味爽脆。和牛牛柳嘅配菜與和牛西冷嘅無異，除咗蒜片、生洋蔥之外，仲有焗薯及烤菜，碟上同樣係冇任何汁液，調味可選芥辣或山葵豉油。厚身嘅牛柳都係咁夠肉汁，只係有比較下質感會稍微覺得嚡實啲啲，啱唔啱口味真係要視乎個人喜好。

7)      Apple Pie with Mango Sorbet & Coffee Sorbet：餐牌上並冇甜品項目，問多兩句發現原來係免費贈送嘅！細細件蘋果批夠薄，半帶煙韌嘅批皮夠輕巧，批面嘅蘋果肉芳香爽潤，伴配芒果味及咖啡味雪葩亦微甜輕盈，份量剛剛好。

8)      甜品小點：三款小點中只有柚子條條一款冇果仁，帶點嚼勁嘅柚子條條酸酸甜甜，清新又醒神。

肥肥家族與法國餐廳「L'Osier」於2016年結緣，全因當時日籍靚女師姐推介為其願望餐廳之一，家人親嚐過星級午餐後亦迅即愛上！闊別兩年，原班人馬重返東京過聖誕節，大家都異口同聲地話要返去名店試埋個晚餐，Boxing Day真的可如願以償，饞嘴肥肚最幸福！

節日嘅燈飾點綴下，西餐廳如酒店般壯麗嘅門面更顯有氣派，大門由身穿制服嘅靚仔哥哥把守，貴客必需按照服裝限制打扮絕對有理。請留意，規定說明身穿牛仔褲、短褲或波鞋者均不得內進，男仕們定必穿上西裝。步進大堂，即見中央掛於半空嘅大吊燈跨往下層，延伸至一棵肥嘟嘟嘅聖誕樹。店內簡單擺出聖誕擺設及藝術品，大方典雅且極具佳節氣氛。

電話訂座時，XO仔已為各人點咗八道菜嘅試食套餐「Menu Degustation」（28,000円/位），並清楚說明廚師要留意嘅食物敏感事項。九人被安排入座兩張圓枱。官仔骨骨嘅服務生謙遜體貼，除咗言談間之外，每個動作都能反映出對用餐禮儀嘅講究及尊重，態度極之誠懇。餐牌均由大廚Olivier Chaignon先生親筆簽署，以表其誠意。既然菜單早已訂好，埋位就由團長揀選粉紅色香檳「Billecart Salmon Rosé Brut NV」（JPY 18,000/btl）襯托一吓聖誕佳餚。

1)      晚餐由外觀猶如花瓶般精緻嘅法式小點心「Canapés」揭開序幕。家人都驚嘆弧形嘅透明玻璃盤及盤上嘅四款小點一樣咁富藝術感！小點心均輕盈健康，可直接用手食，建議可由九點鐘方位開始打橫向右食，最後先逆時鐘方向上埋個十二點位，順序亦即微甜鬆化嘅棗蓉竹炭脆片、軟腍脆皮嘅茄子蓉撻、芳香厚潤嘅香草忌廉三文魚件、香濃柔滑嘅奶酪芝士伴黑松露。

2)      哥哥大讚麵包每款都咁鬆，伴配聖誕樹形嘅牛油塔既可愛又能提升佳節氛圍。原本家人都估頂級貨為廚房出品，細問下方才得悉店子嘅麵包均由區內名店「Maison Kayser」每天新鮮焗製，果然來頭不少！

3)      Amuse-Bouche：開胃小食為廚房每天即興之創作，當日嘅南瓜雪糕混入白蘿蔔精華，純樸清甜，以雅枝竹啫喱墊底即巧妙地加咗份濕潤，頂面再以芬芳香脆嘅松露花及薯片點綴，配搭清麗脫俗得黎口感十分豐富。

4)      Ossetra Caviar - Shellfishes Tartare, Light Fennel Cream Mousse with Lime Jelly/Lemongrass Leaves, Potato "Inkanomezame" Blinis：單憑相片未必睇得到，貝殼形玻璃碟子上其實最底層為晶瑩透光嘅雜錦貝類他他拌青檸啫喱，師傅喺面以黑色嘅魚子醬、奶白色嘅茴香忌廉慕絲及翠綠色嘅香茅小葉砌出形於盆栽嘅一幅美食圖，眼前頓即亮起一種大自然清新嘅氣息。雜錦貝類他他拌青檸啫喱清涼爽嫩，撈入盆栽拼圖上嘅魚子醬及茴香忌廉，效果更覺鮮濃柔滑，將食材塗上碟邊嘅迷你薯仔鬆餅上即變成一口一件嘅DIY小點心般，多元化嘅食法彷彿在提醒貴客飲食嘅趣味，設計者甚有心思。

5)      Blue Lobster/Black Truffle - Spelt Wheat Risotto with Aromatic Vegetables & Truffle Sauce：每道熱食均連蓋呈上，並由幾位服務生同一時間為全席人揭開，感覺猶如置身於皇室宴會中，相當隆重。意粉環節再一次遇上黑松露，濕濕地嘅意大利飯底腍潤中帶有嚼勁，龍蝦肉亦鮮美爽脆，只係長輩們都覺得藍龍蝦配意大利飯依個組合有點兒太過穩陣，失色在於欠缺咗一份驚喜或刺激感。

