虎航是廉航公司，航班自然沒有免費飛機餐供應，剛巧我們的信用卡可免費享用環亞機場貴賓候機室的服務，就一於早點來吃一頓免費「飛機早餐」。可能，現在有個別信用卡提供免費享用機場貴賓候機室服務，所以，就算一早到來也看到大排長龍，幸好我們所預的時間夠充裕。

貴賓候機室環境非常悠閒，大致可略分為3個區域：用餐區、茶座區、酒廊區，純粹以擺設、座椅來定義，基本上是隨意任坐的。

食物採自助形式，西式選擇較多，有麵包、穀麥、沙律、糕點，而中式主要是粉麵，飲品就啡荼、果汁、汽水一應俱全。以一頓早餐而言，我們也吃得很豐富了！

首次乘坐虎航，整體感覺不俗，由辦理登機証、準時登機，雖然起飛由原定10:50am延至11:30am才正式起飛，但相信機師加大馬力飛快一點，跟原定到達時間差不多。

入到機倉，是3x3的空中巴士，全真皮座椅，感覺蠻整潔。

上文已說過是廉航，是沒有飛機餐供應的，如沒有預訂，也可以即場購買，別以為價錢只是十來塊錢很便宜，全是以新加坡紙計算啊！

下機、辦入境、取行李，到達最近酒店的MRT Lavender已4:30pm，大家也有點肚餓，看到地鐵內有一家Jollibean，這小店有很多分店，並遍佈新加坡的不同地方，他們有很多豆類產品得，無論是飲的，還是吃得，選擇也很多，我們就買了兩件蛋糕來嚐嚐，從餅櫃所見，口味眾多，有紅豆沙、碎花生、牛乳……等等。

一件是忌廉芝士口味（乳酪），蛋糕做得頗鬆軟，中間夾了一層芝士，軟化的芝士溶溶的狀態，很香、很軟綿，芝味濃郁。

另一件是多穀子芝士口味，同樣地，蛋糕中間夾了一層芝士，此外，面層更沾了些多穀物籽，除軟綿的口感，就多添幾分咬口的感覺，一樣滋味好吃。

這酒店早於1972年已落成，其後不知何時結業，但於2012年翻新重開。與其叫作翻新，稱之為活化多貼切一點，因為酒店內仍保留原先的樣兒，如地磚、石階、木窗框……很有復古味，感覺有趣。

此外，交通還算方便，雖離MRT Lavender站有點遠，但也只不過是10分鐘左右的步程，而房價便宜是另一大考慮點，我們所住的是標準大床房，3晚的平均房價為HK$440。雖然房間有點小，但基本設備均齊全，環境整潔，又有免費wifi。

還有一個賣點，就是附近有很多食肆，酒店的對面更就是勞明達美食廣場，每天早餐我們也不用愁到哪裡吃。

在酒店安頓好，又是出動的時間，但在前往酒店時，路經這街坊食店「正文志記食豬什湯大王」，因為看到不少街坊光顧，所以，投其信心一票，嚐嚐味道如何。

由於都是街坊小攤檔，環境自然不會有太多要求，但勝在地方整潔。

作為小試牛刀，我們只點了招牌的豬什湯，果然如招牌所言，真材實料，湯內材料豐富，有肉片、肉丸、豬肝、豬腸……等等，一點豬燥味也沒有，沾一丁點辣醬已很好吃，湯頭香濃順喉，只是幾塊錢，真是超值啊！

是次新加坡之行的第一個景點是濱海灣花園，這花園佔地達101公頃，面積大到不得了，園內分了多個園區，當中的濱海灣南花園（Bay South）是最大的面積嘅分區，最觸目自然是當中幾十棵25至50米的「擎天巨樹」，獨特的外形，原來是由16萬棵熱帶植物、攀緣植物、附生植物和蕨類植物，接近200多個品種結合而成，不得不稱讚其創意及心思。

而且，高矮、大小不一，入黑巨樹在加配變色的霓虹燈下，變得可觀性更高！

此外，巨樹間更組成「空中步行徑」（OCBC Skyway），高22米、長128米，需付款，可讓你以不同的角度來觀賞這些巨樹。

另外，園內還有兩個觸目的植物冷室（10℃），分別是：花穹（Flower Dome）；霧林（Cloud Forest），斥資上10億新加坡幣來打造。還原了熱帶山地地區涼爽潮濕的氣候和地中海及半乾旱、亞熱帶地區涼爽乾燥的氣候。這些地區都是世界上最受威脅的棲息地，許多植物物種面臨著人類活動造成的氣候變化和棲息地破壞的威脅。植物種植數量約8.7萬株，包括4百種品種類，是很值得參觀的。唯一可惜是這次來得較晚，未有入場參觀兩個冷室。

牛車水這地方不用多介紹，是早期中國人移居新加坡的聚居地，漸漸就成著名的唐人街了，這裡保留了豐富的華人歷史和文化，仍有很多傳統店屋、中菜館和廟宇，而小巷中還可以看到各式各樣傳統手工藝品，如書法、雕刻、木偶制作等。但吸我的是當中的史密斯街（Smith Street），跟幾年前來的時候不一樣，變得更有規模的露天美食街，在這裏可品嚐美味的地道美食。我們就隨心隨意揀了以下幾家來嚐嚐：

