雖然有得任瞓到自然醒，但晨早七點幾都醒左，攤在床上磨到十點幾，如果不是開始肚餓，實在都想繼續宅在房間內。查看附近的餐廳，居然發現一間<温州大餛飩>，見到'餛飩'兩個字，我雙眼立刻變成心心眼，梳洗完畢便衝出去試食。

由喜來登酒店正門出發，轉右再轉右，未到達7-11之前，便已見到<蝦肉大餛飩>這幾個字，不過要經過店舖再回頭望，才正式見到<温州大餛飩>的招牌。

餐廳範圍不是太大，傳統小店模樣，剛開店我是第一個客人。菜單貼在牆壁上非常清晰，很多款餛飩我都想試，價錢也不是太貴，但我只有一個人食量有限，最後我點了'蛋黃肉大餛飩'和'豬皮凍'，補充一下天然膠原蛋白。

'蛋黄肉大餛飩'即點即煮很快便送上，'豬皮凍'原來是放在架上的其中一款涼菜，其實都有少許擔心衛生情況，希望我的腸胃能撑得住。

一碗大餛飩內裡有六，七隻很抵食，外型扁扁的很可愛，明明看來只包了一層薄餡，但食落皮薄又滿滿都是餡料，加入蛋黄後味道更是香口，湯底加入了紫菜，蛋絲和葱粒也很清甜。

'豬皮涷'味道不錯，完全沒有豬肉的羶味，口感滑滑彈牙的很特别，有些似咸味的蒟蒻，加上醋一起吃酸酸的另有一種風味，雖然我還是喜歡原味多一些。

埋單NT$110超級抵食又美味，如果有'四拼'，一次過讓我試匀全部四款餛飩那簡直就是完美。

今次公司安排我們住<台北喜來登大飯店> (Sheraton Grand Taipei Hotel)，到達酒店時已過半夜，酒店地點算是幾方便，一出<善導寺站>2號出口便立刻見到，而且行出正門轉右再轉右，更有間24小時營業的便利店可以買宵夜，走路前往台北車站和誠品也是10分鐘左右，位置都頗為方便。

房間內裡十分寬敞乾淨，應有的設施都有，但感覺不太貼心，例如燈掣的位置不夠就手，充電掣也不夠多，浴缸無浴簾其實用唔到花灑，另外淋浴間一開花灑就會漏水得非常厲害，我要用大量毛巾頂住湧出來的洗澡水，否則沖一陣涼厠所都會水浸，提供的淋浴用品也不是太合用。此外，窗外望見的只有街景，正正對著內政部警政署，景觀無甚特別。

不過Mini Bar有驚喜，茶包居然是我最喜愛的牌子<天仁茗茶>，用烏龍茶包沖出來的奶茶，竟然跟店裡的味道很近似，房間內各處亦放置了多支瓶裝水無限添飲，Welcome snacks<金雪絮餅>是酥餅化的鳥結糖，具鳥結糖濃濃的牛奶味，但沒有食完後那種黏牙的感覺，口感甘香酥軟，甜度又剛剛好，帶淡淡的紅棗香氣，味道非常有特色，絕對適合小朋友老人家甚至無牙的人，住客買還有八折，結果我幫襯買左兩盒回香港孝敬四大長老。

第二天有餘閒時間，決定去做下運動消耗台灣美食的卡路里，酒店泳池位於最頂層天台，沒有救生員，而且十月的天氣絕對不適合游水，寒風陣陣，涷到我騰騰震，不過我都堅持游左25min，我覺得自己實在是非常厲害。

第一次跟老公business trip，心情既興奮又緊張！之前其實都有好多類似的機會，但擔心自己一個去旅行唔知做咩好會悶，不過最近忙仔女的事情，實在忙到透不過氣來，所以決定放自己一個快閃假期輕鬆一下。只是出發前仍有許多事情心掛掛，Daniel B的小一報名面試仍在進行中，妹妹豬最近一兩星期夜晚又突然瞓得超差，晚晚半夜三更人狼般叫囂，都不知道新來的姐姐能否處理到，前一晚仲無啦啦膝蓋比蚊咬到腫哂，今日出門口前又唔見左串屋企門匙同車匙，好無奈都要放低一切煩惱出發去玩啦！

