Handsome XO
我是Handsome XO。 我最喜愛到日本旅遊 , 最鍾意遊覽主要地標, 住宿通常會揀4星酒店。
留言  留言給此旅遊家
  遊記數目 98
  上載相片 3328
  上載影片 2
最近分享過的旅程
2018美加探親兩週遊
國家/地點: 加拿大, 美國
旅程日期: 2018-03-27 至 2018-04-07
2017京阪神六天遊
國家/地點: 日本
旅程日期: 2017-11-08 至 2017-11-13
2017台灣婚禮三天遊
國家/地點: 台灣
旅程日期: 2017-04-20 至 2017-04-23
2017溫馨家庭大阪四天遊
國家/地點: 日本
旅程日期: 2017-02-23 至 2017-02-26
東京豪食三日兩夜自由行
國家/地點: 日本
旅程日期: 2016-09-09 至 2016-09-11
2016鑽石公主郵輪東瀛遊
國家/地點: 日本, 俄羅斯
旅程日期: 2016-08-30 至 2016-09-09
2015台北怒食三天遊
國家/地點: 台灣
旅程日期: 2015-11-18 至 2015-11-21
2015北海道火車地鐡自遊五天行
國家/地點: 日本
旅程日期: 2015-10-21 至 2015-10-25
布吉島婚宴三天遊
國家/地點: 泰國
旅程日期: 2015-02-11 至 2015-02-13
2014Crystal郵輪東瀛遊
國家/地點: 中國, 日本
旅程日期: 2014-02-10 至 2014-02-22
2015台北怒食三天遊 (台灣)
(旅程日期: 2015-11-18 至 2015-11-21 ,  旅程性質: 飲食購物)
 整個旅程  (共4篇遊記)
 分享至Facebook 
發表日期: 2016-06-24

1119日(

表妹經常外遊,深知台北o既商店大多要十一點後先開門,故訂酒店時亦一早注明要包埋早餐,好等姨媽們唔洗急於起牀出動。團友六人每朝早就喺酒店餐廳「探索廚房」度集合,食完個自助早餐就出去行街街。

由於今次旋風式訪台只有三天時間,抵台翌日XO仔迅即把握機會約會已多月不見o既台灣女朋友,搵佢帶路與家人一同品嚐近日喺香港都頗有名氣o既「三井」日本料理。

享用完一頓又靚又好味o既日本菜,女士們都急不及待要以血拼黎消脂,六人由書店逛到去文具店、服裝店、鞋店、精品店等,淨係鞋都每人最少有一對收穫,講真小肥同表妹少啲手力都未必會應付得到。買到太陽差不多落山時,大家終於咖啡癮起,忍唔住要喺商場內搵個地方嘆下午茶。由於傍晚時份約咗居台多年o既舅父仔同舅公食晚飯,姨媽們飲完咖啡後就決定要返酒店,放好戰利品,稍作休息,並略為梳洗一番。

兩位長輩真係相當客氣,除咗油淡水揸咗架車黎接送我地六個人,仲請我地去酒店中菜廳「天香樓」度食高級杭州菜,飯後仲每人一大袋手信,身為晚輩o既小肥又食又拎,真係覺得唔係幾好意思,請容許細佬在此再次向舅父仔同舅公道謝
台北寒舍艾美酒店 - 探索廚房 Latest Recipe
台北寒舍艾美酒店 - 探索廚房 Latest Recipe
天花上o既抽象藝術品
天花上o既抽象藝術品
用餐大堂樓底都幾高吓,間隔開揚通爽,厚墊o既座椅都好舒適
用餐大堂樓底都幾高吓,間隔開揚通爽,厚墊o既座椅都好舒適
餐具、咖啡小牌、調味、咖啡及熱鮮奶
餐具、咖啡小牌、調味、咖啡及熱鮮奶
雪櫃
雪櫃
自助餐之不同區域
自助餐之不同區域
粥、飯加配料 - 粥、飯加配料
粥、飯加配料 - 粥、飯加配料
湯米粉
湯米粉

「探索廚房」正門牆身一半為雲石造,另一半有條頗兇猛o既魚隻裝飾o既則為木造,襯托埋吊喺天花上o既抽象藝術品,感覺都幾新潮。用餐大堂樓底都幾高吓,間隔開揚通爽,厚墊o既座椅都好舒適

埋位後,服務生隨即上前問及各食客選飲咖啡或茶品,並給予小牌作標記。XO仔習慣咗每日最少飲三杯咖啡,越濃越愛,酒店杯咖啡香濃得黎一啲酸味都冇,好啱細佬口味!

