我地訂酒店房時為方便參加旅行團，專登訂埋酒店o既自助式早餐。其實我地逗留喺倫敦咁多日都有食，不過只有依日先有最多時間去欣賞。

雖然話係食自助餐，酒店餐廳South West 7o既服務生都好客氣，不時會幫客人攞食物，態度友善且落力，一坐低就會自動走過黎問我地要唔要咖啡或茶，加上地方闊落寬敞，大家都食得好舒適自在。

XO仔對餐廳所提供o既中西式食品都好滿意，尤其鍾意自創o既「流心太陽蛋蘑菇雞粥」，班戟，同朱古力碎Croissant。

當日，我地由酒店乘坐倫敦地鐵London Underground，又稱The Tube，轉左幾次車，到達倫敦奧運公園站。

正當不常外遊o既小肥以為只有香港有免費報紙時，黎到倫敦先發覺原來英國都有，不過佢地就冇香港人咁有公德心啦，因為大部分搭客都會將睇完o既報紙周圍放，搞到成車廂都係報紙，非常不雅不潔。就連倫敦市長都要喺地鐵車廂內外登出語句，勸諭搭客環保地處理「垃圾報紙」。

因為奧運公園工程尚未完工，加上英女皇鑽禧紀念慶典將近，守衛開始加強，所以我地只可以由其鄰近o既Westfield 商場遠觀。

2012年對倫敦真係好有意義，除左要主辦2012奧運會，重要為英女皇鑽禧紀念舉辦不同慶祝典禮及活動，今年英國旅遊業應該會好唔錯。為左要將兩件喜事溶埋一齊，此奧運公園將會喺奧運會後改名為"Queen Elizabeth Olympic Park"添。

越南粉中講劣都要係依碗啦！喺香港商場food court搵野食時，成日都會覺得叫碗越南粉係最安全同最快捷o既，所以諗住喺倫敦都一樣啦？！點知... 不但店員態度惡劣，碗粉個湯底仲好咸，粗麵條分唔開一條條，夾起上黎仲係一舊舊，牛肉就超嚡，真係失敗到極點！XO勸大家唔好去試！

Auntie M 一早都話左比我地知喺Fortnum & Mason訂位食High Tea，要一人叫一份，唔可以分黎食；雖然份量係好勁，因為食物離開餐廳會容易變壞，同埋唔係好得體，食剩o既食物係絕對唔可以打包返酒店o既。

普通o既Fortnum & Mason Afternoon Tea Set係GBP 38一份，另加服務費及稅。除左餐茶外，個套餐包有迷你三文治（Finger Sandwiches)，Scones，精美蛋糕，同Macarons，食物任添。

因為小弟唔係好食三文治，所以就選擇食貴GBP 2 o既Fortnum & Mason High Tea。依款套餐同之前嗰款唯一不同之處就係個迷你三文治換左做一款自撰熱食小點。XO仔當日揀左個龍蝦蛋包為熱食小點，嘩，正到dum幾聲呀，可惜依款熱食係冇得再添o既。小肥一向唔浪費食物，而且又見可以無限添食物，我就一於當左個下午茶係晚餐，食個"High Tinner"（即High Tea + Dinner），飽到攬住個肚走。用GBP 50食左兩餐高質食物，如果胃口好，食量勁，真係可以係幾抵食架。

我地喺Fortnum & Mason嘆完個High Tinner後，返酒店o既途中經過Burlington House，見條路封左，門口又有一大堆人圍住影相，大家估計一定係有VIP到訪，莫非係英女皇？！