獅城芽蕯九巷活田雞（Geylang Lor 9 Fresh Frog Porridge）
多年前曾到訪過牛車水，那時史密斯街的排檔只是在街道一旁的小販檔，亦不太大規模，這回再來已是翻天覆地的改頭換面了，除整條街都成為食街之外，外觀也變得很型格。而在眾多檔子中，找來「獅城芽蕯九巷活田雞」，皆因獲得了「民選第2美食大獎」，亦有不少獎狀，自有其過人之處。檔口子只賣田雞生滾粥一道菜式，然而，田雞都是即點即劏，保證新鮮，亦看到檔主新鮮即製生滾粥，真正新鮮滾熱辣。整體味道的確鮮甜，田雞也很嫩滑，粥底也很綿，不過，只是有點糊，否則，就完美了。

美食街炒粿條麵（Food Street Fried Kway Teow）
因為在牛車水實在有很多美食，不可能每一個檔子也光顧，就算同一個檔子，賣數款食物的，在希望多嚐試之下，多數也只嚐嚐其中一款美食，就像來到「美食街炒粿條麵」檔前，有配搭不同材料的炒粿條，看了良久，最後就相中「三合一炒粿條」，貪其一次就可以試到三款食材啊。看起來三合一炒粿條外觀黝黑，像是一道炒燶了的菜式，其實是加了些醬油所出的效果，而粿條炒得爽身，很有鑊氣，而且味道香濃惹味，真是一口接一口吃不停。至於三合一就是粿條內混入蝦、魚餅及鮮蛤，故吃來實在豐富！

麥士威路薄餅 . 叻沙（Maxwell Road Soon Soon Popiah . Laksa）
先後光顧了「獅城芽蕯九巷活田雞」的田雞生滾粥及「美食街炒粿條麵」的三合一炒粿條，當然，意猶未盡吧！看到一個小檔子「麥士威路薄餅 . 叻沙」，有特色薄餅、鮮蛤售賣，但其中一款食品稱之為「貢貢」，因從未吃過，所以，被其趣怪外觀吸引。一客大概有23、24粒，但不是每一粒也有肉的，好幾粒是中空寶啊！而貢貢肉有少少難撩出來，肉感也不厚身，還好是口感爽爽韌韌，蘸點辣醬味道着實不錯。


牛車水美食街熱冷飲料. 甜品（Chinatown Food Street Hot/ Cold Beverage – Desserts）
在新加坡每一個熟食中心，都總有三幾家小檔口專賣飲料，而街口正正就有一家「牛車水美食街熱冷飲料」，所賣的果汁飲料非常多選擇，如西瓜、黃梨、木瓜、青蘋果、蜜瓜、檸檬、楊桃、番石榴、芒果、甘庶水、椰子以及多種樽裝或罐裝汽水……等等。菠蘿汁，當地人稱為黃梨，入口十分清香鮮甜，還帶少少果肉，不過冰塊下得狠，十分之多。甘庶水，或許是店家招牌，因為眼見非常多客人也選了這個，而味道確是清潤香味，在炎熱的新加坡之中，涼快的飲料令人更加起勁。

前往Clubmed Tomamu渡假村，首先要買飛往札幌的機票，帶着小朋友當然要直航+有電視機的航班，其實都只可以選國X航空。坦白講，國X航空的服務確實是越來越差，我七個月前訂機票時已經是買貴少少的機票訂好位子，但一個月前才突然發現，在沒有通知之下被調位，仲要四個人被拆散沒得一起坐，幸好仍有位子可以調動，不過就要坐到最後和坐在厠所隔離，所以對國X印象已是非常差。

最誇張是在出發前兩天的半夜，還突然收到SMS，話我們的航班要延遲八小時出發，那麼我們到達札幌時將會是晚上，亦會沒有巴士前往渡假村，雖然隔兩分鐘後，再收SMS話改回原本時間，但已經被嚇到半死，跟著老公還堅持打了差不多半小時電話，聯絡客戶服務員confirm是系統出錯，才能安心去瞓。

終於去到出發當日，未夠七點大家已經睡眼惺忪打哂呵欠地坐上的士，帶住兩個小朋友的機動性原來是超低，過關用唔到e道，妹妹行兩步又話要抱又唔肯坐BB車，過完關買早餐又大排長龍，食完再輪流上廁所，明明已經是兩小時前到達機場，但眨下眼又到上機時候。

起機時哥哥已經迷失在卡通空間裡，妹妹就攬着幾包零食大吃特吃，之前我擔心他們會因氣壓轉變而耳仔痛的情況完全沒有出現。

跟著差不多五小時的機程都好忙碌，雖然哥哥肯坐定定雙眼沒離開過電視，但完全不肯進食要我餵食，不過兒童餐絕對是難食過成人餐，塊pancake又乾又硬，一點也不吸引，結果我要讓出我的冬菇粥給哥哥吃。妹妹對電視無甚興趣，坐了一會便要落地周圍走，遇到氣流時都不肯回坐位縛安全帶好恐怖，癲到臨落機時終於暈左，結果老公要抬佢落機，我就負責拎BB車好攰。

到達札幌機場已是三點幾，等過關攞埋行李都四點多，出到去發現無人舉牌接機，於是去詢問處再自行揾到Clubmed個counter，要等齊其他客人於是五點半巴士才開車。

