媽咪四姊妹最鍾意食海鮮，當中尤其愛食蟹。佢地家中有位小表妹因工作關係經常往返台北，雖然今次未能夾啱時間相約一聚，不過深知表姐們o既飲食喜好，故亦特意推薦一試以其「處女蟳」（螃蟹o既一種）聞名o既「台南三哥海鮮」。

位於中山區o既「台南三哥海鮮」為地舖，面積唔算好大，一眼望哂。廳內o既散座全為大小圓枱，街坊格局，家庭式作業，氣氛融洽，輕鬆自然。店子最入位置有個半開放式廚房，食客可以睇住師傅炒煮菜式，透明度極高。由於餐店並無印製餐牌，言語唔多通的話，點餸就要靠用手指指出玻璃雪櫃及廚房陳列出o既海鮮食材，幸好姨姨哥哥們都極之友善客套，大家溝通上都冇乜大問題。

點好菜，六人就決定啤一啤佢，姨姨見狀，更隨即呈上三款小食俾我地送酒添。XO仔因敏感問題冇食到花生；麻醬青瓜香脆爽甜；不過最正都係碟自家醃製蜆仔，濃味得黎又不失鮮甜，冇得頂呀！

1)      炒蛤仔（NT 350/中）：小肥啲普通話實在太過普通，要菜式上枱時先知「蛤仔」其實即係蜆。第一道炒蛤仔少辣惹味，嫩滑無比，團友們無一不讚，實屬必吃推介也！

2)      五味軟絲（NT 450/中）：細佬見識少，當真從未聽過「軟絲」依味海產。軟絲形似魷魚，上網查証過先知兩者只可算為遠親關係。凍食o既軟絲爽厚脆滑，口感跟魷魚極其相似，個人覺得不需點上醬汁已夠鮮味。

3)      白鯧米粉（NT 1000/大）：湯米粉原煲連火爐上，夠哂滾熱辣。米粉軟腍入味，魚湯內含芋頭及炸過o既白鯧魚件，濃甜暖胃，不過除非唔點其他小菜，唔係要六個人食哂一大鍋則確有難度。

4)      鹹菜魚肚（NT 350/中）：魚肚肥滑爽脆，無奈XO仔怕咸又怕酸，以鹹菜炒製只可以話唔係自己杯茶囉。

5)      清炒八蓮菜（NT 200/中）：女士們要食青菜，肥哥哥就介紹我地食時令o既八蓮菜。幼幼o既八蓮菜不但外表翠綠，簡單清炒已夠清脆清甜。

6)      蒜泥蚵仔（NT 400/中）：單憑靚相可見菜式光滑亮澤，咬落更覺蚵仔鮮甜肥美，蒜香濃而不俗，效果猶如畫龍點睛，實在非筆墨能形容般美味可口，大家千祈咪走寶！

7)      處女蟳（NT 900/隻）：壓軸上枱o既主角處女蟳外觀震撼非常！蟹隻橙黃色o既外殼已夠吸睛，殼下鮮黃色o既蟹膏豐厚濃潤，蟹肉幼嫩香甜，果然有姿勢、有實際！

多得表姨咁識食，六人今次短遊台北都有緣遇上「台南三哥海鮮」，品嚐到一頓地道o既海鮮大餐。小店選材鮮美，師傅廚藝了得，價廉物美，有心食肆絕對值得支持！