Handsome XO
我是Handsome XO。 我最喜愛到日本旅遊 , 最鍾意遊覽主要地標, 住宿通常會揀4星酒店。
留言  留言給此旅遊家
  遊記數目 104
  上載相片 3530
  上載影片 3
最近分享過的旅程
2019瑪麗皇后二號郵輪八天遊
國家/地點: 新加坡, 越南
旅程日期: 2019-03-05 至 2019-03-12
2018台灣四天美食之旅
國家/地點: 台灣
旅程日期: 2018-11-23 至 2018-11-26
2018美加探親兩週遊
國家/地點: 加拿大, 美國
旅程日期: 2018-03-27 至 2018-04-07
2017京阪神六天遊
國家/地點: 日本
旅程日期: 2017-11-08 至 2017-11-13
2017台灣婚禮三天遊
國家/地點: 台灣
旅程日期: 2017-04-20 至 2017-04-23
2017溫馨家庭大阪四天遊
國家/地點: 日本
旅程日期: 2017-02-23 至 2017-02-26
東京豪食三日兩夜自由行
國家/地點: 日本
旅程日期: 2016-09-09 至 2016-09-11
2016鑽石公主郵輪東瀛遊
國家/地點: 日本, 俄羅斯
旅程日期: 2016-08-30 至 2016-09-09
2015台北怒食三天遊
國家/地點: 台灣
旅程日期: 2015-11-18 至 2015-11-21
2015北海道火車地鐡自遊五天行
國家/地點: 日本
旅程日期: 2015-10-21 至 2015-10-25
拉斯維加斯慶生之旅 (美國)
(旅程日期: 2011-04-17 至 2011-04-19 ,  旅程性質: 慶祝生日)
發表日期: 2011-06-02

為慶祝家中「迷你小霸王」XO仔既生日,哥哥同老豆一早就組定團,連同親愛既姨媽姨丈們一齊進攻美國賭城!拉斯維加斯又多show睇,又多街行,又多野食,又多野玩,真係連我依條大懶虫都唔捨得訓呀!

我地由落緊雪既多倫多出發,連轉機都要成八個鐘頭先到達熱到溶左既拉斯維加斯。一落機已經聽倒好響亮既老虎機聲,真係動聽啦!喺機場會合由洛杉磯飛上黎既auntie uncle們,我地就一齊去酒店check-in。各自梳洗過後,就去婆婆去親拉斯維加斯都一定要幫襯Picasso餐廳同XO仔食晚飯慶祝生
貴賓式待遇 笑臉2011-06-02
門口 + 衣櫃
門口 + 衣櫃
大牀
大牀
豪華浴室之洗手盆
豪華浴室之洗手盆
豪華浴室之廁所
豪華浴室之廁所
豪華浴室之花洒浴缸
豪華浴室之花洒浴缸
雪櫃,電視,書枱
雪櫃,電視,書枱

拉斯維加斯成日都有新酒店開幕,今次哥哥揀既Aria都係開左冇耐。因為Aria同幾間喺附近既酒店,包括好出名既Bellagio,係同一個老細開既,所以起既時候特別加建左條免費列車,方便客人通往各「姊妹酒店」。

停車處:

Aria既圓形停車處真係夠哂大,有成三四條lane,的士上落客做個不停;好在人手夠多,而且有系統,先唔會個個塞住哂。要讚既係D哥哥仔真係好抬得架,而且好有禮貌,有車黎就會自動自覺幫客人手,唔會懶洋洋等運到!

接待處:

酒店接待處都唔弱,counter都有成十個八個,效率絕對高過喺多倫多機場租車嗰D手指甲都有成三吋長既姐姐仔。我地總共九個人,五間房,經理都好友善地走過黎話可以搵幾個人黎幫我地搞,盡量做到我地唔洗等太耐,咁既服務態度真係好難得。

房間:

睇相都知間房樓面高,又夠闊落,香港有層咁大既樓我都已經心滿意足囉!淨係洗手間都分幾part,認真豪華!連兩張牀都大過人,哥哥話係Queen Size wor!衣櫃,夾萬,雪櫃,電視,應有盡有,而且又大又靚又現代化。喺張牀到都可以調教冷氣,燈光既光暗度,窗簾隙縫既大小等,依D高科技既操控亦非常簡易。望出窗個夜景都好剎食架,所以留喺間房都係一種享受。如果真係要雞蛋裡挑骨頭呢,只可以話個洗手間欠缺強勁既抽氣。

賭場:

對上一次黎賭城都已經係七年前既事啦。今次真係好似大鄉里出城咁,坐埋去個老虎機到先知道而家原來冇得入銀仔架啦,只可以用紙幣同電腦飛!以前簡單既777機都變哂種,架架機都有Bonus feature,玩完再玩先有機會中大奬。假如中左所謂既小jackpot,玩十次就冇哂架啦。講真嗰句,D機都好多元化,所以自己每晚玩到三四點都唔想返上房訓。

如果大家都好似我咁,食完飯,行完街,就拉幾個鐘頭機呢,小弟就建議大家入佢個Players Club攞分。因為每攞倒某個分數,你就會有回贈;好似我咁攞倒三千分重有免費buffet食添。

評分: 設備5   服務5   環境5   衛生5   抵住4
靚碟之一
靚碟之一
怕羞餐牌
怕羞餐牌
Poached Oysters
Poached Oysters
Fountains of Bellagio 水舞池
Fountains of Bellagio 水舞池
Sauteed Ruby Red Shrimp
Sauteed Ruby Red Shrimp
Roasted Milk-Fed Veal Chop
Roasted Milk-Fed Veal Chop
Warm Chocolate Fondant
Warm Chocolate Fondant
Les Petits Fours D'anniversaire
Les Petits Fours D'anniversaire

同我一樣係拉斯維加斯fans既婆婆,生前最愛Picasso餐廳,每次去親賭城都必定要去幫襯!為左令嘴刁既細佬有個難忘既生日,哥哥一早安排左喺依間全城最啱XO仔口味既法國餐廳到慶祝。XO可以一邊飲香檳,一邊欣賞Bellagio酒店既「水舞池」表演,一邊影相寫食評,真係high爆!所以借此機會想再一次多謝哂咁錫我既屋企人!

環境:

樓面夠高,所以餐廳面積雖然唔係好大,但係感覺好寬敞。柔和既燈光,牆上既油畫,加上周圍擺放既新鮮花朵,好有氣氛。坐近窗邊既朋友更可欣賞酒店馳名既「水舞池」噴水表演。

服務:

負責我地張枱既係一位比較年長既叔叔。佢非常之有耐性地等我地慢慢諗食乜,完全冇催促過;叫酒既時候亦好專業地提供客觀既意見。見我不停地影餐桌上不同既擺設同餐具時,友善既叔叔更解釋話佢地D碟共有四個唔同設計,重好客氣地幫我收集哂過黎,然後足一擺放喺我面前比我拍攝添,真係感激!

味道:

當晚既餐牌係好簡單既Prix Fixe,最適合我地依D大party;每人四個course,價錢都係USD 113,如果比佢配埋酒既就加USD 53。

Poached Oysters, Garnished with Osetra Caviar, Sauce Vermouth確認左係XO仔愛好之既Kumamoto,所以冇辦法唔叫。非常甜美既Kumamoto,配上魚子醬,同廚師既秘汁,意外地一D都唔咸,味道好香醇濃郁,非筆墨能形容既完美傑作!食得唔好嘥,環保既XO用麵包點埋剩低既秘汁,mmm…一流!講真四隻真係唔係幾夠口,不過少吃多滋味,多吃可能會好滯。秘汁推介一!

Foie Gras au Torchon, Pineapple and Port Reduction因為淨食鵝肝會好溜,所以法國餐多數都會用生果伴碟。今次既驚喜不在鵝肝,而係主配菜既菠蘿!媽咪話因為經糖烹調過,過程好似叫Caramelization,所以三角形既菠蘿可以咁甜脆無比,拼埋鵝肝依個組合,既新穎又精彩,大家一定要試!精彩推介二!

Roasted Milk-Fed Veal Chop, Rosemary Potatoes and Au Jus煮既時間掌握得好好,完全冇過熟,切開真係粉紅色,所以肉質冇老或變嚡,咬落重有肉汁滲出,一D都唔會乾,掂呀!主菜推介三!

Warm Chocolate Fondant原本係配Raspberry Ice-cream既,不過佢好好人,聽倒我話怕酸就幫我換左個Vanilla Ice-cream。嘩,連個甜品既外觀都咁有藝術味道,唔怪得知餐廳要用名畫家個名啦,有意思!心太軟果真係流心既,而且夠暖,味道唔會過甜,份量適中,parfait!甜品推介四!

生日版Les Petits Fours得知小弟生日,餐廳特別安排左份生日版既甜脆美點,真係非常感動!

每位女士走既時候都有份紀念品:原來係餐廳自製既蝴蝶餅。我攞左媽咪嗰盒一邊拉機一邊食;雖然厚左少少,不過都好脆,而且唔會太甜。

今年既生日願望係希望出年生日再返黎慶祝!