車程一個半小時，其他人一上車就瞓到暈左，我都非常眼瞓但兩位小朋友嘈足全程，黃昏七時終於到達Clubmed Tomamu實在令人鬆一口氣。

其實一直都沒有太大意欲帶小朋友出國旅行，但因為要準備Daniel B的小一面試，怕他被問到有否外國旅行經驗時會口啞啞，所以決定在升K3的暑假，一定要帶他出外旅行。

原本想輕鬆一點只帶Daniel B一個的，但他說一定要妹妹同行，見他們如此’手足情深’也唯有應承。

在揀選旅行地點時其實很煩惱，我們帶小朋友去旅行的經驗值完全是零，但無意中給我發現Clubmed Tomamu的廣告，Clubmed Tomamu原本只是冬季的滑雪場，今年是第一年在夏季開放，所以套票價錢做特價不算太貴，五日四夜包三餐，成人$6600小朋友$3700左右一位，妹妹因為四歲以下所以食住都免費，反而最貴是來回北海道的機票，仲貴過Clubmed的套票，但第一次一家大細去旅行，還是決定選擇難度較低的渡假村吧！

閒來翻閱旅遊雜誌時，發現京都一家西餅店「Flavor's」以其抹茶味牛奶千層蛋卷「ミルクレープロール抹茶」榮獲「日本ギフト大賞 2016 京都賞受賞」，無奈店子只接受早成個月前之本地網購，故當時都只係影咗幅相做記錄。咁啱暑假期間，姨媽們提議入秋去京都玩喎，XO仔即諗到可以訂黎做早餐試試，點知細佬玩極都訂唔到，結果幾經艱辛，托酒店先成功購下蛋卷，並代為冷藏儲存，直至九人抵達酒店再轉交到手。

每個蛋糕都有獨立氣珠膠及紙盒包裝，非常穩陣。亦有詳細保溫、解凍及食用說明，但就只有日文一個語言。細佬所訂o既兩款原味及抹茶味牛奶千層蛋卷連稅單售1,242円，網購另加972円運費及324円手續費。

1)      ミルクレープロール抹茶（“Milk Crepe Roll Matcha”；1,242円）：解凍後o既抹茶味牛奶千層蛋卷質感濕潤過腍，忌廉厚濃溜滯，但蛋卷卻淡而無味，一丁點甜意都冇，當真唔明解如何可贏得奬項，莫非係對手太弱？！

2)      ミルクレープロール プレーン（“Milk Crepe Roll Plain”；1,242円）：講真原味牛奶千層蛋卷除咗同抹茶味唔同色水之外，基本上兩者連味道都差唔多，不吃也吧。

經好友介紹於「VELTRA」旅遊網選購巴士遊，比拼過各行程嘅簡介、時間表、亮點及價格後，XO仔就揀咗每位6,400円嘅「【京都巴士遊】二條城 + 金閣寺 + 京都御所」。

八點十分先憑電子發票於「AVANTI Sunrise Tours櫃檯」取票，再跟指示行去巴士站，相當方便。旅遊巴準八點二十五分開車。日藉導遊全程以英語解說，由於自己讀書時代歷史同地理都肥哂佬，所以聽得都幾辛苦吓；哈哈，後尾仲索性淨影相，唔聽書添。三個景點中最靚就係「金閣寺」，但係人山人海，真係好難影到靚相。「金閣寺」除咗寺廟夠金，就連下面嘅湖水都特別清澈，好多龍友影咗相都話「金閣寺」及其湖中嘅倒影一模一樣，實難辨真假咁話。小肥一向對觀景都不甚興趣，反而喺景點內嘅商店買到不少有記念價值嘅精品及手信，不過最搞笑就係居然見到有抹茶味生啤飲，認真棧鬼。

去旅行揀地方食飯，不外乎經親友介紹或跟隨旅遊網、書籍或雜誌推廣。舊年遊京都時，第一個午餐就去咗超閃旅遊書介紹嘅「モリタ屋」（Moritaya）；全因為睇到於明治二年創業嘅餐店擁有自家牧場，壽喜燒及涮涮鍋均只限供應極品京都和牛。

「モリタ屋」有多間分店，細佬當然係挑選咗間離酒店最近，唔洗行出街，步行只需五分鐘嘅「JR京都伊勢丹分店」啦！雖然人多要訂位兼訂埋指定午市套餐，幸得酒店幫忙，XO仔又預足時間，來回幾次電郵迅即搞掂，極之簡易。九人仲被安排入座窗邊最佳位置，一邊進食可一邊欣賞藍天白雲下嘅京都鐵塔及靚景，真爽！

店子午市套餐可選牛扒、壽喜燒、涮涮鍋、或油燒，價格以和牛級數而定。深知家人都怕極級和牛超強嘅油份，故小肥亦只為各人揀咗中間價位嘅「松」及「竹」。原本全部人都要點食同一款套餐架，好彩酒店成功爭取到四加五嘅組合，家人方才可以分批試壽喜燒及油燒京都牛，當真感激酒店及餐廳雙方都咁通情達理！

翻閱桌上嘅餐牌時，發現原來午市仲有個「最高的飯菜」之「極み」（一人前 10,260円）午餐，包齊五色冷盤、和牛頭盤、和牛壽司、特選壽喜燒、涮涮鍋、油燒、湯、飯及甜品。不過講真除咗肥肥家族三大壯漢可以食得哂整份「極み」之外，相信其他長輩都未必有能力一人食一份；嘻嘻，等下次再黎京都時先叫黎試試。