6)      Kue - Low-Temperature Cooking, Cauliflower with Seaweed Sea Urchin Broth：經理哥哥介紹法國大餐嘅魚魚係師傅精挑細選嘅「Kue」（網上翻譯為「泥斑」），屬當地出名難捉嘅石斑，尤其罕見所以矜貴。上枱後由專人續一於斑塊淋上熱辣辣嘅海膽秘汁。配角橙亮嘅海膽鮮甜香濃，翠綠嘅椰菜花蓉則脆潤易入口，白雪雪嘅魚肉以低溫煮出，厚身得黎卻極之軟滑，黏上海膽秘汁成功增強靚魚嘅鮮味，實有畫龍點睛之效。

7)      Roasted Duck from "Challans" - Roasted with Spices, Leg's "Confit" with Orange "Bigarade" Sauce, Turnip/Truffle, Caramelized Apple with Chinese Quince Vinegar & Green Cardamon Salmis Sauce：紅肉主菜上場前先換上更鋒利嘅刀具；女仕用白刀，男仕用黑刀。烤鴨主菜嘅醬汁同魚魚一樣係即場於食客面前斟上。兩件不同部位嘅烤鴨烹調方法及生熟度都有所不同，碟盤中央嘅鴨胸粉嫩紅潤，看似零脂肪嘅肉質軟腍且肉汁豐腴，傳出清幽嘅橙香迅即令精神為之一振；右上方嘅一小件油封鴨腿皮脆味濃，加配酸酸甜甜、腍中帶爽嘅焦糖蘋果一齊食落口即可減低膩感，簡單精妙！

8)      法國餐普遍都會以芝士隔開主菜及甜品項目，「L'Osier」嘅芝士車相信亦迷到不少芝士迷，只係遇上口味唔重嘅XO仔就有少少嘥料。

9)      Kumquat Sorbet：鮮紅艷麗嘅金橘雪葩有紅桑子及紅石榴啫喱墊底，軟潤清爽，消滯嘅同時可洗滌淨化一下味蕾。

10)  Les Petits Fours每人一份，四款甜品小點均擺放在透明嘅長形靚碟上，感覺同晚餐第一道法式小點心嘅擺盤相似得黎又有個對比，即咸對甜及圓對方。相中左起為軟彈濃甜嘅芒果啫喱、酸甜酥脆嘅紅桑子蛋白球、香醇甜脆嘅金箔朱古力杯、香軟帶脆嘅迷你焦糖梨撻。不得不提嘅就係拼盤旁放置咗一碗清水，方便賓客於食用甜點前作洗手之用，衛生周到得很。

11)  聖誕晚餐正常版嘅甜品為經典之選蒙布朗「Mont Blanc」，小弟因對果仁敏感，廚房已另作安排，不過眼見師傅為栗子雪山改編出別出心裁嘅新潮面貌，自己都不禁影咗幅靚相。

12)  Around the Citrus：魚形嘅碗中由幾款柑橘類水果砌出橙黃閃爍嘅果盤，灌入果汁後即浮現出柑橘小島，玩味十足！柑橘果肉部份清甜，有幾件帶酸，伴配甜脆嘅蛋白小餅令口感及味道有層次得黎非常和諧，實在難得！但甜品個高潮位係另上嘅香橙忌廉脆卷！金黃亮麗嘅忌廉卷修長吸睛，一拎起即發現餐碟嘅設計原來好似煙灰缸咁兩邊都有個凹位，卷物啱啱好弗到遢遢陷。手持卷卷已飄來陣陣果香，第一口咬落去連右旁嘅媽咪都聽到巧薄鬆脆嘅卷皮如何卜卜脆，卷心柔滑嘅香橙忌廉溶於舌上，甜美嘅橙香洋溢口腔，這個外剛內柔細膩得太完美了！

13)  法式聖誕大餐以精美嘅甜點車「Sweet Delicacy Trolley」作結，琳瑯滿目嘅糖果、餅乾、朱古力等任君選擇。靚仔哥哥耐心地續一推介，而且好衛生地為每位客人分碟上。嗜甜嘅小肥好捧場地試咗五款，甜點各具特色，可口討好。伴配一杯特濃咖啡，不用加糖以令腸胃舒暢得很。

「L'Osier」為名化妝品牌「資生堂」於東京銀座創立之法國餐廳，法文店名取自銀座區嘅標誌「柳樹」。西餐店富麗堂皇，服務生衣觀整齊，有禮好客，菜式用材高質，且顏值高，星級八道菜聖誕大餐豐富味佳，女仕們仲有個手袋仔紀念品，Boxing Day有聖誕禮物收倍添節日歡樂及難忘，即使有服裝限制都絕對值得一試再試！

「銀座うかい亭」（Ginza Ukai-Tei）為名日劇女主角Doctor X最愛嘅星級鐵板料理。餐店銀光閃閃嘅正門由兩位叉羮護法駐守，入口嘅梯級舖上紅地毯，左右兩旁排出聖誕花，節日氣氛濃烈且氣派十足，相信晚上亮起燈飾時會更壯觀亮麗。店內光線柔和，帶點古堡味嘅歐陸式裝潢及擺設高貴有格調。面積寬廣嘅餐室中央位置有個弧形嘅大鐵板舞台，貴客大多為二至四人一組，亦即搭枱制。

八人派對被安排於廂房內進行，私隱度較高，厚墊椅櫈十分舒適，仲有專人貼身服務，自動換碟及加酒之速度都相當理想，服務生態度誠懇友善。每位席上擺有齊備嘅西式餐具及餐牌，簡潔衛生。餐巾上以銀絲綉出店名，極富貴氣，而且好襯「銀座」個地點添。