多種理由下,肥肥家族出門都絕少食生果,最多都係食早餐時飲番幾杯鮮榨果汁就算。雪櫃內o既果汁選擇除咗有大路啲o既橙汁、菠蘿汁同西瓜汁之外,其中最特別應該係綠色o既「芭樂綜合汁」,微酸帶甜,清新清爽,極之討好

食物方面,就同其他自助餐冇乜大分別,都係分穀物片區、煎蛋奄列區、沙律區、麵包區等,當中亦有煙三文魚、壽司、凍肉、三文治等供應。個人因有食物敏感問題,所以就主攻鬆軟甜美o既「巧克力可頌」。

XO仔始終係喺香港土生土長,飲食習慣都偏愛食中菜,早餐都唔例外,每日點都要有啲粥米飯麵落肚,腸胃先會滿足。餐廳o既粥唔係差,亦有多款配料,但只屬中規中矩,未能令人嘩然。粥品白飯全為自助式,湯麵則即叫即滾,配菜全為自選。湯米粉清就夠清,可惜清到連味道都唔係幾夠,細佬結果就以濃味o既滷肉碎黎自加調味

入住「台北寒舍艾美酒店」所包o既「探索廚房」自助早餐款式唔算少,不過就講唔出有咩特色,水準亦只屬一般,幸好環境舒適衛生,整體尚算合格。
推介菜式: 芭樂綜合汁
評分: 味道3   服務2   環境4   衛生3   抵食3
三井 CUISINE M
三井 CUISINE M
三井 CUISINE M
三井 CUISINE M
小蠟燭擺設、餐具、鶴形筷子座及小鐵酒杯
小蠟燭擺設、餐具、鶴形筷子座及小鐵酒杯
餐牌
餐牌
歇雲套餐(NT 1,200)
歇雲套餐(NT 1,200)
淺雨套餐(NT 1,500)
淺雨套餐(NT 1,500)
薄月套餐(NT 2,800)
薄月套餐(NT 2,800)
單據
單據

XO仔讀書唔叻,唯有將勤補拙,記得大學時代為咗要學講普通話,經常都會厚著臉皮四周結識黎自台灣及大陸o既外地生,好等自己可以有更多練習o既機會,細佬就係咁遇上咗台灣女朋友。畢業多年後,小肥終於有機會去台北玩,所以第一時間就相約台灣女友午聚,地點就揀喺一家多位親友都推薦o既「三井」日本料理。

餐廳黑漆o既大門及深色o既落地玻璃側門極富神秘感,不過當真並不起眼,一啲都唔易搵。大廳樓底極高,開揚通爽,室內光線雖偏暗,不過紅色o既天花配上摩登o既吊燈,潮氣洋溢。餐桌上o既小蠟燭擺設,襯托埋布造餐墊、鶴形筷子座及小鐵酒杯,新潮得黎仍不失高雅。

可能一行十人中只有幾個可以用國語溝通,又有大有細,嚇親樓面位姐姐仔,令佢驚慌失措到要搵同事幫忙落單;為免增添混亂,我地最終都係決定各自挑選一客午市套餐。大家主攻嗰三款套餐分別為「歇雲套餐」(NT 1,200)、「淺雨套餐」(NT 1,500)及「薄月套餐」(NT 2,800);嘻嘻,小肥身為全枱人最擦得嗰個,當然係試勻哂啦!由於餐牌上冇列明各套餐所包o既菜式詳情,我地都係要等食物上枱時先知有咩食。原來三款價錢不同o既午餐除咗菜式數目有所不同之外,就連內容都好大分別,不過當中亦有一模一樣o既飯後生果及餐茶或咖啡。

如相所示,三個套餐都有刺身拼盤一客,價錢越貴,款式及件數越多。每盤最基本有兩件清香甜美o既金目鯛。而所選取o既吞拿魚部位及生蝦o既級數則同套餐o既價格成正比;「淺雨套餐」o既中拖羅及「薄月套餐」o既大拖羅肥美香嫩,入口即溶,確實齒頰留香;「薄月套餐」o既牡丹蝦爽滑甜美,亦是一絕。此外,「淺雨套餐」碟刺身拼盤上多咗一隻飽魚,「薄月套餐」則多咗鮮嫩o既帶子同軟潤o既鮟鱇魚肝,另外仲有兩隻分開上o既飽魚,派頭十足。