可能負責我地張枱位嬸嬸諗住溝通會有問題，起初佢都有少少冷淡，但之後聽到小弟可以簡單日語對答後，即變得好客得多。佢解釋話食物一般都會由食客自己燒煮，不過得知席上冇人有食油燒和牛嘅經驗，佢就好好心機地重複示範咗兩次，細心得很。並教路食油燒和牛有三種食法：第一種係原汁原味、第二種係點檸檬醬油、第三種就係XO仔誤以為係薯蓉嘅蘿蔔蓉混醬油；個人覺得第三種蘿蔔蓉混醬油清新解熱得最合襯。

午餐順序由前菜食起，指定項目有清脆嘅薯仔及鮮嫩嘅蟹肉沙律。「松」級套餐比「竹」級貴少少，所以前菜都多咗舊。。。惹味嘅燒和牛。

オイル焼き「松」（5,724円）：燒煮前，京都和牛色澤鮮紅，雲石紋理分明，油脂分布均勻，賣相超掂！嬸嬸教話以慢火燒至底部油份有聲出，邊邊位開始轉色，即可返轉燒埋第二面。小肥食牛一向越生越愛，意外地今次件五六成熟嘅油燒和牛肉質鬆爽，咬落更覺肉汁豐盛，肉香甜美，正爆！跟餐仲有一大盤色彩繽紛，新鮮爽脆，好睇又好食嘅蔬菜。另附清新醒胃嘅漬物及暖胃嘅白飯同麵豉湯。飯後再以一杯熱茶及爽甜嘅生果作結，腸胃確真大滿足。

好多謝超閃旅遊書咁好介紹，讓肥肥家族認識到「モリタ屋」，輕鬆舒適地初次品嚐到油燒京都和牛。餐店環境優雅有景睇，抽氣足，服務生友善，油燒京都和牛絕對貨真價實，食到長輩們都話要推薦俾親友，証明夠堅！

每次去日本濕平收穫都會好豐富。今次買得最盡興都應該係喺四条河原町「Sanrio Gallery Kyoto」血拼京都限量版XO仔同哈囉貓手信。購物完就行咗去隔離間星巴克咖啡屋「スターバックスコーヒー」（Starbucks Coffee），買咗杯節令紅莓特飲。

咖啡屋全球大部份嘅分店裝修佈局都差唔多，就連用上嘅餐桌椅櫈都係同一款式，唯一不同就係收銀處有個大螢幕顯示出賬單內容，不過唔係數目字就係日文，外國人絕對有機會睇唔明。

）：小肥初嚐之「紅莓白朱古力星冰樂」紅白嘅外表極富聖誕色彩，星冰樂香甜鮮美，頂面嘅紅莓脆脆清新醒神，就連忌廉都白滑過人，掂呀！

其實肥肥家族遊京都前，早一年嘅聖誕表妹舉家已經去過玩，所以小肥喺編排飲食行程前都好醒目地向佢索哂料。由於大家旅遊性質唔多同，表妹要照顧多位小朋友，而XO仔只需為一眾長輩們挑選美食，結果喺佢介紹幾間餐廳入面只能揀出潮派法國大餐「よねむら」（Yonemura）。

餐店為兩層高嘅獨立屋，門牌雖不太起眼，但只要有哥哥帶路就唔洗慌。步入正門，必先經過和風小花園。入到餐廳即變得洋化得多，四周圍都係木造嘅傢俬，光鮮涼爽。地下右方為吧枱，食客可邊食邊與廚師們互動一番。樓上廂房私人空間足，聽唔到樓下任何聲音，最緊要係有專人服務，絕對貼身稱心。

細佬啲日文屬有限公司，好彩有酒店代勞幫忙訂座，唔係相信都未必會聽得明九人嘅派對必須於廂房內進行。晚餐全權由大廚發辦，每位16,000円，並無他選。既然唔洗傷腦筋點食物，大家就應推介以日本清酒配潮派法國菜。。。冇錯，相中以白酒杯載住嘅係日本清酒，仲要係京都出品；嘻嘻，係咪碰杯都碰得潮過人呢？！

廚師除咗喺佳餚設計上花下心思之外，就連碗碟配套都一絲不茍。整套齊備嘅餐具都已擺放喺面前，各人更有自己嘅一小碗薄荷葉清水供洗手之用，衛生非常。

1)      Tomato & Pear Salad, topped w/ boiled lobster; Fig, young Japanese amberjack & raw ham; Toast topped with mussels & kelp：應建議逆時針方向由左邊起最淡嗰件食起：第一件龍蝦蕃茄沙律球清新潤甜；第二件無花果火腿鰤魚卷爽脆中滲出咸香；第三件昆布青口多士則香濃惹味，各有特色。

2)      Mushroom croquette topped the beef tongue stew w/ fennel sauce; Snapping turtle soup：以公雞靚碟承載嘅菜式原來一啲雞嘅成份都冇。右手邊嘅蘑菇炸球新鮮熱辣，外皮金黃香脆，芝士菇餡芳香味佳，頂面淋上腍滑嘅汁煮牛脷，組合新穎可口，再配上左手邊茶杯入面嘅擬鱷龜湯，更覺清甜暖胃。意外地，擬鱷龜湯一啲腥味都冇，唔講真係未必會估到係用龜所燉製。