之前帶着兩個小朋友，起飛前兩個鐘頭到達機場都覺得時間不夠用，但今次剩得我同老公兩個，兩個鐘頭前到實在是太早了，加上班機又delay左，食完麥當勞餐再等到發哂霉至有得上機。

今次坐的是<長榮航空>，居然每個坐位都有電視，揀左套<蠟筆小新>電影，軟Q軟Q拳超搞笑，不過機程太短，未睇完就已經要落機。晚餐是兩件蛋糕加脆丸子，非常輕盈可口，當作宵夜剛剛好。倒茶時空姐會温柔軟語地提醒:<小心熱啊！>，作為女人，我聽到都覺得暈一暈，台灣女士的魅力實在厲害。

上次與家人訪台時，其中一間令長輩們留下美好及深刻印象嘅餐廳就係「邊田庄」，所以今次婚宴之旅結束前都想再度光顧。

闊別一年多，餐店仍用上美艷嘅鮮花裝飾，環境依然典雅華麗，衛生舒適。此外，年輕嘅服務生一樣溫婉好客，細心體貼。

眼見餐牌上嘅菜式冇變，就連價格都未有提升，XO仔就好放心地翻點之前覺得美味嘅鎮店佳餚，另加幾款青菜：

1)      芝麻牛蒡（NT 280）：唯一保持水準嘅芝麻牛蒡修長香脆，輕巧易入口。

2)      油淋去骨雞（NT 380）：第一次黎時，去骨雞明明以藤篩承載住，淋上嘅油都會慢慢滴落藤篩底嗰隻碟上，但今次卻換上平平無奇嘅白碟上，雖然旁邊都插有兩朵鮮花，但就少咗份田園味道，外表不及之前震撼，細佬因有比較下就覺得差咁啲野囉。如果唔理外表的話，平心而論，其實油淋去骨雞肉質仲係咁香嫩潤滑，食落惹味得黎一啲都唔油膩。

3)      豆酥鮮蚵豆腐（NT 280）：因自己對餸菜太有信心，所以未有拍下太多照片，包括依味豆腐在內，還望大家見諒。以熱鍋燒住上嘅豆酥鮮蚵豆腐夠就夠新鮮熱辣，但同上次比鮮蚵份量就明顯少咗，而且不再肥美。

4)      淮陽小籠湯包（NT 180/八隻）：小籠湯包依舊以木盒呈上，上枱時木邊可見蒸煮後留下嘅倒汗水。如相所示，細小嘅湯包皮層偏厚，入面唔多夠湯汁之餘，個豬肉餡心更略為嚡口同冇味，也太失敗了。

5)      紅燒獅子頭（NT 360）：以熱鍋上嘅紅燒獅子頭一客有四件。相中可隱約見到獅子頭呈深啡色，但係要食落先講得出獅子頭太瘦，因為用得唔夠肥豬肉就變得乾乾嚡嚡，不吃也吧！

6)      酥炸蒜香肥腸（NT 380）：酥炸肥腸擺盤同之前一樣，只係當對比新舊照片時就知份量少咗，面對通貨膨脹，人家將貨就價都好應該。問題係炸大腸雖則香口，但咬落質感偏韌，質量可謂大不如前。

7)      培根梨山高麗菜（NT240）：因為今次同行嘅家人都鍾意食菜，所以就點多咗幾款青菜，其中此味高麗菜色澤翠綠，入口清新爽脆，實屬正菜也！

8)      鹹蛋山苦瓜（NT 260）：黃金苦瓜喺香港就食得多，台灣版鹹蛋山苦瓜同港式黃金苦瓜最大不同之處就係個鹹蛋山原來係鹹蛋黃醬黎嘅，故效果較為輕巧。切成幼絲嘅苦瓜極之爽脆，混入鹹蛋黃醬食可真甘香味佳。