推介菜式: Poached Oysters,Foie Gras au Torchon,Roasted Milk-Fed Veal Chop,Warm Chocolate Fondant,Les Petits Fours
每人消費: 約200美元 (晚餐)
評分: 味道5   服務5   環境5   衛生5   抵食3
  0 個留言    |  加入你的留言
發表日期: 2011-06-07

早:
「爛賭二」九點未到已經落左去賭場拉機,希望中個大Jackpot請屋企人食餐勁既,可惜未有任何斬獲。

午:
之前喺多倫多編遊記度提及過XO仔同爸爸都有個「中餐肚」,去到邊都要搵中餐食,黎到拉斯維加斯都唔例外。我地當日既原定計劃係步行去以前有白老虎睇既Mirage酒店食麵做午餐。點知我地行左十五分鐘都唔夠,爸爸已經熱到頂唔順,重話唔好再行啦,求其見倒有中餐食就坐低啦!碰巧我地啱啱入左去Caesar Palace,睇地圖發現左有間叫Beijing Noodle No. 9既東西,所以就衝左入去。中國人應該好鍾意做一哥,No.1,先之啱架,何解今次會排第九呢?哈,食完個九流既午餐,我地終於明白哂啦!

我地食完麵,行左陣街,就返左去Aria度繼續拉機。雖然拉唔倒咩大Jackpot,不過因為XO同媽咪每人都拉夠三千分,所以Players Club送左四份喺酒店既自助餐比我地,算係贏返份安慰奬啦。

晚:
因為大家行街行到好攰啦,所以晚餐就留返喺自己間酒店既意大利餐廳Sirio Ristorante。大家既評語好一致,就係食物太咸!

九流 哭臉2011-06-07
北京玖號
北京玖號
眼都花
眼都花
開放式廚房
開放式廚房
營養不良既小籠包
營養不良既小籠包
肉絲炒麵
肉絲炒麵
北京雲吞麵
北京雲吞麵
蘭州牛肉拉麵
蘭州牛肉拉麵
鍋貼
鍋貼

食中餐既地方居然用九號黎起名,而且午飯時段都唔爆, bad sign #1。

環境衛生:O哂嘴

門口既開放式廚房有師傅喺度拉緊麵同包緊小籠包,好有鼎泰豐feel。入面有兩排落地魚缸,感覺係一個好誇張既風水陣!牆身同天花既設計睇到我依個後生仔眼都花埋,真係好唔舒服,未食都暈到想嘔,bad sign #2。睇得出佢地想「潮」,可惜效果出黎只得「俗」,失敗也!因為室內周圍都好白,所以好多污損既地方都變得好明顯,衛生分數大打折扣。

服務:

工作人員全部都係亞洲人。雖則冇話粗聲粗氣,或大力擺放碗碟,不過面口都算黑,服務態度絕對唔係友善嗰隻,問多兩句都嫌我地煩,bad sign #3。

味道:

茶係續杯叫,雖然唔會迫你叫,不過要成三蚊美金一杯!

肉絲炒麵USD 23.09):個麵係做得好脆,不過肉絲冇芡汁,整體變得好乾,而且味道好味精,食到口都乾哂。

蘭州拉麵(USD 16.09):喺門口見倒師傅拉麵,所以好捧場地叫左碗黎試下。份量真係少得可憐,一人一碗一定唔夠飽。雖然有湯,不過都可以覺得牛肉又硬又乾,真係劣呀!湯底重要充滿味精味,已經估倒其他湯麵都會係一樣。

紅燒牛肉刀削麵(USD 16.09):果然不出所料,湯底都係同一個味精味。刀削麵好長,可以肯定唔係用刀削既!紅燒牛肉比蘭州牛肉腍,不過都唔係好得去邊,大家只好繼續搖頭。

北京雲吞麵(USD 16.09):雲吞皮多過餡,肉質偏嚡,食哂都係因為唔想浪費食物。

小籠包(USD 12.09睇相都知D小籠包係超級營養不良啦!細隻唔係一個大問題,不過蒸得好乾,又唔夠餡,最劣既係層皮重厚過我塊面,真係後悔我地叫左三籠。

鍋貼(USD 10.09):上枱時感覺好似我地喺超市買嗰D咁,不過自己煎出黎都靚過佢;似乎「賣相唔得」係餐廳既商標。皮厚肉少,咬落一D肉汁都冇,唔掂!