餐牌印上兩款聖誕套餐「Christmas Lunch Course」（12,960円/人）及「Christmas Special Course」（32,400円/人）嘅詳盡內容。酒店以電話訂座時，接線生講明八人要清一色訂同一個餐，當時即點咗「Christmas Lunch Course」，用餐當日經理姐姐卻提議不妨換成每款套餐要四份，臨時嘅彈性改動其實正合姨媽們心意。嘻嘻，既然係慶祝聖誕節，咁當然係要叫酒飲啦，相信人多續樽叫應該最抵，所以就應推介點咗枝日本清酒「磯自慢純米大吟釀四合瓶」（21,600円）。

聖誕海陸大餐由年輕俊朗嘅大沼豐師傅（Yutaka Onuma-san）全權負責。師傅開始動手燒煮前，先展出鮮美嘅食材，包括龍蝦、帶子、和牛，並問及各人嘅飲食喜好要求，如敏感問題、牛肉生熟度等等，細心兼認真。

1)      「Christmas Lunch Course」由橙亮嘅「Ocean Trout with Seasonal Vegetable」作序。貌似三文魚嘅兩件Ocean Trout（Google之神譯作為「鱒魚」）刺身厚潤柔軟，連同頂面嘅魚子醬及碟邊嘅白汁食落口，鮮味洋溢味蕾。

2)      第二道「Foie Gras Sauteed」賣相未必吸引，但一刀切落去，手仔已感到從刀鋒傳出鵝肝軟滑嘅質感，入口即可証實靚肝皮層香脆，肝心極其幼嫩，當真肝不可以貌相哦！

3)      是日例湯「帝王蟹湯」鮮濃芳香、窩心暖胃。

4)      鐵板菜式由「Scallop with Marinier Sauce」打響頭炮，型男師傅分開咁燒煮帶子及以牛油煮汁，最後一刻刨上檸檬粉後即搞掂。帶子煎煮時間掌握得恰到好處，外香脆內軟嫩，未入口已聞到檸檬粉傳出嘅清新香氣，牛油秘汁令帶子更為鮮香甜美。

5)     兩款午餐中最多功夫就係「Christmas Special Course」嘅龍蝦主菜「Homard Brue Steamed」，大家可目擊鹽山嘅建造及龍蝦如何於鐵板上蒸煮、去殼、加燒、調味，真係大開眼界！

6)      兩份套餐其實都包咗一道和牛「Wagyu Beef Steak with Onion」，所選之部位因應套餐價格而有所不同，厚身嘅為牛柳，雲石紋理交多嘅則為西冷。得知席上全為家人，師傅就主動提出每人每款分半件，一同試齊兩款靚牛。肉質紅潤軟腍嘅和牛半溶於口腔，油脂及肉汁同樣豐腴。

7)      單尾為米形意粉「Risoni」，只用芝士調味都好溜吓，所以每人一小碗份量已經好夠。

8)      甜品環節進行前全體都要先移玉步前往後廳嘅豪華梳化區。點好餐飲後，妹妹隨即推出聖誕版甜品車，並續一切出鬆軟香潤、微甜不滯嘅「Christmas Strawberry Cake」。

9)      喺日本飲特濃咖啡真係可以保證堅夠濃。

10)  另伴嘅四色朱古力就好甜吓，邊飲咖啡的話絕對唔需要加糖。朱古力四種口味分別為紅色嘅士多啤梨味、白色嘅榛子味、綠色嘅開心果味、啡色嘅威士忌味，對果仁敏感嘅朋友要小心唔好食錯。

於銀座區購物真係可以停唔到手架，不過點買長輩們中途都要歇一歇。原本計劃咗去上榜熱店「Tricolore」飲下午茶，無奈店子早已滿座，八人唯有改去附近仲有大把位嘅「Noa Café」。

前往地牢餐廳必需行落十幾級樓梯。適逢聖誕佳節，接待處擺出聖誕樹，好有氣氛。服務生態度唔算差，只係比起平時遇見嘅差咗份熱誠同衝勁。黐立立嘅雲石餐桌上有自助餐具及餐紙，埋位姨丈即要狂抹，明顯衛生水平唔係咁高。厚本餐牌共有十五頁之多，名就日英對照，但詳細說明就只有日文版，另附彩圖參考。小食及甜品系列大多可以散點或跟指定飲品叫套餐。

1)      Hot Cocoa（620円）：細佬杯熱朱古力飲落淡而無味，而且稀如奶水，奶味多過朱古力味，完全唔掂！

2)      姨媽姨丈們分咗個Panini Set（1,100 円）同Mont Blanc Waffle Set（1,420円），食後感想係：「Panini好似烘過嘅三文治咁，嗰餡唔乾，味道一般。粟子Waffle個樣靚過客Panini，個味唔會太甜，正正常常。」

3)      Dark Syrup & Soybean Flower & Sesame Gelato Waffle Set（1,420円）：節令限定嘅「黑蜜糖芝麻雪糕窩夫」賣相甚為震撼，兩件厚厚嘅窩夫中間夾咗球芝麻雪糕同忌廉，頂面再淋上黑蜜糖漿及黑蜜糖粉，顏值夠高。配料芝麻雪糕清涼微甜，忌廉亦幼滑軟潤，當中嘅黑蜜糖微甜討好，只可惜窩夫厚而偏實，毫不香脆，唔得鬆化，直令甜品美味程度大打折扣。

聖誕節最旺場嘅食肆主要都係西餐廳，日本亦不例外，結果正日晚市只有酒店壽司店「銀座久兵衛 京王プラザホテル店」（Ginza Kyubey, Keio Plaza Hotel）有位。多人派對之訂座必先預定埋清一色嘅晚市套餐，團長就從六款中選出唯一取自店名嘅「久兵衛御夕食」（Kyubey Assorted Sushi；17,820円/位），共包有十六件壽司及卷物。