3)      Steamed glutinous rice with crab：個人覺得此乃晚餐其中一個亮點。鮮蟹糯米飯不單有鮮橙美艷，幼嫩鮮甜嘅蟹肉及蟹籽擔當主角，就連小碗底層嘅配角蒸糯米飯都粒粒飽滿晶瑩，煙韌潤澤，堅掂！

4)      Gratin of Oyster：焗蠔肥美滑溜，厚潤鮮香。

5)      Meuniere of flounder with red wine & citrus pepper sauce & steak of turnip：潮派極都唔可以忘本，食法國大餐當然係要多舊魚啦，嘩卡卡！「よねむら」客奶油香煎比目魚可以稱得上為整頓晚餐最傳統嘅一味。比目魚白滑嘅魚肉鮮嫩無比，魚皮巧薄香脆，點上碟底嘅紅酒黑椒酸汁確真清新醒胃。

6)      Cold served pasta with surf clam, avocado, salmon roe & soft-boiled quail egg：西餐中嘅意粉通常都係熱食，今次師傅明顯係混入咗日式冷麵嘅構思製出凍食意粉。意大利粉麵條修長軟潤，師傅專登將色彩繽紛嘅食材，包括蜆肉、蕃茄、生洋蔥、紫菜絲、牛油果、及三文魚籽舖喺意粉面，再以小匙羮另上完隻流心鵪鶉蛋，好等貴客可自行混製意粉。XO仔可謂粗人一個，三兩吓手勢就成功撈起意粉！潮派海鮮撈起冷意粉集鮮香、濃郁、惹味、清新、爽脆、柔軟、潤滑於一身，口感味道豐富得黎毫不溜滯，超正！

7)      Wagyu beef steak with garlic peanut sauce：食過多味海鮮後，終於輪到靚靚和牛出場（細佬嗰份係走咗花生嘅，但賣相冇分別）。如相所示，三、四成熟嘅和牛色澤粉嫩紅潤，靚牛鬆軟得黎半溶於口中，每人三件份量剛剛好。

8)      Curry Rice：食和牛時加配一碗咖哩飯，效果醒神暖胃，真係估佢唔到會咁襯喎！

9)      Green perilla and blood orange sorbet：甜品環節前先有連隻杯都冰凍過人嘅雪葩，為味蕾洗滌一番。大家飲咗酒後其實都冇乜再點睇過個餐牌，所以見到杯中綠色嘅雪葩時個個都以為一定係綠茶味。。。點知食完第一啖，口腔卻洋溢著紫蘇香，之後再見到個底原來另有乾坤，藏著清新芳香嘅血橙味雪葩，方才搵返個餐牌對應一吓，發現橙綠組合係紫蘇味及血橙味雪葩。小肥才疏學淺，去到京都食法國餐先認識到「紫蘇」嘅英文乃「green perilla」，又上了一課。

10)  甜品兩部曲先有皮脆鬆軟嘅泡芙伴朱古力忌廉。

11)  生果拼盤食唔少，不過有邊個會諗到生果可以跟雪糕及朱古力醬以一隻西式透明玻璃碟上呢？！碟上嘅無花果及提子已起核，混入埋球雲尼拿雪糕及朱古力醬黎食，清甜涼快又潤滑，仲一啲都唔溜添，吃畢絕無罪惡感。

12)  一頓完整嘅法國餐以一杯特濃咖啡作結就最完美不過。

終於要踏上歸途，今次有少少趕，因為好多人排隊等過關，過完關高速買完手信後便已經要上機。

 
今次長榮航空是細機，所以無電影睇我安心瞓覺瞓到暈左，直到老公叫醒我食晚餐，雖說是晚餐，但份量似乎是太少了，只有一小盒清水，一小包零食糙米堡，和一份自制三文治，要自己將雞肉碎，芝士和生菜，夾在麵包中一齊食，頗有創意又出奇地好味，不過食完完全沒有飽肚感，幸好我隨身帶備不少零食，食完都算勉強夠飽，返到香港不用再去食宵夜。

食飽飽之後再出發去台北車站逛街，台北車站外觀樸素，但原來內裡十分寬敞又漂亮，最重要是可以逛超多的手信店和餐廳，手信和零食店的貨品很多款式亦非常吸引，但因為不想太多手提行李，所以決定留待機場才買手信，今次的目標鎖定為<八月堂>的牛角包作下午茶。

<八月堂>各款牛角包都極之吸睛，考慮了很久，終於決定買一個期間限定的蘋果味NT$56。

找個角落坐下便立刻享用蘋果牛角包，蘋果粒甜美多汁，甜度剛剛好，牛角包亦鬆脆充滿牛油香氣，只是小小一個份量太少了眨眼便食完，不過食完美味的甜品確實能令人心情特別愉快。

眨下眼就到行程最後一日實在好唔捨得走，今早安排試食<雙月食品社>，想不到在喜來登酒店附近，就有間米芝蓮推薦餐廳，如此方便當然要去一試。因為都預計會有勁多人幫襯，所以打算早些十一時在餐廳開店時便到達，哪知道在酒店房間內懶懶閒，都是要磨到十二時才能夠check out出門。

在喜來登酒店正門出發，轉右再轉右，走兩分鐘便來到<雙月食品社>，去到果然已是超多人排隊，店員會先派發菜單，讓客人點菜結帳後才安排入座。因為我只有一個人食量有限，雖然很多菜式尤其是滷味都想試，但還是不要貪心，只點了個油飯NT$35，和虱目魚皮蛤蜊湯NT$150。