蝦餃(USD 10.09):雖然大家都極力反對,但係爸爸堅決要叫黎試下。結果佢食完一舊冇聲出,面部表情已經解釋哂。

炒年糕(USD 16.09):雖然係油左少少,不過起碼冇炒到一pat pat,黐埋哂一齊。味道亦冇咁咸咁味精,成餐叫做好食D既一味。

雜費:因為我地人多,所以埋單時佢自動加左18% 小費(USD 29.19) + 稅( USD 13.14) = USD 42.33。

終結:依頓可以話係一餐九流既中餐,身為中國人食完都覺得冇哂face呀!
每人消費: 約24美元 (午餐)
評分: 味道1   服務2   環境2   衛生2   抵食1
咸! 哭臉2011-06-07
Calamari
Calamari
Pizza
Pizza
Yellowtail Tartare
Yellowtail Tartare
Linguine Vongole
Linguine Vongole
Veal Scaloppine
Veal Scaloppine
Veal Carpaccio
Veal Carpaccio
Roasted Lobster Tail
Roasted Lobster Tail
開放式廚房
開放式廚房

環境,衛生,服務:

餐廳裝修簡單,冇乜花巧既設計。燈光暗淡,只係開放式廚房嗰邊光返D。有少少奇怪既係高級西餐廳好少話餐桌係冇舖枱布既,感覺上冇咁衛生。侍應叔叔好似好攰咁,木無表情,態度好一般。

味道:

我地叫左幾款頭盤大家分,主菜就各自叫。

Frittura Mista - Deep-Fried Calamari, Bay Scallop, Shrimp, Seasonal Vegetables with Spicy Tomato Sauce:USD 22;西餐既炸物通常都唔及亞洲既炸物脆,因為佢地既材料唔夠乾身。Sirio其實都做得唔錯,起碼炸得唔油膩,只係味道咸左少少。

Tartara Di Ricciola – Yellowtail Tartare, Avocado, Artichokes, Asparagus Salad, Champagne Vinaigrette:USD 22;唯一唔夠味道既一款菜式,唔知係咪冇落鹽呢?雖然一D都唔腥,不過完全食唔倒魚既鮮甜味,而且比較乾,失望失望!

Carpaccio Di Vitello – Herb-Seared Veal Carpaccio, Truffle-Sherry Vinaigrette, Castelmagno Cheese, White Bread Croutons: USD 19;肉質好幼嫩,不過可能因為芝士既關係,所以整體味道變得咸,而且食落比較乾。

Linguine Con Le Vongole Veraci – Linguine Pasta with Manila Clams in White Wine Broth:USD 19/29;嘩,好咸呀!真係從未食過咁咸既蜆麵架,好似飲緊咸水咁。個麵條幾煙韌幾彈牙都冇用,因為個咸味用水沖都沖唔淡。

Scaloppine Di Vitello - Veal Scaloppine, Braised Sardinian Couscous and Wild Mushrooms, Marsala Sauce:USD 34;牛肉可以再切薄少少。味道繼續咸!而且個牛肉煮得過熟,肉質變嚡左,失敗哂。

可能早一晚既法國餐實在太精彩,所以相比之下,Sirio既意大利餐欠缺水準,我諗自己唔會再去幫襯囉。

每人消費: 約60美元 (晚餐)
評分: 味道2   服務2   環境4   衛生4   抵食2
  0 個留言    |  加入你的留言
發表日期: 2011-06-09

話咁快我地既拉斯維加斯long weekend就要結束lu。整個旅程最奇怪既係,平時返工剷極都唔起既XO,居然黎到賭城係每朝最早蒲頭既一個!離開嗰日都唔例外,因為十二點前要checkout,所以晨早八點梳洗完,交低D行李比哥哥,就把握時間繼續拉機。

哥哥幫我地打點好一切,中午就去左酒店入面既自助餐廳食Players Club請我地食既自助餐。食完飯,拉多陣機,我地就坐的士去機場,向洛杉磯進發。

一入門口就要比左錢先,好似每人要成廿幾蚊美金;都啱既,可以避免D人食霸王餐。雖然Players Club話請我地食buffet,原來我地要額外比18%既小費,所以低食分先被扣一分。

地方好大好闊落,又夠光猛,好似個大food court咁。唯一係人手唔夠,每區落單,攞野,執野,都係同一個人負責,所以我地叫飲品要等好耐,食完D碟又冇人收。

食物圍住餐廳既一邊,有壽司,刺身,cocktail shrimp,涷蟹,奄列,腸仔,清湯,忌廉湯,咖哩,炒飯,炒菜,炒麵,燒雞,roast beef,kimchi,蛋糕,雪糕,乜都有。因為全日都係食buffet,食物都好新鮮,味道OK啦。
每人消費: 約5美元 (午餐)
評分: 味道3   服務2   環境4   衛生3   抵食4
  0 個留言    |  加入你的留言