一家八口被安排入座「桜」房中進行，要先除鞋及脫去外套才可入座。座位均圍繞著主廚小高師傅嘅大舞台，不過由於全冇椅背或椅柄，長輩們進出時都甚有難度。每位席上有一個托盤擺放齊備嘅自用餐具及醬油。食物早已訂好，飲品就各自叫。四頁飲品牌日英對照，簡單易明。小肥自己叫咗枝細瓶裝日本清酒「八海山純米吟釀」（3,330円/300ml）。

面相嚴肅嘅小高師傅其實十分友善，眼見跟長輩們介紹魚生時發生言語障礙，佢就自動玩看圖識魚。晚餐嘅十六件壽司雖則續件上，但大部份嘅魚生早已切好於砧板上，等待大師傅續一握製；當時感覺其實有少少不對勁，因為印象中傳統做法好似續款靚魚由師傅即場處理喎，何況高級酒店餐廳唔係應該更講究咩？！

1)      師傅忙於準備壽司前，先安排一小碗海帶為食客潔淨一吓味蕾。

2)      打頭陣嘅為鮮紅亮澤、厚潤帶爽嘅「醬油中卜口壽司」。

3)      意外地，「肝醬剝皮魚壽司」味道較清淡，唔似平時食開嘅咁香濃，而且魚肉偏韌，個人有少少失望。

4)      面上灑咗鹽嘅「魷魚壽司」比剝皮魚壽司更硬同韌，食落只有強勁嘅咸味，直令XO仔食到咪起雙眼，面部表情確真與被傷口上灑鹽無異。

5)      輕輕燒過嘅「海帶鯖魚壽司」鮮香帶甜，比喺香港食開嘅柔和易入口得多。

6)      或許細佬嘅辨魚能力唔係咁強，食完鮮紅厚潤嘅「まぐろ壽司」後即同旁邊嘅姨丈細聲問及點解咁快會重複嘅，結果聽返錄音方才發現第一件落肚嘅原來係中拖羅。

7)      初嚐嘅「鰆魚（Sawara）壽司」質感猶如鰤魚般爽厚肥潤，掂！

8)      成晚最多功夫必數即場處理生猛狂跳嘅竹籤蝦！活潑嘅蝦隻於冰鎮冷靜過後就以竹籤串起，隔咗一陣先由大師傅親自去殼、挑腸、並握成壽司。「竹籤蝦壽司」超級爽彈清甜，屬整餐之最！

9)      已塗上醬油嘅「海膽壽司」鮮濃嫩滑，不過可能係自己俾香港相熟嘅師傅們竉慣，硬係覺得份量唔夠澎湃咁。

10)  色澤粉嫩嘅「大卜口壽司」紋理鮮明，半溶於舌上，鮮味迅即洋溢口腔！

11)  微微燒過嘅「赤鯥壽司」厚潤肥美，鮮甜可口。

12)  竹籤蝦嘅蝦身就做咗「竹籤蝦壽司」，其頭尾就交由廚房炸煮。雖則師傅話蝦頭及蝦尾可連殼吞落肚，無奈食落勁多渣，唔係咁吞得囉。

13)  「赤貝壽司」不單外表橙亮有光澤，咬落更加係爽潤有彈性，滋味無窮！

14)  第一次接觸嘅銀皮「慈魚壽司」魚肉白裡透紅，唔知係魚味偏淡，定係師傅調味時重手咗少少，細佬只係食到成口薑嘅辣味。。。

15)  只屬和暖嘅「麵豉湯」味道偏咸，甚為失色。

16)  「蜆壽司」味道香甜就夠香甜，不過有點好奇怪，蜆隻一半爽嫩，另一半則嚡韌有渣，質素好似唔係咁得。

17)  幾件吞拿魚壽司中唯有此味溶溶爛爛嘅「火灸吞拿魚壽司」賣相最唔得，亦相信讀者們單憑照片都唔會估到係酒店餐廳嘅出品，仲要係名牌酒店「Keio Plaza Hotel」！XO仔見狀頓即覺得師傅除咗有敷衍遊客之嫌，對自己更加係毫無要求，令人失望透。

18)  壽司餐可以話越食越差，即使小肥一向怕骨唔食鱔，兩件「穴子壽司」都係轉讓俾旁邊嘅姨丈，但都講得出穴子切得同燒得都幾有問題吓。

19)  姨丈講得都幾有道理，食完幾件味重嘅壽司後先上件未有調味嘅「中卜口壽司」，即使係靚魚都已經食唔得出其鮮與甜，可算係設計及舖排嘅失誤。

20)  四色卷物外型唔係太靚，但幸好味道正正常常，十分爽脆。

21)  食得出「蛋蛋」方磚啱啱喺雪櫃拎出黎，溫度凍而且硬身，吃畢直教人繼續搖頭。

22)  反而壓軸嘅「紫蘇蘿蔔卷」巧薄清新，芳香爽甜，更可一解膩感，清新消滯。

「東京凱悅酒店」房費所包嘅早餐券適用於酒店三樓之「日本料理 佳香」，早上七至十時可享用和式自助早餐（原價3,100円/大人；連稅3,683円/大人）。

日本餐廳以木為主嘅間隔感覺十分溫和舒適，室內外可見簡樸嘅屏風、禪式石池及靚花擺設，雅致得很。聖誕期間，店內坐滿食客，為怕影響他人，細佬不便於用餐區內隨便拍照。團友們未能一齊坐，不過都被安排入座鄰近嘅二至四人散座。