9)      雞汁娃娃菜（NT280）：滾住上嘅娃娃菜清甜軟腍，奶黃色嘅雞湯底香濃甜美且毫不油膩，盡顯簡單美！

10)  冰花楓糖露（免費贈送）：冰花楓糖露芳香潤喉，清涼微甜，雖免費贈送但都絕無欺場。

國泰航空設於桃園國際機場嘅貴賓室面積寬廣開揚，最重要係冷氣足，故極為舒適。貴賓室除咗有電腦室同梳化客廳之外，最受歡迎就係個自助餐廳區。

用餐區有多張合拼式及卡位散座，落單處旁仲有一列圍繞住開放式廚房嘅吧位。肥肥家族原本已有打算返港後先食晚餐，所以都係飲住等，後因螢幕顯示出航機一再延誤，見唔係太對路就去咗餐廳度邊食邊等，飲完奶茶再轉飲埋酒：

1)      Bubble Milk Tea：台灣出品嘅珍珠奶茶香滑清涼，冇得頂呀！

2)      燒賣：燒賣應該係即食貨式，雖然唔及平時飲茶嗰啲好食，不過就係個貴賓室入面最好食嘅點心，叫做可以頂得住。。。

3)      蕃茄蛋沙律三文治：三文治個包不單硬，而且仲勁乾同嚡，大肥爸爸連碗都咬得蹦，卻未能咬得爛個麵包，相信唔洗細佬多加形容啦！

4)      生煎包：淨睇相都應該估到個生煎包皮層厚硬，餡少且毫無肉汁，失敗過失敗！

5)      湯米粉：餐牌上唯一最好食就係碗米粉，因米粉幼嫩，湯底夠清，入面兩粒貢丸又大又惹味。

國泰航空商務艙嘅獨立座位闊落且空間感足，不過都係嗰句，機艙冷氣唔夠凍，夜機冇太陽曬住都一樣坐到出哂汗，幸好機上有靚香檳無限添飲，可助XO仔一解熱氣。

航班飛行時間只有個幾鐘，但都包咗份簡單嘅晚餐：

1)      麵包：餐包鬆就夠鬆，無奈質感又乾又嚡，塗上牛油都無補於事。

2)      巴馬火腿蜜瓜卷伴小龍蝦芥末馬鈴薯沙律：沙律看似鮮美清爽，可惜巴馬火腿食落淡而無味，除咗啲菜夠爽脆之外，其他乜都好嚡，食到細佬搖哂頭，唯有飲多兩杯自我安慰啦！

3)      塔香炒雞球配蛋炒飯及白菜：小肥可能唔識分辨芥蘭同菜心，但係都可以幾肯定餐碟上嗰條係小棠菜喎。。。「國泰」作為香港代表嘅航空公司，是否理應用返香港人熟悉嘅蔬菜名呢？！單憑相片都應該睇得出小棠菜乾噌噌，咬得真係好辛苦。主角塔香炒雞球惹味就夠惹味，不過啲雞肉好嚡，就連個蛋炒飯都乾硬過人，當真太令人失望了！

4)      香芒芝士蛋糕：甜品香芒芝士蛋糕微甜柔軟，係成份飛機餐中叫做最好味嘅一道。

早一日喺酒店「行政樓層貴賓廳」度食咗早餐，父母都話想試埋地下「明園西餐廳」個自助早餐，因據悉該處食物款式更多及更精。

去台灣玩，家人第一句都會話想食火鍋，上次同班姨媽食過美如藝術般嘅「寬X子」後，今次就決定一試潮流熱店「這一鍋皇室秘藏鍋物」。

人氣火鍋店最與別不同之處就係門面及室內裝修嘅設計都用上兵馬俑作題。正門有迷你水池及木橋，由兵馬俑守門真夠威嚴。推開重重嘅鐵門即見龍椅一張，更顯氣派。用餐大堂所有散座均為方形木造枱櫈，並以屏風隔開，中國風得黎清爽簡潔。四周有不少靚花擺設，感覺甚為雅致。最有古代感就係洗手間門外寫有「男」字及「女」字嘅布簾，認真搞鬼。

小肥早已托台灣女朋友訂座，一行九人到步即被安排入座廂房，餐桌上亦早已擺放好茶具。細心一看，方才留意到碗碟茶杯均為翠玉色系列，貴氣十足。每人一塊紅色嘅掛頸紙圍裙，衛生非常。細問下先知原來圍裙上嘅「呷嘎宋嘎」意思原來係「吃得很爽」；好，就睇吓食完會幾爽！