買了單再等了一會才有位子，餐廳範圍不是太大，每張枱子都坐滿了客人。油飯很快便送上，飯粒軟糯煙靱，內裡加入不少菇粒和肉粒，剩食味道都不錯，只是略嫌不夠熱，早知道就點些滷味來送飯，因為我食完整碗飯，再等待了好一會兒，虱目魚皮蛤蜊湯才壓軸出場。

實在枉我的痴痴等待，因為這個湯確實是超清甜美味，這是我第一次食虱目魚，聽說這是台灣特產，虱目魚皮好香滑，啖啖都是油香又無骨，一點魚腥味也没有，蛤蜊細細粒但好鮮甜，大量的椰菜也令湯增添甜味，熱騰騰飲完簡直令人精神一振。

見客人越來越多於是我急急飲完湯便離開，哪知道有個店員追出來，說不好意思見我食得如此趕忙，送了杯檸檬愛玉給我喝，那一刻覺得好感動，深深感受到台灣人的人情味。檸檬愛玉底下有滑滑的啫喱口感很特別，味道酸酸甜甜的，十分清爽醒神，值得一試。

Shopping完後回酒店休息一陣，再會合老公，便出發前往<夏慕尼新香榭鐵板燒>。原本打算走路前往的，但訂位時酒店櫃檯職員話走路比較遠，建議我們坐捷運會較為省時，於是我們由善導寺站出發，在忠孝新生站轉車去古亭站，第一次買捷運車票感覺都很方便，車資NT$20也不是太貴，但應該正值繁忙時間超多人要迫上車，到古亭站再走路五分鐘左右，便到達<夏慕尼新香榭鐵板燒>。

我們六時到達，但餐廳已是半滿而且客人已在進食中，餐廳範圍非常寬敞，共有兩大張半月形的鐵板燒桌，每張可以坐十多個客人，我覺得坐位十分舒適，但老公有長腿就說雙膝經常被頂住，如果自命有長腿的人要留意啦。

剛打開餐牌，便有侍應走來詢問點什麼菜式，即使我們回答需要些時間考慮，仍不斷有人前來詢問，雖然語氣上尚算有禮貌，但對第一次幫襯的客人來說，其實頗有壓迫感。最後我們點左個二人套餐，另加一隻龍蝦。

點完菜麵包就隨即送上，這間餐廳的運作確實非常有效率。麵包温熱綿軟，帶淡淡的芝士焦香，我都是第一次用沙律醬同洋蔥粒點蘸麵包，想不到竟然是超級相夾又超美味，熱前菜是'松露蒸蛋及時令海鮮'，蒸蛋好幼滑,，但松露味得一啖眨眼消失，時令海鮮其實是涷蝦粒，蝦肉新鮮彈牙，我覺得醬汁反而是這道菜的亮點，帶清新的椰子香氣，十分美味可口，大大提升了蝦肉的鮮味。

套餐包任飲的蘋果汽水，對於我倆這類酒量甚低的人士非常適合，十分解渴又清爽開胃，和不同的菜式也相當配合。

湯類我們選了海鮮清湯和洋葱濃湯，兩款湯都各有特色，海鮮清湯的擺盤放上塊啫喱，看來很漂亮很有格調，再慢慢倒入熱清湯將其融化，清湯帶濃濃的蝦殼味，還有十分鮮甜的帶子和魚肉，非常有海洋的味道。洋蔥濃湯亦相當香濃，啖啖都是洋蔥的甜味，蘸滿濃湯的麵包更是美味可口。

松露百菇沙律，我見師傅將雜菌炒香後，再毫不吝嗇地加了一大匙松露醬，食落果然香氣四溢，相對上燻鴨沙律味道普通了一點，但所有菜蔬都很新鮮爽口。

中場有檸檬sorbet清清口腔，酸甜度剛剛好又冰凉，令人精神一振。

櫻花蝦炒飯很香口惹味，飯粒炒得粒粒分明，軟糯可口。

前主菜是三文魚、大蝦和帶子，三文魚煎得火侯剛好，皮脆肉嫩，但調味我覺得可以重一點，這樣更能帶出三文魚的鮮味，大蝦和帶子都不錯，外層煎得帶微微的焦香，肉質亦爽口彈牙。

主菜是羅西尼牛排和伊比利豬，羅西尼牛排，初時我還以為是特別品種的牛肉，原來那是菜式的名稱，是肥美的鵝肝配嫩滑的菲力牛排，口感嫩上加嫩，滑不溜口令人印象深刻，但實在吃不慣太生的牛肉，如果師傅在烹調時，能跟我們溝通一下食物的火候便會更加理想。

伊比利豬口感細緻，聽說因為是用橡果餵飼，所以完全沒有豬肉的羶味，配炸蒜脆片和櫻桃汁更是可口。

食完主菜已經是超飽，但因為加了隻龍蝦所以要繼續努力，龍蝦份量不是太大，但NT$499一隻實在是幾抵食，可選原味或加芝士汁，我覺得無添加更能突出龍蝦肉的鮮甜味。

隨後我們離開鐵板燒桌，移師另一位置繼續享用甜品和餐茶，甜品蜜瓜奶酪略為普通，阿爾薩斯蘋果塔更為出色，酸酸甜甜的蘋果肉，加上香甜幼滑的吉士達醬和酥脆的餅底，實在令人一口接一口食不停口。