和式早餐每人包咗一客燒魚、麵豉湯及飯或粥：

1)      燒魚皮層香脆，不過就勁多骨，對XO仔黎講實在係太高難度啦！

2)      麵豉湯清香暖胃。

3)      粥品上枱前都係用火煲住嘅。大大碗白粥熱辣辣，而且軟綿綿。

自助餐飲區內有不少送粥嘅濃味配料，包括漬物、關東煮，當中個人鍾情食獅子狗卷。健康之選有生果、果汁、乳酪、清水。其餘有香腸、煙肉、雜菜、炒蛋、沙律等。熱食中最有驚喜就係芳香無比、爽潤巧脆嘅天婦羅舞茸菇，送粥一流！

講真遊日本絕少會揀中餐食，因為個心總覺得日本版嘅中華料理唔可以同香港食到嘅媲美。機緣巧合下，於家庭聚會中跟叔公嬸婆坐埋一枱，大談食經時得知兩位長輩每次去東京玩都必定要訂位去「日本橋 紫苑」食翅翅，肥肥家族聽到流哂口水，所以就決定去見識吓！

餐店位於日本橋三越本店新館十樓。正月將近，接待處旁展出多款迎春精美禮盒。店子設有兩間私人廂房，分別可容納八人及十二人。樓底雖然唔算高，不過勝在有地毯吸音，厚墊椅櫈亦十分舒適，個人只係略嫌冬天嘅暖氣過強，越食越熱。四人被安排入座用餐大堂靜靜嘅一角，半邊為梳化。舖有白色枱布嘅餐桌上簡單擺有自用餐巾及筷子，埋位續一派上熱毛巾，衛生潔淨。

適逢平安夜，午餐就點咗樽細粉紅色香檳碰碰杯。有一點好奇怪，就係香檳開咗後就一直放喺枱上，未有放入冰桶保凍，喺二十多度高溫下迅即變暖；此外，成餐飯都冇服務生為三人斟添酒品，結果要自己黎，感覺好似唔係太專業囉！唔想咁早飲酒嘅哥哥就叫咗壺台灣清香凍頂鳥龍茶（540円/位）。

厚本餐牌中、英、日對照，推介菜式更附有彩圖。最意外就係遇上水魚節，有成頁咁多嘅水魚菜式，小肥喺香港都未見過。出門前得到叔公同嬸婆教路，午餐每人只需點一份「紅燒排翅毛鹿鮫」（21,600円/位）已經夠哂飽。以鐵鍋滾住上枱嘅「紅燒排翅毛鹿鮫」比細佬個頭還要大，賣相震撼到連附近嘅食客都忍唔住要八吓四口子食緊乜，認真唔講得笑！大大梳靚翅不僅熱力十足，而且每份都係咁厚身，實屬勁量級！翅翅質感半腍半爽，芬芳潤滑，紅燒湯底鮮濃甜美，極品也！請留意，貴客可另加2,160円由上湯底轉為蟹湯底，不過哥哥同媽咪都話原味更出色。

靚靚媽咪同姨媽們愛購物，不過除咗衫褲鞋襪之外，最令大家瘋狂嘅都要數卡通精品，嘻嘻，依方面XO仔絕對遺傳到佢地啲基因呀！家人畢竟不同年代出生，陪著長大嘅卡通人物亦好唔一樣，上網找尋購物熱點時竟然俾細佬發現東京車站內原來有條「東京駅一番街」（Tokyo Character Street），有齊大家心儀嘅蠟筆小新、鬆弛熊、Hello Kitty、比卡超、龍貓、P助等角色嘅精品店，就連外國代表史努比自己都有個Snoopy Town！食嘅、擺嘅、玩嘅乜都有，款式琳瑯滿目，特價貨品同扭蛋抵過香港多多聲，絕對稱得上為精品天堂！買夠五千円仲可以憑護照退稅，不過大家要記緊於購物前先去服務櫃檯登記及索取「免稅收理單」哦！

第一次喺東京過聖誕節，平安夜就一反傳統地棄選西餐，於日本名飲食網「食べログ」（Tabelog）度揀咗間超高評價3.95分（最高4分）嘅「東京肉しゃぶ家」（Tokyo Niku Shabuya）食日式涮涮鍋，一於烚吓烚吓咁過。

餐店木造嘅門面有射燈照明，於街道上十分起眼，只係外國人未必識睇其日文嘅招牌。小店一眼睇哂，只有十二個圍繞住師傅大舞台嘅吧位，光亮簡潔，晚市要分兩輪都合情合理。裝潢中最可愛就係牆上一幅著住和服嘅狗仔畫像。細問下，得知講得一口流利國語嘅店主兼主廚高忠伸先生為韓日混血兒，2016年創立嘅店舖為與太太之愛情結精，通往廚房通道之紅白門簾正正印上二人嘅芳名，濃情厚愛盡在不言中！

飲品選擇中，日本清酒九成九都只可以續杯叫，姨媽們見係聖誕節就決定豪啲飲十四代（1,250円/盒），可惜酒品唔知開咗幾多日，飲落當中應有之酒味已經揮發咗大半。聖誕期間，餐廳只提供一款廚師發辦聖誕大餐，每位22,000円，另加8%稅，訂座時必先預繳五成訂金：

