姨丈個妹妹出咗名緊貼潮流，得知我地組咗小團短遊台北，佢就好有心地立即傳來「吳寶春麥方店」o既咭片同靚相，告知店內o既巨型包點屬得奬食品，務必一試。

離台當日，為怕午後光顧時排隊會耽誤去機場o既時間，我地就盡早十一點鬆啲到達麵包店。離遠已聞到新鮮出爐o既麵包香，跟住啲香氣行走，終於被細佬發現廚房o既所在地。眼見忙得團團轉o既工作人員個個帶哂口罩同帽咁講求衛生，小肥立即向姨媽們匯報，令大家放心最後衝刺，狂購麵包做手信。

真係估唔到週六早上收銀處已見人龍，店內o既人客數量仲不斷上升。店子除咗有吳寶春先生獨創o既得奬包點之外，其實亦有售多種口味o既法包、可頌、吐司、薄餅、布丁等，極之多元化。如果嫌攞熱辣辣o既麵包做手信麻煩，遊客仲可以選購架上以禮盒包裝o既鳳梨酥、史多倫、手作果醬等。喜愛閱讀o既朋友不妨試睇吳寶春先生o既自傳、「麵包秘笈」、「麥方寶典」等書籍。

麵包全部新鮮熱辣烘出，服務生更會不時攞出樣品供客人試食。XO仔嗰朝早所試o既「饢餅（原味）」（NT 85/件）鬆軟中帶點煙韌，食落好似印度囊餅咁，不過明顯更有奶香，質感亦更為柔潤，實屬超值之選。嘻嘻，深知稍後o既飛機餐唔會好食得去邊，細佬當然係好醒目地買定兩件上機食啦！小肥嗜甜，成塊面咁大o既「奶油埃及」（NT 40/件）真係啱哂口味。大包同饢餅一樣鬆柔，包心滲滿著奶油香，外層以砂糖點綴，效果猶如神來之筆，甜味喺口腔內好似星星咁閃爍，精彩尤甚！

排隊等俾錢時，姨媽們已經開始研究啲巨包攞到返香港應該點樣處理。唔知收銀姐姐係咪聽得明我地o既對話呢，佢好自然地咁就連同一張麵包保存方法及回烤或蒸煮說明包起哂啲戰利品，服務貼身得很。

榮獲「2008年世界麵包大賽亞軍」o既「酒釀桂圓」（NT 350/個）主要用上龍眼乾同紅酒烘焙，清甜中帶著醇香，配搭新穎獨特，口感剛柔並重，好有驚喜。上網查證過，得知吳寶春先生於2008年o既亞軍得奬作採用咗紅酒同龍眼，八年後o既2016年則以混合醃漬梅子與阿里山茶o既「梅引茶香」（NT 288/個）再度參賽。麵包同一時間有齊酒香、梅酸、茶甘，暗地裡又帶點咸咸甜甜，盡顯台灣人o既飲食風味，唔怪得知能夠再下一成，贏取「2016年世界盃麵包大賽亞軍」，確真可喜可賀！

介紹完兩款亞軍麵包，壓軸當然係「2010 世界麵包大師賽冠軍」代表「荔枝玫瑰」（NT 350/個）上場啦！「荔枝玫瑰」o既概念同「酒釀桂圓」差不多，都係融合咗水果同美酒，不過前者o既冠軍組合就加插咗幽香o既玫瑰花。巨包內含甘醇甜美o既荔枝乾，果酒跟玫瑰花香o既結合，令鼻腔同味蕾洋溢著芬芳與清新，贏得冠軍奬項可謂實至名歸！