中國城位於唐人街核心地帶，我地由酒店搭地鐡半個鐘頭就到，亦唔需要行太多路。酒樓門面裝修好有中國傳統味道，小橋流水，好似幅國畫咁，非常詩意。

因為uncle係熟客，所以招呼好到不得了。講到食物，其實中國城所提供o既餸菜質素真係好好，不過最可惜就係佢所有食物同一時間上枱，一窩蜂黎哂，食物好快涷哂，令大家食慾大減：

薑蔥龍蝦麵（GBP 35.50）：龍蝦爽，薑蔥味香濃，不過麵質就腍左少少。

清蒸多寶魚：條魚好新鮮，肉質嫩滑，全枱人都讚不絕口。

明爐燒鵝（GBP 13）：燒鵝肉質唔嚡又夠多汁，個人覺得做得好過香港名牌X記。

千葉豆腐：薄薄o既豆腐片好滑，不過整個餸唔夠味，只可以話OK。

鮮魷蒸肉餅：個肉餅看似好厚，但係意外地做得好鬆，亦好香口，唔錯！

如果大家準備去幫襯，記得叫伙計慢慢上餸，或者可以安全D，自己食完一碟先叫第二碟。