1)      為平安夜晚餐作序嘅兩片薄切牛脷色澤粉嫩，輕輕燒過足以令其質感鬆爽軟潤，用金碟承載更顯佳節盛宴貴氣十足。

2)      同樣以金盤呈上嘅兩件北海道 ニシン（Nishin）魚籽刺身顏色同口感都一樣咁清新，不用點上調味已夠鮮爽。

3)      另配嘅牛尾湯好暖胃，不過就有少少嚡同粉，唔係咁啱小弟口味。

4)      和牛海膽卷橙紅嘅配搭十分鮮艷，一口食落去，黏上甜豉油嘅和牛薄片及海膽刺身同時化於舌上，兩款海陸主材嘅芳香及鮮甜慢慢滲進味蕾，美妙極！

5)      或許係個人對牛尾嘅偏見，XO仔覺得清燉牛尾雖然好夠腍，不過其肉質及湯底均偏油膩同唔係咁夠味，反而頂面點綴嘅蔥絲勁清爽惹味。

6)      不知不覺已經食到第六道菜，唔講真係未必睇得出熱食嘅三款主材咁猛料，包括魚翅、鮑魚、海膽，咪即翅鮑膽？！舖面嘅一梳梳魚翅爽脆非常，撥開先見到魚翅塔原來以厚潤彈牙嘅鮮鮑及嫩滑嘅海膽墊底，組合口感豐富，鮮美可口。

7)      正當細佬以為翅鮑膽屬重頭戲，點知跟住上場嘅香箱蟹再另起高潮，因為席上嘅長輩全為蟹痴。嘻嘻，拆蟹重任當然係師傅預先做啦！已去殼嘅香箱蟹肉橙白艷麗、幼嫩柔軟、鮮甜無比，底層嘅碎柳混入橙美嘅蟹膏及蟹籽即增強厚潤濕脆，正蟹確真無懈可擊！

8)      既然店名「東京肉しゃぶ家」用上「肉しゃぶ」（Niku Shabu）而起，理應為其專長，海陸大餐亦不可缺少涮涮肉！靚肉上枱前先要擺好嗰陣，滾熱辣嘅火鍋每二人一組，調味嘅芝麻醬、酸汁、蔥碎、蘿蔔蓉、薑蓉則每人一份，設備及配料都係咁齊全，絕對講究，且衛生非常。三款肉品為不同部份之和牛，單憑其獨特嘅紅白紋理已睇得出油脂分佈及比率有所不同。下圖中最多雪花嘅和牛薄片每人一大塊，半溶於口，係一種充滿犯罪感嘅美味！件數最多嘅牛脷因切得夠薄，於滾湯中拖兩拖已夠熟，入口軟腍帶微微韌度，同頭盤輕輕燒過嗰兩片牛脷完全唔同。最後兩件和牛看似厚身，但烚完縮埋水後就剛剛好，咬落肉質超級柔順軟滑，每個部位都各有特色。除咗和牛之外，涮涮鍋環節每人仲有一杯仔正菜及雜菌，每款均芳香輕盈。

9)      肉食中壓軸上陣嘅和牛壽喜燒拌蛋黃泡泡外表鮮黃亮麗，夠哂搶眼！經過蛋黃泡泡洗禮嘅和牛壽喜燒尤其芬芳香滑，咀嚼時壽喜燒嘅甜味慢慢散發進口腔，真係甜到笑架！

10)  單尾嘅一碗清湯麵品十分暖胃。

11)  其實食完碗麵大家都已經攬住個肚肚話飽，誰不知結尾仲有個香箱蟹飯，師傅攞個蟹煲show quali嗰一刻也太震撼同吸引了，順便提及到飯品混入咗醋醋可有助消滯，XO仔心諗幾大就幾大啦，放緊假一於去盡佢，飽極都要騰出空間食多碗飯！香箱蟹飯個飯底粒粒飽滿肥潤，以香箱蟹肉、蟹膏、蟹籽撈製，集齊爽脆鮮嫩清甜於一身，正到暈呀！

「全日空航空公司」於香港國際機場並無設置貴賓室，商務及頭等艙嘅搭客可選擇享用其星空聯盟伙伴嘅三個貴賓室，亦即「泰國國際航空皇家風蘭貴賓室」（Thai Airways Royal Orchid Lounge）、「聯合航空貴賓室」（United Club）、「新加坡航空銀刃貴賓室」（Singapore Airlines SilverKris Lounge）。多得櫃檯位姐姐提點，肥肥家族最終決定採納佢意見，揀去最近嘅「銀刃貴賓室」，好等同行嘅長輩行少啲路。

比起機場內其他地方，貴賓室嘅樓底偏矮，不過勝在面積夠大，可容納多位旅客，厚墊椅櫈都好舒適。最開心就係見到四周嘅聖誕樹、薑餅屋、雪人等佈置，洋溢著濃烈嘅聖誕色彩。室內可免費上網，亦有報紙及雜誌任睇，不過爛飲嘅XO仔第一站就梗係去酒吧啦！中午時份飲客不多，小肥可任影唔嬲。眼見聖誕節有限定品「Christmas Sangria」，所以就試咗杯同雪人對飲，可惜雞尾酒過甜且酒味唔香，組合幾上頭吓，不喝也吧。

除咗接待處之外，場內嘅服務生不多，餐飲都係自助式為主。飲品區凍、熱飲齊備，有水、咖啡、奶、茶包、果汁、汽水、啤酒等。自選食物嘅種類都好多，包括沙律、點心、中湯、西湯、飯、意粉等。個人主攻燒賣同雞翼，質素一般，但似乎屬最安全之選。熱食中嘅「叻沙」及「雲吞湯麵」均即叫即煮，製作需時約五至十分鐘，另有配料供食客自己後加。細佬因敏感問題唔敢食叻沙，不過都有記錄到姨丈嘅食後感想：「蝦就冇乜味，啲麵就腍咗啲，豆卜爽口，湯底唔會話好辣，椰香味好濃，整體算唔錯。」甜品除咗有大路嘅雪糕同生果之外，仲有「白果腐竹雞蛋糖水」，個人因嫌棄糖水賣相唔係好得，望落去好似好稀咁，所以冇擔試。最搶手嘅就係「自家製豆腐花」，可惜到XO仔見到時已經冇哂，希望下次有機會品嚐。