除咗魚生,每份餐都包有沙律或前菜、蝦或蟹、燒魚菜式、湯品及甜品。「歇雲套餐」可算為最清o既一款;前菜「秋葵三文魚籽」清新濕潤、炸物「油切車蝦」乾身爽脆、煮物「銀鱈大根カマ」口感豐富,香脆惹味、形似魚蛋o既「毛蟹の真薯椀」則軟腍中帶點煙韌,清湯微甜討好。

淺雨套餐」整體味道更為濃郁;前菜「馬糞海膽葵泥」香濃潤澤、大大隻「0.20kg 活車海老塩燒」爽厚彈牙、「旗魚腹串燒」香口而不油膩、「北寄貝吸」亦軟脆清甜。除咗四款升級海鮮菜式,套餐仲包有如薯片般脆薄o既「餅揚出げし」、「馬鈴薯牛肉釡燒」及甘醇o既「綠茶朱古力餅」。

薄月套餐」o既項目數量雖然同「淺雨套餐」差唔多,但係其實份量同食材明顯更為豐盛;刺身拼盤多咗魚生同鮑魚、沙律入面加咗幾片大鮑、蝦o既菜式變成幼嫩無比o既「活鱈場蟹烤」、燒魚亦升呢為鮮嫩香滑o既「0.32kg油串(吞拿魚)下巴燒き」、湯品更換上包有原隻蟹鉗o既「味噌醇蟹」。套餐額外仲有兩串皮脆心嫩o既「生蠔カリカリ揚げ」(炸蠔)、鬆軟而肉汁豐厚o既「沙朗牛ステーキ」(西冷牛扒)及望落都矜貴過人o既「金箔綠茶朱古力餅」。

三井」環境雅麗新潮,舒適衛生,午市套餐o既菜餚款式多元化,魚材高質鮮美,菜式美觀又美味,難怪可得到眾親友頂力支持及推舉,下次再黎台北一定會返轉頭。
推介菜式: 淺雨套餐,薄月套餐
每人消費: 約1800新台幣 (午餐)
評分: 味道4   服務4   環境5   衛生5   抵食4
史奴比陪過聖誕
史奴比陪過聖誕
彩龍
彩龍
彩色長頸鹿
彩色長頸鹿
朝聖必到之地:StayReal 商店
朝聖必到之地:StayReal 商店
朝聖必到之地:StayReal 商店
朝聖必到之地:StayReal 商店
可愛小狗
可愛小狗
名牌馬騮公仔
名牌馬騮公仔
翠兒主題咖啡屋
翠兒主題咖啡屋

XO仔係五月天o既小粉絲,得知所入住o既「台北寒舍艾美酒店」旁o既「新光三越A11館」內就有樂隊主音阿信所開設o既「StayReal」商店,當然係要逛個夠本啦

為迎接聖誕節o既光臨,商場正門已擺出史奴比o既聖誕電影宣傳佈景及高高o既聖誕樹。商場內差不多每個品牌都有個吉祥物小公仔喺門旁,四處都流露著歡欣o既氣息。最開心o既就係瘋狂購買完多袋戰利品後,靚女店員話遊客可以於即日內,帶同護照去辦理即場退稅服務,流程同之前喺日本一樣都係咁簡易快捷,買得實在令人痛快
推介項目: 即場退稅
參觀時段: 下午
入場價錢: 每人0新台幣
評分: 值得去5  
龍貓巴士
龍貓巴士
龍貓
龍貓
龍貓之家
龍貓之家
龍貓之家
龍貓之家
龍貓之家
龍貓之家
睡夢中的龍貓
睡夢中的龍貓
龍貓家族及好友
龍貓家族及好友
ATT 4 FUN 內的愛麗絲夢遊仙境
ATT 4 FUN 內的愛麗絲夢遊仙境

信義區內可以話係商場臨位,離「新光三越A11館」唔遠o既「ATT 4 FUN」合共有十層高,要買到野真係話都冇咁易!「ATT 4 FUN」一樣有即場退稅服務,櫃台位於四樓 o既「甜品王國」旁,要穿越過愛麗絲夢遊仙境方才到達,感覺極之夢幻。

全場最具代表性都應該非七月新開幕o既龍貓世界どんぐり共和国」莫屬。精品店內除咗有售大小主角o既公仔、精美文具及飾物之外,整間店舖仲裝修成卡通片內o既樹林佈景咁,當中更不乏巨大o既龍貓及其好友龍貓巴士;行近啲望入玻璃窗就會發現原來龍貓喺大樹中心度瞓緊覺,非常搞鬼