厚本餐牌頭幾頁先講解推廣優惠、靚鍋底賣點、幾篇火鍋傳說及鍋品食用秘訣。散點火鍋料項目全伴上彩圖對照，計埋大圖共有十二頁之多。消費指南及細則如最低消費額等，就列咗喺尾頁，有埋圖表夠哂清晰易明。

1)      老火湯（NT 110/人）：據餐牌所講，老火湯底以大豬骨、雞骨、豬後腿肉及多款中藥等精髓所燉製而成。奶色嘅老火湯肉味香濃，且傳出陣陣胡椒味，餐前先嚐一碗直令胃口大增。

2)      翡翠鮮蝦滑（NT 380）：因為港版蝦滑大多為灰色，所以當見到蝦滑如此皎潔雪白時真係有啲意外。煮熟咗嘅蝦滑爽脆彈牙，鮮甜可口。

3)      黑玉墨魚滑（NT228）：同白雪雪嘅蝦滑成對比嘅墨魚滑色澤真係黑得夠哂勻循，幸好咬落柔潤有彈性，是不錯之選。

4)      梅花豬肉（原價NT 268，拼埋「和牛梅花」則可以優惠價NT 10享用）：豬肉雖切成薄片，但個人覺得肉質都係偏嚡，如果唔係半送的話一定唔會叫黎食。

5)      雪花牛肉（NT 268）：砌到一朵花咁嘅雪花牛肉片從紋理睇講真唔多似雪花，色調又唔夠鮮明，食落唔夠軟滑亦冇乜肉香，請恕細佬未能推介。

6)      培根牛肉（NT 338）：據餐牌簡介所述，培根牛肉嘅油花分佈應最均勻，但如相所示，碟中嘅白色肥膏全積聚於一邊，個人覺得絕不均勻，煮熟咗亦屬嚡口之列，不吃也吧。

7)      極神仙牛肉（NT 488）：多款牛肉中只有兩款啱XO仔口味，其中極版神仙牛肉薄片掛於架上，以乾冰營造出仙氣，外觀最為震撼。神仙牛肉嘅雲石紋就真係表現出靚牛肉嘅油脂如何均勻，即煮即食半溶於口中，肉香軟腍，何其美妙！

8)      和牛梅花（NT 588）：第二款靚牛就係最薄巧嘅和牛梅花。和牛紅白嘅紋理同極神仙牛肉可謂不相伯仲，講真飲咗幾杯後，兩者質感如何不同已難以分辨，只係覺得好食就夠。

9)      松阪豬肉（NT 328）：松阪豬肉片疊成玫瑰花形，這個外表同之前喺「寬X子」食過嘅有八成相似，但「這一鍋」個版本就明顯少配咗個鮮蛋黃醬汁。可能係先入為主嘅關係啦，未黏上蛋黃嘅松阪豬肉雖則夠爽，但就欠缺咗份柔滑，有陣時菜式嘅靈魂就是隱藏在那一點點。。。

10)  鮮跳活蝦（NT 268）：小肥一向少食蝦蟹，尤其係當身處於異地時，不過見蝦隻當真係活生生咁喺隻碟上跳來跳去時就不得不拍下照片與大家分享。

11)  半殼扇貝（NT 368）：扇貝體積同彩圖一樣咁大隻，烚熟咗仍能保持爽厚嫩滑，正！

12)  青竹蚌（NT 268）：睇相已知青竹蚌其實即係蟶子。蟶子原條冰陣上枱，夠哂睇頭，可惜滾兩滾同滾耐啲蟶子都一樣咁韌，即使味道幾鮮，咬唔到已大打折扣。

13)  五彩鮮蔬盤（NT 198）：鮮綠色嘅蔬菜均新鮮爽脆，實屬正菜也！

14)  福氣粥（NT 100）：最後加NT 100即可加碗白飯由服務生以鍋底即煮香濃鮮甜嘅福氣粥。雖然九人只可每人分到一小碗，但靚粥極之暖胃，一小碗就已經夠哂。