全日空NH 860選用「夢幻客機」B787型號班機，商務機艙嘅藍白設計光鮮衛生，獨立式座位超級闊落，除咗可拉出一張伸縮餐桌之外，椅櫈其中一邊仲有張茶几，空間夠又好用。而且椅背腳踏延伸控制、影音系統、連窗簾開關均全電動化，高科技容易操作，質素又高，姨媽最欣賞就係全程機覺得尤其安靜及平穩，舒適得很！

全日空嘅厚本餐牌係每季出一次，每次會印出幾個月不同班次嘅餐飲詳情，但由於內容隨時會變，故以網上公佈嘅最為準確，點菜時亦會由服務生直接與乘客講解，專業貼身嘅同時感覺十分環保。飛機起航冇耐先有

家人遊東京總會入住「東京凱悅酒店」（Hyatt Regency Tokyo），因對其寬敞企理嘅房間及設備有信心嘅保證，加上會所層嘅「Regency Club Lounge」冇咁擠迫，除咗早餐之外，全日都有輕膳提供，歡樂時光更不乏酒品，早已深得長輩歡心。酒店於限定時間有免費穿梭巴士來往新宿車站，區內嘅購物中心已夠姨媽們買個夠，要前往其他區域嘅交通亦方便得很。

雙人房「2 Twin Beds with Club Access」寬敞衛生，空調充裕，大牀舒服，浴室亦光猛潔淨，日用品及茶、水、咖啡等應有盡有，配套十分齊全。大家要留意，六十二歲或以上之貴客均可享長者折扣優惠。

個人最欣賞就係酒店嘅服務，喺門口搭的士，哥哥仔落力又好禮貌。此外，為怕訂座時會發生言語溝通問題，入住前小肥先以電郵跟酒店職員聯系，找其代打電話，嘻嘻，唔洗獻醜講啲唔咸唔淡嘅日文，又可以慳返啲長途電話費，可謂一舉兩得！

「北の味紀行と地酒　北海道」（簡稱「北海道」）位於飲食購物中心「Shinjuku i-LAND Tower 」44樓高層，六點後有專𨋢直達，十分方便。

步出升降機門，已聽到店內客人飲到興高采烈嘅聲浪，歡樂氣氛洋溢。可能見同行嘅全為六、七旬長者，八人派對就被安排入座私人廂房，空間感足。

居酒屋文化，第一時間就係叫生啤飲（朝日啤酒：930円/大杯；590円/中杯）！餐桌整潔企理，埋位每人先有一條熱毛巾，餐具全為自助式。最型就係個電子點餐系統，有彩圖參考之餘，仲有中、英、日、韓，四種語言可選。居酒屋絕對冇玩年齡歧視，同時亦有提供紙版酒牌及餐牌。

1)      北の黃金雞（690円）：炸至金黃嘅雞件皮層乾巧香脆，雞肉幼嫩，屬送酒佳品！

2)      海の惠み彩りサラダ（1,390円）：色彩鮮艷嘅海鮮沙律其實係什錦刺身沙律，另配山葵豉油。沙律嘅什菜鮮爽，幾款刺身則不過不失。

3)      ずわい蟹天麩羅（1,390円）：松葉蟹天婦羅層炸皮輕巧鬆脆，反而個松葉蟹食落唔係咁幼嫩，偏咗少少嚡口，席上嘅蟹王蟹后都有少少失望，所以試咗一客就冇再追加。

4)      北の黃金雞　塩レバー（530円）：此道黃金雞雞肝喺厚本餐牌上並冇列出，只係XO仔撳撳吓個電子餐牌無意間發現。簡單以鹽、蔥、芽菜點綴嘅黃金雞肝清香肥潤，完全唔乾唔嚡，連埋啲配料食落即增添爽脆，絕對係極品！

5)      枝豆（490円）：枝豆正正常常，冇乜驚喜。

6)      冷やしトマト（530円）：蕃茄迷爸爸大讚冰鎮蕃茄爽甜多汁。

7)      栃尾揚げ 山わさび添え（590円）：新潟名菜栃尾油炸豆腐以山葵醬作餡，食落有啲似咸味嘅雪芳蛋糕咁，個人略嫌炸豆腐偏乾同嚡，唔得鬆爽。

8)      夢の大地の餃子（690円）：平心而論，餃子嘅質量其實同大家喺超市買到嘅版本差唔多，皮夠薄，不過個底就硬咗少少，唔夠脆卜卜。

9)      海鮮塩焼きそば（790円）：炒麵嘅油麵底韌彈牙唔油膩，不過海鮮配料就好似少咗啲，如果可以加啲椰菜或紹菜，相信效果會更爽脆。

10)  蟹味噌グラタン（880円）：意日混血嘅味噌焗蟹砵熱力十足，味道香濃，但真係唔食得多，因為都幾溜。

11)  串燒き盛り合わせ7点（1,490円）：八人點咗兩客七式串燒拼盤，上枱時先發現原來拼盤上嘅七款串燒並非鎖定，而係落單時任由廚房揀選。串燒中以雞皮最為香脆惹味，其餘嘅秋葵串清新爽潤，雞肉串好夠肉汁，雞翼都好香口。