參觀時段: 下午
評分: 值得去5  
米朗琪咖啡 Melange Cafe
米朗琪咖啡 Melange Cafe
間隔開揚通爽,衛生企理
間隔開揚通爽,衛生企理
店子中央簡單以蒸餾咖啡器裝飾
店子中央簡單以蒸餾咖啡器裝飾
「拿鐵咖啡」(Cafe Latte,NT 130/杯)
「拿鐵咖啡」(Cafe Latte,NT 130/杯)
甜品餐牌
甜品餐牌
義式濃縮咖啡(NT 110/double),加法式捲餅(NT 90)
義式濃縮咖啡(NT 110/double),加法式捲餅(NT 90)
法式捲餅(NT 90)
法式捲餅(NT 90)
單據
單據

步出「StayReal」時已接近黃昏,由於手持多袋戰利品,為一解咖啡癮,小肥就同靚靚媽咪同姨媽索性喺商店隔壁,連旅遊書都有介紹o既「米朗琪咖啡」度歇一歇腳,飲個下午茶

咖啡屋門面光鮮潔亮,間隔亦開揚通爽,衛生企理,中央簡單以蒸餾咖啡器裝飾,貼切又到題。

入座後,溫婉有禮o既姐姐仔先放低清水同餐牌,等大家慢慢參閱。靚靚媽咪同姨媽可謂姊妹情深,異口同聲地每人點咗杯「拿鐵咖啡」(Café Latte,NT 130/杯)。小肥就為食啲,要咗杯「義式濃縮咖啡」(NT 110/double),另加「法式捲餅」一客。

法式捲餅(NT 90):甜品實物跟餐牌上o既彩圖冇十成都有九成九相似。奶黃色o既捲餅皮層軟薄,內裡o既吉士餡心則柔滑香濃,點上忌廉煉奶後,再連同橙黃色o既水蜜桃食,更覺清新甜潤,美味可口,實屬超值之選

遊客喺「新光三越A11館」購物後可憑護照及單據即場退稅,XO仔就運用所退回o既稅款請家人於商場入面o既「米朗琪咖啡」度飲咖啡、食甜品,當真皆大歡喜
推介菜式: 法式捲餅
每人消費: 約163新台幣 (下午茶)
評分: 味道5   服務5   環境4   衛生4   抵食5
亞都麗緻大飯店 - 天香樓
亞都麗緻大飯店 - 天香樓
蕃茄前菜(價錢不詳)
蕃茄前菜(價錢不詳)
龍井白蝦仁(NT 780/例牌)
龍井白蝦仁(NT 780/例牌)
宋嫂鮮魚羮(NT 300/位)
宋嫂鮮魚羮(NT 300/位)
牛扒鮑魚(價錢不詳)
牛扒鮑魚(價錢不詳)
蟹粉豆苗嫩白玉(單點價不詳)
蟹粉豆苗嫩白玉(單點價不詳)
花雕東坡肉(NT 320/位)
花雕東坡肉(NT 320/位)
桔香酒釀甜湯丸(NT 160/位)
桔香酒釀甜湯丸(NT 160/位)

「亞都麗緻大飯店」每個角落都有鮮美o既靚花,華麗悅目。酒店中菜廳「天香樓」正門有小橋流水,襯托埋四周木造o既橫樑,裝潢雅致得黎極富傳統中國色彩,氣派十足。

舅公認真客氣,除咗點選咗晚宴套餐之外,仲額外叫多咗幾味前菜、鮑魚、蟹粉東坡肉,更一人附送一本中、英文版任揀o既「杭州菜的故事」添

1)      蕃茄前菜(價錢不詳):此味蕃茄前菜喺餐牌上搵唔到,亦要由舅父仔同舅公示範,先知原來係要用匙羮連汁「筆」黎食。蕃茄粒好爽滑,姨媽同舅公就覺得醒胃,不過小肥就覺得好似聽到嫲嫲叫咁,好「孫」(酸)

2)      拌萬年青(NT 250):薄薄o既蓮藕片同幼幼o既荀絲清香脆口,輕盈健康。

3)      龍井白蝦仁(NT 780/例牌):細閱「杭州菜的故事」後,方才知道龍井被乾隆皇o既皇太后封為「貢品」。故事講述一位杭州廚師從蘇東坡o既一句「休對故人思故國,且將新火試新茶,詩酒趁年華。」領悟出龍井最鮮嫩o既時候正正就係河蝦最肥美o既季節,兩者雙合即創出杭州名菜「龍井蝦仁」。可能十一月並非河蝦o既季節,「天香樓」o既蝦仁質感雖然好爽脆,但就好似差咗陣鮮,加上炒製時落多咗粉,蝦仁就變得過黏,幸好龍井o既茶香清麗脫俗,為菜式挽回不少分數。

