這天一早爬起床就摸去搭輕鐵, 當時還未發生溫州動車事件, 不然都不夠膽搭.

到達後朋友開車來接, 去這間棠記吃海鮮. 由輕鐵站開過來起碼用了大半個鐘, 轉入了一條田間小路後再開十幾分鐘才到. 迂回曲折, 但一路上私家車絡繹不絕, 因為沿路都是一間間建在水邊的海鮮餐廳, 人人趕住去搵食.

所有菜式都是由朋友發辦. 說是海鮮宴, 第一味上的卻是白灼河蝦. 因為位於鹹淡水交界處, 河鮮也同樣好正. 河蝦新鮮清甜, 我很喜歡河蝦那軟糯的口感.

白灼東風螺: 螺肉小小卻鮮甜無比. 我一人掃了差不多半碟.

紅炆鲃魚: 鲃魚是河豚的親戚, 肉質頗有韌性, 幾襟嚼下, 但又不是咬不動那種. 魚味濃而鮮甜, 唯一要挑剔的是個芡打得厚了點.

再來就是今餐的主角, 清蒸大大大水蟹是也! 我要強調個大字因為每只水蟹都有我塊面咁大. 輕輕咬開蟹殼後一隻水蟹可以流出大半碗蟹汁. 那蟹汁, 比我以往吃過的任何一種蟹都要鮮味得多. 吸一口, 那股鮮甜味會在霎時之間直竄上你個腦, 令人神魂顛倒. 水蟹的肉質頗削, 但肉地都幾豐滿, 有些還有不少蟹膏. 我吃了兩隻, 還打包了一隻回廣州做宵夜.

粉絲大蜆煲: 蜆極大隻厚肉, 鮮甜無沙. 下面吸收了蜆汁的粉絲更是精華所在. 我將蜆汁當湯, 飲咗好鬼大碗.

清炒南瓜苗: 我第一次知道原來南瓜的嫩莖可以吃. 南瓜苗本身沒有特殊味道, 吃的只是其爽脆的口感.

我跟中山的朋友笑說原來這裏的海鮮咁正, 其他不講, 單是那隻水蟹已經踏破鐵鞋無覓處. 睇怕以後要組個為食海鮮團, 每年上來三五七次了.

餐廳地址不詳, 只知道位處南朗鎮. 衛生程度也不錯, 假如你不去廁所的話.

 

食飽飽後朋友帶我們去一個果園摘生果. 可惜我不記得果園個名…入場要收費, 朋友幫我們搞掂晒, so唔知要幾貴. 在園內生果任吃, 帶走則要計錢.

我們去得不是時候, 很多生果如大樹菠蘿, 龍眼, 番石榴等都未熟. 火龍果本來有, 但之前來了個旅行團把所有火龍果狂風卷落葉式掃得一個不留, 只剩下青BB未熟的. 幾經辛苦才由眼利的朋友找到一個, 味道清甜, 不錯.

黃皮倒是有不少, 我好多年沒吃過黃皮因為以前吃的都很酸. 今次試了一個才發現如今的黃皮原來很甜, 一點酸味都沒有. 再就是杧果, 這裏的杧果品種一般, 甜度夠但香氣不足. 不過來果園玩吃是其次, 鍾意邊個摘邊個才是最大樂趣.

摘完生果, 去長輩家坐了一陣, 抱著長輩那超可愛的兩歲大孫女玩到人家嘴扁扁想喊, 一行人就拍拍屁股, 嘻嘻哈哈地啟程返廣州. 到達後我們直接去表哥茶餐廳吃晚飯, 這間連鎖餐廳是張堅庭開的, 是廣州比較高檔的港式茶餐廳, 一杯奶茶十幾蚊, 絕不算便宜.

如果沒記錯我們去的是烈士陵園旁的那間. 環境本來不錯, 裝修新凈, 樓底高. 不過枱擺得太密, 狹窄嘈雜之餘, 更間接逼我強行收聽後面枱九十後成餐飯的粗口直播, 非常影響食欲.

名物No.1: 當然是奶茶. 質地頗滑, 茶味偏濃, 稍微蓋過了奶味. 我自己就幾喜歡.

名物No.2: 奶醬多, 有心思地用煉奶寫上表哥二字. 多士頗鬆軟, 唔乾, 但就未至於好食到可稱為名物, 我在家裏也能做到同樣水準.

名物No.3: 雲吞麵. 雲吞裏的蝦肉不少, 可惜吃到其中一個雲吞的蝦肉霉霉地, 扣分. 麵淥得較腍, 也很合我的口味. 湯底也不錯, 蝦子下得足, 鮮香甘美.

試了少少阿妹的燒鵝拼墨魚飯. 墨魚無味, 燒鵝皮不脆, 肥膏望不到盡頭, 件件仲豐滿過楊貴妃. 最失敗是個飯, 粒粒都煮不透, 生心的.

阿妹還叫了個甜品. 嘩完全唔掂, 杧果汁帶酸, 生果不新鮮, 杏仁豆腐和涼粉尚可, 水晶涼粉簡直史上最強, 直情硬到可以掟穿地板. 

結論: 來這裏首選奶茶, 其次雲吞麵, 唔夠既話最多搭件多士. 其他的, 送都考慮下食定唔食. 拉勻嚟計都值得俾個OK既, 服務就麻麻過麻麻, D侍應人人滾水淥腳兼失魂.