餐茶點了錫蘭玫瑰紅茶，玫瑰和紅茶味道都是輕輕淡淡的，淡到差不多是嚐不到的地步，另外試了著名的台茶紅玉18號，茶味很特別，帶果香入口很香醇圓滑，給這一餐劃上完美的句號。

埋單NT$3827，都是HK$1000左右實在很抵食，食物味道和份量都是一流，如果在甜品和餐茶方面再加強一點就更是無懈可擊，不過上菜的速度對我來說，確實的急速了一點，實在沒想到在台灣吃飯還要快過香港，如果整個流程和氣氛能再輕鬆一些就更理想。

食完超飽老公提議行路回酒店，散步一下消耗卡路里，說地圖指示路程只不過是三十多分鐘，但我們中途經過一間Poya雜貨店，內裡貨品種類繁多價錢亦便宜，於是又喪買一輪，結果行左個多小時才返到酒店，行到腳都斷埋。

肥肥家族對「香港航空」情有獨鍾，今次同行嘅全為七旬長輩，為咗大家都可以舒舒服服，哥哥就訂購好較闊落嘅商務機位，諗住候機時可以佗佻地享用貴賓室嘅餐飲及設施，即使遇上延誤都唔洗太過狼狽或掃興。

記得上次仲去緊藏於地下室間「紫荊堂」貴賓室，真係估唔到航空公司可於三年內增設第二間貴賓室，仲升埋上樓，淨睇門面已覺樓底更高，面積更寬廣。唯一有少少失望就係見唔到「紫荊堂」嗰個懷舊磅重機。

如果唔係有哥哥介紹，XO仔根本唔會留意到兩間貴賓室嘅中英文名都完全唔一樣，新貴賓室「遨堂」其實係已拉丁文「Autus」起名，意味著「香港航空」正「豐盛成長」，故室內設計亦以此為題，四周可見不少鮮花綠葉作擺設，有意思極！光鮮光猛嘅貴賓室極富空間感，到處都有舒適嘅梳化椅櫈及用餐散座，人多都唔覺嘈吵或逼人。電腦區有多個差電插頭、幾部電腦及傳真打印機。小朋友仲可以揀坐彩色高櫈添，設備確真齊備。

室內嘅餐飲均為自助式，望落乾淨企理，衛生非常。餐具全擺放於中間嘅小涼亭內。飲品包冇酒精類嘅咖啡、茶、汽水、果汁及凍熱水。十八歲以上嘅旅客更可向酒保點選限定酒品，生啤都有三款揀架。早上十一點後連雞尾酒都出埋。由於當日遇上航班延誤，細佬同靚靚媽咪先可以飲多幾杯「遨堂」嘅招牌雞尾酒「Autus Delight Plus」。「Autus Delight Plus」滲透著荔枝嘅清甜及玫瑰嘅花香，很是清新。自助區內之食物中不乏大路嘅沙律、三文治、點心、炒麵、意粉、咖哩、甜品等。XO仔當然係主攻蝦餃同燒賣啦！喺機場食已預咗係叮叮點心，不過燒賣明顯比厚皮蝦餃美味，最正反而係潤滑而不太油膩嘅腸粉同煙韌爽脆嘅炒麵。

此外，廚房於不同時段都會提供幾款即叫即製嘅菜式。朝早六點到十一點有三款湯麵及煎蛋或炒蛋。個人推介熱辣辣嘅炒蛋，因炒蛋本身炒得好夠鮮黃香滑，加配埋菠菜、火腿、蘑菇則更為惹味豐富。碗榨菜肉絲米粉個湯底好清，米粉麵條唔會腍哂，加上榨菜肉絲夠味得黎又唔油膩，屬暖胃嘅輕食。廚房由早上十一點就換上另外五款湯麵，當中有辣有唔辣。最搶手就係貴賓室聞名中午十二點起先出嘅雞蛋仔！由於當真即叫即製，大家記緊要預十五至二十分鐘製作時間。辣手嘅雞蛋仔香脆無比，微甜輕巧，家人邊行去閘口，邊分黎食，一客話咁快就食哂，嘻嘻，下次一定要打孖黎叫！

以前離港，家人都唔會太早去機場，但最近身邊有親友因自己遲到而遇上不愉快事件，家中嘅長輩就變得更加謹慎，會預鬆多啲時間，橫掂買咗商務機票可以喺貴賓室享用免費餐飲及其他設施，等耐啲都冇妨。「香港航空」新增嘅「遨堂」貴賓室比起第一個貴賓室「紫荊堂」於各方面都明顯有所提升，真如其名般象徵著航空公司有所成長。「遨堂」環境開揚通爽，設施齊備，自助餐飲款式多，質量亦偏高，室內嘅服務生雖則年輕，但每位同樣友善客套，而且樂於助人，臨行前除咗順祝旅客有個愉快嘅旅程，亦不忘閒談兩句，問及各人對航空公司及貴賓室有否意見，這就是誠意！「香港航空」，肥肥家族支持你！

因為之前已經寫過幾次香港航空商務艙如何舒適、服務多麼貼身，故細佬在此都不想多費唇舌再次讚許。講真前幾次航空公司嘅膳食當真有啲參差，今次HX 618同上次一樣都係唔係咁掂。。。