15)  乳酪冰沙（免費贈送）：清涼嘅冰沙味道就好似益力多咁多甜微酸，飯後一小枝有助解熱消滯。

同為五迷嘅XO仔、哥哥同表妹每到台北都必定要一訪「STAYREAL」瘋狂掃貨，今次亦不例外。三口子襯婚禮前有少少空檔就去咗最近酒店間台北南西店逛逛。

嘅產品。嘩卡卡

，小肥買咗一大袋，店員即幫忙登記做會員，得知四月正正係細佬生日月份，更送上生日賀禮，小小心意確真暖在心頭，真係好想高歌一曲「最好的一天，最好的一天。。。」！

小表弟迎娶嬌妻，舅父特選於「台北國賓大飯店」擺酒大宴親朋。婚宴設於酒店十二樓之「樓外樓」宴會廳，環境高雅得很，四周以鮮花點綴，散發著芬芳及雅致。

除咗靚花擺設及菜譜之外，每席都有糖果及馬仔，寓意甜甜蜜蜜。每位賓客更有鳳梨酥及精美「囍」蜜糖帶回家，一同分享此份甜蜜喜悅。

晚宴共有十二道菜，確真豐富：

1)      和風龍蝦沙拉：以蕃茄墊底嘅沙律清新潤甜，喺面疊上爽脆嘅龍蝦及沙律醬，紅當當嘅組合好睇又好食。

2)      六喜碟：由服務生續一分配嘅潮派六味喜碟分別為雞件、薄餅捲蛋、炸蠔、銀杏、腐皮卷、及炒年糕，顏色鮮橙奪目，食落均香濃惹味。

3)      花好月圓：意頭咁好，餸名又靚嘅「花好月圓」原來係炸湯丸仔，煙煙韌韌都幾得意。

4)      珊瑚魚翅盅：嘩，魚翅每盅都咁大碗同咁足料，啲翅成梳喺湯面可謂睇頭十足，認真唔講得笑！靚翅厚而爽潤，湯底亦濃而不俗，正爆！

5)      麻醬鮮鮑：清蒸鮮鮑就食得多，以麻醬作鮮鮑嘅調味都係第一次食。鮑魚質感雖則軟腍，無奈麻醬嘅味道實在太搶，所以就唔係好食得出任何鮑魚嘅鮮甜味。

6)      掛爐烤雞：意外地，烤雞外表肥厚，但香脆嘅雞皮下並無太多脂肪，就連雞胸肉都一啲都唔嚡，肉質軟嫩可口。

7)      茄汁蝦球佐花卷：甜酸蝦球一人一大隻，體積絕對夠哂大體！咬落層炸皮鬆化乾脆，蝦身更加係爽厚潤甜，個個食到嗦嗦聲，冇得頂呀！

8)      清蒸老虎斑：老虎斑魚肉幼嫩滑溜，鮮味無窮。

9)      貝酥油飯：原來「貝酥」乃乾瑤柱個靚名，細佬又上咗一課。油飯粒粒晶瑩飽滿，油潤有光澤，伴上脆身惹味嘅貝酥猶如畫龍點睛，更上一層樓。

10)  鴛鴦美點：甜品環節家人都忙於拍大合照，小肥就襯排隊時不停偷食超級香口而且唔係太甜嘅紅豆薄罉。

每次外出旅遊，我都需要大量的安全感，一定要和老公形影不離，因此住温泉酒店，都一定要訂房內有温泉的。而＜浜千鳥の湯· 海舟＞我最欣賞的地方，就是有大量可以一齊浸的温泉，絕對可以滿足我喪浸温泉的願望。

參觀完＜千疊敷＞之後，我們換上輕鬆的浴衣去浸温泉，房內貼心地提供了一個小籃子，讓我們攜帶私人物品外出。大湯屋位於母屋旁邊，內裡有間休息室可以通往男/女大浴場，或是換上木屐落一大段樓梯前往室外温泉，樓梯非常濕滑，我又着不慣木屐要戰戰兢兢地行，感覺十分恐怖。

室外温泉包括三個私人風呂，以及最底層的混浴露天風呂。如果要浸私人風呂，就要先在休息室攞鎖匙，如果鎖匙不在的話，就代表該風呂正在使用中，黃昏時分大部分婆婆公公已經在進食晚餐，所以難得可以試哂三個私人風呂。