4)      宋嫂鮮魚羮(NT 300/位):顧名思義,「宋嫂魚羮」乃宋(五)嫂所創出。宋嫂其實係一名逃難老婦,與其叔仔喺杭州落腳後就單靠捕魚為生。機緣巧合下,一次為照顧病重o既叔仔時,就善用賣剩咗o既鮮魚,混入令人開胃o既薑、醋、酒、椒等刺激食慾o既調味,煲煮出一碗魚羮;叔仔食後,胃口大開,並迅速痊癒。故仔傳到去南宋淳熙帝耳邊,為求一嚐魚羮即召見宋嫂,親証過「宋嫂魚羮」如何鮮美後當然係重重有賞啦,宋嫂就順應各方要求,開設小店,為名菜發揚光大。「天香樓」o既宋嫂鮮魚羮以瓦煲及名火滾住上,夠哂新鮮滾熱辣,魚羮鮮濃嫩滑,其薑、醋、酒味當真極其醒胃

5)      牛扒鮑魚(價錢不詳):正當大家都沉醉於幾款傳統杭州菜o既典故時,面前突然出現一碟中西合璧o既海陸組合,牛扒配鮑魚。中餐食鮑魚已經夠矜貴,但係用牛扒墊底都係第一次見,似乎大廚係要証明俾大家睇佢都有藝術細飽同創作天份。牛扒係XO仔最愛o既三成熟,軟身得黎好夠肉汁,不過個人略嫌唔夠咸;鮑魚亦好腍滑。一口牛扒、一口鮑魚,口中o既肉香剛好吊出鮑魚o既鮮甜,配搭好有特色。席上幾位美女廚神卻因兩種食材有啲微微硬碰硬o既口感評咗兩句,更提出師傅可考慮將鮑魚換上一梳魚翅,相信會為視覺及味覺帶黎更豐沛o既享受。

6)      左宗棠雞球(單點價不詳):微辣帶甜o既左宗棠雞球偏乾同嚡,可算為整頓晚餐中最為遜色o既一道

7)      蟹粉豆苗嫩白玉(單點價不詳):適逢蟹季,舅公亦刻意加插咗一味蟹粉菜。金黃色o既蟹粉鮮甜無比,配角o既兩、三條豆苗亦翠綠嫩口。碗中o既兩球「白玉」其實係豆腐丸,其外表白滑,質感柔潤,塗上蟹粉食則更覺鮮美。

8)      花雕東坡肉(NT 320/位):唔經唔覺已經食咗五款大菜,女士們都已經開始叫飽,估唔到壓軸每人仲有一小盅東坡肉送白飯!半肥瘦o既東坡肉軟腍滑溜,花雕味醇厚香濃,半溶於口中可以話係食豬肉最高o既境界!四大才子之一蘇東坡不但詩詞書畫樣樣精,電視劇都有提到其廚藝其實一樣咁耍家,其中「東坡肉」明顯亦取自其名。據書中記載,蘇東坡上任後即為西湖修提,為其重展容貌,好官形象深入民心,老百姓為表答謝都紛紛於春節送上其最愛食o既豬肉。由於豬肉實在過多,蘇東坡就命人切成小小方塊,再以其獨門秘方燒煮,並「連酒一起送」,派俾每家每戶o既人民,怎料此句卻被誤聽成「連酒一起燒」,紅燒肉o既調味料中就加入咗酒,效果變得比普通紅燒肉更為甘香醇美;從此以後,此菜就被稱為「東坡肉」。

9)      桔香酒釀甜湯丸(NT 160/位):酒釀湯丸煙韌輕巧,桂花甘香撲鼻,酒味清秀淳樸,湯中鮮橙色o既柑肉更甜而不溜,飯後一小碗確令腸胃舒暢不少。

酒店餐廳「天香樓」環境雅致衛生,服務稱心又貼身,用餐時更可從小冊子學到多款杭州名菜背後o既一段故及烹調秘訣,極有意思。師傅除咗懂得烹煮傳統杭菜,亦有顯示出自己o既新派作品,菜餚大多美味精彩,但都有需要改進o既地方,XO仔o既總評其實係OK與笑臉之間,希望最終決定給予笑臉可被視為小小鼓勵

推介菜式: 拌萬年青,宋嫂鮮魚羮,蟹粉豆苗嫩白玉,花雕東坡肉,桔香酒釀甜湯丸
評分: 味道3   服務5   環境5   衛生5   抵食4
  0 個留言    |  加入你的留言
此遊記的留言
加入留言
如要加入留言, 請先登入