二零一二年五月尾o既倫敦，到處都見到有關伊利沙伯二世女皇鑽禧紀念o既活動情報同精品。就連英國名百貨公司Harrods都要出一本特別版指南，同製作一系列o既cupcakes，真係好有氣氛。

Harrods所賣o既產品同食物都非常高尚，小弟雖然買唔起，不過入去見識下都已經覺得好高級。

酒店大堂非常寬敞，大梳化坐得都幾舒服。由concierge，到酒店接待處，至執房隊伍，所有高低級職員都同樣友善有禮，我地每位住客都覺得自己好受歡迎，舒適得很！

我地八個人分開四間房，其中一間集合房係比較高級o既"Studio Suite"。其實普通雙人房都已經好夠大夠住，不過有間Studio Suite就方便大家約見。大家見到此大房中o既Nespresso咖啡機尤其驚喜！Studio Suite除左房較大，配備齊全Ｄ，房租仲包有報紙，wifi，早餐，及Club Lounge許可證。Club Lounge提供早餐，下午茶，同happy hour（有酒），亦有免費wifi，如果用得盡，其實條數返哂黎。

第一次歐遊o既小肥真係唔知米貴，上網查閱酒店價錢先知原來英國酒店間間都係咁貴，我地依間已經係算平，長輩門個個都話抵住。

雖然係旅程o既第一日，不過因為我地知道喺遊輪十三日唔會有中餐食，所以未上船前都盡量食中餐或類似o既食物。當晚因為大家啱啱坐完飛機都攰，第二朝早個旅行團又早，所以特意留喺酒店食。

Bugis Street Brasserie地方好似咖啡店咁，枱櫈簡單，不過偏細，大中小肥感覺座位有少少狹窄。餐廳服務正常，唔會好殷勤，亦唔會話態度惡劣。

食物上枱速度快，所以十五分鐘內成枱滿哂。食物質素其實唔差，海南雞及其醬汁尤其出色，非常正宗。哥哥仔介紹o既煎蛋蝦醬飯亦好香口特別。只係小弟係一個對味精極敏感o既人，通常飲杯可樂都可以輕輕舒緩下，不過選擇性地食完依餐星馬式晚飯，飲埋可樂，都仲要趕上酒店房食特效藥，即代表味精指數頗高或所用o既味精品牌同我身體唔夾。