＜梅香の湯＞，＜石匠の湯＞和＜岩户の湯＞之中，最高的＜梅香の湯＞我覺得景觀是最靚的，而由於每次換風呂鎖匙都要上落濕滑樓梯一次，故試匀三個風呂之後，感覺都頗為疲累，再加上浸完溫泉，簡直有如跑馬拉松般虛脱。

所以每次路經休息室，我們都會食番條雪條叉叉電，有曲奇和波子汽水味，兩款都十分好味，實在好耐未試過可以坐定定地嘆食雪條。如果早上來浸温泉，更會另外有冰凍乳酸飲品任飲。

長長的樓梯途中會經過＜海路茶屋＞，我有入去八卦一下，但天開始黑感覺十分陰森，又好似有好多蚊蟲在飛舞，內裡亦沒什麼特別，故我只是望一望就高速離開。

而絕對不可以錯過的，當然是最對住個無敵海景浸的混浴温泉，在休息室和更衣室都有'雀鳥'圖片，講解如何穿着混浴的浴衣，十分有趣。其實所謂的浴衣，都只是一塊薄薄的布，勉強可以遮住重要部位，故上落温泉都要非常小心。幸好我們浸的時候，都不是有太多其他客人，有些時候甚至只有我倆獨佔整個浴池。

雖然當日下着雨看不到日落，但落住雨浸温泉亦好有氣氛，雨滴在上半身涼浸浸，下半身泡在温泉裡温度剛剛好，實在是舒服到唔捨得走。

入住「台北國賓大飯店」嘅行政房間除咗包咗樓下咖啡室嘅自助早餐券之外，其實亦可選擇去同層，即十一樓嘅「行政樓層貴賓廳」度食早餐。

。早餐供應時間為每朝早六點半至十點，座位任揀唔嬲，只係食咗成大半個鐘都未見有服務生經過就有啲奇怪。食物區有咖啡機

肥肥家族個個身形都有番咁上吓，尤其係大肥成二百幾磅，行得太多或企得太耐都容易攰，為咗大家搭台灣高鐵可以坐得安心又舒服，哥哥就決定訂哂商務車廂，有指定座位就唔洗怕要搵位同排隊。

嘅厚墊椅櫈都好舒適，每人仲包有蛋糕仔同飲品一杯，短短四十五分鐘車程可望出窗外欣賞景色，玩吓手提電話兼充埋電，亦可以短睡片刻，由台北去台中真係話咁快就到，方便得很。

三層高嘅「樂沐法式餐廳」猶如一座洋式別墅般，步入樓底高高嘅大堂，面對著接待處已感到餐店嘅氣派。核實訂座後，即由專人帶領往上層之用餐區域，貴客可選擇行樓梯或搭乘升降機。店子內外嘅燈飾、鮮花、擺設、傢俱等，包括洗手間都流露著華麗嘅格調。

同樣樓底極高嘅用餐大堂環境優雅，光線柔和，空間感足。小肥早於網上訂座時為家人從三個規範餐單「創造」、「感官」、「記憶」中選訂午餐，每款菜單均可加錢玩埋配酒。侍酒師不單加配日本清酒，更呈上店子自家品牌嘅香檳，就連紅酒都用上潮流新興嘅Coravin取酒器，可謂驚喜不斷。

搞掂好飲品，姐姐即送上兩款海藻味及海鹽味牛油，告知大家可先食用花瓶內修長嘅麵包條，食完佢地會陸續換上不同款式嘅自家製麵包，當中最正必選熱辣香醇惹味嘅高梁酒臘肉包及芳香微甜嘅蜂蜜麥包。

午餐由兩道節令下酒菜作序。第一味金光閃閃嘅「黃豆卷拼香草芝士球」中黃豆卷皮脆餡軟味淡，剛巧同濃味嘅香草芝士球造成對比，都幾得意。第二道「海鮮脆米通」鮮黃色嘅米通鬆化脆巧，連同米通上嘅帶子魚碎食落口即增添鮮嫩。

「感官」先由熱湯「鮮鵝肝/芥菜心/香草」接捧。上枱時，湯碗以一塊薄薄嘅鵝肝醬蓋上，再由服務生續一斟入清湯，鵝肝醬隨即溶化並為湯品揭盅，露出碗內其他湯料，賣相極之震撼吸睛。可能自己唔係太鍾意食菜啦，故對菜味極濃嘅清湯只可以用「苦」字黎形容，幸好鵝肝醬幫忙調和咗陣菜味，先變得易入口得多。

