...必先勞其筋骨(坐咗成兩個鐘巴士先到), 磨其心志(坐著架無冷氣巴士搞到全身濕晒), 餓其體膚(由唔餓到微餓到好餓都仲未望見目的地).

孟子講這段話的時候, 肯定不是和飲食有關. 我亦從未想過食餐飯要咁長途跋涉. 提起荷香居, 我廣州不少親友都對它推崇備至.今晚的飯局正是由擁荷派發辦, 當然大力慫恿此店. 我們見這天時間充裕, 那就去吧.

無錯, 去荷香居是需要時間的, 尤其是當你並不住在芳村一帶. 以我們為例, 由親戚家出發搭巴士, 搖啊搖, 搖到了外婆橋都未搖到荷香居. 坐咗個幾兩個鐘後終於到達, 落車後還要穿過條鐵路才能一親荷香居芳澤--而這條鐵路是仍然有火車在行駛的.

餐廳內有個荷塘, 面積以市區來說算很大了. 但對於我這些在西湖感嘆過接天蓮葉無窮碧的人而言當然不怎麽看得上眼.

入到去, 抖順條氣, 抹抹汗, 跟住馬上開始叫野食(肚餓吖嘛). 這間是人氣極盛的店子,  有幾味拿手菜為免向隅, 請早預訂, 特別是招牌菜之首的蓮藕豬腩煲. 我們一氣訂了兩煲, 未上之前可說是萬眾期待, 因為早先已聽過無數人讚它有幾好味d蓮藕有幾粉.

好了, 蓮藕煲上枱. 先試一塊藕, 真的夠粉夠香, 店家還在藕孔中塞入開邊綠豆--這招很高明, 綿綿的綠豆再加上藕, 吃起來能令口感變得更粉. 豬腩就唔掂了, 一吃下去非常鞋烚烚, 又因為煮得太久, 肉味已經完全失去了. 既然煲了那麽長時間, 啖湯應該是濃郁香甜的吧? 又錯. 喝一口, 是沒有蓮藕香的, 連豬肉的鮮甜味都欠奉. 我不得不懷疑蓮藕和豬腩是分開煮好才放在煲內,  再淋上一勺所謂的"上湯"而成. 其實只要揀到枝靚蓮藕, 人人都隨時做得比這裏好, 至少啖湯會有蓮藕味. 這樣的招牌菜, 令人失望之極.

燒鵝也是這裏預訂為妙的另一名物. 呢味似番d樣, 皮脆, 肉質不霉. 問題是上枱時燒鵝不夠熱, 連微暖都稱不上, 令味道打了折扣. 老實講這種中等水準的燒鵝比比皆是, 一試固然無妨, 說是名物就未免誇大了.

薑蔥炒蟹也是極快售罄的一味. 基於價錢不貴, 我對蟹身瘦小蟹鮮又不足等缺點顯得比較寬容. 但炒得無鑊氣個芡又一pat pat咁就不能原諒了.　

落單時阿姐推介鯪魚滑釀芥蘭, 心想釀芥蘭咁巧手的菜式都有? 即管叫來試試. 上枱一看, 原來是白灼芥蘭上面擺了幾塊鯪魚滑, 這就是所謂的"釀"了. 鯪魚滑無甚魚味, 味道跟下面的芥蘭沒任何關連. 再加上那同樣無厘頭的蛋白芡, 就像三個搭枱的人一樣咁互不相幹.

鮑汁雜菌豆腐: 上菜才知道是玉子豆腐, 落單時阿姐又沒說清楚. 嗱, 我可不承認玉子豆腐=豆腐. 鮑汁只是個鹹味的汁, 也不會有人去研究裏面到底有沒有鮑魚成份. 這道菜平平無奇, 菇菌爽脆得來沒甚麼鮮味, 是吃了也沒印象的一味.

缽仔焗魚腸: 魚腸太少; 滷水掌翼: 不過不失, 是除燒鵝外比較好吃的一味.

還有兩味不記得了. 成餐飯沒一味特別出色, even他們的招牌菜. 有些甚至是水準以下. 唯一的優點是夠平, 十個人十個菜埋單只是四百幾. 如果你說這裏抵食, 同意, 沒異議. 之不過這裏並不是街坊飯堂, 乃是譽滿廣州的名店. 無論我的親友或網上評語都對它讚美得交關, 所讚者並非其價錢而是味道, 真有人攀山涉水遠道來吃的. 這種水準一般價錢實惠的餐廳通街都係, 不明白荷香居為何會一枝獨秀? 恕我不懂欣賞, 我不如慳番來囘四個鐘車程o係路口間酒樓食好過.