12)  食咗多款小食，長輩們都要有啲飯麵落肚先滿足。拉麵只有細碗份量，湯底分別有鹽味（塩ラーメン）、醬油味（醤油ラーメン）、麵豉味（味噌ラーメン），三款口味均590円，結果當然係三款叫齊啦！

13)  蟹チャーハン（890円）：相比起下，蟹肉炒飯比拉麵更有睇頭！金黃色嘅炒飯底粒粒飽滿香潤，撈入蔥碎及蟹肉絲，口感即變得幼嫩爽脆及鮮甜。

14)  茶碗蒸し（490円）：細細碗日式燉蛋輕盈軟滑，清新甜美，窩心暖胃。

由於抵步當日就係姨丈生日，因難以估計航班會否延誤，XO仔又想搞吓氣氛喎，所以就預早經入住嘅「東京凱悅酒店」（Hyatt Regency Tokyo）於其餅店「Hyatt Regency Tokyo Pastry Shop」訂咗個蛋糕，並安排晚上十一點半送上長輩房間。

，連同蠟燭、八份餐具及開水推進房間，整潔衛生，而且十分周到。

入口香滑鬆軟，鮮甜輕巧，絕對係好睇又好食！

同其他酒店唔同，每組新祖谷溫泉飯店蔓橋嘅客人都會圍住炭爐享用晚餐，除咗可以取暖之外，亦會有一D食物係喺炭爐度燒，好有特色。

所有客人都會去餐廳用膳，去到門口已經見到歡迎牌寫住我哋個名！

入到去已經見到好多食物已經準備好，不過熟食都會按照每組客人用膳嘅時間而各自準備，所以唔使擔心食物會變涼。

我哋點咗兩壺熱sake，暖暖身！

我好鍾意食會席料理，其中一個原因係我見到咁多細細碟覺得好療癒，哈哈。

當中最特別嘅就係呢個『木偶串燒』，由丸子、豆腐、蒟蒻而成，係德島當地嘅特色鄉土料理。

夜晚睇景睇得唔係咁清楚，所以我6am都起身再浸多次，望住天黑到慢慢天光，好療癒。（早上一個人都冇，所以可以影到入面張相比大家睇）聽講某D月份，早上可以睇到雲海添！內湯 嘅泉水其實同山上嘅一樣，只係景觀無咁好，不過內湯入面嘅護膚品以及梳洗用品就比較齊全👍🏻

由於昨日已返回黃山市中心，而我們亦再次下榻於「黃山高爾夫酒店」，理所當然今早在這裡的「果嶺陽光西餐廳」享用自助早餐。基於回程是乘坐12:50pm的航班，並需預早1.5小時到機場辦理登機手續，而旅行團行程一早已列明不會安排午餐；再者，回程一樣是廉航包機，所以，不會有飛機餐供應，故此，早餐打算作為兩餐來吃，一於吃飽一點！

雖然我們是乘搭中午的航機，但早上還是安排了一個室內景點「徽州文化博物館」，既然來到徽州，沒有理由不多了解一下吧！再者，其實這博物館就是往機場的中途，離酒店十分近，只是10分鐘車程，繼而往機場也只不過是5分鐘車程，大可順道一遊。

「徽州文化博物館」為安徽省第二大綜合性博物館，建築面積達14,000平方米，以徽州文化為基本內容、徽州地理山水為背景、徽州建築風格為基調的一組多功能綜合建築及徽派風景園林。館藏極為豐富，收藏有陶瓷、硯臺、徽墨、書畫、徽州三雕、青銅器、玉器、雜項、古籍圖書、徽州文書……等各種文物近10萬件。

始終我們的逗留時間有限，這就是跟團的弊處，故導遊先安排了館內的職員作一個概略的介紹，然後，才各自散去參觀喜歡的展館，而我們也只是隨意走走，看得多少就看多少。其實，博物館外的環境頗優美，隨意逛逛也頗舒服。

第一日抵達黃山屯溪機場，隨即上旅遊巴開始行程，當然沒有機會看看這個小巧機場。而今日準備離境返回香港，就可以有點閒暇在機場內逛逛。

由於機場離黃山市中心很近，而且，機場的規模亦很小，故預90分鐘辦理登機已非常充足。在離境大堂，就只有數個櫃位辦登機，商鋪也不多；反而，入到禁區那裡，商鋪則多了一點，但其實也不多，只是三數家，主要都只是賣賣手信、紀念品之類的店鋪。

約3:10pm抵達香港國際機場，取過行李後才3:45pm，肚子剛好有點餓，故此，就來到抵港大堂對開的環亞機場貴賓室（屬禁區外）吃一頓下午茶才回家。

這個貴賓室比禁區內的另外兩個機場貴賓室要小很多，但環境佈局則依然十分舒適。而餐點亦有少少分別，並非全自助，而是半自助，即沙律、麵包、三文治、湯品、咖茶、汽水可以任取，而主菜則6選1，包含亞洲、日式及西式風味，更是全日餐單，即任何時間都有供應。

自助項目的食物也不錯，故可以先飲熱湯，配點意大利香草包及餅乾條，再來點沙律也不錯。

我們揀了亞洲湯麵的五香牛肉湯麵及西式精選的卡邦尼，前者睇得出製作用心，湯底色沉卻不濁，濃郁芳香，麵條彃牙，牛展軟腍入味；後者亦有水準，意大利麵煮得咬口，每口也充滿白汁香，伴以煙肉，有陣陣鹹鮮香味。

呷完最後一口咖啡，是次旅程就真真正正地結束了！
(註：此禁區外的環亞機場貴賓室已於2019年10月起暫時停用)