午餐第一款肉為顏色鮮美嘅雞翼組合「古早小母雞翅/甜蝦/番茄/酸黃瓜/香草蛋黃醬」，另配一小杯黑色嘅甜豆湯。已去骨嘅雞翼包住咗甜蝦同雞肉，皮脆肉爽嫩，輕輕點上色彩繽紛嘅香草蛋黃醬就好比畫龍點睛般同時提升視覺及味覺嘅享受，實在妙極！

接著嘅「緬因龍蝦/西班牙辣腸/香草青醬/覆盆子」色澤同樣鮮美，師傅以不同調味、醬汁、緬因龍蝦等食材重新砌成一幅立體嘅龍蝦食物圖，當真令人嘆為觀止！龍蝦肉爽脆彈牙，配上秘醬同時帶出花香、果甜及微辣，味道複雜得黎和諧新穎。

主菜上枱前，哥哥先以銀盤展出多把靚刀讓食客挑選，再將刀子安全地擺放於牙形嘅刀架上；「樂沐」嘅女主人明顯喺用餐所有細節都有花下不少心思。「感官」嘅主菜「嫩烤鵝肉/姬松茸/芥菜/米湯」雖外貌為最平凡嘅一道，味道卻絕不遜色之前道「緬因龍蝦」。汁液上枱時先會即場淋上，以確保新鮮度，碟上兩件鵝肉皮層香脆，肉質厚而鬆軟多汁，可以話係小弟至今食過最好味嘅鵝肉；伴碟嘅姬松茸則芳香惹味嫩脆，一樣咁出色！

甜品出場前先由清新爽甜嘅「香桃雪葩」為味蕾洗滌一番以作準備。套餐第一道甜品杯「可可清湯凍/焦糖蘋果塔雪酪」其實係朱古力味淡淡嘅啫喱拼果香甜甜嘅焦糖蘋果雪葩。而第二道紅黃鮮明且時代感極重嘅則為「現代主義之乳酪蛋糕」！餐牌上注明，芝士蛋糕嘅紅、白、黃網格外型構思源自荷蘭藝術家「彼埃•蒙德里安」（Piet Mondrian）及「密斯•凡德羅」（Mies van der Rohe）嘅「新造型主義」風格。極富立體感嘅芝士蛋糕微甜軟潤，輕巧不溜滯，放進口中就好似吞噬咗件藝術品般，認真搞鬼。

食到咁飽最好就係飲番杯飛沙走奶嘅特濃咖啡。跟餐茶及咖啡最後仲有的骰嘅「精緻小點」；每人都有兩粒，細細粒，容易食。黃色小球乃脆皮清涼嘅乳酪雪糕棒，而兩球中央嗰件則為巧薄爽脆嘅鳳梨塔，兩者均微微酸甜，毫不溜滯。

司機先生見距離列車離台中嘅時間仲有成個幾鐘頭，佢就好客氣咁提議四周圍兜吓，順便喺「如邑堂太陽餅」間旗鑑店度停留，介紹我地買台中最出名嘅得奬太陽餅做手信。

由於一早訂好車票，只要預多少少時間排隊攞飛就可以直接去月台等車。台中車站感覺上比台北車站大，但站內嘅小食店、報攤、及咖啡館就較集中，個人覺得好行啲，喺月台影列車都容易得多。一樣係坐咗九個字車就返回台北，簡易方便。