素鵝卷真係好難食吓

嘅唐揚炸雞咁，肉質乾噌噌，非常恐怖！

詳盡地翻閱過旅遊書，方才得知於關西機場之二樓JR West站內可以優惠價3600円購買「JR Express Train HARUKA + ICOCA 卡」，包乘「HARUKA」列車前往京都市中心及鐵路儲值咭一張。「HARUKA」由關西機場往京都車站只需約76分鐘，相當快捷及舒適。哥哥所訂嘅酒店「Hotel Granvia Kyoto」就喺車站嘅樓上，路牌清晰，唔洗行出街又可以行得到，實在太方便了！

入夜後嘅京都街道上唔係太多人，反而沿路經過嘅所有餐廳都已滿座，唯一只有兩層高嘅「すき焼き炭火居酒屋 北斗」有位，眼見大家都餓到冇力再行，團長即決定一試。

八口子被安排入座樓上嘅合併式散座。話就話係包哂全層，因為當晚冇乜人幫襯，但埋位後想搵個店員都難，就連廚房仔同水吧都係吉嘅。不過搵到人都唔代表係好事，因明顯我地喺度阻住人家玩電話，應該都阻住埋佢收工嗰隻，其黑面及極不誠懇之態度可真係日本之最劣呀！

飲品餐牌共有四頁之多，除咗有大路嘅日式汽水、果汁、清酒等之外，當中仲有多款洋酒及雞尾酒可選。八頁食物餐牌附有彩圖，日英對照，簡單易明。

1)      小食（免費贈送）：等待廚房烹調晚餐時，先有巧薄脆脆嘅薯片送酒，真係冇諗到成晚最好食就係依碟免費送嘅薯片。

2)      牛すき特上盛り（一人前 2,290円）：全店均用上炭爐煮製壽喜燒，睇頭十足！雖然只係叫咗兩客一人份嘅壽喜燒，不過每人都有隻蛋黃鮮美嘅靚靚日本蛋。配料有廚房特選嘅蘋果蓉及解熱嘅蘿蔔汁。壽喜燒套餐包有一盒特上級「吟味重ねた國產上貨牛」（即和牛吧？！）及一盤雜菜。和牛主色鮮紅，但單睇紋理即覺油脂分佈唔得均勻，加上牛肉切得唔夠薄，煮熟咗後肉質偏韌難咬，唔得軟腍滑溜，長輩們要同牛牛做手術小肥亦冇話可說，實不能推介。成份餐最正常就係煙韌彈牙嘅烏冬，索哂啲壽喜燒汁則甜美可口。

3)      肉吸い仕立ての京風湯豆腐（790円）：以煲仔上嘅豆腐湯熱力十足，豆腐都好嫩滑，無奈湯底唔多夠味，頂面啲牛腩更加係集乾、嚡、厚、硬於一身，絕對食唔過。

4)      牛ステーキ大串（590円）：正當大家對壽喜燒及豆腐煲已大失所望時，食串燒時先知曉個壽喜燒其實算係店內好食嘅菜式，因為第一款牛扒大串燒韌到就連碗都可以咬崩嘅大肥爸爸都扯唔開，也太驚嚇了吧？！

5)      鶏もも大串（540円）：串燒雞肉雖則用上黑肉燒煮，食落都叫做有啲肉汁，不過可能雞肉較大件，啲肉就實咗啲，認真麻麻！

6)      豚バラ串（540円）：試埋豬排肉串燒，即可確認大廚燒功都幾九流吓，豬肉乾噌噌、嚡霎霎，真係後悔每款串燒都叫咗咁多條囉！

7)      山椒から揚げ（690円）：最後上嘅炸雞一樣唔多掂，但到咗依個地步小肥已再無餘力去彈啲餸菜。。。

食飽飽好滿足決定去逛街，由喜來登酒店正門出發，今次向左轉，見到一條掛滿台灣旗幟的天橋過馬路，再走一會便到達台北車站。

我先逛地下街的誠品書店，這間誠品規模一般，不過都見到好多不錯的小朋友繪本，包括一套教小朋友保護自己的書，在香港很難找到此類型的書而且還有七五折，另一本'海底100層樓的家'，是和家裡那本'地底100層樓的家'同一系列的，每層樓都有其獨特之處，每幅插畫亦非常可愛很有心思，結果我忍唔到手買了四大本書好重。之後行地下街的店舖無甚特別，貨品也不是太吸引，只是去到一間手信店，店員不斷殷勤地請我試食，見價錢也相宜NT$900任選六包，結果幫襯左拎到好重。

在地下街行行下突然聞到陣陣煎餅香氣，見到一間'忠將葱抓餅'門口不斷有人排隊，店員煎餅一塊接一塊無停手，實在令人心郁郁好想試。葱抓餅款式非常之多令人選擇困難，最後我點了其中一款熱銷中的'九層塔蛋'味。

因為頗多人幫襯加上即點即煎所以都等了好一會，於是我走進店內坐低慢慢等，過一陣煎餅以紙袋包好送上，剛剛煎好仍是熱騰騰的我要小心翼翼去吃，葱抓餅口感酥軟充滿層次感，內包著滿滿的餡料，包括一整隻煎蛋以及大量的九層塔，九層塔獨特的香氣提升了整塊煎餅的味道，令人一口接一口食不停口，只是煎餅份量都頗大，食完都有些飽滯的感覺，原本打算繼續掃街品嚐其他台灣小食的，但一塊葱抓餅巳完全KO了我的戰鬥力了。