入夜後嘅京都街道上唔係太多人，反而沿路經過嘅所有餐廳都已滿座，唯一只有兩層高嘅「すき焼き炭火居酒屋 北斗」有位，眼見大家都餓到冇力再行，團長即決定一試。

八口子被安排入座樓上嘅合併式散座。話就話係包哂全層，因為當晚冇乜人幫襯，但埋位後想搵個店員都難，就連廚房仔同水吧都係吉嘅。不過搵到人都唔代表係好事，因明顯我地喺度阻住人家玩電話，應該都阻住埋佢收工嗰隻，其黑面及極不誠懇之態度可真係日本之最劣呀！

飲品餐牌共有四頁之多，除咗有大路嘅日式汽水、果汁、清酒等之外，當中仲有多款洋酒及雞尾酒可選。八頁食物餐牌附有彩圖，日英對照，簡單易明。

1)      小食（免費贈送）：等待廚房烹調晚餐時，先有巧薄脆脆嘅薯片送酒，真係冇諗到成晚最好食就係依碟免費送嘅薯片。

2)      牛すき特上盛り（一人前 2,290円）：全店均用上炭爐煮製壽喜燒，睇頭十足！雖然只係叫咗兩客一人份嘅壽喜燒，不過每人都有隻蛋黃鮮美嘅靚靚日本蛋。配料有廚房特選嘅蘋果蓉及解熱嘅蘿蔔汁。壽喜燒套餐包有一盒特上級「吟味重ねた國產上貨牛」（即和牛吧？！）及一盤雜菜。和牛主色鮮紅，但單睇紋理即覺油脂分佈唔得均勻，加上牛肉切得唔夠薄，煮熟咗後肉質偏韌難咬，唔得軟腍滑溜，長輩們要同牛牛做手術小肥亦冇話可說，實不能推介。成份餐最正常就係煙韌彈牙嘅烏冬，索哂啲壽喜燒汁則甜美可口。

3)      肉吸い仕立ての京風湯豆腐（790円）：以煲仔上嘅豆腐湯熱力十足，豆腐都好嫩滑，無奈湯底唔多夠味，頂面啲牛腩更加係集乾、嚡、厚、硬於一身，絕對食唔過。

4)      牛ステーキ大串（590円）：正當大家對壽喜燒及豆腐煲已大失所望時，食串燒時先知曉個壽喜燒其實算係店內好食嘅菜式，因為第一款牛扒大串燒韌到就連碗都可以咬崩嘅大肥爸爸都扯唔開，也太驚嚇了吧？！

5)      鶏もも大串（540円）：串燒雞肉雖則用上黑肉燒煮，食落都叫做有啲肉汁，不過可能雞肉較大件，啲肉就實咗啲，認真麻麻！

6)      豚バラ串（540円）：試埋豬排肉串燒，即可確認大廚燒功都幾九流吓，豬肉乾噌噌、嚡霎霎，真係後悔每款串燒都叫咗咁多條囉！

7)      山椒から揚げ（690円）：最後上嘅炸雞一樣唔多掂，但到咗依個地步小肥已再無餘力去彈啲餸菜。。。