，不過週五傍晚遇上狂風大雨，交通擠塞也在所難免，冇計。

小表弟週六娶妻，舅父仔早一晚就招呼香港代表嘅親戚去佢家常幫襯嘅「嘟柏林鐵板燒餐廳」食半西半日又帶少少中嘅新潮鐵板料理。

餐店正門喺金漆招牌旁有盆靚靚嘅蘭花，高雅簡潔。十多人嘅派對安排於最入嘅廂房內進行。主人家早已訂好菜單，每個位置亦擺有齊備嘅西式餐具、醬汁及花生小食。

1)      蒜蓉包：可任添嘅蒜蓉包厚而鬆化，外脆內軟，香濃惹味。

2)      南瓜海鮮湯：鮮橙色嘅南瓜海鮮湯以大貝殼承載著，外表相當吸引。熱湯芳香輕巧，香滑而不溜滯，配搭新穎，效果討好。

3)      鱈魚：師傅即場喺貴客面前為雪白嘅鱈魚調味及半燒半蒸。熱辣辣嘅鱈魚鮮甜嫩滑，微微唧上青檸更添清新，實屬好魚也！

4)      燒蠔：講真自己都係第一次食鐵板式燒蠔，真係冇諗到可以燒至如此香口，薄薄嘅外皮脆巧嘅同時，蠔隻仍能保持肥潤，好有驚喜！

5)      芝士龍蝦：厚厚嘅龍蝦爽脆潤澤，鮮甜無比。

6)      梅子沙律：交接海陸主菜之時，姐姐先送上沙律一碗。梅子沙律清新醒胃，最正就係塊又甜又多汁嘅粟米，堅爽！

7)      牛扒：燒煮牛扒前，師傅先續一問及客人要求之生熟度，結果全場只有細佬一個要見紅嘅三、四成熟。牛扒均切成薄片，肉質鬆軟，且肉汁豐盛，簡單點上鹽同胡椒已夠美味。

8)      翡翠苗：鮮綠嘅翡翠苗幼嫩帶脆，無可挑剔。

9)      三色鮮果：三款水果一樣爽甜。

10)  芋蓉燒餅：鐵板燒餅脆薄輕巧，如要減少或增加芋蓉餡料份量，可直接跟師傅提出。

雖然仍是在下雨，房間亦是超舒服，但在床上碌了好一會，最後還是要爭取時間外出走走。

旅館附近都有不少景點，旁邊便是一個玫瑰園，有一大片盛開的玫瑰花，還有間溫室可以入去坐低慢慢賞花。

園內亦有個＜文殊足湯＞，當然要試浸一下暖下腳，一邊浸一邊欣賞四周園景，感覺十分懶洋洋不想離開，浸完對腳更是立刻滑不溜手。

穿過玫瑰園，行多一會便到達＜千疊敷＞，是白浜其中一個非常出名的景點，海邊的砂岩被海浪長時間侵蝕，形成一層層如千疊的榻榻米，十分壯觀，所以稱為＜千疊敷＞。

這裡也是和歌山一個著名欣賞日落的地點，可惜仍在落雨陰雲密佈睇唔到日落，而且雖然雨不算太大，但在海邊一直無遮無掩食左一大輪風，還是決定快快回旅館休息嘆温泉。

＜浜千鳥の湯· 海舟＞絕對是白浜其中一間，最著名又最豪華的温泉旅館。我們落巴士的時候，仍是下着毛毛細雨，還要拖着行走一大段路才到達室內;幸好走了一會，便有職員撑着雨傘前來幫拖。雖然只是毛毛雨，但由大阪落到白浜幾個鐘都没停過都好誇張，終於到達旅館總算令人鬆一口氣。

入到旅館居然要脫鞋，我又沒有穿襪子，要赤腳周圍走實在不太習慣。我們先被安置在Lobby等候check in，那兒有咖啡和南高梅汁任飲，梅汁清涼酸甜開胃，絕對是解渴之選，我飲左好多杯。

職員先講解旅館的環境和設施，旅館的範圍非常大，我們的房間位於波の抄3至5層的和洋室，跟著我們就要選擇晚飯的菜式和時間，我們揀了海鮮的＜紀州舟盛會席＞和19:45食晚宴，因為見到旅館內，大部分都是老公公和老婆婆，相信他們都比較喜歡早吃和早睡，遲一點吃應該可以避開這批老人家人潮。

拿到房間鎖匙立刻上房休息！我們的和洋室超大超舒適，還有無敵海景，可以一邊浸浴一邊欣賞，如果不是下著雨的話，景觀應該會更加漂亮，但因為旅館有太多其他更靚的温泉，結果房內這個居然是完全沒使用過。

房內的設施亦非常貼心，有welcome snacks和果子同兩粒勁酸的酸梅，還有瓶裝水，梅汁和自助抹茶，仲有部放濕機，以及梅の果實健康枕頭，不過實在太硬完全無興趣試。