Tower Bridge係倫敦地標之一，橫跨River Thames，連接住Tower of London，不過經常被誤為London Bridge。因為船隻過橋數量不大如前，所以起橋次數少左，而且船隻過橋前要最少二十四小時前通知。據導遊先生講，佢細個返學每次要走堂，都會計準Tower Bridge 起橋時間，製造藉口，實則喺賴牀訓多幾個字，真係搞笑。

白金漢宮係英女皇o既辦公室，雖然英女皇年紀唔輕，不過每日都會返工，了解及聽取所有報告。導遊先生話我地真係好彩，因為佢一睇白金漢宮頂枝旗就知道英女皇喺宮內，而且我地去到嗰一刻剛好有客人乘坐馬車入去見英女皇。

因為離英女皇鑽禧紀念活動只剩兩星期，所以白金漢宮周圍o既守衛開始比平時嚴密（個人其實覺得好鬆懈，因為旅客可以走到好近），我地亦可以睇倒工作人員正在忙碌搭建舞台同觀眾席。

導遊先生一早提醒過我地千奇唔好行得太近，因為D禁衛軍係唔會減慢步速，更加唔會停下腳步黎就D旅客或途人，只係會直行直過。

同D禁衛軍咁近距離先知道原來個個都係身材健碩o既後生仔，而且每位都同樣有型靚仔，莫非全部都經英女皇篩選過？

據說為免有人喺英女皇鑽禧紀念活動及倫敦奧運期間搗亂，如掉炸彈入垃圾桶而製造恐慌，倫敦市內，包括各酒店，大小街道及機場等，都收起哂D垃圾桶，以防萬一。黎左倫敦三日，終於比我地喺最接近奧運會場o既Westfield商場見倒第一個垃圾桶啦，仲要咁有環保意識地分開三格，真係難得。

我地喺五層高o既Westfield商場度行左幾個鐘，發現原來入面有間叫John Lewis o既百貨公司，係倫敦奧運特許紀念品銷售店。喺店內見倒有幾款不同o既吉祥物，附圖中帶燈色o既Wenlock就係其中之一款。精品店隔離係一個設有不同望遠鏡o既瞭望台，比大家更加清楚地欣賞奧運村。